Lanmou Bondié étèrnèl

1-2. Ki santiman an krétjen pé ni ?

IMAJINEN an bato an mitan an gwo siklòn. Sé vag-la ka malmennen bato-a, yo ka lévé-fésé’y. Si yo pa jété an lank, asiré-pa-pétèt sé vag-la ké mennen’y la yo lé. Sé sèlman an lank ki pé tjenbé bato-a, pou anpéché’y dérivé.

² Lè an gwo léprèv ka soukwé’w, ou pé ni lenprésion ou kon bato-tala. An kou ou bien, an kou ou pa bien. An jou, ou asiré Jéova enmen’w épi ka soutienn ou, épi lè landèmen, ou ni lenprésion i ladjé’w (Sòm 10:1 ; 13:1). An zanmi ka ba’w bèl ti pawòl pou konsolé’w, alò ou ka santi kòw bien pandan an tan (Pwo. 17:17 ; 25:11). Men apré, ou ka rikoumansé douté. Pétèt menm, ou ka pansé Jéova pa enmen’w ankò. Ki « lank » pé endé’w tjenbé lè’w anba an léprèv ? Kidonk, kisa ki pé ba’w lasirans épi endé’w kontinié kwè Jéova enmen’w épi ka soutienn ou ?

3. a) « Lanmou fidèl » Jéova, nou ka touvé adan Sòm 31:7 épi Sòm 136:1, sé kisa ? b) Poutji nou pé di Jéova sé pli bèl lègzanp lanmou fidèl ki ni ? (gadé zimaj-la osi).

³ Pou rété solid lè’w ka jwenn an léprèv, fòk ou sonjé Jéova ni an lanmou ki fidèl ba sèvitè’y (li Sòm 31:7 ; 136:1). « Lanmou fidèl » sé kisa ? Sé an lanmou ka sòti an fon tjè é ki étèrnèl. Lanmou-tala ka lianné 2 moun ansanm. Jéova sé pli bèl lègzanp lanmou fidèl ki ni. Pou vré, Labib-la ka di i « ka débòdé épi lanmou fidèl » (Ègz. 34:6, 7). I ka di osi ‘lanmou fidèl li ka débòdé pou tout moun ki ka kriyé’y’ (Sòm 86:5). Katjilé asou sa sa lé di : Jéova pa ka janmen ladjé sèvitè’y ki fidèl ! Si’w sonjé vérité-tala, sa ké tjenbé’w bien solid lè an léprèv ka vini soukwé’w (Sòm 23:4).

PA BLIYÉ KI LANMOU JÉOVA BA SÈVITÈ’Y SÉ AN VÉRITÉ FONDAL-NATAL

4. Ba yonn-dé vérité biblik fondal-natal, é èsplitjé poutji nou ka kwè sé vérité-tala.

⁴ Sonjé ki lanmou Jéova ba sèvitè’y sé an vérité fondal-natal, ké endé’w tjenbé anba an léprèv. Lè nou ka palé di an « vérité biblik fondal-natal », kisa sa lé di ba’w ? Pétèt sa ka fè’w sonjé sé prèmié vérité-a ou dékouvè adan Labib. Pa ègzanp, ou aprann non Bondié sé Jéova, Jézi sé Yich Bondié, moun mò pa sav ayen, épi talè, ké ni an paradi asou latè éti lézòm ké viv pou toujou (Sòm 83:18 ; Ékl. 9:5 ; Jan 3:16 ; Rév. 21:3, 4). Lè’w vini kwè sé vérité-tala, pèsonn pa té pé brennen lafwa’w. Poutji ? Pas ou sav yo apiyé asou prèv. Menm manniè-a, fòk sonjé lanmou Jéova ni ba nou, sé an vérité fondal-natal. Si’w fè sa, sa ké endé’w tiré an lèspri’w lidé-a ki Jéova pa ka wè sa’w ka viv, ouben pa ka sousié kòy di’w. Annou wè poutji nou ka di sa.

5. Èsplitjé ki manniè sa posib krazé fo ansèyman.

⁵ Lè’w koumansé étidié Labib, kisa ki endé’w rijété fo ansèyman ? Asiré, sa ki endé’w, sé lè’w konparé sa’w aprann adan rèlijion’w épi sa Labib ka ansénié. Imajinen : Ou té ka kwè Jézi sé Bondié tou-puisan an. Men lè’w étidié Bib-la, ou mandé kòw : « Ès ansèyman-tala vré ? » Ou rann kòw kont Labib ka montré an manniè klè, sa pa vré. Kidonk, ou ladjé fo ansèyman-tala, é ou mété kòw ka kwè vérité biblik tala : Jézi sé « prèmié kréyati adan tout lakréyasion », « sèl Yich-la Bondié fè » (Kol. 1:15 ; Jan 3:18). Alò pou vré, délè sé fo ansèyman-an, kon gwo batiman solid, difisil pou krazé (2 Kor. 10:4, 5). Men, aprézavwè ou rivé krazé sé batiman solid tala, asiré-pa-pétèt, ou pa viré adan (Fil. 3:13).

6. Poutji adan Sòm 136-la, nou ka jwenn « lanmou fidèl [Jéova] étèrnèl » tousa fwa ?

⁶ Pétèt ou ké ni pou suiv menm chimen-an si, lè’w anba an léprèv, ou ka douté Jéova enmen’w. Mandé kòw : « Ès man ka wè bagay-la bon manniè-a ? » Apré, konparé dout ou ni épi vèsé tèm awtik-tala : Sòm 136:1. Poutji Jéova ka di lanmou’y, sé an lanmou ki « fidèl » ? Poutji pawòl-tala « lanmou fidèl li étèrnèl », 26 fwa adan Sòm 136-la ? Kon nou ja wè, lanmou fidèl Jéova ba sèvitè’y, sé an vérité fondal-natal, kon tout vérité ki adan Bib-la ou rivé asèpté. Kidonk, si an tèt-ou, ba Jéova ou pa vo ayen épi ou pa mérité lanmou’y, asiré sa pa vré piès ! Jété lidé-tala an poubèl, menm manniè ou té ké jété nenpòt lansèyman ki pa annakò épi Labib !

7. Ba yonn-dé vèsé Labib ki ka ba nou lasirans Jéova enmen nou.

⁷ Anlo dòt vèsé Labib ka ba nou lasirans Jéova enmen nou. Pa ègzanp, Jézi di sé disip-li a : « Zòt ni plis valè pasé anlo ti sisi » (Mat. 10:31). É Jéova li menm di pèp-li : « Mwen ké ba’w lafòs. Wi, mwen kay endé’w ; asiré, mwen pé ké ladjé’w, mwen kay tjenbé’w épi lanmen dwèt mwen, pas mwen toujou ka fè sa ki jis » (Iza. 41:10). Sé pawòl-tala klè ! Jézi pa di : « Zòt sé pé ni plis valè. » É Jéova pa di : « Man sé pé endé’w. » Yo pito di « zòt ni plis valè » é « mwen kay endé’w ». Kidonk, si lè’w ka sibi an léprèv, ou ka douté Jéova enmen’w, vèsé konsaa pé endé’w santi kòw pli bien. Yo pé endé’w ni lasirans Jéova enmen’w. Pas sé pawòl-tala apiyé asou prèv. Si’w ka priyé Jéova parapòt a dout ou ni, é si’w ka bien réfléchi asou sé vèsé-tala, ou ké pé di a moman-tala sa ki matjé an 1 Jan 4:16 : ‘Man aprann konnèt lanmou-a Bondié ni ba mwen, épi kwè adan lanmou-tala.’

8. Sa’w pé fè si délè, ou ka douté Jéova enmen’w ?

⁸ Sa’w pé fè si, magré tousa, délè ou ka douté Jéova enmen’w ? Konparé sa’w ka risanti épi sa’w sav asou Jéova. Sa’w ka risanti pa osi solid ki an prèv. Pou vré, an prèv ni plis pwa. É nou ni laprèv Jéova enmen nou, pas sé sa Labib ka ansénié nou. Si nou pa ka kwè Jéova enmen nou, sé konsi nou pa ka kwè lè Labib ka di : « Bondié sé lanmou » (1 Jan 4:8).

MÉDITÉ ASOU LANMOU-A JÉOVA LI MENM NI BA’W

9-10. Adan ki kontèks Jézi di sé pawòl-tala : « Papa-a li menm enmen zòt épi anpil tandrès » ? (Jan 16:26, 27 ; gadé zimaj-la osi).

⁹ Nou pé aprann ankò plis asou lanmou Jéova, lè nou ka katjilé anlè sé pawòl-tala Jézi ba sé disip-li a : « Papa-a li menm enmen zòt épi anpil tandrès » (li Jan 16:26, 27). Jézi pa di yo sa jiskont pou yo santi kòyo bien. Kontèks-la ka pèwmèt nou konprann ki, a moman-tala, Jézi pa té ka palé sèlman di santiman sé disip-la. Men sa i té lé mété douvan : sé lapriyè.

¹⁰ Jézi té fini èsplitjé disip-li fòk yo té priyé an non’y (Jan 16:23, 24). Men, sa té enpòwtan yo té konprann fòk pa yo té priyé Jézi. Pou vré, konm yo té aprann konnèt li, épi i té vini zanmi-yo, pétèt yo té ké anvi i kouté lapriyè-yo apré rézirèksion’y. Yo té pé pansé ki, pas Jézi té sitèlman enmen yo, i té ké asèpté kouté yo, épi pòté lapriyè-yo ba Papa’y. Men Jézi fè yo konprann fòk pa yo té wè sa konsa. Poutji ? I èsplitjé yo : « Papa-a li menm enmen zòt épi anpil tandrès. » Sa Jézi di yo, sé an vérité fondal-natal asou lapriyè. Aprézan, sonjé sa sa lé di ba’w : Adan létid Labib-ou, ou aprann konnèt épi enmen Jézi (Jan 14:21). Men, kon sé disip 1^ié sièk-la, ou pé priyé Bondié épi konfians, pas ou sav ‘li menm enmen’w épi anpil tandrès’. Ou ka montré ou ni lafwa adan sé pawòl-tala chak fwa ou ka priyé Jéova (1 Jan 5:14).

SONJÉ KISA KA FÈ’W DOUTÉ

11. Poutji Satan té ké kontan si nou té ka pansé Jéova pa enmen nou ?

¹¹ Kisa ki pé fè nou kwè Jéova pa enmen nou ? Délè, dout-nou ka vini di Satan. Djab-la « ka chèché dévoré an moun », é i té ké tèlman kontan si nou té ka pansé Jéova pa enmen nou ! (1 Piè 5:8). Men lanmou Jéova fè’y ba nou ranson-an, é Satan té ké enmen fè nou kwè nou pa mérité ranson-tala (Ébré 2:9). Men ki moun ka genyen si nou ka douté Jéova enmen nou ? Satan ! É ki moun ka genyen si nou ka ladjé anba an léprèv ? Sé Satan ankò ! Satan lé fè nou kwè Jéova pa enmen nou, men sa pa vré piès ! Sé li Jéova pa enmen. Poutan, an « zatrap » i enmen sèvi anba-fèy, sé fè nou kwè sé nou Jéova pa enmen, é sé nou i ka kondané (Éfé. 6:11). Nou ké bien désidé ‘opozé kònou’ a Djab-la, si nou ka bien konprann sa i ka chèché fè (Jak 4:7).

12-13. Koumanniè péché-a pé fè nou kwè Jéova pa enmen nou ?

¹² Ni dòt bagay ankò ki pé fè nou douté Jéova enmen nou. Kisa ki pé dèyè sa ? Nou wè jou adan péché-a (Sòm 51:5 ; Wom. 5:12). Péché-a séparé lézòm di Kréyatè-yo. Péché-a osi bimen lèspri-yo, tjè-yo épi kò-yo.

¹³ Difèt nou wè jou adan péché-a, sa mété vié santiman an tjè-nou, kontèl : nou ka santi kònou koupab, nou entjèt, nou pè, épi nou wont. Sé sa nou ka risanti osi lè nou ka fè an péché. Sé vié santiman-tala ka viré osi, pas nou ka sonjé toulong adan ki sitiyasion nou yé. Pou vré, nou pa ni ayen a wè épi manniè Jéova té kréyé nou okoumansman (Wom. 8:20, 21). Avrédi, sé kon an loto ki ni an né krévé. I pé pa woulé bien konmifo. Menm manniè-a, palakòz péché-a, nou pé pa fonksionnen bien konmifo, kon Jéova té kréyé nou. Kidonk sa nòwmal ki délè nou ka douté i enmen nou. Lè sa ka rivé, annou sonjé ki Jéova sé « Bondié-a ki gran é ki èstwòdinè [...] é ki ka montré an lanmou fidèl ba moun ki enmen’y é ki ka obéyi koumandman’y » (Néy. 1:5).

14. Koumanniè ranson-an ka endé nou ni lasirans Jéova enmen nou ? (Women 5:8 ; gadé osi kad-la « Pran konsians péché-a pé kouyonnen nou »).

¹⁴ Sa pé rivé nou tout pansé nou pa mérité lanmou Jéova. É pou vré, nou pa mérité’y, é sé sa ka fè lanmou’y èstwòdinè. Nou pé pa genyen’y épi sa nou ka fè. Men ranson-an ka kouvè péché-nou, é si Jéova péyé’y, sé pas i enmen nou (1 Jan 4:10). Sonjé osi, ki Jézi vini anlè latè pou sové moun ki péchè, pa moun ki pawfé (li Women 5:8). Nou piès pa pawfé, é sé pa sa Jéova ka atann di nou. Si nou ka sonjé sa, nou pé ké kité sitiyasion-tala fè nou douté di lanmou Jéova (Wom. 7:24, 25).

CHWAZI RÉTÉ FIDÈL

15-16. Si nou rété fidèl a Jéova, ki lasirans nou pé ni, é poutji ? (2 Samièl 22:26).

¹⁵ Jéova lé nou pran bon désizion-an, i lé nou lianné épi’y (Dét. 30:19, 20). Si nou lianné épi Jéova, nou pé ni lasirans i ké fidèl épi nou (li 2 Samièl 22:26). É si nou ka rété fidèl, i ké endé nou, kisiswa sitiyasion-an nou ka jwenn.

¹⁶ Kon nou wè adan awtik-tala, nou pé ni lasirans Jéova enmen nou, é sa ka endé nou tjenbé anba léprèv nou pé jwenn. Nou sav i enmen nou é i ka soutienn nou, pas sé sa Labib ka ansénié. É si nou ka douté Jéova enmen nou, annou réfléchi asou sa nou sav ki vré, olié nou rété asou sa nou ka risanti. Wi, fòk nou ni konfians adan vérité fondal-natal tala : lanmou fidèl Jéova étèrnèl !