3. Kisa pou fè pou vini zanmi Jéova ?

Jéova enmen tout moun, men « i an tjè-koko épi moun ki dwèt » (Pwovèb 3:32). Pou vini zanmi Bondié, fòk goumen pou fè sa ki bien an zié’y, épi mété asou koté sa ki mal an zié’y. I ni moun ki ni lenprésion yo pé ké janmen sa fè tousa Jéova ka mandé, kisiswa lè i ka mandé fè sa ki bien, ouben rijété sa ki mal. Men Jéova ka konprann nou. I ka vini zanmi épi tout moun ki enmen’y poubon é ki ka fè tousa yo pé pou fè’y plézi (Sòm 147:11 ; Akt 10:34, 35).

Nou enmen lè zanmi-nou onnèt épi nou. Jéova lé zanmi’y onnèt épi’y tou. Men sa pa fasil onnèt adan an monn oti anlo moun pa onnèt. Ki bénéfis i ni di onnèt adan tout sitiyasion ?

1. Ki prèmié rézon nou ni di onnèt ?

Lè nou onnèt, nou ka montré Jéova nou enmen’y épi nou ka rèspèkté’y. Nou pa lé oubliyé Jéova ka wè tousa nou ka pansé épi tousa nou ka fè (Ébré 4:13). Lè nou désidé onnèt, i ka wè sa épi i ka kontan. Pawòl-li ka di : « Jéova rayi an moun ki ni pliziè chimen, men i an tjè-koko épi moun ki dwèt » (Pwovèb 3:32).

2. Koumanniè nou pé onnèt adan lavi-nou touléjou ?

Jéova ka di : « Fòk zòt di lavérité yonn ba lòt » (Zakari 8:16, 17). Sa sa lé di ? Lè nou ka palé épi lafanmi-nou, kolèg-nou, frè é sè-nou ouben sé lotorité-a, nou pa ka manti é nou pa ka ba enfòwmasion ki pa vré. An moun ki onnèt pa ka ni volè ni twonpé moun (li Pwovèb 24:28 épi Éfézien 4:28). É i ka ba Léta tousa i dwé’y (Women 13:5-7). Poutoudi, « nou lé ni an bon konduit adan tou sa nou ka fè » (Ébré 13:18).

3. Ki bénéfis nou ni lè nou onnèt ?

Si yo konnèt nou kon an moun ki onnèt, lézòt kèy fè nou konfians. Konsa nou ka endé tout moun santi kòyo an sékirité adan sanblé-a kon adan an fanmi éti tout moun enmen kòyo. Anplis, nou ni an konsians ki pwòp. Onnètté-nou pé osi « rann pli bèl lansèyman Bondié », é i pé ba moun ki pa ka fè pati lasanblé-a lanvi pratitjé, yo tou, vré ladorasion-an (Tit 2:10).

ANNOU PLI LWEN

4. Lonnètté ka fè Jéova plézi

Li Sòm 44:21 épi Malaki 3:16, épi diskité sé kèsion-tala :

• Dapré’w, poutji sa pa bon kwè ou pé séré lavérité ?

• Dapré’w, kisa Jéova ka risanti lè ou ka désidé di lavérité menm lè sa pa fasil ?

5. Fòk nou onnèt toulong

VIDÉWO : Sa ki ka favorizé lajwa : An bon konsians (2:32)

Li Ébré 13:18 épi diskité asou manniè ou pé onnèt...

• épi fanmi’w,

• adan travay-ou ouben lékòl,

• adan dòt sitiyasion.

6. Lonnètté égal bénéfis

Ou pé ni lenprésion, ki si ou onnèt, sé plis pwoblèm ou kay ni. Men anfinaldikont, sé méyè bagay ou pé fè. Li Sòm 34:12-16 épi diskité kèsion-tala :

• Ki manniè lonnètté’w ka rann lavi’w pli bèl ?

1. Lonnètté ka rann mariaj an mari épi madanm-li pli solid.

2. Lonnètté ka fè an patwon ni konfians adan anplwayé’y.

3. Lonnètté ka fè an sitwayen ni an bon répitasion douvan lé zotorité.

SA’W APRANN

Jéova lé zanmi’y onnèt adan tousa yo ka di épi tousa yo ka fè.

An ti viré gadé

• Adan ki diféran sitiyasion ou pé montré ou onnèt ?

• Poutji sa pa bon kwè nou pé séré lavérité ?

• Poutji ou lé onnèt toulong ?

TIBREN PLIS ANKÒ

Ki manniè lé paran pé aprann timanmay-yo lonnètté ?

Di lavérité (1:44)

Ki bénéfis i ni tjenn pawòl-ou ?

Tjenn pawòl-ou é ou kèy béni (9:09)

Gadé poutji fòk nou péyé lenpo-nou, menm si ba nou, yo ka mal sèvi lajan-an.

« Faut-il payer ses impôts ? » (La Tour de Garde, 1^ié sèptanm 2011)

Kisa ki pousé an nonm malonnèt vini onnèt ?

« J’ai découvert la miséricorde et le pardon de Jéhovah » (La Tour de Garde, 1^ié mé 2015)

2. Poutji sa enpòwtan ba Jéova ki nou bien chwazi zanmi-nou ?

Jéova pa zanmi nenpòt ki moun. « I an tjè-koko épi moun ki dwèt » (Pwovèb 3:32). Kisa Jéova kèy risanti si nou ka chwazi kanmarad ki pa ka sèvi’y ? Asiré sa ké an gwo falfrèt ba’y (li Jak 4:4). Okontrè, i kèy fiè si nou ka fè pati di zanmi’y, i kèy kontan si nou pa ka pran men épi mové kanmarad ankò, é si nou vini toupré’y épi toupré sa ki enmen’y ! (Sòm 15:1-4).