Ès monn-tala kèy bout ?

Pétèt zòt sav Bib-la ka palé di lafen monn-lan (1 Jan 2:17). Ès fòk nou konprann ki lézonm kay disparèt ? Ès asou latè-a pé kèy ni ayen, ès i pé kèy ni lavi anlè’y ankò piès, oben i kèy détwi toubonnman ?

RÉPONS BIB-LA ASOU SÉ 2 KÈSION-TALA SÉ NON !

**Sa ki pa kay disparèt**

LIMANITÉ

Sa Labib ka di : Bondié ‘pa kréyé latè-a pou ayen, mé i fè’y pou moun viv anlè’y’ (IZAYI 45:18).

PLANÈT-NOU

Sa Labib ka di : « An jénérasion ka pati é an jénérasion ka vini, men latè-a ka rété la pou tout tan » (ÉKLÉZIAS 1:4).

SA SA VÉ DI : Dapré Labib, latè-a pé kéy jen détwi é i kèy toujou abité. Alòs, kisa « lafen monn-lan » lé di ?

RÉFLÉCHI ASOU SA : Labib ka konparé lafen monn-lan épi an lévènman ki fèt antan Noé. Antan-tala, latè té « plen épi violans » (Jénèz 6:13). Noé, kant-a-li, té an nonm jis. Kidonk, Bondié sové Noé épi fanmi’y li, mé i détwi sé méchan-an épi an délij. Parapòt a lévènman-tala, Labib ka di : « Monn-lan a lépòk-tala détwi, lè i disparèt anba dlo » (2 Piè 3:6). Sé té lafen monn-tala. Men, kisa ki té détwi ? Pa latè-a, men moun méchan ki té ka viv asou latè-a. Donk, lè Labib ka palé di lafen monn-lan, i pa ka palé di dèstriksion planèt-la. I ka palé di moun méchan é tout enstitision yo mété an plas ki kay disparèt asou latè-a.

**Sa ki kay disparèt**

PWOBLÈM ÈK MÉCHANSTÉ

Sa Labib ka di : « Adan an ti-moman, pé ké ni méchan ankò ; ou kay chèché la yo té yé, mé yo pé ké la. Mé moun ki ni limilité, latè-a kèy ta-yo é yo kèy pwofité an bondans lapé » (SÒM 37:10, 11).

Lalis zimaj : 1) Moun ki baré fidji-yo, ka sòti di an magazen épi sa yo fini vòlè. 2) An boug ka ba an lòt boug an valiz plen lajan.

SA SA VÉ DI : Antan Noé, Délij-la pa fè méchansté disparèt pou toujou. Apré Délij-la, moun méchan viré rann lavi-a difisil ba tout moun. Mé talè, Bondié ké fini an fwa pou tout épi méchansté-a. Kon matjè sòm-lan té di, « pé ké ni méchan ankò ». Bondié ké fè méchansté disparèt épi wayòm-li, an gouvènman mondial ki an sièl, ki ké dirijé moun asou latè ki enmen lajistis.

RÉFLÉCHI ASOU SA : Ès sé moun-lan ki ka dirijé jòdi-a ké asèpté dominasion wayòm Bondié ? Labib ka montré yo pé ké asèpté sa. Yo ké aji an manniè sòt pas yo kont wayòm-tala (Sòm 2:2). Épi ki rézilta ? Wayòm Bondié kèy ranplasé tout gouvènman lézòm é « li-yonn kèy rété pou tout tan » (Danièl 2:44). Mé poutji dominasion lézòm dwé fini ?

Lafen dominasion lézòm : SA KI POU FÈT

Sa Labib ka di : « Sé pa nonm-lan ki ka maché ki pou désidé koté fòk i mété pié’y » (JÉRÉMI 10:23).

Moun ka maché douvan an masonn plen afich pou élèksion.

SA SA VÉ DI : Lézòm pa fèt pou dirijé kòyo yo menm. Yo pa ka rivé dirijé dòt moun é pòté solision ba pwoblèm-yo.

RÉFLÉCHI ASOU SA : Dapré sa lansiklopédi Britannica Academic rimatjé, i ka sanm piès gouvènman pa kapab « tiré lènmi monn-lan ka jwen kontèl, lanmizè, lafen, lamaladi, katastwòf natirèl épi ladjè ouben dòt kalté violans ». Awtik-la ka di anplis, dapré sèten moun, « sé sèlman an gouvènman mondial ki pé mennen an aksion éfikas kont sé fléwo-tala ». Sèlman, menm si tout gouvènman lézòm té ka lianné, sé moun enpawfé ki té kèy dirijé monn-lan, é yo pa kapab rézoud pwoblèm ki matjé pli wo. Sé sèlman wayòm Bondié ki kapab rézoud pwoblèm limanité an fwa pou tout.

Donk dapré Labib, lafen monn-lan, kivédi nonm méchan ki la jòdi-a, sé pa an lévènman moun ki bon pou pè. Sé plito an bagay nou présé wè pas vié monn an chinpongtong-tala pé ké la, mé nouvo monn èstwòdinè Bondié ké pran plas !

Ki tan sa kèy fèt ? Adan awtik-la ka vini apré, ou ké jwenn répons Labib-la.