• Wayòm Bondié sé kisa ?
    Viv an bèl lavi pou toujou ! (An létid Labib ki pé pwofité’w)

    • 7. Lwa wayòm Bondié pli bon pasé ta lézòm

      Sé gouvènman-an ka mété lwa pou pwotéjé sitwayen péyi-yo. Wayòm Bondié tou ni lwa sijé’y pou rèspèkté. Li 1 Korentjen 6:9-11 épi diskité sé kèsion-tala :

      • Dapré’w, lè tout moun kéy suiv lwa Bondiéa ki manniè monn-lan kèy yé ?

      • Dapré’w, ès sa rézonnab Jéova mandé moun ki lé viv anba Wayòm-li rèspèkté sé règ-tala ? Poutji ?

      • Kisa ka pèwmèt nou di moun ki ka suiv sé règ-tala pé chanjé ? (gadé vèsé 11-lan).

      An polisié ka fè sin an loto rété pou kité an manman épi tifi’y li épi an gran-moun travèsé lari-a.

      Sé gouvènman-an ka mété lwa pou pwotéjé sitwayen péyi-yo. Lwa wayòm Bondié tou la pou pwotéjé nou.

  • Kisa Labib ka di anlè lasèksialité ?
    Viv an bèl lavi pou toujou ! (An létid Labib ki pé pwofité’w)
    • Lison 41. An nonm épi an fanm ka tjenbé kòyo pa lanmen.

      LISON 41

      Kisa Labib ka di anlè lasèksialité ?

      Anlo moun jennen lè yo ka palé di sèksialité. Labib, kanta li, ka palé di sa franchman épi rèspé. Sa i ka di asou lasèksialité sé pou bien nou. Sa vré, Jéova sé Kréyatè-nou é i sav sa ki méyè ba nou. Lè nou ka montré nou dakò épi manniè wè Jéova asou lasèksialité, nou ka ba’y lonnè épi nou ni lèspwa viv pou toujou.

      1. Ki manniè Jéova ka wè lasèksialité ?

      Lasèksialité sé an kado Jéova ka ba moun mayé. Gras a kado-tala an nonm épi an fanm pé ni timanmay, men osi yo pé montré lanmou épi lafèksion yo ni yonn pou lòt. Adan an pasaj ki ka palé di rilasion sèksièl Labib-la ka di : « Pran plézi épi madanm jénès-ou » (Pwovèb 5:18, 19). Jéova lé an mari épi an madanm rété fidèl yonn a lòt é i pa lé yo konmèt piès adiltè (li Ébré 13:4).

      2. Épi ki konpòwtasion sèksièl Bondié pa dakò ?

      Labib ka di « sa ki ni konduit sèksièl ki pa pwòp [...] pé ké trapé wayòm Bondié » (1 Korentjen 6:9, 10). « Konduit sèksièl ki pa pwòp » sé an tradiksion mo grèk-la pornéïa. Sinifikasion mo-tala sé 1) rilasion sèksièla ant dé moun ki pa mayé, 2) rilasion sèksièl ant dé moun menm sèks é 3) rilasion sèksièl épi bèt. Tala ki ‘pa ka konmèt piès péché sèksièl’ ka trapé bienfé é i ka fè Jéova plézi (1 Tésalonisien 4:3).

      ANNOU PLI LWEN

      Annou wè ki manniè nou pé rété pwòp adan domenn lasèksialité é ki bienfé nou pé trapé.

      Jozèf ka kité rad li ba madanm Putifa é ka chapé kouri.

      3. Chapé kouri douvan tout kalté péché sèksièl

      Jozèf, an jenn boug ki rété fidèl douvan Bondié, té pou goumen pou gadé an bon konduit. Li Jénèz 39:1-12 épi diskité sé kèsion-tala :

      • Pou ki rézon Jozèf chapé kouri ? (gadé vèsé 9-la).

      • Ès ou ka pansé Jozèf fè bon chwa-a ? Poutji ?

      Koumanniè lé jenn pé fè kon Jozèf é chapé kouri douvan tout péché sèksièl ? Gadé VIDÉWO-a.

      VIDÉWO : Chapé kouri douvan tout péché sèksièl (5:06)

      Jéova ka mandé tout adoratè’y rijété tout kalté péché sèksièl. Li 1 Korentjen 6:18 épi diskité sé kèsion-tala :

      • Kisa ki pé mennen an moun fè an péché sèksièl ?

      • Kouman ou pé chapé kouri douvan tout péché sèksièl ?

      4. Ou pé rété fò douvan tantasion

      Rijété tantasion fè an péché sèksièl ka mandé bon éfò. Kisa ki sé pé rann konba-tala pli rèd ankò ? Gadé VIDÉWO-a épi diskité kèsion-an ka vini an.

      VIDÉWO : Tjilé douvan latantasion gras a létid Labib-la (3:02)

      • Kisa frè-a fè lè i wè konpòwtasion’y té ké mennen’y kònen madanm-li ?

      Délè, menm an moun ki enmen Bondié ka goumen pou tiré lidé ki pa pwòp an tèt-li. Kisa nou pé fè pou pa kité piès lidé ki pa pwòp pran rasin an lèspri-nou ? Li Filipien 4:8 épi diskité sé kèsion-tala :

      • Ki modèl bagay ki pou rété an lèspri-nou ?

      • Poutji li Labib épi kontinié travay rèd ba Jéova ka endé nou rété fò douvan tantasion ?

      5. Jéova mété règ pou bien-nou

      Jéova sav bien sa nou ni bizwen. I ka di nou sa pou fè pou gadé an bon konduit adan domenn sèksièl é ki bienfè sa ka pòté ba nou. Li Pwovèb 7:7-27 oben gadé VIDÉWO-a, épi diskité sé kèsion-an ka vini an.

      VIDÉWO : Fòk pa nou mantjé bon jijman (9:31)

      • Poutji jenn boug-la touvé kòy adan an sitiyasion ki danjéré ? (gadé Pwovèb 7:8, 9).

      • Dapré Pwovèb 7:23, 26, an mové konpòwtasion sèksièl pé mennen gwo déga. Anba ki pwoblèm nou ké chapé si nou ka gadé an bon konduit adan domenn sèksièl ?

      • Ki liannaj ki ni ant an bon konduit adan domenn sèksièl épi lèspwa viv pou toujou ?

      Ni moun ka pansé ki sa Labib ka di asou lomosèksialité two rèd. Men Jéova sé an Bondié lanmou. Sa i lé sé ki tout moun viv pou toujou. Men sèl bagay, fòk yo obéyi règ-li. Li 1 Korentjen 6:9-11 épi diskité kèsion-tala :

      • Ès lomosèksialité sé sèl konpòwtasion Bondié pa dakò ?

      Pou Bondié asèpté nou, nou tout pou fè dé chanjman. Ès sa vo lapenn ? Li Sòm 19:8, 11 épi diskité sé kèsion-tala :

      • Dapré’w, ès lwa moral Jéova rézonnab ? Poutji ou ka di sa ?

      Montaj : 1. An jenn fi ka fimen épi ka brè épi boug-li épi zanmi’y an bwèt. I tris é i pa ka djè anmizé kòy. 2. Menm fanm-tala adan an sal di Wayòm. I ka palé épi dòt sè épi i ni tjè kontan.

      Kon i fè ba anpil moun, Jéova pé endé’w chanjé.

      NI MOUN KA DI : « Dépi dé moun enmen, pa ni piès pwoblèm pou yo kouché ansanm. »

      • Sa’w té kèy di ?

      SA’W APRANN

      Lasèksialité sé an kado Jéova fè an nonm épi an madanm ki mayé.

      An ti viré gadé

      • Dapré Labib, an konpòwtasion sèksièl ki pa pwòp sé kisa ?

      • Kisa ki pé endé nou rijété tout modèl péché sèksièl ?

      • Ki bienfè nou ni lè nou ka obéyi lwa moral Jéova ?

      Sa man pou fè

      TIBREN PLIS ANKÒ

      Lè an nonm épi an fanm ka viv ansanm, poutji Bondié lé yo mayé ?

      « Kisa Labib ka di asou moun ka viv ansanm san yo mayé ? » (awtik jw.org)

      Poutji sa Labib ka di asou lomosèksialité sé pa menm bagay ki rayi moun omosèksièl ?

      « Ès lomosèksialité sé an mové bagay ? » (awtik jw.org)

      Poutji lwa Bondié asou lasèksialité sé an pwotèksion ?

      « Rilasion épi bouch ès sé rilasion sèksièl osi ? » (awtik jw.org)

      Sa ki mennen an omosèksièl chanjé manniè viv-li (pòtré « Ils ont respecté ma dignité »).

      « La Bible transforme des vies » (La Tour de Garde, 1ié avril 2011)

      a Rilasion sèksièl sé osi : rilasion sèksièl épi bouch, rilasion sèksièl pa fès, épi lè ou ka menyen sèks an moun pou èksité’y.

  • Kisa Labib ka di anlè bwè alkòl ?
    Viv an bèl lavi pou toujou ! (An létid Labib ki pé pwofité’w)
    • Lison 43. Boutèy labiè épi bwéson san alkòl anlè an tab pandan an lafèt.

      LISON 43

      Kisa Labib ka di anlè bwè alkòl ?

      Sé pa tout moun ki ni menm lidé anlè alkòl. I ni ki enmen bwè épi zanmi-yo tanzantan. Ni dòt ki préféré pa bwè piès. Ni dòt ankò, sé bwè yo ka bwè jiktan yo boulé. Kisa Labib-la ka di anlè alkòl ?

      1. Ès bwè alkòl sé an mové bagay ?

      Labib pa ka entèwdi bwè. Okontrè, i ka di « diven ka ba nonm tjè kontan », sé yonn adan tout sé kado-a Bondié fè lézòm (Sòm 104:14, 15). I ka menm di té ni sèvitè fidèl Jéova ki té ka bwè alkòl (1 Timoté 5:23).

      2. Ki konsèy Labib ka ba sé moun-lan ki désidé bwè ?

      Pou Jéova, sa pa bon bwè twòp, oben bwè pou boulé (Galat 5:21). Pawòl-li ka di : « Prangad pa touvé kòw an mitan moun ka bwè twòp diven » (Pwovèb 23:20). Kidonk, lè nou désidé bwè—menm lè nou tou sèl—nou pé kèy bwè jiktan nou pé pa réfléchi ankò, jiktan nou pé pa métrizé pawòl-nou épi aksion-nou, oben nou tonbé malad. É si nou pa ka rivé kontwolé kònou, sa té kèy mié ba nou arété bwè toubannman.

      3. Ki manniè nou ka montré nou ka rèspèkté désizion lézòt pran asou alkòl ?

      Sé chak moun ki ka désidé pou kòy. Alòs si an moun désidé bwè tibren, nou dwé rèspèkté chwa’y. É si an moun désidé i pa ka bwè, fòk pa nou ensisté (Women 14:10). É si nou sav, pas nou ka bwè, sa pé jennen moun, nou pa ka bwè (li Women 14:21). Nou ka chèché « non pa lavantaj-[nou], mé ta lòt-la » (li 1 Korentjen 10:23, 24).

      ANNOU PLI LWEN

      Annou wè yonn-dé prensip biblik ki ké endé’w désidé si’w ka bwè, é si’w désidé bwè, ki kantité ou kèy bwè. Annou wè osi sa’w pé fè si’w ka goumen épi an pwoblèm alkòl.

      4. Ès ou kèy bwè ?

      Ki manniè Jézi té ka wè zafè bwè alkòl ? Pou konnèt répons-lan, annou palé di prèmié mirak-la i fè. Li Jan 2:1-11 épi diskité sé kèsion-tala :

      • Kisa mirak-tala ka aprann nou anlè manniè Jézi ka wè alkòl-la épi moun ki ka bwè ?

      • Jézi pa ka entèwdi bwè. Kidonk, koumanniè an krétjen dwé konsidéré an moun ki désidé bwè ?

      Sa vré, Labib-la ka ba an krétjen lotorizasion bwè alkòl. Men sé pa adan tout sitiyasion sé an bon bagay bwè. Li Pwovèb 22:3 épi gadé koumannié ou sé pé aplitjé’y adan sé sitiyasion-tala :

      • Ou kèy kondui an loto oben ou kèy itilizé an machin.

      • Ou ansent.

      • An dòktè ka konséyé’w pa bwè.

      • Sa difisil ba’w pa bwè twòp.

      • Lalwa péyi-a ka entèwdi’w bwè.

      • Ou épi an moun ki désidé i pa ka bwè, pas avan i té ni pwoblèm alkòl.

      Ès ou kèy sèvi alkòl adan an fèt, kontèl an mariyaj ? Avan réponn kèsion-tala, gadé VIDÉWO-a.

      VIDÉWO : Ès man ké ba yo alkòl ? (2:41)

      Li Women 13:13 épi 1 Korentjen 10:31, 32. Apré lèkti chak vèsé, diskité kèsion-tala :

      • Koumanniè prensip-tala pé endé’w pran an désizion ki kèy fè Jéova plézi ?

      Adan an rèstoran, an frè ka rifizé diven. Sé dé sè-a ki épi’y, yo, yo ka bwè.

      Sé chak krétjen ki ké désidé si’y pou bwè. É menm si délè sa ka rivé i bwè, i ni dòt lè i ké chwazi pa bwè piès.

      5. Désidé ki kantité ou kèy bwè

      Lè ou désidé bwè, sonjé sa : Jéova pa ka entèwdi nou bwè, men i pa lé nou bwè twòp. Poutji ? Li Ozé 4:11, 18 épi diskité kèsion-tala :

      • Kisa ki pé rivé an moun ki ka bwè twòp ?

      Kisa ki pé endé nou pa bwè twòp ? Fòk nou konnèt limit-nou. Li Pwovèb 11:2 épi diskité kèsion-tala :

      • Poutji sa enpòwtan sav ki kantité alkòl ou désidé bwè alavans ?

      6. Koumanniè goumen kont an vié labitid bwè alkòl ?

      Pou wè sa ki endé an nonm genyen vié labitid-tala, gadé VIDÉWO-a. Apré diskité sé kèsion-an ka vini an.

      VIDÉWO : « Mwen pa té ka sipòté manniè mwen té ka viv ankò » (6:32)

      Montaj : Zimaj ki sòti adan vidéwo-a « Mwen pa té ka sipòté manniè mwen té ka viv ankò ». 1. Dmitry ka gadé an boutèy alkòl. 2. Dmitry, madanm-li épi fi’y li ka étidié Labib ansanm.

      • Kisa ki té ka rivé Dmitry lè i té ka bwè alkòl ?

      • Ès i rivé arété bwè lamenm ?

      • Kisa ki endé’y genyen an fwa pou tout vié labitid-tala ?

      Li 1 Korentjen 6:10, 11 épi diskité sé kèsion-tala :

      • Kisa Labib ka di anlè soulézon ?

      • Kisa ka montré an moun ki ni mové labitid bwè twòp pé chanjé ?

      Li Matié 5:30 épi diskité kèsion-tala :

      • Ti pawòl-tala « koupé lanmen’w » ka fè nou konprann fòk nou fè sakrifis pou fè Jéova plézi. Sa’w pé fè si’w ka goumen épi an pwoblèm alkòla ?

      Li 1 Korentjen 15:33 épi diskité kèsion-tala :

      • Kisa ki pé rivé’w si’w ka rété épi moun ki enmen bwè twòp ?

      AN MOUN SÉ PÉ MANDÉ’W : « Ès sé an mové bagay bwè alkòl ? »

      • Kisa ou té kèy réponn ?

      SA’W APRANN

      Jéova mété alkòl-la pou i ban nou tjè kontan, men i pa lé nou pran mové labitid bwè twòp oben bwè jiktan nou boulé.

      An ti viré gadé

      • Kisa Labib ka di anlè alkòl ?

      • Ki pwoblèm ou pé trapé si’w ka bwè twòp ?

      • Ki manniè nou pé rèspèkté désizion lézòt ka pran asou alkòl ?

      Sa man pou fè

      TIBREN PLIS ANKÒ

      Ki manniè an jenn-jan pé fè bon chwa an rapò épi alkòl-la ?

      Bwè ou pa : fè chwa pou pa ni déga ! (2:31)

      Dé-twa lidé ki pé endé an moun genyen pwoblèm i ni épi alkòl.

      « Quelle place l’alcool a-t-il dans votre vie ? » (La Tour de Garde, 1ié janvié 2010)

      Ès an krétjen pé lévé vè’y pou fè an vé ?

      « Questions des lecteurs » (La Tour de Garde, 15 févriyé 2007)

      Manniè an wonmié rivé genyen vié labitid-li (pòtré « J’étais une barrique sans fond »).

      « La Bible transforme des vies » (La Tour de Garde, 1ié mé 2012)

      a An moun ki lé fini épi vié labitid-li bwè, sé pé ni bizwen an èspésialis endé’y. Anplis, i ni anpil dòktè ki ka ankourajé moun ki té ni pwoblèm épi alkòl pa bwè piès ankò.

  • Kisa ki pé endé’w si ou fè an péché ki grav ?
    Viv an bèl lavi pou toujou ! (An létid Labib ki pé pwofité’w)

    • Menm si ou enmen Jéova anpil é ki ou ka fè éfò pou pa mété dlo an zié’y, délè ou kèy fè lérè. Men i ni péché ki pli grav ki dòt (1 Korentjen 6:9, 10). Si ou ka fè an péché ki grav, pa pansé Jéova pa enmen’w ankò. Toujou sonjé i paré padonnen’w épi endé’w.

      1. Sa pou fè pou bénéfisié padon Jéova ?

      Lè an moun ki enmen Jéova ka wouvè zié’y épi réyalizé i fè an péché ki grav i ka risanti an gwo lapenn. Men pwonmès-tala Jéova ka fè’y ka konsolé’y : « Menm si péché-zòt wouj, yo kèy viré vini blan kon lanèj » (Izayi 1:18). Si i ka ripanti kòy épi tout tjè’y, Jéova ka padonnen tousa i fè. Koumanniè nou ka ripanti kònou ? Nou ka rigrété tèlman sa nou fè, sa ka fè nou sispann fè sa ki mal épi sipliyé Jéova padonnen nou. Apré sa, nou ka fè tousa ki fo pou chanjé manniè wè-nou épi mové mès ki mennen nou adan péché-a, épi nou ka fè éfò pou viv silon lwa moral Jéova ki wo (li Izayi 55:6, 7).

      2. Koumanniè Jéova ka sèvi sé ansien-an pou endé an moun ki péché ?

      Jéova ka mandé an moun ki fè an péché grav : « Fòk i kriyé sé ansien lasanblé-a pou yo wè’y » (li Jak 5:14, 15). Sé ansien-an enmen Jéova épi tout sèvitè’y. Yo aprann ki manniè yo pé endé an moun ki péché pou i pé sa ritouvé bon rilasion épi Jéova (Galat 6:1).

      Koumanniè lé zansien ka endé an krétjen ki fè an péché grav ? Épi Labib-la, dézoutwa ansien ka èsplitjé’y poutji sa i fè a pa bon. Yo ka ba’y osi yonn-dé konsèy pratik pou i pa rikoumansé. Si an krétjen ki fè an péché grav pa ka ripanti kòy, sé ansien-an kèy tiré’y adan lasanblé-a pou pwotéjé sé frè é sè-a di mové lenfliyans-li.

      ANNOU PLI LWEN

      Annou wè koumanniè Jéova ka endé nou lè nou fè an péché grav épi ki manniè nou pé montré’y plis rikonésans pou sa.

      3. Konfésé kòw kèy pèwmèt ou viré vini zanmi Jéova

      Lè nou ka péché, nou ka fann tjè Jéova. Kidonk, fòk nou dévwalé sa nou fè ba Jéova. Li Sòm 32:1-5 épi diskité kèsion-tala :

      • Poutji fòk nou di Jéova sa nou fè pito ki séré ?

      Pou nou santi kònou bien, nou bizwen konfésé péché-nou ba Jéova épi osi mandé sé ansien-an endé nou. Gadé VIDÉWO-a épi diskité kèsion-an ka vini an.

      VIDÉWO : « Jéova ka korijé moun i enmen » (3:01)

      • Koumanniè sé ansien-an endé Canon rivini a Jéova ?

      Nou pou onnèt épi sé ansien-an ; yo la pou endé nou. Li Jak 5:16 épi diskité kèsion-tala :

      • Poutji sa pli fasil ba sé ansien-an endé nou si nou onnèt épi yo ?

      Montaj : 1. An frè ki ni gwo-tjè ka tjenbé tèt-li adan lanmen’y. 2. Frè-a ka prédié Jéova. 3. Frè-a ka téléfònen an ansien pou èsplitjé’y sitiyasion’y. 4. Frè-a ka palé épi 3 zansien. 5. Frè-a ka ri, pas i ritouvé an konsians ki pwòp.

      Fòk ou konfésé péché’w, onnèt épi lé zansien épi asèpté Jéova endé’w.

      4. Jéova plen konpasion ba sé péchè-a

      Lè an moun ka fè an péché grav épi i ka rifizé suiv lwa Jéova, yo ka tiré’y adan lasanblé-a épi nou pa ka frékanté’y. Li 1 Korentjen 5:6, 11, épi diskité sé kèsion-tala :

      • Kisa ka pasé lè ou ka mété lèvi adan an pat pou fè pen ? Ki lenfliyans an moun ki péché épi ki pa ka ripanti kòy pé ni asou lasanblé-a ?

      Lè sé ansien-an ka fè tousa yo pé pou endé sé moun-lan yo tiré adan lasanblé-a, yo ka imité konpasion Jéova ba sé péchè-a. Pétèt sa fè yo mal lè yo tiré yo adan lasanblé-a, men sa endé yo ritouvé larézon (Sòm 141:5).

      Jéova rézonnab, plen konpasion épi plen lanmou. Ki manniè i ka montré sa épi sé péchè-a ?

      5. Jéova ka padonnen péchè-a ki ka ripanti

      Épi an ègzanp, Jézi èsplitjé sa Jéova ka risanti lè an moun ka ripanti kòy. Li Lik 15:1-7 épi diskité kèsion-tala :

      • Kisa lègzanp-tala ka aprann nou anlè Jéova ?

      Li Ézékièl 33:11 épi diskité kèsion-tala :

      • Koumanniè nou pé wè ki an moun ripanti kòy poudibon ?

      An bèrjé ka bandé épi anpil tandrès pat an brèbi ki blésé.

      Kon an bèrjé, Jéova ka sousié kòy anpil di sé brèbi’y la.

      NI MOUN KA DI : « Si man di sé ansien-an sa man fè, yo kèy tiré mwen adan lasanblé-a. »

      • Sa ou té kèy réponn an moun ka pansé konsa ?

      SA’W APRANN

      Si nou fè an péché ki grav, men ki nou ka rigrété épi tout tjè-nou é ki nou bien désidé sispann fè sa ki mal, Jéova kèy padonnen nou.

      An ti viré gadé

      • Poutji sa bon konfésé péché-nou ba Jéova ?

      • Kisa nou pou fè pou péché-nou padonnen ?

      • Si nou fè an péché ki grav, poutji fòk nou mandé sé ansien-an endé nou ?

      Sa man pou fè

      TIBREN PLIS ANKÒ

      Listwa an nonm ki bénéfisié mizérikòd Jéova kon nou ka li an Izayi 1:18.

      Pa jen douté Jéova ka padonnen (5:02)

      Wè ki manniè sé ansien-an ka fè tousa yo pé pou endé an moun ki fè an péché grav.

      « Sé ansien-an ka montré lanmou épi lanmizérikòd ba moun ki péché » (Tou di Gad-la, out 2024)

      Gadé ki manniè yo ka montré lanmou épi konpasion pou péchè ki ka ripanti kòyo.

      « Koumanniè sé ansien-an ka fè pou endé an moun yo tiré adan sanblé-a » (Tou di Gad-la, out 2024)

      Listwa an nonm ki té kité lavérité men Jéova viré mennen’y obò’y (pòtré « Il fallait que je revienne vers Jéhovah »).

      « La Bible transforme des vies » (La Tour de Garde, 1ié avril 2012)