-
Kisa Labib ka di anlè lasèksialité ?Viv an bèl lavi pou toujou ! (An létid Labib ki pé pwofité’w)
-
-
LISON 41
Kisa Labib ka di anlè lasèksialité ?
Anlo moun jennen lè yo ka palé di sèksialité. Labib, kanta li, ka palé di sa franchman épi rèspé. Sa i ka di asou lasèksialité sé pou bien nou. Sa vré, Jéova sé Kréyatè-nou é i sav sa ki méyè ba nou. Lè nou ka montré nou dakò épi manniè wè Jéova asou lasèksialité, nou ka ba’y lonnè épi nou ni lèspwa viv pou toujou.
1. Ki manniè Jéova ka wè lasèksialité ?
Lasèksialité sé an kado Jéova ka ba moun mayé. Gras a kado-tala an nonm épi an fanm pé ni timanmay, men osi yo pé montré lanmou épi lafèksion yo ni yonn pou lòt. Adan an pasaj ki ka palé di rilasion sèksièl Labib-la ka di : « Pran plézi épi madanm jénès-ou » (Pwovèb 5:18, 19). Jéova lé an mari épi an madanm rété fidèl yonn a lòt é i pa lé yo konmèt piès adiltè (li Ébré 13:4).
2. Épi ki konpòwtasion sèksièl Bondié pa dakò ?
Labib ka di « sa ki ni konduit sèksièl ki pa pwòp [...] pé ké trapé wayòm Bondié » (1 Korentjen 6:9, 10). « Konduit sèksièl ki pa pwòp » sé an tradiksion mo grèk-la pornéïa. Sinifikasion mo-tala sé 1) rilasion sèksièla ant dé moun ki pa mayé, 2) rilasion sèksièl ant dé moun menm sèks é 3) rilasion sèksièl épi bèt. Tala ki ‘pa ka konmèt piès péché sèksièl’ ka trapé bienfé é i ka fè Jéova plézi (1 Tésalonisien 4:3).
ANNOU PLI LWEN
Annou wè ki manniè nou pé rété pwòp adan domenn lasèksialité é ki bienfé nou pé trapé.
3. Chapé kouri douvan tout kalté péché sèksièl
Jozèf, an jenn boug ki rété fidèl douvan Bondié, té pou goumen pou gadé an bon konduit. Li Jénèz 39:1-12 épi diskité sé kèsion-tala :
Pou ki rézon Jozèf chapé kouri ? (gadé vèsé 9-la).
Ès ou ka pansé Jozèf fè bon chwa-a ? Poutji ?
Koumanniè lé jenn pé fè kon Jozèf é chapé kouri douvan tout péché sèksièl ? Gadé VIDÉWO-a.
Jéova ka mandé tout adoratè’y rijété tout kalté péché sèksièl. Li 1 Korentjen 6:18 épi diskité sé kèsion-tala :
Kisa ki pé mennen an moun fè an péché sèksièl ?
Kouman ou pé chapé kouri douvan tout péché sèksièl ?
4. Ou pé rété fò douvan tantasion
Rijété tantasion fè an péché sèksièl ka mandé bon éfò. Kisa ki sé pé rann konba-tala pli rèd ankò ? Gadé VIDÉWO-a épi diskité kèsion-an ka vini an.
Kisa frè-a fè lè i wè konpòwtasion’y té ké mennen’y kònen madanm-li ?
Délè, menm an moun ki enmen Bondié ka goumen pou tiré lidé ki pa pwòp an tèt-li. Kisa nou pé fè pou pa kité piès lidé ki pa pwòp pran rasin an lèspri-nou ? Li Filipien 4:8 épi diskité sé kèsion-tala :
Ki modèl bagay ki pou rété an lèspri-nou ?
Poutji li Labib épi kontinié travay rèd ba Jéova ka endé nou rété fò douvan tantasion ?
5. Jéova mété règ pou bien-nou
Jéova sav bien sa nou ni bizwen. I ka di nou sa pou fè pou gadé an bon konduit adan domenn sèksièl é ki bienfè sa ka pòté ba nou. Li Pwovèb 7:7-27 oben gadé VIDÉWO-a, épi diskité sé kèsion-an ka vini an.
Poutji jenn boug-la touvé kòy adan an sitiyasion ki danjéré ? (gadé Pwovèb 7:8, 9).
Dapré Pwovèb 7:23, 26, an mové konpòwtasion sèksièl pé mennen gwo déga. Anba ki pwoblèm nou ké chapé si nou ka gadé an bon konduit adan domenn sèksièl ?
Ki liannaj ki ni ant an bon konduit adan domenn sèksièl épi lèspwa viv pou toujou ?
Ni moun ka pansé ki sa Labib ka di asou lomosèksialité two rèd. Men Jéova sé an Bondié lanmou. Sa i lé sé ki tout moun viv pou toujou. Men sèl bagay, fòk yo obéyi règ-li. Li 1 Korentjen 6:9-11 épi diskité kèsion-tala :
Ès lomosèksialité sé sèl konpòwtasion Bondié pa dakò ?
Pou Bondié asèpté nou, nou tout pou fè dé chanjman. Ès sa vo lapenn ? Li Sòm 19:8, 11 épi diskité sé kèsion-tala :
Dapré’w, ès lwa moral Jéova rézonnab ? Poutji ou ka di sa ?
Kon i fè ba anpil moun, Jéova pé endé’w chanjé.
NI MOUN KA DI : « Dépi dé moun enmen, pa ni piès pwoblèm pou yo kouché ansanm. »
Sa’w té kèy di ?
SA’W APRANN
Lasèksialité sé an kado Jéova fè an nonm épi an madanm ki mayé.
An ti viré gadé
Dapré Labib, an konpòwtasion sèksièl ki pa pwòp sé kisa ?
Kisa ki pé endé nou rijété tout modèl péché sèksièl ?
Ki bienfè nou ni lè nou ka obéyi lwa moral Jéova ?
TIBREN PLIS ANKÒ
Lè an nonm épi an fanm ka viv ansanm, poutji Bondié lé yo mayé ?
« Kisa Labib ka di asou moun ka viv ansanm san yo mayé ? » (awtik jw.org)
Poutji sa Labib ka di asou lomosèksialité sé pa menm bagay ki rayi moun omosèksièl ?
Poutji lwa Bondié asou lasèksialité sé an pwotèksion ?
« Rilasion épi bouch ès sé rilasion sèksièl osi ? » (awtik jw.org)
Sa ki mennen an omosèksièl chanjé manniè viv-li (pòtré « Ils ont respecté ma dignité »).
« La Bible transforme des vies » (La Tour de Garde, 1ié avril 2011)
a Rilasion sèksièl sé osi : rilasion sèksièl épi bouch, rilasion sèksièl pa fès, épi lè ou ka menyen sèks an moun pou èksité’y.
-
-
Kisa Labib ka di asou moun ki sélibatè é moun ki mayé ?Viv an bèl lavi pou toujou ! (An létid Labib ki pé pwofité’w)
-
-
LISON 42
Kisa Labib ka di asou moun ki sélibatè é moun ki mayé ?
Adan sèten péyi, sé moun-lan ka pansé, pou yo ni lakontantman, fòk yo mayé. Poutan, i ni moun mayé ki maléré épi moun sélibatè ki éré. Poutoudi, Labib-la ka di ki ou sélibatè ki ou mayé sé dé kado Bondié.
1. Ki bénéfis ou ni lè’w sélibatè ?
Nou ka li adan Bib-la : « Moun-lan ki ka mayé ka fè bien, men moun-lan ki pa ka mayé ké fè pli mié » (li 1 Korentjen 7:32, 33, 38). Poutji Labib-la ka di ki an sélibatè ka fè « pli mié » ? Davwè i pa mayé, an jénéral i ni plis libèté. Pa èkzanp, sa pi fasil ba’y alé préché bon nouvèl-la adan an lòt réjion oben an lòt péyi. Anplis, souvan i ni plis tan pou rann lanmitié’y épi Jéova pli fò.
2. Ki bénéfis ou ni lè’w mayé ?
Kon lè ou sélibatè, mariyaj-la ni bénéfis tou. Labib-la ka di « simié dé ki an sèl » (Éklézias 4:9). Ou ka wè sa vré lè dé konjwen ka aplitjé sé prensip Labib-la. Lè an nonm épi an madanm ka mayé yo ka pwonmèt enmen épi rèspèkté kòyo pou toujou. Souvan yo ka santi yo an sékirité lontan plis pasé moun ka viv ansanm san yo mayé. É liannaj-yo ka ba timanmay-yo laposibilité grandi an sékirité tou.
3. Koumanniè Jéova ka wè mariyaj ?
Lè Jéova sélébré prèmié mariyaj-la, i di : « An nonm kay kité papa’y épi manman’y, é i kay lianné épi madanm-li » (Jénèz 2:24). Sa Jéova lé sé ki madanm épi misié enmen épi rété ansanm tout tan yo vivan. I ka otorizé divòs-la sèlman si yonn di sé konjwen-an konmèt ladiltè. Adan ka-tala, Jéova ka ba konjwen-an ki inosan dwa désidé si i lé divòséa (Matié 19:9). Jéova pa ka otorizé sé krétjen-an ni pliziè konjwen (1 Timoté 3:2).
ANNOU PLI LWEN
Annou wè kouman, ki sélibatè ki moun mayé pé touvé bonè-yo épi ba Jéova tjè kontan.
4. Pwofité davwè ou sélibatè
Jézi té sélibatè é ba’y sé té an don (Matié 19:11, 12). Li Matié 4:23 épi diskité kèsion-tala :
Koumanniè Jézi itilizé don-tala pou sèvi Papa’y épi fè moun dibien ?
Kon Jézi, an krétjen ki sélibatè pé ni lajwa. Gadé VIDÉWO-a épi diskité kèsion-an ka vini an.
Adan ki bèl aktivité sé krétjen-an ki sélibatè pé ba lafòs-yo ?
Ès ou té sav sa ?
Labib-la pa ka di dépi ki laj ou pé mayé. Men i ka ba an konsèy, kité pasé sa i ka kriyé « flè lajénès », an périòd lavi-a éti sé lanvi sèksièl-a fò anpil épi yo pé fè’w pran mové désizion (1 Korentjen 7:36).
5. Bien chwazi konjwen’w
Chwazi an konjwen sé yonn adan sé désizion-an ki pli enpòwtan adan lavi-a. Li Matié 19:4-6, 9 épi diskité kèsion-tala :
Poutji an krétjen pou pran tan réfléchi avan i mayé ?
Labib-la pé endé’w sav sa ou pou chèché lakay an moun pou’w mayé. Chèché an moun ki enmen Jéovab. Li 1 Korentjen 7:39 épi 2 Korentjen 6:14, épi diskité sé kèsion-tala :
Poutji fòk ou mayé sèlman épi an moun ka sèvi Jéova ?
Si an krétjen ka désidé mayé épi an moun ki pa ka sèvi Jéova, kisa Jéova kèy risanti ?
Si ou mété ansanm dé zannimo vréman diféran, tou lé dé ka soufè. Menm manniè, mayé épi an moun ki pa ka adoré Jéova, kèy ba’w bon dézagréman.
6. Wè mariyaj-la menm manniè ki Jéova
Té ni an tan, lakay sé Izrayélit-la, sé nonm-lan té ka divòsé pou dé rézon égoyis. Li Malaki 2:13, 14, 16 épi diskité kèsion-tala :
Poutji Jéova rayi lè moun ka divòsé pou rézon ki pa adan Pawòl-li ?
Ladiltè épi divòs ka mennen anpil soufwans.
Gadé VIDÉWO-a épi diskité kèsion-an ka vini an.
Si ou mayé épi an moun ki pa ka sèvi Jéova, sa ou pé fè pou mariyaj-ou réyisi ?
7. Aplitjé lwa Jéova asou mariyaj
Fè sa Jéova ka mandé asou mariyaj ka mandé délè anpil éfòc. Men si ou ka obéyi, Jéova kay béni’w. Gadé VIDÉWO-a.
Li Ébré 13:4 épi diskité sé kèsion-tala :
Ès ou ka pansé sa posib suiv lwa Jéova asou mariyaj ? Kisa ki ka fè’w di sa ?
Adan près tout péyi, i ni lwa pou déklaré mariyaj épi divòs. Jéova ka mandé sé krétjen-an soumèt kòyo a sé lwa-tala. Li Tit 3:1 épi diskité kèsion-tala :
Si ou mayé, ès ou pran tan déklaré mariyaj-ou douvan sé lotorité péyi-a ?
AN MOUN SÉ PÉ MANDÉ’W : « Poutji fòk mayé ? Nou pé pa jiskont viv ansanm ? »
Kisa ou té ké réponn ?
SA’W APRANN
Ki ou sélibatè ki ou mayé sé dé kado Jéova. Tou lé dé pé ba’w lajwa si ou ka suiv prensip Jéova.
An ti viré gadé
Ki manniè an sélibatè pé bien itilizé sitiyasion’y ?
Poutji Labib-la ka mandé nou mayé sèlman épi an moun ka sèvi Jéova ?
Labib-la ka ba an sèl rézon pou divòsé, kilès ?
TIBREN PLIS ANKÒ
Sa sa lé di « mayé sèlman si sé an disip Senyè-a ».
« Questions des lecteurs » (La Tour de Garde, 1ié juiyé 2004)
Bon konsèy asou frékantasion épi mariyaj adan an vidéwo an 2 mòso.
Koumanniè Jéova rékonpansé an frè ki fè chwa ki té ka mandé kouraj ?
Kisa fòk ou sonjé avan ou désidé divòsé ouben séparé ?
« Honore “ce que Dieu a uni” » (La Tour de Garde, désanm 2018)
a Nòt 4-la ka palé di diféran sitiyasion éti an moun pé séparé kòy di konjwen’y menm si pa ni adiltè.
b Adan péyi éti sé lé paran ka chwazi konjwen yich-yo, sé paran-tala ki enmen yich-yo kèy koumansé pa mandé kòyo si moun-lan yo chwazi enmen Jéova. Lajan ouben travay moun-lan sé pa sa lé paran pou gadé an prèmié.
c Si ou ka viv épi an moun san ou mayé, sé wou sèl ki pé désidé si ou ka kité’y ouben si ou ka mayé épi’y.
-