Ki manniè pou sèvi lidé pou kozé

Dépi janvié 2018, i ni lidé pou kozé asou prèmié paj Kayé pou réyinion Lavi an krétjen épi ministè. Ki manniè pou sèvi yo ?

Lè’w ka prézanté an sijé : Itilizé kèsion-an, vèsé-a épi kèsion-an pou pwochen fwa-a. Mé, ou pa oblijé itilizé egzaktiman sé menm mo-a ou tann adan vidéwo-a ka sèvi’w egzanp. Ou pé chwazi an sitiyasion ki diféran, chanjé sé prèmié pawol-la, sèvi an lot rézònman, etsétéra. Ou pé pwopozé tou an piblikasion ki adan bwet zouti-a pou ansénié, menm si yo pa mandé fè sa adan kayé-a.

Lè’w ka préché : Lidé pou kozé fet pou ba’w yann dé lidé. Si’w jwenn an moun ki vréman entérésé pa lavérité é ki lé sav plis, ou pé kontinié palé épi’y, pou sa, pétet ou pé touvé lidé adan lidé pou kozé, sou-tit lè’w viré vini. Ou pé ranjé lidé pou kozé pou mété’y an gou’w oben sèvi an prézantasion toutafetman diféran. Es ou pé sèvi prézantasion an mwa ki ja pasé oben an vèsé ki ka plis lévé lentéré sé moun-lan adan téritwè’w la ? Es sé moun-lan terbolizé épi an bagay ki fini pasé oben an nouvel ki matjé péyi-a ? Kisiswa manniè-a ou chwazi sèvi lidé pou kozé, sa’w lé, sé ‘fè tout bagay pou bon nouvel-la, pou endé dot moun tann li’ (1 Ko 9:22, 23).