LISON 40
Ki manniè nou pé vini pwòp an zié Bondié ?
Lè an manman ka paré ti-gason’y pou alé lékòl, i ka gadé pou wè si i pwòp é si lenj-li nikèl ; pas i sav sa ka pwotéjé santé’y. Lè an ti-manmay pwòp sa ka montré paran’y ka pran swen di’y. Menm manniè-a, pwòpté ni anpil lenpòtans ba Papa-nou ki an sièl-la. Kidonk, lè nou pwòp sa ka fè nou dibien é nou ka gloriyé Jéova.
1. Koumanniè ou pé pwòp ?
Mi lòd-la Jéova ka ba nou : « Zòt pou vini sen » (1 Piè 1:16). An moun ki sen, pwòp adan domenn moral épi fizik. Nou pwòp lè nou ka fè dé bagay, kontèl benyen, mété lenj ki pwòp, nétwayé kay-nou, loto-nou, jaden-nou épi dòt bagay ankò. É nou chak pé partisipé osi adan nétwayaj sal Wayòm-lan. Lè nou pwòp, nou ka gloriyé Jéova (2 Korentjen 6:3, 4).
2. Ki pratik fòk rijété si nou lé rété pwòp ?
Labib-la ka di an manniè klè : « Annou lavé kònou di tout bagay ki ka sali lachè épi lèspri » (2 Korentjen 7:1). Sa lé di nou dwé rijété tousa ki pé fè kò-nou épi lèspri-nou ditò. Pou pansé-nou fè Jéova plézi, fòk nou rijété épi tout fòs-nou bagay ki an lèspri-nou é ki pa pwòp (Sòm 104:34). Nou pou véyé osi manniè nou ka palé (li Kolosien 3:8).
Ki lòt bagay ankò pé fè nou pa pwòp an zié Bondié ? I ni dé sibstans, kontèl tabak ouben ladwòg ki danjéré menm. Kidonk, fòk pa pran sa menm. An moun ki pa ka fimen é ki pa ka dwodjé kòy an méyè santé, é i ka montré i ni rèspé pou lavi-a Bondié ba’y la. Lè nou pwòp adan domenn moral-la, nou ka goumen kont labitid mastirbé ouben labitid gadé pòrnografi (Sòm 119:37 ; Éfézien 5:5). Sa pa fasil ladjé sé labitid-tala ki pa pwòp, men nou pé konté asou Jéova pou i endé nou (li Izayi 41:13).
ANNOU PLI LWEN
Annou wè poutji lapwòpté ka gloriyé Jéova épi koumanniè ladjé labitid ki pa pwòp.
3. Lapwòpté ka onoré Jéova
Koumandman Jéova ba nasion Izrayèl-la ka mété douvan manniè i ka wè lapwòpté. Li Ègzòd 19:10 épi 30:17-19, épi diskité sé kèsion-tala :
Kisa sé vèsé-tala ka aprann nou asou manniè Jéova ka wè lapwòpté ?
Ki bon labitid pé endé’w rété pwòp ?
Pou rété pwòp épi nétwayé bagay-ou sa ka mandé tan épi éfò. Kisiswa wotè lajan-nou ouben koté nou ka rété, nou tout pé rivé fè sa. Gadé VIDÉWO-a épi diskité kèsion-an ka vini an.
Lè nou ka préché, kisa sé moun-lan kèy pansé di nou si nou pwòp é nou ni lòd an zafè-nou ?
4. Ki manniè ladjé an labitid ki pa pwòp ?
Gras a Jéova, sa posib ladjé mové labitid.
An moun ki ka fimen ouben ki ka dwodjé kòy, sav sa rèd menm ladjé sa. Si’w an ka-tala, bien réfléchi asou konsékans labitid-tala ni anlè lavi’w. Li Matié 22:37-39 épi diskité kèsion-tala : Si an moun ka fimen ouben dwodjé kòy, ki éfé sa ni...
anlè lanmitié’y épi Jéova ?
anlè fanmi’y épi moun ki alantou’y ?
Fè an plan pou arété labitid-talaa. Gadé VIDÉWO-a.
Li Filipien 4:13 épi diskité kèsion-tala :
Lè ou ka goumen kont an labitid ki pa pwòp, ki manniè lapriyè, létid Labib-la èk sé réyinion sanblé-a pé endé’w ?
5. Koumanniè goumen kont pansé é labitid ki pa pwòp ?
Li Kolosien 3:5 épi diskité sé kèsion-tala :
Poutji nou pé di pòrnografi, sèkstin épi lamastirbasion sé dé bagay ki pa pwòp an zié Jéova ?
Ès ou ka pansé sa rézonnab Jéova mandé nou rété pwòp adan domenn moral ? Poutji ?
Sa posib goumen kont pansé ki pa pwòp. Gadé VIDÉWO-a.
Jézi itilizé an lèkzanp, pou montré sa fòk fè pou rété pwòp adan domenn moral. Li Matié 5:29, 30 épi diskité kèsion-tala :
Jézi pa té lé di fòk fè nou soufè, men plito fo nou bien désidé aji. Kisa nou pé fè pou kouri dèyè vié pansé ki pa pwòp nou ni an lèspri-noub ?
Si’w ka mennen an konba kont pansé ki pa pwòp, fò’w asiré Jéova ka wè tout éfò ou ka fè. Li Sòm 103:13, 14 épi diskité kèsion-tala :
Si’w ka goumen kont an labitid ki pa pwòp, koumanniè sé vèsé-tala ka ankourajé’w kontinié fè éfò ?
É si’w ka viré tonbé ? Kontinié goumen !
« Kon man pa ka rivé, simié man ladjé sa ! » Délè sé sa moun ki ka viré tonbé ka di. Annou pran lèkzanp an kourè. Sé pa pas i trilbiché é i tonbé sa lé di i pèd kous-la ouben fòk i rikoumansé’y. Menm manniè-a, si’w viré tonbé sa pa lé di ou pèd konba’w. É sa pa ka éfasé tout pwogré ou ja fè. Viré tonbé sé dé bagay ki ka rivé. Souvan sé dé étap ki pé endé’w genyen konba-a. Alò, pa dékourajé ! Gras a Jéova, ou kèy pé rivé a bout vié labitid-tala.
NI MOUN KA DI : « Vié mès-tala tèlman fò anlè mwen, man pa ka rivé ladjé’y ! »
Ki vèsé ou té kèy pran pou montré lè Jéova ka endé’w, ou pé ladjé tout mové labitid ?
SA’W APRANN
Nou ka gloriyé Jéova lè nou pwòp anlè kò-nou, an pansé-nou é an konduit-nou.
An ti viré gadé
Poutji lapwòpté sa enpòwtan ?
Koumanniè ou pé pwòp ?
Ki manniè ou pé pwòp ki an lèspri’w ki an konduit-ou ?
TIBREN PLIS ANKÒ
Pwòp menm si ou pa ni anpil lajan.
Yonn-dé konsèy pou arété fimen.
Mové konsékans pòrnografi-a.
« La pornographie : inoffensive ou dangereuse ? » (La Tour de Garde, 1ié out 2013)
Konba an nonm ki té ka gadé toulong lapòrnografi.
« J’ai échoué bien des fois avant de réussir » (La Tour de Garde no 4 2016)
a Adan ribrik-la « Tibren plis ankò », dosié-a « Comment arrêter de fumer » ka ba konsèy itil pou sòti anba vié labitid.
b Parapòt a lamastirbasion, gadé chapit 25 liv-la Les jeunes s’interrogent. Réponses pratiques (volume 1), tit-li sé « Comment arrêter de me masturber ? ».