LISON 03
Ès ou pé ni konfians an Labib ?
Adan Labib-la, i ni anlo pwonmès épi anlo konsèy. Pétèt ou sé lé sav sa i ka ansénié, men an menm tan ou ka mandé kòw si ou pé ni konfians an li. Ès ou pé apiyé anlè pwonmès épi konsèy an liv antan lontan ? Ès sa Labib-la ka di pé sèvi nou jòdi ? Ès ou pé kwè sa i ka prévwè pou dèmen ? Milion moun ka pansé : sé wi. É wou ? Sa té kèy bon ou ni pwòp lidé’w asou sa.
1. Ès listwa Labib vré oben envanté ?
Labib-la ka di andidan’y ni ‘pawòl ki vérité épi ki èkzak’ (Éklézias 12:10). I ka palé lévènman ki réyèl épi moun ki ègzisté poubon (li Lik 1:3 ; 3:1, 2). An patjé istowyen épi arkéwològ konfirmé enfòwmasion nan Labib-la vré, kontèl dat, moun, koté, épi lévènman.
2. Poutji nou pé di Labib sé pa an liv ki rasi ?
Souvantman, Labib-la té ja ka palé di bagay moun poko té konprann lè yo ékri’y. Kontèl, asou sijé ki ka palé di lasians i pa ka di bétiz. Poutan, antan yo ékri Labib, moun poko té ka kwè bagay lasians i té ka palé. Sé sèlman plita lasians dékouvè sa Labib-la té ka di té vré. Labib-la ‘toujou ni valè, atjèlman èk pou tout tan’ (Sòm 111:8).
3. Poutji nou pé ni konfians adan sa Labib ka prévwè pou dèmen ?
Adan Labib-la, i ni pwofésia ki ka anonsé « bagay ki poko fèt » (Izayi 46:10). Poutoudi, i prédi anlo lévènman listwa, lontan avan yo rivé poutoulbon. I ka ba tou an patjé détay anlè lavi-nou jòdi. Adan lison-tala, nou kèy dékatiyé yonn-dé pwofési Labib-la, é zòt ké soté lè zòt ké wè ki manniè yo ègzak !
ANNOU PLI LWEN
Annou gadé yonn-dé bagay lasians éti Labib-la ka palé, épi dékatiyé dé-twa pwofési èstwòdinè.
4. Labib-la annakò épi lasians
Antan lontan, anlo moun té ka pansé latè té pozé asou an bagay. Gadé VIDÉWO-a.
Annou gadé sa liv Jòb-la té ka di i ni 3 500 lanné. Li Jòb 26:7, épi diskité kèsion-tala :
Poutji ou ka èstébékwé lè Labib-la ka di latè ‘pann anlè ayen’ ?
Sé sèlman apré lanné 1 800, lasians rivé konprann sistenm dlo-a anlè latè. Poutan, Labib té ja ka èsplitjé sa i ni milié lanné. Li Jòb 36:27, 28, épi diskité sé kèsion-tala :
Isi-a sistenm dlo-a anlè latè èsplitjé an manniè senp. Poutji sa fòwmidab ?
Ès sé vèsé-tala ka endé’w ni konfians an Labib ?
5. Labib ka anonsé lévènman potalan
Li Izayi 44:27–45:2, épi diskité kèsion-tala :
Ki détay Labib-la té ja anonsé 200 lanné alavans, anlè manniè Babilòn té pou tonbé ?
Listwa ba laprèv Siris, wa Lapèws, épi lawmé’y, pran Babilòn pa koté 539 avan Jézikri. Yo fè flèv-la ki té ka pwotéjé vil-la fè chimen kochi. Sé lapòt-la té rété gran ouvè, kidonk yo rivé antré épi pran vil-la san goumen. Jòdi-a, pasé 2 500 lanné apré, Babilòn sé toujou an pil wòch. Annou gadé sa Labib-la té anonsé.
Li Izayi 13:19, 20, épi diskité kèsion-tala :
Kouman pwofési-tala réyalizé ?
Win Babilòn adan péyi Lirak.
6. Labib anonsé bagay nou ka wè jòdi
Labib-la ka kriyé sé tan-an nou ka viv-la « sé dènié jou-a » (2 Timoté 3:1). Annou gadé sa Labib-la prévwè pou tan-tala :
Li Matié 24:6, 7, épi diskité kèsion-tala :
Dapré sa Labib-la ka di, kisa ki té kèy pasé adan sé dènié jou-a ?
Li 2 Timoté 3:1-5, épi diskité sé kèsion-tala :
Dapré Labib-la, ki mantalité moun té kèy ni pandan sé dènié jou-a ?
Adan tout konpòwtasion sé vèsé-tala ka palé, kilès ou ka wè alantou’w ?
NI MOUN KA DI : « Labib sé an liv kont épi léjann. »
É wou, kisa ki ka ba’w lasirans ou pé ni konfians an Labib-la ?
SA’W APRANN
Ki listwa, ki lasians, ki sé pwofési-a, tout ka montré ou pé ni konfians an Labib.
An ti viré gadé
Labib-la sé an listwa ki vré oben envanté ?
Kisa ka montré Labib-la annakò épi lasians ?
Dapré’w, ès Labib-la pé prévwè sa kèy fèt dèmen ? Poutji ?
TIBREN PLIS ANKÒ
Dapré lasians, ès i ni lérè adan Labib-la ?
Lè ou ka gadé sé dènié jou-a, kisa ou ka wè ka fèt ?
« 6 prophéties qui se réalisent sous vos yeux » (La Tour de Garde, 1ié mé 2011)
Gadé kouman sé pwofési biblik-la réyalizé asou Puisans grèk-la.
Sé pwofési biblik-la, chanjé manniè an nonm té ka wè Labib-la.
« Pour moi, Dieu n’existait pas » (La Tour de Garde no 5 2017)
a An pwofési sé an mésaj Bondié vréyé. Délè, sé anonsé i ka anonsé an bagay ki kay fèt.