Vini pionié

Pou nou pé bien sèvi lafòs-nou, fòk nou mété douvan nou lòbjèktif èspiritièl (1Ko 9:26). Ni sé kalté lòbjèktif-tala, sé méyè manniè sèvi tan-an nou rété, avan monn-tala bout (Éf 5:15, 16). Pandan ladorasion lafanmi, ès sa pa té kèy an bon bagay palé di lòbjèktif pou lanné-a ka vini an ? Pou endé nou, adan Kayé Lavi épi ministè-tala, i ni divès awtik ki ka pwopozé nou pliziè lòbjèktif. Konsa nou kèy pé katjilé anlè sé lòbjèktif-tala épi priyé pou sa. (Jk 1:5).

Kontèl, ès tout fanmiy-an pé pa òwganizé kòy, pou endé menm yonn, vini pionié pèwmanan ? Si i pa asiré fini sé lè-a, poutji pa palé épi pionié éti sitiyasion-yo ka sanm ta’y la ? (Pw 15:22). Épi menm diskité épi yonn di yo adan ladorasion lafanmi ? Apré, mété anlè an papié diféran pwogram posib. Pétèt ou té ja pionié avan, ès sitiyasion’w atjèlman ka pèwmèt ou ripran sèvis-la ?

Ès i ni moun adan fanmiy-an ki pé vini pionié òksiliè pandan yonn oben pliziè mwa ? Si’w ka pansé ou pa ni asé lafòs pou sa, pétèt ou ké rivé si’w ka préché tibren chak jou. Si ou ka travay a plen tan oben ou lékòl, alò pétèt ou pa ni anpil tan pou préché pandan lasimenn, men pou pran sèvis-la ou pé chwazi an mwa ki ni vakans adan oben ki ni senk wikenn. Épi lafanmi, pran tan katjilé ki lòbjèktif zòt pé ni pou lanné sèvis-la ka vini. Anlè an almanna, matjé a ki moman ou konté vini pionié òksiliè épi ékri an pwogram (Pw 21:5).

GADÉ VIDÉWO-A SOYEZ DE COURAGEUX PIONNIERS, APRÉ RÉPONN KÈSION-TALA :

• Ki manniè témwayaj sè Aamand ka montré Jéova ka pran swen épi anpil tandrès di moun ki ka fè sakrifis pou vini pionié ?