Kèsion ki mérité an répons

Ki tan nou kèy arété préché bon nouvèl-la ?

Jézi di : « Yo kèy préché bon nouvèl Wayòm-lan toupatou anlè latè, pou sèvi témwayaj pou tout nasion, é apré sa sé ké lafen » (Mat. 24:14). Mo orijinal la pou « lafen » adan vèsé-tala, men osi adan Matié 24 vèsé 6 épi 13, ka palé di moman-an éti monn Satan-an ké disparèt an fwa pou tout, a Armagédon (Rév. 16:14, 16). Kidonk, nou kèy arété préché bon nouvèl Wayòm-lan jiskont avan Armagédon rivé. Sé an chanjman adan manniè nou ka èsplitjé sé vèsé-tala.

Pou koumansé, avan, nou té konprann nou té kèy arété préché lamenm apré Gran Babilòn-lan té kèy détwi. Sa lé di, lè gran tribilasion-an té kèy koumansé (Rév. 17:3, 5, 15, 16). Nou té ka pansé osi, ki a moman-tala, Jéova pa té kèy ba pèsonn laposibilité tann bon nouvèl-la ankò (Iza. 61:2). Pou fini, nou té ka kwè ki tout sé moun-lan ki té kèy chapé anba gran tribilasion-an, té ké ni pou montré yo fidèl avan gran tribilasion-tala koumansé. Poutji nou té ka wè sa konsa ? Sé pas nou té ka konparé sé moun-tala épi sé Juif-la ki té rété vivan lè Jérizalèm détwi, lanné 607 avan Jézikri. Sé Juif-tala té rété fidèl é yo té rayi laméchansté, alò yo té risivrè an mak ki pwotéjé lavi-yo, lè yo détwi vil-la (Ézé. 5:11 ; 9:4). Men konparézon-tala pa annakò épi sa Jézi di an Matié 24:14. I di sé moun-lan té kèy ni laposibilité asèpté bon nouvèl-la, tout tan monn Satan-an pa té kèy disparèt an fwa pou tout, a Armagédon.

Manniè nou ka konprann Matié 24:14 atjèlman, ka endé nou konprann pli bien Révélasion 16:21 ki ka palé di an mésaj ki kon an gwo lagrèl. Lè nou ka ègzaminé fondòk sé 2 vèsé-tala, nou ka konstaté ki yonn ka konplété lòt. Koumanniè ? Pou konprann, annou wè sa Pòl di anlè manniè sé moun-lan ka réyaji, lè yo ka tann mésaj Wayòm-lan. Pòl èsplitjé ki, ba « moun kèy sové », mésaj-la sé an bon nouvèl, ouben ankò « an bon lodè lavi ». Men ba lènmi Bondié, mésaj-tala sé an mové nouvèl, ouben ankò « an lodè lanmò » (2 Kor. 2:15, 16). Yo rayi mésaj-tala pas i ka di lavérité asou monn-yo a : sé an monn méchan, sé Satan ki ka dirijé’y, é i pa lwen disparèt (Jan 7:7 ; 1 Jan 2:17 ; 5:19).

Sonjé osi ki lapli gwo lagrèl-la adan Révélasion 16:21 ké « an bidim kalamité ». Kisa sa lé di ? Pandan gran tribilasion-an, mésaj-nou an kèy brennen monn-lan ankò plis, é Jéova ké fè konnèt non’y kon i pa jen fè avan (Ézé. 39:7). A moman-tala, apré dèstriksion Gran Babilòn-lan, ès i ni moun ki ké asèpté kouté mésaj-nou an ? Ès yo ké touvé i ni an bon ti lodè ? Sa toutafètman posib. Pétèt yo ké sonjé, ouben yo ké aprann, sa sé Témwen Jéova-a préché pandan an patjé lanné ; sé fo rèlijion-an té ké disparèt an jou.

Mi an istwa ka endé nou konprann sa nou fini di a. Lè Jéova vréyé sé 10 malè-a anlè Léjip, « an foul-moun dòt nasion » pati-kité Léjip épi pèp Bondié-a (Ègz. 12:12, 37, 38). Pétèt sé étranjé-tala pran désizion suiv pèp Bondié-a, pas yo wè sé 10 malè-a Moyiz té prédi réyalizé douvan zié-yo.

Tout moun ki ké chwazi sèvi Jéova apré dèstriksion Gran Babilòn-lan, kèy ni lonnè soutienn sé frè Kris-la ki kèy toujou asou latè (Mat. 25:34-36, 40). Men jiskont avan Armagédon, i kèy two ta pou an moun vini an brèbi, pas sé dènié wen-an ké ja monté an sièl-la.

Nouvo lèsplikasion-tala ka montré nou ankò an fwa, wotè lanmou épi konpasion Jéova. Pou vré, « i pa lé menm an sèl moun détwi, men i lé tout moun ripanti kòyo » (2 Piè 3:9).