Kontinié kité lèspri sen lianné zòt

Linité-a nou ni adan lasanblé-a ka vini di « lèspri sen ». Sa lé di, linité-tala ka ègzisté gras a lafòs Bondié annaksion. Men kon Pòl ka mété douvan, sa ka mandé éfò pou rété ini. Men ki moun ki pou fè sé éfò-tala ? Avrédi, sé chak krétjen ki pou fè pa ta’y pou ‘kontinié kité lèspri sen lianné nou’.

Annou pran an ègzanp : Imajinen yo ka ba’w an loto tou nèf. Ki moun ki ni rèsponsabilité otjipé di loto-a ? Asiré ou ja konnèt répons-lan. Si i tonbé an pann pas ou pa otjipé di’y, ou pé ké akizé moun-lan ki ba’w loto-a, pa vré ?

Menm manniè-a, linité sé an kado Jéova, men nou chak la pou fè tousa ki fo pou pwotéjé’y. Alò si pa ni lapé ant nou épi an frè ouben an sè, fòk nou mandé kònou : « Ès man ka fè tousa man pé pou ranjé sitiyasion-an épi pwotéjé linité-a ki adan lasanblé-a ? »

« FÈ GWO ÉFÒ » POU PWOTÉJÉ LINITÉ

Kon Pòl di, pou rété ini, délè sa ka mandé nou anpil éfò. Èspésialman lè an frè ouben an sè blésé nou. Men ès sa lé di fòk nou toujou ay wè moun-lan ki blésé nou pou di’y sa nou ka risanti ? Pa oblijé. Mandé kòw : « Si man ka alé wè’y, ès sa ké mété lapé, ouben sitiyasion-an ké vini ankò pli mové ? » Délè, sa té kèy méyè ou anni pasé anlè sa toubannman, ouben padonnen (Pwo. 19:11 ; Mak 11:25).

Kon Pòl ka ankourajé nou fè, annou kontinié sipòté kònou yonn lòt adan lanmou (Éfé. 4:2). An liv ka di, nou pé tradui pawòl-la « pou yonn sipòté lòt adan lanmou » pa « akéyi lézòt kon yo yéa ». Kivédi, fò nou asèpté ki, kon nou menm, frè é sè-nou ka fè lérè. Asiré, nou ka fè éfò pou abiyé kònou épi « nouvo pèrsonalité-a » (Éfé. 4:23, 24). Men pèsonn pé pa fè sa an manniè pawfé (Wom. 3:23). Si nou ka sonjé sa, sa ké pli fasil rété pasian épi padonnen, é konsa nou ké kité ‘lèspri sen lianné nou’.

Lè nou ka padonnen épi nou ka oubliyé lè an moun blésé nou — menmsi sé an tjè-nou sèlman nou fè’y san nou ay wè moun lan —, nou ka rété lianné adan lapé. Mo grèk la yo sèvi adan Éfézien 4:3 pou « lianné », sé an mo yo ka sèvi osi pou palé di liannaj solid la ki ka tjenbé 2 zo ansanm. Menm manniè-a, lanmou épi lapé ki ni ant nou ka endé nou pwotéjé lanmitié-nou épi frè èk sè-nou, menmsi nou pa toujou dakò épi yo.

Alò si an frè ouben an sè ka blésé’w, ka fwasé’w ouben ka énèrvé’w, éséyé konprann li, pasé ou chèché défo i ni (Kol. 3:12). Nou piès pa pawfé, kidonk sa pé rivé’w, wou osi, blésé an moun. Si’w ka sonjé sa, sa ké endé’w fè pa ta’w pou kité « lèspri sen lianné zòt ».