Kèsion ki mérité an répons

Ki « volonté » Jéova kèy mété an tjè sé gouvènman-an talè ?

Parapòt a koumansman gran tribilasion-an, Révélasion 17:16, 17 ka di : « Kanta sé di kòn-lan ou wè a épi bèt sovaj la, yo kèy rayi pwòstitié-a épi yo kèy lésé’y an chèpi é tou touni ; yo ké manjé lachè’y é yo kéy brilé’y nèt. Pas Bondié mété an tjè-yo di fè volonté’y, wi, pou réyalizé pwòp volonté-yo, pou yo ba bèt sovaj la wayòm-yo. » Avan piblikasion-nou té ka di, ki ‘volonté-a’ Jéova kèy mété adan tjè sé gouvènman-an, sé détwi fo rèlijion-an.

Men manniè nou té ka èsplitjé pwofési-tala mérité nou viré asou’y. ‘Volonté-a’ Jéova ké mété adan tjè sé gouvènman-an, sé « ba bèt sovaj la wayòm-yo ». Pou konprann ki manniè pwofési-tala kèy akonpli, nou ké réponn yonn-dé kèsion.

Pwofési-tala ka palé di ki moun ? « Pwòstitié-a », yo ka kriyé osi « Gran Babilòn-lan », ka riprézanté lansanm fo rèlijion asou tout latè. ‘Bèt sovaj la ki wouj’ ka riprézanté an òwganizasion pou lapé ki wè jou an 1919 ; yo té ka kriyé’y Sosiété sé Nasion-an. Jòdi-a yo ka kriyé’y lé Nasionzini (Rév. 17:3-5). Kantapou « sé di kòn-lan » yo ka riprézanté tout gouvènman ka soutienn bèt sovaj la.

Ki modèl rilasion i ni ant pwòstitié-a épi bèt sovaj wouj la ? Pwòstitié-a « asiz » anlè bèt sovaj la, kivédi i ka soutienn bèt-tala, i ka chèché enfliyansé’y é i jik ka éséyé dominé’y.

Kisa kèy rivé pwòstitié-a ? Bèt sovaj la épi sé 10 kòn-lan ka soutienn li « kèy rayi pwòstitié-a ». Yo kèy rayi’y tèlman ki yo kèy pran tout richès-li, é yo ké mété douvan jou fòs méchansté’y. Anplis di sa, yo kèy réyalizé jijman Bondié asou pwòstitié-a : yo kèy fè’y fè lapousiè (Rév. 17:1 ; 18:8). A moman-tala, sé ké lafen fo rèlijion-an. Men avan yo détwi’y, Jéova ké ba sé gouvènman-an an lòt bagay pou fè ankò. An bagay pèsonn pa janmen wè adan tout listwa limanité.

Kisa Jéova kèy mété an tjè sé gouvènman-an ? Jéova kèy mété an tjè sé 10 kòn-lan « volonté’y ». Volonté’y sé fè yo ba bèt sovaj la, sa lé di lé Nasionzini, puisans-yo épi pouvwa-yo (Rév. 17:13). Katjilé asou sa sa lé di. Ès sé gouvènman-an kèy désidé yo menm, ba bèt sovaj la pouvwa-yo épi puisans-yo ? Non ! Pwofési-a ka montré ki sé Jéova kèy enfliyansé yo pou yo aji konsa (Pwo. 21:1 ; konparé épi Izayi 44:28). Ès yo kèy ba pouvwa-yo épi puisans-yo piti-a-piti ? Non ! Chanjman-tala kèy fèt adan an bat-zié, an sèl kou. Épi pouvwa-tala i fini trapé, bèt sovaj la kèy fè sa Jéova désidé : détwi tout sé fo rèlijion-an an fwa pou tout !

Kisa kèy rivé talè ? Sé pa lapenn fatidjé kòw véyé adan nouvèl si sé gouvènman-an ka soutienn plizanpli lé Nasionzini. Men mi sa ki kèy fèt : san pèsonn atann kòy, Jéova kèy mété adan tjè sé gouvènman-an lanvi ba lé Nasionzini puisans-yo. A moman-tala, nou kèy sav ki gran tribilasion-an pé pété a nenpòt ki moman. Annatandan, « annou rété véyatif é annou kontinié ni bon jijman », pas adan an ti moman, nou ké wè bagay kèy siwpwann nou ! (1 Tés. 5:6).