Akt (sa sé apòt-la fè)
6 Pannan sé jou-lasa, kantité disip ki té ni té ka ògmanté. An menm balan-la, Juif ki té ka palé grèk mèt-yo ka kritiké Juif ki té ka palé ébré pas lè yo té ka distribiyé manjé chakjou, yo pa té ka ba sé vèv-la ki té ka palé grèk la pa a yo. 2 Alò sé 12 apòt-la kriyé tout sé disip-la é yo di-yo : « Sa pé’é fè Bondyé plézi siwvwè nou arété anségné pawòl a-y pou nou distribiyé manjé. 3 Alò léfrè, chwazi 7 boug pawmi zòt ki ni on bon répitasyon*, ki plen lèspri sen é ki plen sajès, é nou ké ba-yo fè travay-lasa paskè sa nésésè ; 4 nou aprézan, nou ké sèvi èvè tan an nou pou priyé é pou anségné pawòl a Bondyé. » 5 Toutmoun té dakò èvè sa yo di la, é yo chwazi Étyèn, on boug ki té ni onlo fwa é ki té plen lèspri sen. Anplisdisa, yo chwazi Filip, Pwokò, Nikanò, Timòn, Pawménas é Nikola, on boug ki rantré an rèlijyon a sé Juif-la é ki té sòti a Antyòch. 6 Yo menné-yo ba sé apòt-la. Sé apòt-la fè on priyè é aprésa, yo pozé men a yo anlè sé boug-la yo té chwazi la.
7 Pi tan-la té ka pasé, é pi moun té ka tann pawòl a Bondyé. É kantité moun ki vin disip a Jérizalèm kontinyé ògmanté toubònman. Anplisdisa, ni onpakèt prèt ki vin disip.
8 Bondyé té ka ba Étyèn onlo puisans toubònman é i té ka soutyenn-li menm. Kifè, Étyèn té ka fè mirak é i té ka fè biten ki èstraòwdinè toubònman ; i té ka fè sa anmitan pèp-la. 9 Ni déotwa boug ki vin diskité èvè-y. Pawmi yo, té ni sèwten ki té adan sa yo ka kriyé Sinagòg a sé Boug-la yo Lagé la, té ni boug Sirèn é Alèksandri, é té ni dòt boug ki té sòti an Silisi é an Azi. 10 Men yo pa té pé réponn ayen lèwvwè Étyèn té ka palé, pas i té ni onlo sajès é pas lèspri sen té ka édé-y. 11 Alò yo monté tèt a déotwa boug andous pou fè-yo di : « Nou tann-li ka dérèspèkté Bondyé é Moyiz. » 12 Anplisdisa, yo fè ki pèp-la, ki sé ansyen-la, ki sé iskrib-la lévé cho. Aprésa, yo enn débaké asi Étyèn. Yo pongné-y é yo menné-y douvan Sannédren-la. 13 Yo fè déotwa moun vin pou manti asi-y é mi sa sé moun-lasa di : « Boug-lasa pa’a las di mové biten asi Tanp-la. I pa’a las di mové biten asi Lwa-la osi. 14 Pa ègzanp, nou tann-li di kè Jézi Nazaréyen-la ké détwi koté-lasa, é kè i ké chanjé sé lwa-la Moyiz ban-nou la. »
15 É pannan tout sé moun-la ki té sizé an Sannédren-la té ka gadé Étyèn fiks, yo rann-yo kont kè figi a-y té kon figi a on zanj.