Akt (sa sé apòt-la fè)
27 Men lèwvwè Fèstis désidé kè nou ké pran bato pou ay an Itali, yo pran Pòl é déotwa prizonyé, é yo lagé-yo an men a on ofisyé non a-y sé té Jiliyis. I té ka fè pawti a on gwoup sòlda yo té ka kriyé “gwoup sòlda a Ogis*”. 2 Nou baké òbò on bato ki té sòti a Adramityòm, é ki té kay pasé adan plizyè pòw ki ka touvé-yo asi téritwa a Lazi. Lèwvwè bato-la pati, Aristawk té èvè nou. Sé té on Masédonyen, on boug Tésalonik. 3 Lèlandèmen-la, nou akòsté a Sidon. Jiliyis aji èvè Pòl épi onlo bonté, é i lésé Pòl ay aka zanmi a-y pou yo té pran swen a-y.
4 Bato-la kité Sidon, é nou pasé toupré lilèt a Chip pou nou pa té pran sé van-la ki té ka vin anfas èvè nou la. 5 Aprésa nou pran gran lanmè ban nou. Nou travèsé pa owa Lasilisi é Lapanfili, é nou débaké a Mir, on vil ki ka touvé-y an Lisi. 6 Lè nou rivé la, ofisyé a lawmé la touvé on bato ki té sòti a Alèksandri é ki té k’ay an Itali, é i fè-nou monté abò. 7 Aprésa, bato-la navigé pannan bon enpé jou, men i pa té k’ay vit. Kifè nou rivé a Knid èvè onlo difikilté. Konm van-la té ka anpéché-nou fè douvan, nou pasé pa owa Salmoné toupré Lakrèt pou van-la pa té fè-nou ayen. 8 Magré nou pasé toupré tè-la, van-la ba bato-la bon gaz. Men kanmenmsa, nou rivé on koté yo ka kriyé Bopò. Sé on koté ki ka touvé-y toupré vil a Lazé.
9 Onpakèt tan pasé, é siwvwè nou té mèt-nou ka navigé a moman-lasa, sa té’é danjéré toubònman. Jou-la sé Juif-la té ka rété san manjé pou sélébré jou a Rékonsilyasyon-la* té ja pasé. Kifè, Pòl ba-yo on konsèy. 10 I di-yo : « Lézòm, an ja santi kè siwvwè nou kontinyé vwayaj-lasa, malè ké rivé-nou. Non sèlman nou ké pèd sa ki adan bato-la, men nou ké pèd bato-la osi. É anplisdisa, nou pé jous rivé a pèd vi* an nou adan sa. » 11 Men olyé ofisyé a lawmé la té kouté Pòl, i kouté kapitèn a bato-la é pwopriyétè a bato-la. 12 Konm pòw-la pa té on bon koté pou nou té rété pannan livè, lamajorité a sé moun-la ki té òbò bato-la di kè sé té’é on bon biten si nou té ka pati pou vwè si nou pé ay a Féniks pou pasé livè. Féniks sé on pòw ki ka touvé-y an Krèt, é pou rivé la, swa ou ka pasé o nò-ès, swa ou ka pasé o sid-ès.
13 Van-la ki té ka sòti o sid la mété-y ka souflé, men i pa té fò. Alò yo konpranndèdi yo té’é pé rivé la yo té k’ay la. Kifè yo halé lank-la monté, é yo pati. Yo rété ka navigé toupré Lakrèt. 14 On titak tan apré, on gwo van yo ka kriyé érakilon* mété-y ka souflé. 15 Van-la té fò toubònman é i té ka malmenné bato-la. Kifè, bato-la pa té pé fè douvan. Alò nou lésé van-la chayé-nou, pas nou pa té pé fè ayen. 16 Nou pòté mannèv pou ay paré van dèyè on ti lilèt non a-y sé Koda. É magrésa, nou pran bon gaz pou nou té mèt kannòt-la* ki té dèyè bato-la abò. 17 Apré yo halé kannòt-la monté, sé boug-la pran déotwa kòd é yo fè-yo fè lantou a bato-la pou yo té maré-y. Konm nou té pè échwé asi Sirt-la*, nou fè sé vwal-la* désann, é nou lésé bato-la alé. 18 Tanpèt-la té ka soukwé bato-la fò toubònman. Kifè lèlandèmen-la, nou koumansé voyé biten alé an lanmè-la pou bato-la té vin pi léjè. 19 Aprésa, twazyèm jou-la, sé matlo-la jété déotwa kòd ki té òbò bato-la yomenm a yo.
20 Té ja ka fè bon déotwa jou nou poto’o vwè ni solèy ni zétwal, é tanpèt-la ki té ka malmenné-nou la, a pa té on ti tanpèt ! Kifè i té ka sanm sa sé mò nou té kay mò. 21 Sa té ja ka fè déotwa jou nou po’o té manjé ayen. Alò Pòl mété-y doubout anmitan a yo, é i di : « Lézòm, zò té dwèt suiv konsèy an mwen. Siwvwè nou té rété an Krèt, nou pa té’é vwè mizè konsa, é nou pa té’é oblijé jété ayen an lanmè-la. 22 Men konnyéla, sa an ka konséyé-zòt sé pa lagé, pas ponyonn adan zòt pé’é mò. Sé bato-la tousèl ki ké krazé. 23 Yèswa, Bondyé-la an ka sèvi la é kè an ka adoré la voyé on zanj a-y é zanj-la doubout owa an mwen. 24 I di-mwen : “Pòl, ou pa bizwen pè ! Fò ou ay douvan Séza. Anplisdisa, Bondyé ké sové ki vou, ki sé moun-la ki ka vwayajé èvè-w la.” 25 Alò lézòm pa pè ! Pas an ka fè Bondyé konfyans : tout biten ké fèt ègzaktèman kon zanj-la di-mwen. 26 Sèlman, fò bato-la échwé asi on lilèt. »
27 Sa té ja ka fè 14 jou nou té pati, é tanpèt-la té ka malmenné-nou asi lanmè a Adriya. Koté minui, sé matlo-la té ni lenprésyon kè nou té toupré rivé owa on mòso tè. 28 Yo gadé ki fondè dlo-la té yé, é yo touvé 36 mèt apépré. Yo ay tibwen pi douvan, é yo wougadé fondè a dlo-la ankò. Kou-lasa yo touvé 27 mèt apépré. 29 Konm sé matlo-la té pè bato-la ay échwé anlè kay-la, yo lagé 4 lank an lanmè-la pa dèyè bato-la. Yo té présé vwè jou wouvè. 30 Konm yo té bizwen sòti òbò bato-la pou yo té chapé kò a yo, yo mèt-yo ka fè kannòt-la désann an lanmè-la, é yo fè moun konprann kè sé lagé yo té kay lagé déotwa lank douvan bato-la. 31 Lè Pòl vwè sa, i di ofisyé a lawmé la é sé sòlda-la : « Si sé boug-lasa pa rété òbò bato-la, zò pé’é sové. » 32 Alò sé sòlda-la koupé kòd a kannòt-la, é yo lésé-y tonbé an lanmè-la.
33 On ti moman avan jou té wouvè, Pòl ankourajé-yotout a manjé on ti biten. I di-yo : « Jòdila, sa ka fè 14 jou zò la ka atann, 14 jou kè zò enkyèt é kè zò po’o manjé ayen menm. 34 Kifè, an ka ankourajé-zòt a manjé on ti biten ; sé pou byen a zòt, pas ponyonn adan zòt pé’é pèd pa menm onsèl chivé asi tèt a-y. » 35 Lè Pòl fin palé, i pran on mòso pen, i di Bondyé mèsi douvan toutmoun, i kasé pen-la, é i koumansé manjé. 36 Alò yotout woupran fòs, é yo osi, yo koumansé manjé. 37 Asi bato-la, nou té a 276* antout. 38 Lè yo manjé vant a yo plen, yo jété blé-la an lanmè-la pou bato-la té vin pi léjè.
39 Lè jou wouvè, yo vwè on mòso tè, men yo pa té ka rivé rèkonnèt ki tè ésa. Pawkont yo vwè on plaj èvè onpakèt sab, é yo désidé kè si yo té pé, yo té’é fè bato-la échwé anlè-y. 40 Alò yo koupé kòd a sé lank-la, é yo lésé sé lank-la désann an lanmè-la. An menm balan-la, yo démaré sé ranm-la ki té ka sèvi-yo gouvènay. Yo fè ti vwal-la ki douvan bato-la monté pou van-la té souflé adan, é aprésa, yo ay an dirèksyon a plaj-la. 41 Lèwgadé, yo bouré anlè on ban-sab* ; lanmè-la té ka varé asi ban-sab-lasa asi 2 koté a-y. Alò yo fè bato-la échwé an sab-la ; douvan a-y rantré an sab-la é i rété pri la. É dèyè a bato-la koumansé krazé an plizyè mòso pas sé vag-la té ka fwayé fò anlè-y. 42 Alò sé sòlda-la désidé tchouyé sé prizonyé-la pou ponyonn pa chapé kò a-y alanaj. 43 Men ofisyé a lawmé la té vlé sové Pòl. Kifè i anpéché-yo fè sa yo té ni lentansyon fè la. I mandé séla ki té sav najé la soté an lanmè-la, é i di-yo fè ansòt pou yo rivé anlè plaj-la an prèmyé. 44 Sélézòt-la té’é rivé apré asi plaj-la ; yo té’é monté asi planch oben asi dòt mòso a bato-la. É sé konsa yotout rivé asi plaj-la san ayen rivé-yo.