Évanjil a Jan
19 Alò Pilat di sé sòlda-la menné Jézi alé, é ba-y koud-fwèt. 2 Sé sòlda-la naté déotwa branch ki té plen pikan, yo fè on kouwòn èvè-y é yo mété-y asi tèt a Jézi. Anplisdisa, yo mèt on gran wòb bòwdo asi-y. 3 Aprésa yo vin owa a-y, é yo koumansé fè jé èvè-y. Yo té ka di : « Wa a sé Juif-la ! Pasé on bon ti jouné* ! » É yo mété-yo ka ba-y kalòt osi. 4 Pilat wouviré déwò la é i di-yo : « Gay sa ! An ka menné-y déwò la ba zòt, konsa zò ké sav kè an pa ni ayen a rèpwoché-y. » 5 Alò Jézi sòti déwò la. I té ni lenj bòwdo la anlè-y, é kouwòn-la ki té fèt èvè pikan la té anlè tèt a-y. É Pilat di sé moun-la : « Mi nonm-la ! » 6 Men lè sé prèt pi enpòwtan la é sé ofisyé-la vwè-y, yo mété-yo ka kriyé : « Mété-y asi on poto ! Mété-y asi on poto* ! » Pilat di-yo : « Pran-y zòmenm a zòt é tchouyé-y*, pas mwen, an pa ni ayen a rèpwoché-y. » 7 Sé Juif-la réponn-li : « Nou ni on lwa, é dapré lwa-lasa, fò i mò, pas i ka fè moun konprann kè i sé gason a Bondyé. »
8 Lè Pilat tann sa yo té ka di, i touvé-y pi pè ankò. 9 I viré rantré akaz a gouvènè-la é i di Jézi : « Kikoté ou sòti ? » Men Jézi pa réponn-li. 10 Alò Pilat di-y : « Ou konsa ou vé pa réponn-mwen ? An ni pouvwa pou libéré-w é an ni pouvwa pou tchouyé-w* osi. Ou pa sav sa ? » 11 Jézi réponn-li : « Ou pa té’é pé fè-mwen ayen siwvwè Bondyé-la ki anhola pa té pèwmèt-vou fè sa*. Sé pousa, boug-la ki lagé-mwen an men a-w la fè on pi gwo péché ki-w. »
12 Akòz dè sa, Pilat té bizwen lagé-y, é i té ka éséyé touvé on jan pou i té fè sa. Men sé Juif-la mèt-yo ka kriyé : « Si ou lagé misyé, ou pa zanmi a Séza. Dépi on moun ka di kè i wa, moun-lasa kont Séza. » 13 Alò lè Pilat tann sé pawòl-lasa, i menné Jézi déwò la, é i sizé an tribinal-la. La i té sizé la, atè-la té fèt èvè wòch, é an ébré yo té ka kriyé koté-lasa Gabata. 14 Men sé té jou a Préparasyon a Lapak é i té midi apépré*. Pilat di sé Juif-la : « Mi wa a zòt ! » 15 Men yo mèt-yo ka hélé : « Tchouyé-y ! Tchouyé-y ! Mété-y asi on poto* ! » Pilat di-yo : « Zò vé an tchouyé wa a zòt ? » Sé prèt pi enpòwtan la réponn : « Onsèl wa nou ni, sé Séza ! » 16 Alò i lagé-y an men a yo pou yo té kloué-y asi on poto*.
Kifè yo menné Jézi alé. 17 I té ka chayé poto-siplis a-y limenm a-y, é i ay on koté yo té ka kriyé Kràn (an ébré, yo té ka kriyé koté-lasa Gòlgota). 18 Yo kloué-y asi poto-la, é té ni dézòt boug èvè-y. Jézi té anmitan, é té ni yonn agòch a-y é yonn adwat a-y. 19 Anplisdisa Pilat fè on pano, é i mété-y asi poto-siplis-la. Mi sa i maké asi-y : « Jézi Nazaréyen-la, wa a sé Juif-la. » 20 Ni onlo Juif ki li sa ki té maké asi pano-la paskè koté-la yo té kloué Jézi la té ka touvé-y toupré vil-la. Sa ki té maké anlè pano-la té ékri an ébré, an laten é an grèk. 21 Men sé prèt pi enpòwtan la di Pilat : « Pa maké : “Wa a sé Juif-la”, men pisimé ou maké : “Boug-lasa di : ‘An sé wa a sé Juif-la.’” » 22 Pilat réponn : « Sa an maké, sé sa an maké. »
23 Men lè sé sòlda-la kloué Jézi asi poto-la, yo pran yonn adan sé lenj-la i té ni anlè-y la é yo séparé-y an 4, on mòso pou chak sòlda. Yo pran gran wòb-la i té ni anlè-y la osi. Wòb-lasa té fèt èvè onsèl mòso twèl ; i pa té ni pon kouti dépi anho jis anba. 24 Kifè yonn té ka di lòt : « Pa chiré-y, men an-nou fè on tiraj o sò pou sav kimoun ki ké ni-y. » Sé té pou on pasaj adan Lézékriti té réyalizé. Pasaj-lasa té ka di : « Yo séparé lenj an mwen antrè yo é yo fè on tiraj o sò pou sav ka chakmoun ké ni. » É sé sa sé sòlda-la fè.
25 Men manman Jézi é sè a manman-y té owa poto-siplis-la. Anplisdisa, té ni Mari, madanm a Klopas é Mari Magdaléèn-la. 26 Jézi vwè manman-y ; disip-la i té enmé la té doubout akoté a-y. Lè i vwè-yo, Jézi di manman-y : « Mi gason a-w ! » 27 Aprésa i di disip-la : « Mi manman-w ! » É dépi sa, disip-la pran-y akaz a-y.
28 Plita, lè Jézi rann-li kont kè tout biten té akonpli, i di : « An swèf. » Sé té pou on pasaj a Lézékriti té réyalizé. 29 Té ni on ja la, é i té plen èvè diven ki té touné an vinèg. Alò yo mèt on éponj plen vinèg an bout a on baton* é yo mété-y owa bouch a-y. 30 Lè Jézi gouté vinèg-la, i di : « Sa réyalizé ! » I bésé tèt a-y é i mò*.
31 Konm sé té jou a Préparasyon-la, sé Juif-la di Pilat kasé janm a sé moun-la ki té anlè sé poto-siplis-la é woté kò a yo la. Si yo mandé-y sa, sé té pou sé kadav-la pa té rété anlè sé poto-la jou a saba la (pas jou-lasa, sé té on gran saba). 32 Alò sé sòlda-la alé é yo kasé janm a toulédé boug-la yo té kloué anlè sé poto-la akoté a Jézi. 33 Men lè yo rivé owa Jézi, yo vwè kè i té ja mò. Kifè, yo pa kasé janm a-y. 34 Men yonn adan sé sòlda-la pèsé òbò kòt a Jézi èvè on lans, é lamenmla, dlo é san enn sòti. 35 Moun-la ki vwè sé biten-lasa palé dè sa i vwè, é sa i di sé lavérité. Boug-lasa sav kè sa i ka di sé lavérité, é i ka di sé biten-lasa pou zòt osi zò pé sa kwè. 36 An réyalité, sé biten-lasa fèt pou on pasaj a Lézékriti réyalizé. Pasaj-lasa ka di : « Yo pé’é kasé* pon zo a-y. » 37 É ni ondòt pasaj a Lézékriti ki ka di : « Yo ké rété ka gadé sila yo pèsé la. »
38 Aprésa, Jozèf, on boug Arimati, ay vwè Pilat pou mandé-y si i té pé pran kò a Jézi. Sé té on disip a Jézi, men i pa fè ponmoun sav sa pas i té pè sé Juif-la. Pilat di-y kè i pé pran kò-la. Kifè i alé, é i pati èvè kò a Jézi. 39 Nikodèm, boug-la ki té ay vwè Jézi on jouswa, vin osi. I menné on mélanj ki té fèt èvè mir* é lalwé, é mélanj-lasa té ka pézé 33 kilo apépré*. 40 Yo pran kò a Jézi, yo vlopé-y èvè twèl an len é èvè biten ki ka santi bon. Sé konsa sé Juif-la té abityé préparé kò a on moun avan yo té téré-y. 41 É la yo té tchouyé-y* la, té ni on jaden. Adan jaden-lasa té ni on tonm tou nèf ; yo po’o té mèt ponmoun adan. 42 Konm sé té jou a Préparasyon-la pou sé Juif-la, é konm tonm-la té toupré, yo mèt Jézi adan-y.