Akt (sa sé apòt-la fè)
23 Pòl té ka gadé Sannédren-la fiks é i di : « Lézòm, léfrè, douvan Bondyé an pé di kè konsyans an mwen pa’a bat-mwen, pas jous alajouné jòdi, an pa fè ayen ki pa bon. » 2 Lamenmla, Ananyas gran prèt-la mandé sé moun-la ki té doubout owa Pòl la ba-y kou asi bouch a-y. 3 Alò Pòl di-y : « Bondyé ké rann-vou kou a-w, ipokrit* ! Ou sizé la pou ou pé sa jijé-mwen dapré sa Lwa-la ka di, men anmenmditan, ou pa’a suiv sa Lwa-la ka di pas ou ka mandé-yo ban’an kou. Ou ka di sa ou ka fè la byen ? » 4 Sé moun-la ki té la la di : « Ou ka di gran prèt a Bondyé bétiz ! » 5 Pòl di : « Léfrè, an pa té sav kè sé té gran prèt-la. Pas mi sa ki maké : “Fò pa ou malpalé on moun ki chèf adan pèp a-w.” »
6 Pòl té sav kè adan Sannédren-la, ni on pati ki té sadiséyen é ni on pati ki té farizyen. Alò i palé byen fò. I di : « Lézòm, léfrè, an sé on farizyen, an sé on pitit a farizyen. Si yo ka jijé-mwen konnyéla la, sé pas an ka kwè kè moun-mò ké résisité. » 7 Akòz dè sa Pòl di la, on gwo babyé lévé ant sé farizyen-la é sé sadiséyen-la, é yo pa té ka tonbé dakò. 8 Pas sé sadiséyen-la ka di kè pa ni rézirèksyon, pa ni zanj, é pa ni lèspri, alòskè sé farizyen-la ka di kè tout sé biten-lasa ka ègzisté*. 9 Alò onlo moun mèt-yo ka hélé fò toubònman. Déotwa iskrib ki té farizyen lévé, é yo koumansé babyé bon babyé la. Yo té ka di : « Nou pa’a vwè ka boug-lasa fè dè mal ; é si on lèspri oben on zanj palé ba-y, ... » 10 Konm biten-la té ka vin pi cho ankò, komandan a lawmé la té pè yo tchouyé Pòl. Alò i mandé sé sòlda-la désann é woté-y anmitan sé mésyé. Anplisdisa, i di-yo menné-y la sé sòlda-la ka rété la.
11 Men pannan lannuit Ségnè-la vin owa a-y é i di-y : « Pa lagé ! Pas menmjan ou palé dè mwen a Jérizalèm, sé menmjan-la fò ou ké palé a Wòm osi. »
12 Lè jou wouvè, sé Juif-la monté on konplo é yo fè on pwomès. Yo di konsa kè yo pé’é ni manjé ni bwè toutotan yo pa tchouyé Pòl. 13 Ni plis ki 40 boug ki fè pwomès-lasa. 14 Sé boug-lasa ay vwè sé prèt pi enpòwtan la é sé ansyen-la, é yo di : « Nou fè on pwomès é a pa pawòl anlè : nou pé’é manjé ayen toutotan nou pa tchouyé Pòl. 15 Alò konnyéla, zòt èvè Sannédren-la, mandé komandan a lawmé la menné Pòl ba zòt. Fè-y kwè kè zò bizwen pozé Pòl plis kèsyon. Men avan Pòl rivé, nou ké ja paré pou nou tchouyé-y. »
16 Men nivé a Pòl* tann-palé dè konplo-la yo té monté la. Kifè, i ay la sé sòlda-la té ka rété la é i di Pòl sa. 17 Aprésa Pòl kriyé yonn adan sé ofisyé a lawmé la é i di-y : « Menné tiboug-lasa owa komandan a lawmé la pas i ni on biten a di-y. » 18 Alò ofisyé-la menné tiboug-la owa komandan-la é i di komandan-la : « Pòl, boug-la ki lajòl la, kriyé-mwen é i mandé-mwen menné tiboug-lasa ba-w, pas i ni on biten a di-w. » 19 Komandan a lawmé la tchenbé men a tiboug-la, i menné-y on ti koté apa é i mandé-y : « Ka ou ni a di-mwen ? » 20 Tiboug-la réponn-li : « Sé Juif-la mèt-yo dakò pou mandé-w si ou pé menné Pòl an Sannédren-la dèmen, pou yo pé sa pozé-y plis kèsyon. 21 Men pa kwè-yo, pas ni plis ki 40 boug pawmi yo ki monté konplo pou yo tchouyé-y é yo fè on pwomès. Yo di kè yo pé’é ni manjé ni bwè toutotan yo pa tchouyé-y ; yo ja paré, é konnyéla onsèl biten yo ka atann, sé kè ou di-yo banko. » 22 Alò komandan a lawmé la di tiboug-la : « Pa di ponmoun sa ou sòti di-mwen la. » Aprésa i lésé-y pati.
23 Lèwgadé, komandan a lawmé la fè 2 ofisyé vin é i di-yo : « Fè 200 sòlda préparé-yo pou ay a Sézaré. Anplisdisa, fè 70 kavalyé é 200 boug ki ni lans préparé-yo pou ay anbala osi. Fò-yo ké pati koté névè-d-swa*. 24 Prévwa déotwa chouval ba Pòl osi. Konsa i ké pé vwayajé pou ay aka Féliks gouvènè-la san ayen rivé-y. » 25 Aprésa i maké on lèt ki té ka di :
26 « Mwen Klòd Lizyas, an ka maké lèt-lasa ba-w, gouvènè Féliks, vou ki mérité onlo lonnè. An ka voyé on bèl bonjou ba-w ! 27 Sé Juif-la té kenbé boug-lasa, é yo té kay tchouyé-y, men an vin vitman èvè sòlda an mwen é an sové-y pas an aprann kè i Women. 28 É konm an té bizwen sav pou ki biten yo té ka akizé-y, an menné-y douvan Sannédren a yo. 29 An rann-mwen kont kè sé parapòt a sèwten biten ki anrapò èvè Lwa a yo kè yo ka akizé-y. Pawkont, i pa fè ayen ki mérité kè yo tchouyé-y oben kè yo mété-y lajòl. 30 Men konm an vin sav kè yo monté konplo pou yo tchouyé boug-lasa, an ka voyé-y ba-w onfwamenm é an di sé boug-la ki ka akizé-y la vin èspliké-w pou ki rézon yo ka pòté plent kont li. »
31 Alò sé sòlda-la fè sa komandan a lawmé la té di-yo fè la. Yo pran Pòl é yo menné-y a Antipatris pannan lannuit. 32 Lèlandèmen-la, yo lésé sé kavalyé-la pati èvè Pòl, men yo, yo rètouné la sé sòlda-la ka rété la. 33 Sé kavalyé-la rantré a Sézaré, yo ba gouvènè-la lèt-la, é yo lagé Pòl an men a-y. 34 Alò i li lèt-la é i mandé Pòl kikoté i fèt ; Pòl fè-y sav kè i fèt an Silisi. 35 I di Pòl : « Lèwvwè sé moun-la ki ka akizé-w la ké rivé, an ké pran tan kouté sa ou ni a di. » Aprésa i ba déotwa gad on lòd. I di-yo véyé Pòl adan chato a Éwòd.