Akt (sa sé apòt-la fè)
12 An tan-lasa, wa Éwòd koumansé pèwsékité déotwa moun adan lasanblé-la. 2 I di sòlda a-y pran on épé, é tchouyé Jak, frè a Jan. 3 Lè i vwè kè sa té ka fè sé Juif-la plézi, i di sòlda a-y arété Pyè osi (sa rivé pannan fèt a sé Pen san lèvi la). 4 Yo kenbé-y, é aprésa yo mété-y lajòl. Yo lagé-y an men a 4 gwoup sòlda é adan chak gwoup té ni 4 sòlda. Chak gwoup-la té ka véyé-y yonn apré lòt. Éwòd té ni lentansyon menné-y douvan pèp-la apré Lapak. 5 Kifè, pannan Pyè té an lajòl-la, yo té ka véyé-y byen. É frè é sè a lasanblé-la té ka priyé ba-y onlo toubònman.
6 Lavèy a jou-la Éwòd té k’ay menné Pyè douvan pèp-la, pannan lannuit, Pyè té ka dòmi anmitan a 2 sòlda é men a-y té maré èvè 2 chenn. Té ni dézòt sòlda douvan pòt-la, ki té ka véyé lajòl-la. 7 Lèwgadé, on zanj a Jéova enn parèt, é on limyè mété-y ka kléré, koté-la Pyè té yé la. Zanj-la mannyé Pyè òbò kòt a-y pou i té lévé-y, é i di-y : « Dépéché-w, lévé-w ! » É sé chenn-la ki té an men a-y la enn tonbé. 8 Zanj-la di-y : « Abiyé-w é mèt soulyé a-w. » É sé sa i fè. Aprésa, zanj-la di-y : « Mèt manto a-w anlè-w, é suiv-mwen. » 9 Pyè sòti, é i suiv zanj-la, men i pa té sav kè sa zanj-la té ka fè la sé té laréyalité. I té ka konprann kè sé on vizyon i té ka vwè. 10 Yo pasé douvan on prèmyé gwoup sòlda, yo pasé douvan on dézyèm, é yo rivé owa pòt an fè la ki té ka bay asi vil-la. Pòt-la wouvè tousèl a-y douvan yo. Apré yo sòti, yo maché on ti moman ansanm adan on lari, é zanj-la pati onsèl kou. 11 Lè Pyè konprann ka ki té ka fèt, i di : « Konnyéla, an sav kè Jéova voyé zanj a-y, kè i sové-mwen anba men a Éwòd, é kè i fè ansòt pou sé malè-la sé Juif-la té ka swété pou mwen la pa rivé-mwen. An pa ni pon dout asi sa ! »
12 I réfléchi asi sa ki té pasé, é aprésa i ay aka Mari, manman Jan (yo té ka kriyé Jan, Mawk osi). 13 Onpakèt moun té sanblé la, é yo té ka priyé. Lè i kongné asi pòwtay-la, on bòn non a-y sé Wòd vin réponn. 14 Lè i rèkonnèt vwa a Pyè, a pa ti kontan i té kontan ! Kifè olyé i té ay wouvè pòt-la, i kouri andidan la pou di kè Pyè té douvan pòwtay-la. 15 Yo di-y : « Tèt a-w pati ! » Men konm i pa té ka démòd, yo mèt-yo ka di : « Ében sé zanj a-y alò ! » 16 Pannansitan, Pyè té ka kontinyé frapé asi pòt-la. Lè yo wouvè pòt-la é yo vwè-y, yo rété èstèbèkwè. 17 Men i fè-yo sign èvè men a-y pou di-yo pé la, é i rakonté-yo tousa Jéova fè pou woté-y lajòl. Anplisdisa i di-yo : « Ay rakonté Jak é sé frè-la sa an sòti di-zòt la. » Aprésa i sòti, é i ay ondòt koté.
18 Lè jou wouvè, sé sòlda-la té ozabwa èvè kò a yo pas yo pa té sav ola Pyè té pasé. 19 Éwòd mété-y ka chèché-y toupatou, é konm i pa té ka touvé-y, i pozé sé gad-la kèsyon, é i fè ansòt pou yo pini-yo. I sòti an Jidé, i désann Sézaré, é i rété déotwa tan anbala.
20 Éwòd té kòlè* èvè moun ki té ka rété a Ti é a Sidon. Kifè, sé moun-lasa désidé kè yo ké ay vwè-y ansanm. Yo ay vwè Blastis pou mandé-y édé-yo. Boug-lasa té ka okipé-y dè kaz a wa-la*. Aprésa yo mandé Éwòd si i té dakò pou fè lapé èvè yo, pas sé an péyi a-y yo té ka achté manjé pou péyi a yo. 21 On jou, pèp-la té sanblé pou on lokazyon èspésyal, é Éwòd mèt lenj a wa a-y anlè-y. I sizé an tribinal-la, é i mété-y ka fè on diskou. 22 Lèwgadé, sé moun-la ki té ka kouté-y la mèt-yo ka hélé. Yo té ka di : « A pa on boug ki ka palé la, men sé on bondyé ! » 23 Lamenmla, zanj a Jéova pini-y, pas i pa ba Bondyé glwa-la i té mérité la, men i pran glwa-lasa pou-y. Vè manjé-y é i mò.
24 Men pi tan té ka pasé, pi moun té ka tann pawòl a Jéova, é kantité disip ki té ni té ka kontinyé ògmanté.
25 Lè Bawnabé é Sòl woumèt sé frè Jérizalèm la sa yo té menné ba yo la, yo viré Antyòch, é yo menné Jan èvè yo, sila yo ka kriyé Mawk osi.