Évanjil a Matyé
18 A moman-lasa sé disip-la vin owa Jézi, é yo mandé-y : « Kimoun ki pi gran adan wayòm-la ki an syèl-la ? » 2 Alò Jézi kriyé on jenn timoun, i mété-y anmitan a yo, 3 é i di : « San manti ba zòt, siwvwè zò pa’a chanjé pou vin kon jenn timoun, zò pé’é rantré adan wayòm-la ki an syèl-la. 4 Kifè, si on moun ka montré-y toupiti é i ka vin kon jenn timoun-lasa, sé-y ki pi gran adan wayòm-la ki an syèl-la. 5 É si on moun ka akéyi on jenn timoun kon sila an non an mwen, sé mwen i ka akéyi osi. 6 Sé piti-lasa ni fwa adan mwen, men si on moun fè yonn adan yo tribiché, vométan yo maré on gwo wòch a moulen* an kou a-y, kon séla sé boukèt-la ka fè touné la, é kè yo jété-y anmitan lanmè-la.
7 « Malè ké rivé mond-lasa pas ni biten ki ka fè moun tribiché adan-y ! Antoutjan, ké ni biten pou fè moun tribiché ; men siwvwè on moun ka fè lézòt tribiché, malè ké rivé-y. 8 Alò si men a-w oben pyé a-w ka fè-w tribiché, koupé-y, é jété-y lwen a-w. Vométan ou ni onsèl men oben onsèl pyé é ou risivwè lavi, olyé yo jété-w èvè 2 men a-w é 2 pyé a-w adan difé-la ki pa’a jen étenn la. 9 Anplisdisa, si zyé a-w ka fè-w tribiché, raché-y é jété-y lwen a-w. Vométan ou ni onsèl zyé é ou risivwè lavi, olyé yo jété-w èvè 2 zyé a-w adan difé a jéenn-la*. 10 Tansyon a zòt pou zò pa méprizé ponyonn adan sé piti-lasa, pas yo ni zanj a yo an syèl-la ki toujou èvè Pap’an mwen ki an syèl-la. 11 *
12 « Ka zò ka di ? Si on boug ni 100 mouton, é yonn adan yo pèd, zò pa’a di i ké lésé sé 99 la ki ka rété la an montangn-la, é i ké ay chèché sila ki pèd la ? 13 É an ka di-zòt kè siwvwè i touvé-y, i ké pi kontan davwa i touvé-y ki davwa i pa pèd sélézòt 99 la. 14 Menmjan-la, Pap’an mwen* ki an syèl-la vé pa ponyonn adan sé piti-lasa pèd vi a-y.
15 « Si frè a-w péché, ay vwè-y apa é èspliké-y ki péché i fè*. Si i kouté-w, ou fè frè a-w wouvin asi bon chimen-la. 16 Men si i pa’a kouté-w, menné yonn oben 2 moun èvè-w. Konsa ké ni 2 ou 3 témwen* ki ké pé di ègzaktèman sa ki pasé. 17 Si i pa’a kouté-yo, palé ba lasanblé-la*. Si i pa’a kouté lasanblé-la nonplis, aji èvè-y konsi sé on moun ki sòti adan sélézòt nasyon-la, oben konsi sé on moun ki ka ranmasé lajan a enpo.
18 « San manti ba zòt, tousa zò ké désidé maré asi latè ké ja maré an syèl-la. É tousa zò ké désidé défèt asi latè ké ja défèt an syèl-la. 19 An ka di-zòt ondòt biten ankò, é sé on biten ki sèten : asi latè, si ni 2 adan zòt ki mèt-yo dakò pou mandé Pap’an mwen ki an syèl-la on biten ki enpòwtan, kèlkèswa sa yo mandé-y, i ké fè-y pou yo. 20 Pas lè ni 2 ou 3 moun ki sanblé an non an mwen, an la anmitan a yo. »
21 Alò Pyè vin owa Jézi é i di-y : « Ségnè, konmen fwa fò an padonné frè an mwen lè i ka péché kont mwen ? 7 fwa ? » 22 Jézi réponn-li : « Mwen an ka di-w kè a pa 7 fwa tousèl, men sé 77 fwa pou ou padonné-y. »
23 « Mi sé pousa nou pé konparé wayòm-la ki an syèl-la èvè on wa ki té vlé kè èsklav a-y péyé-y sa yo té ka doué-y. 24 Lè i koumansé ranmasé sa yo té ka doué-y, yo menné on boug ba-y ; misyé-lasa té ka doué-y 10000 talan*. 25 Men konm i pa té pé woumèt lajan-la, mèt a-y di vann-li, vann madanm a-y, timoun a-y, é tousa i té ni, pou i pé sa rékipéré lajan a-y. 26 Alò èsklav-la tonbé ajounou douvan-y é i sipliyé-y. I di-y : « Souplé, ban’an tibwen tan ankò é an ké rèmèt-vou tousa an ka doué-w. » 27 Mèt a-y vin ni pityé pou-y. I lésé-y pati é i di-y kè i pa’a doué-y ayen ankò. 28 Men èsklav-lasa ay touvé ondòt èsklav ki té ka doué-y 100 dènyé. I kenbé-y, i koumansé tranglé-y é i di-y : « Ban’an tousa ou ka doué-mwen ! » 29 Alò lòt èsklav-la mété-y ajounou douvan a-y é i mété-y ka sipliyé-y : « Souplé, ban’an tibwen tan ankò é an ké ranbousé-w ! » 30 Men misyé pa té vlé tann pon lang. I fè-yo mèt boug-la lajòl, jiskatan i ranbousé-y sa i té ka doué-y. 31 Lèwvwè sélézòt èsklav-la vwè sa ki fèt, sa fè-yo lapenn toubònman é yo ay rakonté mèt a yo tousa ki té pasé. 32 Alò mèt-la fè èsklav-la vin é i di-y : « Èsklav méchan ki ou yé ! Lèwvwè ou sipliyé-mwen, an di-w kè ou pa’a doué-mwen ayen ankò. 33 Alò vou a tou a-w, ou pa’a di kè ou té dwèt ni pityé pou kolèg a-w menmjan an té ni pityé pou-w ? » 34 Alò mèt a-y fè gwo kòlè toubònman, é i fè-yo mèt boug-la lajòl*, joustan i ranbousé-y tousa i té ka doué-y. 35 Sé konsa Pap’an mwen ki an syèl-la ké fè èvè zòt, si zò pa’a padonné frè a zòt èvè tout tchè a zòt. »