Akt (sa sé apòt-la fè)
22 « Lézòm, léfrè, lépapa, konnyéla kouté-mwen ! An kay èspliké-zòt adan ki sitiyasyon an yé. » 2 Ében lè yo tann Pòl ka palé an ébré ba yo, sé lè yo pé menm. Pòl di-yo : 3 « An sé on Juif é an fèt a Taws an Silisi. Men an ay lékòl isidan adan vil a Jérizalèm, é sé Gamalyèl limenm a-y ki fè lékòl ban mwen. An aprann kijan pou mwen suiv tout détay ki adan Lwa a Moyiz é an sèvi Bondyé èvè tout tchè an mwen menmjan ki zòtout. 4 An pèwsékité moun ki té ka suiv Chimen-lasa, é an fè ansòt pou yo tchouyé-yo. An fè-yo maré ki misyé ki madanm, é an fè-yo mèt-yo lajòl osi. 5 Dayè, gran prèt-la é tout moun ki adan lasanblé a sé ansyen-la* pé di-zòt sa. An jous fè-yo ban-mwen plizyè lèt pou sé chèf juif la ki té a Damas la. Anplis an té ja anchimen pou ay arété sé frè-la anbala, é an té ni lentansyon menné-yo Jérizalèm tou maré pou yo té pini-yo.
6 « Men koté midi, lèwvwè an té toupré rivé Damas, on gwo limyè enn sòti an syèl-la é i mété-y ka kléré alantou an mwen. 7 Lèwgadé an tonbé atè, é an tann on vwa ka di-mwen : “Sòl, Sòl, poukwa ou ka pèwsékité-mwen ?” 8 An réponn : “Kimoun ou yé Ségnè ?” É i di-mwen : “An sé Jézi Nazaréyen-la, sila ou ka pèwsékité la.” 9 Sé boug-la ki té èvè mwen la vwè limyè-la, men yo pa tann vwa a sila ki té ka palé ban mwen la. 10 Alò an mandé : “Ségnè, ka pou an fè ?” Ségnè-la réponn-mwen : “Lévé-w, ay a Damas, é lè ou ké rivé la, on moun ké di-w tousa pou ou fè.” 11 Men an pa té ka vwè ayen ankò, pas limyè-la té fò toubònman. Kifè, sé moun-la ki té èvè mwen la kenbé men an mwen pou menné-mwen a Damas.
12 « A Damas, on boug non a-y sé Ananyas vin owa an mwen. I té ka krenn Bondyé, é i té ka fè sa Lwa-la té ka di. Anplisdisa, tout sé Juif-la ki té ka rété an vil-lasa té ka palé anbyen dè-y. 13 I mété-y doubout owa an mwen, é i di-mwen : “Sòl, frè an mwen, woukoumansé vwè klè !” An lévé zyé an mwen anlè tousuit, é an vwè Ananyas. 14 I di-mwen : “Bondyé a zansèt an nou chwazi-w pou ou aprann konnèt volonté a-y, pou ou pé sa vwè Sila ki jis la é pou ou pé sa tann vwa a-y, 15 pas fò ou ay palé dè tousa ou vwè-y fè é dè tousa ou tann-li di. 16 É konnyéla, poukwa ou ka tadé konsa ? Lévé, pran lèbatèm, é montré kè ou ni fwa adan non a Jézi pou Bondyé padonné péché a-w.”
17 « Men lè an viré Jérizalèm, pannan an té ka priyé an Tanp-la, an vwè on vizyon ; 18 an vwè Ségnè-la é mi sa i di-mwen : “Fè mannèv, sòti Jérizalèm ! Fè vit, pas moun kotésit pé’é kouté sa ou ka di anrapò èvè mwen.” 19 Alò an di : “Ségnè, yomenm a yo sav byen kè an té k’ay adan sé sinagòg-la é kè an té ka mèt moun ki ka kwè adan-w lajòl. An té ka ba-yo koud-fwèt osi. 20 É lè yo tchouyé Étyèn sèwvitè a-w, an té la. An té dakò èvè sa ki té ka fèt é an té ka véyé lenj a sé moun-la ki té ka tchouyé-y la.” 21 Men magrésa i réponn-mwen : “Alé-w, pas an ké voyé-w owa moun ki pa Juif é ki ka rété lwen kotésit.” »
22 Yo kontinyé kouté-y joustan i di sé pawòl-lasa. Men lè i fin palé, yo mèt-yo ka hélé. Yo té ka di : « On boug konsa pa dwèt rété si latè pli lontan ! Fò i mò ! » 23 Non sèlman yo té ka hélé, men anplisdisa, yo té ka voyé lenj a yo alé, é yo té ka voyé pousyè anlè. 24 Alò komandan a lawmé la ba sé sòlda-la lòd ; i di-yo menné Pòl la sé sòlda-la té ka rété la. Anplisdisa, i di-yo ba-y koud-fwèt pou fè-y palé. Konsa, i té’é pé sav pou ki biten sé moun-la té ka hélé anlè Pòl konsa. 25 Men lèwvwè yo maré Pòl pou yo té ba-y koud-fwèt, i di ofisyé a lawmé la ki té doubout la : « Ès zò ni dwa ba on Women* koud-fwèt alòskè zò po’o jijé-y ? » 26 Lèwvwè ofisyé-la tann sa, i ay owa komandan-la é i rakonté-y sa. I mandé-y : « Ka ou ni lentansyon fè ? Pas boug-lasa sé on Women ! » 27 Alò komandan-la vin owa Pòl é i di-y : « Ou sé on Women ? » I réponn-li : « Wi, an sé on Women. » 28 Komandan-la réponn : « Pou an té ni dwa vin Women, fò-mwen té péyé on bèl lajan. » Men Pòl réponn : « Men mwen, dépi lè an fèt an sé on Women. »
29 Lamenmla, sé sòlda-la ki té k’ay fwété-y la pou fòsé-y palé sòti owa a-y. É lèwvwè komandan-la rann-li kont kè Pòl té Women, i pran pè, pas i té fè-yo maré-y èvè chenn.
30 Alò lèlandèmen-la, konm komandan-la té vlé sav ègzaktèman pou ki biten sé Juif-la té ka akizé Pòl, i fè sé sòlda-la démaré-y. Anplisdisa, i mandé sé prèt pi enpòwtan la é tout Sannédren-la réini-yo. Aprésa i fè Pòl désann é i mèt Pòl anmitan a yo.