Évanjil a Jan
20 Prèmyé jou a simenn-la, Mari Magdaléèn-la ay owa tonm-la granbonnè maten, pannan té ka fè nwè toujou, é i rann-li kont kè yo té ja woté wòch-la ki té douvan tonm-la. 2 Alò i kouri ay vwè Simon Pyè é lòt disip-la, sila Jézi té enmé onlo la, é i di-yo : « Yo woté Ségnè-la an tonm-la, é nou pa sav ola yo mété-y. »
3 Alò Pyè é lòt disip-la ay owa tonm-la. 4 Yo toulédé mèt-yo ka kouri ansanm, men lòt disip-la ay pi vit ki Pyè, é i rivé prèmyé owa tonm-la. 5 I panché-y pou i té gadé andidan tonm-la é i vwè sé twèl an len la, men i pa rantré. 6 Tousuit apré, Simon Pyè rivé dèyè do a-y, i rantré an tonm-la é i vwè sé twèl an len la andidan la. 7 Twèl-la yo té mèt asi tèt a Jézi la pa té menm koté ki sé rèstan twèl la, men i té vlopé é i té on koté apa. 8 Lèwgadé, lòt disip-la, sila ki rivé prèmyé owa tonm-la, rantré andidan tonm-la osi. É parapòt a sa i vwè, i vin ka kwè sa yo té di-yo la. 9 Men ni on pasaj adan Lézékriti kè yo poto’o ka konprann. Pasaj-lasa té ka di kè fò Jézi té résisité. 10 Alò sé disip-la rantré akaz a yo.
11 Men li Mari, i té déwò la toupré tonm-la, é i té ka pléré. Pannan i té ka pléré, i panché-y pou i té gadé andidan tonm-la, 12 é i vwè 2 zanj abiyé an blan. Yo té sizé la kò a Jézi té yé la. Té ni yonn sizé la tèt a Jézi té yé, é lòt-la té ka touvé-y la pyé a-y té yé la. 13 É yo mandé-y : « Poukwa ou ka pléré ? » I réponn-yo : « Yo pati èvè Ségnè an mwen, é an pa sav ola yo mété-y. » 14 Apré i di sa, i touné, é i vwè Jézi doubout la, men i pa rann-li kont kè sé té Jézi. 15 Jézi di-y : « Poukwa ou ka pléré ? Kimoun ou ka chèché ? » Konm Mari té ka konprann kè sé té boug-la ki té ka okipé dè jaden-la ki té ka palé ba-y, i di-y : « Misyé an mwen, si ou pati èvè-y, di-mwen ola ou mété-y, konsa an ké pran-y é an ké pati èvè-y. » 16 Jézi di-y : « Mari ! » Pannan Mari té ka touné-y, i palé ba Jézi an ébré. I di-y : « Rabouni ! » (kivédi « Anségnan ! »). 17 Jézi réponn-li : « Arété kenbé-mwen, pas an po’o monté owa Papa-la. Men ay vwè frè an mwen, é di-yo kè an ka monté owa Pap’an mwen, ki sé Pap’a zòt osi, é owa Bondyé an mwen, ki sé Bondyé a zòt osi. » 18 Mari Magdaléèn-la alé, é i ay pòté nouvèl-la ba sé disip-la. I di-yo : « An vwè Ségnè-la ! » É i rakonté-yo sa Jézi té di-y.
19 Jou-lasa sé té prèmyé jou a simenn-la. Lè solèy té k’ay kouché, Jézi vin la sé disip-la té yé la, é i doubout anmitan a yo. Jézi fè sa alòskè la sé disip-la té yé la, sé pòt-la té ja fèmé aklé, pas yo té pè sé Juif-la. Alò i di-yo : « An ka swété kè zò ni lapé. » 20 Apré Jézi di sa, i montré-yo men a-y é koté-la yo té pèsé-y la. Alò sé disip-la té kontan vwè Ségnè-la. 21 Jézi woudi-yo ankò : « An ka swété kè zò ni lapé. Menmjan Papa-la voyé-mwen, mwen osi an ka voyé-zòt. » 22 Apré i di sé biten-lasa, i souflé anlè yo, é i di-yo : « Mi ! An ka ba-zòt lèspri sen. 23 Si zò ka padonné péché a on moun, sa vé di Bondyé ja padonné moun-lasa. Men si zò pa ka padonné péché a on moun, sa vé di Bondyé pa ka padonné-y nonplis. »
24 Men ni yonn adan sé 12 apòt-la ki pa té èvè sélézòt disip-la lè Jézi vin anmitan a yo. Non a-y sé té Toma, é yo té ka kriyé-y Jimo-la. 25 Kifè sélézòt disip-la di-y konsa : « Nou vwè Ségnè-la ! » Men i di-yo : « Toutotan an pa vwè mak a sé klou-la an men a-y, toutotan an pa fouré dwèt an mwen adan mak a sé klou-la, é toutotan an pa fouré men an mwen la yo pèsé-y la, an pé’é jen kwè sa. »
26 Ében 8 jou apré, disip a Jézi touvé-yo an kaz-la ankò, é kou-lasa, Toma té èvè yo. É magré sé pòt-la té fèmé aklé, Jézi vin anmitan a yo, é i di : « An ka swété kè zò ni lapé. » 27 Aprésa i di Toma : « Mèt dwèt a-w la, é gadé men an mwen. Fouré men a-w la yo pèsé-mwen la ; é arété douté, men kwè. » 28 Toma réponn-li : « Ségnè an mwen é Bondyé an mwen ! » 29 Jézi di-y : « Sé pas ou vwè-mwen ou ka kwè ? Moun ki pa vwè é ki ka kwè magré yo pa vwè ké ni tchè-kontan. »
30 On biten ki sèten, sé kè Jézi fè onlo dòt mirak douvan sé disip-la, é sé mirak-lasa pa maké adan woulo-lasa. 31 Men touséla ki maké la, yo maké pou zò pé sa kwè kè Jézi sé Lèkris, Gason a Bondyé. É davwa zò ka kwè, zò ké ni lavi grasa non a-y.