Poukwa Bondyé ni on òwganizasyon ?

1. Poukwa Bondyé té òwganizé sé Izraélit-la ?

Bondyé té òwganizé tout désandans a Abraam pou i té fè-yo vin on nasyon. I kriyé nasyon-lasa « Izrayèl », é i ba-y on séri lwa a rèspèkté. Fò pèp a Izrayèl té pratiké é pwotéjé vré adorasyon-la é fò i té fè menm biten-la èvè pawòl a Bondyé (Sòm 147:19, 20). Konsa, moun a tout nasyon té’é pé jwenn bénédisyon grasa Izrayèl (Li Jénèz 22:18).

Bondyé té chwazi sé Izraélit-la pou yo té vin témwen a-y. Istwa a pèp-lasa ka montré kijan, lè ou ka rèspèkté lwa a Bondyé, sa ka menné onlo byenfé (Détéwonòm 4:6). Grasa ègzanp a sé Izraélit-la, dòt nasyon té ké pé aprann konnèt vré Dyé-la (Li Izayi 43:10, 12).

2. Poukwa sé vré krétyen-la òwganizé ?

Malérèzman, pèp a Izrayèl fin pa pèd bénédisyon a Bondyé. Kifè Bondyé lagé-yo, é an plas a yo, i mété lasanblé krétyèn la, kivédi on gwoup-moun ki té ka suiv Jézi (Matyé 21:43 ; 23:37, 38). Jòdila, an plas a sé Izraélit-la, sé sé vré krétyen-la ki sé témwen a Jéova (Li Akt 15:14, 17).

Jézi òwganizé disip a-y pou yo préché é pou yo fè dòt disip adan tout nasyon ki tini (Matyé 10:7, 11 ; 24:14 ; 28:19, 20). Moun potoko jen fè travay-lasa kon i ka fèt konnyéla la, pannan dènyé jou a sistèm-lasa. Sé prèmyé fwa Jéova ka sanblé milyon é milyon moun toupatou konsa, pou yo adoré-y adan onsèl òwganizasyon (Révélasyon 7:9, 10). Sé vré krétyen-la òwganizé pou yonn ankourajé lòt é pou yonn édé lòt. Adan lèmondantyé, yo ka bénéfisyé dè menm ansègnman biblik la adan réinyon a yo (Li Ébré 10:24, 25).

3. Kijan òwganizasyon a Témwen a Jéova (kon nou konnèt-li jòdila) vwè jou ?

Kèktan apré 1870, on ti gwoup-moun ki té ka étidyé Labib vin dékouvè on séri vérité ki té rété kaché pannan on bon moman. Dépi yo konprann kè Jézi té òwganizé lasanblé krétyèn la pou préché, yo pòté bon mannèv pou préché Wayòm-la toupatou si latè. An 1931, yo chwazi pòté on non : Témwen a Jéova (Li Akt 1:8 ; 2:1, 4 ; 5:42).

4. Kijan Témwen a Jéova òwganizé ?

O prèmyé syèk, té ni dé lasanblé krétyèn adan onlo péyi. É sé on komité santral (on gwoup-nonm ki ni èkspéryans) ki té ka okipé dè yo. Komité-lasa té ka rèkonnèt Jézi konm Chèf a lasanblé-la (Akt 16:4, 5). Jòdila osi, Témwen a Jéova ka bénéfisyé dè dirèksyon a on Komité santral (ansyen ki ni èkspéryans). Sé li ki ka voyé zyé si travay a filyal ki ka tradui, enprimé é distribiyé piblikasyon bazé si Labib adan pasé 800 lang. Ni pliski 120 000 lasanblé ka risivwè ankourajman é dirèksyon a yo. Adan chak sé lasanblé-la, ni moun kalifyé yo ka kriyé ansyen oben rèsponsab. Yo ka « pran swen a troupo a Bondyé » èvè onlo lanmou (Li 1 Pyè 5:2, 3).

Témwen a Jéova òwganizé pou préché bon nouvèl-la é pou fè disip. Kon sé apòt-la, nou ka préché kaz an kaz (Akt 20:20). Nou ka pwopozé moun-sensè, ki enmé lavérité, étidyé Labib. Men Témwen a Jéova, sé pliski on òwganizasyon, sé on fanmi. Nou sé on fanmi èvè on Papa ki enmé-nou fò toubònman ; nou sé frè é sè, é yonn ka pran swen a lòt (2 Tésalonisyen 1:3). Sèwvitè a Jéova òwganizé pou fè Jéova plézi é pou édé lézòt. Kifè, sé fanmi-la ki pli kontan la asi latè ! (Li Sòm 33:12 ; Akt 20:35).