VI A ON KRÉTYEN
Sé lasanblé réjyonal la : dé lokazyon pou manifèsté lanmou
Poukwa nou enmé lasanblé réjyonal an nou fò konsa ? Paskè menmjan ki an Izrayèl an tan lontan, sé sanblé-la ki ka fèt adan lanné-la ka ban-nou lokazyon adoré Jéova ansanm èvè onpakèt dòt sèwvitè a Bondyé. Anplisdisa, sé dé vré banké èspirityèl. É nou kontan toubònman pasé sé bèl ti moman-lasa èvè fanmi an nou é zanmi an nou. Tout sé rézon-lasa ka ban-nou anvi asisté sé twa jou lasanblé la.
Pannan sé sanblé-lasa, fò pa nou sonjé enki sa lasanblé-la ké pòté ban nou, men fò-nou gadé kijan nou pé montré lanmou an nou osi (Gal 6:10 ; Éb 10:24, 25). Pa ègzanp, lè nou ka fè atansyon pou nou pa bloké pasaj-la, oben lè nou ka tchenbé enki plas nou bizwen, nou ka montré nou ka fè entéré a lézòt pasé avan tan nou (Flp 2:3, 4). Sé lasanblé-la, sé dé bèl lokazyon osi pou nou pé vin zanmi èvè dòt frè é sè. Alò pétèt, nou té’é pé ni lòbjèktif dè palé èvè on moun avan lasanblé-la koumansé, an fen a pwogram-la é pannan lè a manjé (2Ko 6:13). Lanmityé nou jwenn adan sé lasanblé-la pé diré pou touttan ! Ni on biten ki pli bèl ankò, sé lè sé moun-la ki envité la ka vwè jan nou ka manifèsté vré lanmou-la. Sa pé ba-yo anvi sèvi Jéova ansanm èvè nou (Jan 13:35).
GADÉ VIDÉO-LA LES ASSEMBLÉES INTERNATIONALES « L’AMOUR NE DISPARAÎT JAMAIS ! », É RÉPONN A SÉ KÈSYON-LASA :
Pannan sé lasanblé entèwnasyonal a 2019 la, kijan sé délégé-la rèsèvwa lanmou ?
Poukwa nou pé di kè linité é lanmou ki an pèp a Jéova èstraòwdinè toubònman ?
Sé frè a Komité santral la palé dè jan sé krétyen-la ka manifèsté lanmou adan plizyè domenn. Ki domenn ésa ?
Kijan nou osi nou pé montré lanmou lè ni lasanblé ?
Kijan lanmou édé frè é sè an nou rété soudé an Almagn é an Koré di Sid ?
Ka fò-nou byen désidé a fè ?