Ès ou té sav sa ?

Lè sé Women-la té ka tchouyé on moun asi on poto, kon yo fè-y èvè Jézi, ès yo té’é pèwmèt kè yo téré moun-lasa kon yo té ni labitid téré moun ?

ONLO moun konnèt sa Labib ka rakonté asi jan yo tchouyé Jézi asi on poto anmitan a 2 kriminèl (Mat. 27:35-38). Labib ka di kè aprésa, yo préparé kò a Jézi pou yo té téré-y adan on tonm men ni sèwten moun ki ka kwè kè a pa ègzaktèman konsa sa fèt (Mawk 15:42-46).

Sèwten èspésyalis bay avi a yo asi Lézévanjil, é yo di konsa kè yo pa’a gè kwè kè yo té’é pèwmèt kè yo téré on kriminèl kon toutmoun apré yo té tchouyé-y. Pa ègzanp, pou sé èspésyalis-lasa, sé Women-la pa té’é lésé ponmoun mèt kò a on kriminèl adan on tonm men yo té’é fè ondòt biten èvè kò a-y. On jounalis non a-y sé Ariel Sabar ékri on awtik adan on jounal yo ka kriyé Smithsonian é i èspliké poukwa sèwten moun ka vwè sa konsa. Mi sa i maké : « Sé yenki sé pi mové kriminèl-la yo té ka kloué asi on poto pou pini-yo, é ni sèwten èspésyalis ki ka di kè si on moun té ka pansé kè sé Women-la té’é pran tan fè on bèl lantèwman pou on kriminèl, moun-lasa té’é byen sòt. » Sé Women-la té ka fè sé kriminèl-la sibi tout kalté abominasyon pou yo té fè-yo hont. Sé pousa pli souvan ki rarman, yo té ka lésé kò a sé kriminèl-la pann èspré pou bèt sovaj vin manjé-yo. Aprésa, yo té ka jété rèstan a kò-la adan on tou èvè dòt kò.

Men, sèwten awkéològ touvé rèstan a kò a sèwten Juif é sa té ka montré kè an réyalité, a pa konsa sa pasé pou yo lèwvwè yo tchouyé-yo. An 1968, yo dékouvè rèstan a zo a on nonm yo té tchouyé o 1^é syèk. Sé zo-la té adan on tonm toupré Jérizalèm é i té kon sé tonm-la onlo fanmi Juif té ni labitid ni an tan-lasa. Tonm-la sé té on bwèt ki té fèt èvè zo. Adan sa yo touvé té ni on talon. Yo té kloué-y asi on planch an bwa èvè on klou an fè ki té ka miziré 11,5 santimèt. Mi sa jounalis-la nou palé dè-y talè la ka di : « Talon-lasa, sé té ta on nonm yo té ka kriyé Yehohanan, é talon-lasa ka pòté on prèv ki ka montré poukwa lè Lézévanjil ka di kè yo téré Jézi adan on tonm, sé lavérité. » Kifè, « talon a Yehohanan sé on bèl ègzanp ki ka montré kè an tan a Jézi, délè sé Women-la té ka téré on moun adan on tonm menmsi yo té kloué moun-lasa asi lakwa ».

Pou èspliké kijan yo té kloué Jézi asi poto-la, yo bay diféran lidé asi sa zo a talon-lasa té ka montré. Men on biten ki klè, sé kè yo téré sèwten kriminèl kon yo té ka téré moun a épòk-lasa é yo pa enki jété-yo adan on tou èvè dòt kò adan-y. Kifè, lèwvwè Labib ka di kè yo mèt kò a Jézi adan on tonm, nou pé fè-y konfyans. Sé prèv-la nou ni la ka montré kè sa labib ka di sé lavérité.

On biten ki pi enpòwtan ankò, sé kè Jéova té ja anonsé kè yo té’é mèt kò a Jézi adan tonm a on boug rich, é ponmoun pé pa anpéché Pawòl a Bondyé réyalizé (Iz. 53:9 ; 55:11).