Zò té vlé sav…

Dè ki « madanm » yo ka palé an Izayi 60:1 é lè yo ka di kè i ka ‘lévé-y’ é kè i ka ‘voyé limyè a-y’, ka sa vé di ojis ?

An Izayi 60:1 nou ka li : « Lévé-w, o vou madanm, voyé limyè a-w, pas limyè a-w rivé. Glwa a Jéova ka kléré-w. » Lè nou ka gadé sé vèwsé-la ki avan la é sé vèwsé-la ki apré la, nou ka vwè kè madanm-lasa sé Syon oben Jérizalèm, kivédi kapital a Jida an tan a Izayi (Iz. 60:14 ; 62:1, 2). Lè yo ka palé dè Jérizalèm, sé pou palé dè tout nasyon a Izrayèl. An-nou réponn a 2 kèsyon ki lyanné èvè vèwsé-lasa : 1) A ki moman Jérizalèm mété-y doubout é voyé limyè a-y é kijan i fè sa ? 2) Ès sé pawòl-la Izayi di la ka réyalizé a épòk an nou èvè plis fòs ankò ?

A ki moman Jérizalèm mété-y doubout é voyé limyè a-y é kijan i fè sa ? Sé Juif-la yo té chayé Babilòn pa fòs rété la 70 an é pannan touttan-lasa, Jérizalèm é tanp a-y té détwi. Men lè sé Mèd-la é sé Pèws-la pran Babilòn, yo pèwmèt tout sé Izraélit-la ki té ka viv asi téritwa a Babilòn viré adan péyi a yo pou woumèt vré adorasyon-la anplas (Èsdr. 1:1-4). Alò dépi 537 avan épòk an nou, sé Juif-la ki té fidèl la viré Jérizalèm (Iz. 60:4). Yo koumansé fè sakrifis pou Jéova, yo koumansé fè sé fèt-la yo té abityé fè la chak lanné é yo mèt-yo ka woukonstwi Tanp-la (Èsdr. 3:1-4, 7-11 ; 6:16-22). A moman-lasa, glwa a Jéova koumansé briyé asi Jérizalèm kon avan, kivédi i koumansé briyé asi pèp a-y ki té sòti woukoumansé sèvi-y. A moman-lasa yo té kon limyè pou sélézòt nasyon-la ki pa té ka sèvi Jéova é ki té adan nwèsè.

Men sé enki on pawti a pwofési a Izayi, ki té ka di kè tout biten té’é wouvin kon yo té yé avan, ki té’é réyalizé a Jérizalèm an tan lontan. Anfinaldikont, sé Izraélit-la woumèt-yo ka ba Bondyé do (Néém. 13:27 ; Mal. 1:6-8 ; 2:13, 14 ; Mat. 15:7-9). Plizyè lanné apré, yo rèfizé suiv Mési-la, Jézikris (Mat. 27:1, 2). Kifè an 70, on nasyon détwi Jérizalèm é tanp a-y on 2^èm fwa.

Jéova té ja anonsé sa ki té’é pasé (Dan. 9:24-27). Nou ka vwè on mannyè ki klè kè tout pwofési a Izayi chapit 60 anrapò èvè vré adorasyon-la pa té pou réyalizé asi vil a Jérizalèm.

Ès sa Izayi té anonsé té’é réyalizé a épòk an nou èvè plis fòs ankò ? Wi pwofési-lasa ka réyalizé èvè ondòt madanm. Madanm-lasa sé on senbòl osi. Yo ka kriyé-y « Jérizalèm-la ki anho la ». Mi sa lapòt Pòl ni lokazyon di anrapò èvè madanm-lasa : « Sé-y ki manman-nou » (Gal. 4:26). Jérizalèm-la ki anho la, sé on pawti a òwganizasyon a Bondyé ki an syèl-la é ki plen èvè kréyati ki ka viv an syèl-la é ki fidèl. Timoun a Jérizalèm-la ki anho la sé Jézi é sé 144 000 krétyen wen la ki ni lèspwa dè ay viv an syèl-la kon Pòl. Sé wen-la ka fòwmé « on nasyon ki sen » : « Izrayèl a Bondyé » (1 Pyè 2:9 ; Gal. 6:16).

Kijan Jérizalèm-la ki anho la ‘lévé-y’ é kijan i ‘voyé limyè a-y’ ? I sèvi èvè timoun a-y ki wen é ki asi latè pou fè sa. An-nou konparé sa yo viv èvè sa pwofési a Izayi chapit 60 té anonsé.

Sé krétyen wen la ‘lévé-yo’ pas dépi o 2^èm syèk yo té adan on nwèsè. Yo té konsa pas apré mò a sé apòt-la, vin ni enpé vyé zèb adan lasanblé-la kivédi vin ni enpé apòsta adan lasanblé-la (Mat. 13:37-43). Alò sé krétyen-la touvé-yo pri anba jouk a Gran Babilòn-la ki ka rèprézanté tout sé fo rèlijyon-la. Yo rété konsa jous an 1914, otila on péryòd yo ka kriyé « bout a mond-lasa » koumansé (Mat. 13:39, 40). Kèlkètan apré, an 1919 yo lagé sé krétyen wen la é tousuit apré sé krétyen-la mèt-yo ka préché bon nouvèl a Wayòm-la pou kléré moun ki té an nwèsèa. Pannan tout sé lanné-la ki vin apré la, moun a tout kalté nasyon vin adan limyè-lasa, é pawmi yo ou ka touvé rèstan a Izrayèl a Bondyé kivédi sé wa-la Izayi 60:3 ka palé la (Rév. 5:9, 10).

Talè, sé krétyen wen la ké voyé limyè a Bondyé plis ankò. Poukwa nou ka di sa ? Pas lèwvwè yo ké mò asi latè, yo ké ay an syèl-la é yo ké fè pawti a Nouvo Jérizalèm-la. Adan Nouvo Jérizalèm-la ou ka touvé 144 000 moun ki ké wa é prèt é sé li ki madanm a Jézikris (Rév. 14:1 ; 21:1, 2, 24 ; 22:3-5).

Lè Izayi 60:1 ké réyalizé, Nouvo Jérizalèm-la ké joué on wòl enpòwtan adan sa (konparé Izayi 60:1, 3, 5, 11, 19, 20 èvè Révélasyon 21:2, 9-11, 22-26). An tan lontan, gouvènman a Izrayèl té ka touvé-y Jérizalèm. Menmjan-la, Nouvo Jérizalèm-la é Jézikris ké fòwmé gouvènman a nouvo mond-la. Kijan Nouvo Jérizalèm-la ka sòti an syèl-la owa Bondyé é ka désann ? Sé lè i ka mèt men a-y adan sèwten biten ki ka fèt asi latè. ‘Limyè a-y ké gidé moun a tout kalté nasyon ki ka krenn Bondyé, pou yo maché.’ Yo pé’é anba jouk a péché-la é anba jouk a lanmò ankò (Rév. 21:3, 4, 24). Aprésa « tout biten [ké] wouvin kon yo té yé avan » kon Izayi é dòt pwofèt té anonsé (Akt 3:21). Sé gran chanjman-lasa koumansé lèwvwè Jézikris vin wa é yo ké fin lèwvwè i ké fin gouvèné an bout a sé 1 000 an la.