Ki byenfé ou ké ni si ou vin an réinyon an nou ?

Onlo moun pa kay kouté prèch yo ka fè an rèlijyon a yo ankò, pas, lè yo té kay la, yo pa té ka touvé pon rékonfò, ni pon répons a kèsyon yo té ka pozé-yo. Alò jistèman, ki entéré ou té ké ni a vin an réinyon a Témwen a Jéova ? Ka sa ké pòté ba-w ?

Ou ké kontan pas ou ké pawmi moun ki janti é ki ni lanmou pou lézòt. O prèmyé syèk, sé krétyen-la té òwganizé ; yo fòwmé diféran kongrégasyon. Yo té ka réini pou adoré Bondyé, pou étidyé Labib é pou yonn ankourajé lòt (Ébré 10:24, 25). Yo té adan on bon anbyans, on anbyans plen lanmou. Yo té ka rasanblé èvè dé vré zanmi, èvè frè é sè èspirityèl a yo (2 Tésalonisyen 1:3 ; 3 Jan 14). Jòdila, nou ka suiv ègzanp a yo é nou ka rèsanti menm jwa ki yo.

Ou ké pé aprann kijan pou-w apliké prensip a Labib. Dapré sa ki maké an Bib-la, misyé, madanm é timoun té ka réini ansanm pou yo adoré Bondyé, é sé modèl-lasa nou ka suiv. Dé nonm ki kalifyé pou sa, ka itilizé Labib pou édé-nou konprann kijan pou nou apliké prensip a Bondyé an vi an nou touléjou (Détéwonòm 31:12 ; Nèémya 8:8). Adan réinyon an nou, lè i ni on ti palé asi on tèm oben lè nou ka chanté, toutmoun pé pawtisipé ; sé on fason pou yo pé sa èsprimé fwa a yo é palé dè èspérans a yo (Ébré 10:23).

Ou ké vréman kontan lè ou ké konstaté fwa a-w vin pli fò. Lapòt Pòl ni lokazyon di on kongrégasyon kè i vréman anvi vwè-yo, pou yonn pé sa ankourajé lòt, « pou fwa a yonn ankourajé fwa a on dòt » (Women 1:11, 12). Lè nou pran labitid réini èvè dòt Témwen a Jéova, fwa an nou ka vin pli fò é nou ka rété byen désidé a kontinyé viv kon on krétyen dwètèt viv.

Sa té ké di-w dè vin asisté a pwochen réinyon a kongrégasyon an nou ? Konsa ou ké pé vwè voumenm kijan sa ka déwoulé. Nou ké akéyi-w bra gran ouvè ! Ou pé ké ni ayen a péyé ; pa jen ni lakèt.

• Ki ègzanp nou ka suiv pou nou pé sa òwganizé réinyon an nou ?

• Ki byenfé réinyon an nou ka pòté ban nou ?