Poukwa nou ka abiyé-nou byen pou nou ay an réinyon an nou ?

Lè ou ka gadé foto ki an bwochi-lasa, ès ou ka vwè kijan Témwen a Jéova ka abiyé-yo byen pou yo ay an réinyon a yo ? Poukwa nou ka ba prézantasyon an nou tousa enpòwtans ?

Pou nou montré nou ka rèspèkté Bondyé. Sé vré, sa zyé ka vwè, a pa sa ki pli enpòwtan pou Bondyé (1 Samyèl 16:7). Men lè nou ka réini pou adoré-y, nou vréman anvi montré kè nou ka rèspèkté ki li, ki moun ki ka réini èvè nou. Si sété pou nou pasé douvan on jij adan on tribinal, pa rèspé pou grad a-y, nou té ké fè atansyon a prézantasyon an nou, pa vré ? Menmjan-la osi, lè nou ka réini, jan nou pengné é jan nou abiyé ka montré rèspé an nou pou « Jij a toutlatè », Jéova Dyé, é pou koté-la nou ka adoré-y la (Jénèz 18:25).

Pou nou montré kè sé prensip-la nou ka suiv la enpòwtan pou nou. Labib ka ankourajé sé krétyen-la abiyé-yo « èvè modèsti é bon jijman » (1 Timoté 2:9, 10). Abiyé « èvè modèsti » sa vé di pa mèt lenj pou fè moun vwè, pou atiré latansyon asi-w, pou-w « sèksi » (lenj two kout, two séré, two dékòlté, ...). Lè ou ni « bon jijman », sa ka édé-w chwazi on bon lenj, pou-w pa anchengteng, é pou-w pa choké pon moun. Anmenmtan, sé prensip-lasa ka lésé chakmoun lib dè chwazi on istil ki ta-y men ki korèk. Konsa, san menm nou palé, nou pé « anbéli ansègnman a Bondyé, Sovè an nou » é nou pé « ba[-y] glwa » yenki parapòt a bèl prézantasyon an nou (Tit 2:10 ; 1 Pyè 2:12). Donk, lè nou byen abiyé pou nou ay réinyon, nou ka édé moun ni on bèl opinyon si jan nou ka adoré Jéova.

Men pa di ou pa ka vin an réinyon èvè nou pas ou pa ni lenj pou sa ! On lenj pa bizwen chè oben sofistiké pou-y konvènab. Dépi i pwòp é prézantab, i bon.

• Lè nou ka adoré Bondyé, poukwa fò-nou fè atansyon a jan nou ka abiyé-nou ?

• Ki prensip ka gidé-nou lè fò-nou chwazi kijan nou ké pengné é ki lenj nou ké mété ?