Ka ki on Bétèl ?

Bétèl, sé on mo ki vlé di « Kaz a Bondyé » an ébré (Jénèz 28:17, 19, gadé nòt-la). Sé on non ki kay byen èvè batiman kè Témwen a Jéova ka itilizé tibwen toupatou si latè, pou pé sa òwganizé é soutyenn prédikasyon-la. O Zétazini, a Nouyòk, ni on Bétèl. É sé dépi an Bétèl-lasa Komité santral la ka voyé on koudzyé asi aktivité a tout sélézòt Bétèl-la, adan onlo dòt péyi. Tout frè é sè ki ka sèvi adan sé Bétèl-la, ka fòwmé sa nou ka kriyé « fanmi a Bétèl-la ». Kon adan on fanmi, sé bétélit-la ka viv, ka manjé, ka kolaboré é ka étidyé Labib ansanm-ansanm (Sòm 133:1).

On koté èspésyal, la on gran « fanmi » ka travay rèd é dè tou kè. Adan chak Bétèl, ni dé krétyen é dé krétyèn ki ka itilizé tout énèrji a yo pou fè volonté a Jéova é pou soutyenn Wayòm-la aplentan (Matyé 6:33). Yo pa ka péyé-yo pou sa yo ka fè, men yotout, yo nouri, yo ni on chanm é yo ka ba-yo on ti monné pou dépans pèwsonèl a yo. Chak bétélit ni on travay i ka fè : ni sa ki adan on biwo, an kuizin-la, an sal-a-manjé la, ni sa ki ka nétwayé, sa osi ki ka okipé dè sé lenj-la é sa ki ka fè antrètyen. Ni dòt ki ka travay la yo ka enprimé sé piblikasyon-la, sa ki ka travay la yo ka fè sé liv-la oben dòt koté ankò.

On koté toutmoun ka pòté bon mannèv pou fè prédikasyon-la avansé. Prèmyé objèktif a Bétèl-la, sé dè édé lè plis moun posib a konnèt sé vérité-la ki an Bib-la. Bwochi-la ou ni an men a-w la sé on prèv. Yo komansé pa ékri-y anba dirèksyon a Komité santral la, aprésa yo voyé-y pa entèwnèt ba plizyè ékip ki ka tradui adan lèmondantyé, yo enprimé-y adan diféran Bétèl èvè dé machin ki ka touné vit, é finalman, yo voyé-y ba tout sé kongrégasyon-la (é ni pliski 115000 !). A chak étap, grasa « fanmi a Bétèl-la », travay pli enpòwtan la ka kontinyé : prédikasyon a bon nouvèl-la (Mawk 13:10).

• Kimoun ki ka travay adan on Bétèl é ki dispozisyon yo ka pran pou édé-yo ?

• Ki aktivité enpòwtan tout sé Bétèl-la ka soutyenn ?