Èvè ki lajan nou ka finansé aktivité an nou asi tout latè ?

Chak lanné, òwganizasyon an nou ka pibliyé é ka distribiyé plizyè milyon Bib é plizyè milyon piblikasyon gratuitman. Nou ka konstwi Sal di Wayòm, nou ka konstwi Bétèl é nou ka fè antrètyen a tout batiman nou ni. Nou ka pran swen a plizyè milyé Bétélit é plizyè milyé misyonè, é lè ni on katastròf, nou ka édé frè é sè an nou ki an difikilté. Alò, pétèt ou ka mandé-w : « Ola yo ka pran lajan pou yo fè tousa ? ».

Nou pa ka mandé moun péyé ni ladim, ni pon sèwvis rèlijyé, é nou pa ka fè lakèt. Sé vré, pou préché bon nouvèl-la toupatou si latè nou ka dépansé onlo, men a pa pou otan nou ka réklanmé lajan. Ni pliski 100 an dè sa, adan dézyèm niméwo a La Tour de Garde ki parèt, nou té ka di kè nou sèten Jéova ka soutyenn-nou, é sé pousa nou pa té ké jen mandé, ni oblijé pon moun finansé-nou. É nou tchenn a mo an nou ! (Matyé 10:8).

Sé grasa don moun ka fè dè yomenm aktivité an nou ka fèt. Onlo moun ka aprésyé sa nou ka fè pou anségné Labib, kifè yo ka bay lajan pou soutyenn travay-lasa. Kanta sé Témwen-la menm, yo kontan bay tan a yo, énèrji a yo, lajan a yo oben dòt biten yo ni, pou volonté a Jéova fèt toupatou si latè (1 Kronik 29:9). Adan sé Sal di Wayòm la é la sé lasanblé-la ka fèt la, sa ki vlé pé mété don a yo adan dé bwat ki fèt pou sa. Oben ni mwayen fè on don pa entèwnèt asi sit an nou, jw.org. On gran pati a sa nou ka rèsèvwa ka vin dè moun ki pa ni onlo lajan, moun ki onjan kon vèv malérèz la Jézi obsèwvé an tanp-la. Jézi palé dè-y an byen pas i té mété dé ti pyès an trézò a tanp-la (Lik 21:1-4). Konsa, nou ka konprann kè chakmoun pé pran labitid « mèt on biten dè koté », pou bay « kon i désidé an kè a-y » (1 Korentyen 16:2 ; 2 Korentyen 9:7).

Nou sèten Jéova ké kontinyé motivé sa ki vlé onoré-y èvè « sa yo ni ki ni valè » pou yo soutyenn aktivité a Wayòm-la. Konsa, volonté a-y ké pé fèt (Pwovèb 3:9).

• Ka ki ka fè nou diféran dè tout sélézòt rèlijyon-la ?

• Ka sé don-la ka sèvi ?