LÈSON 28
Ka ou ka touvé anlè sit entèwnèt an nou ?
Fwans
Pològn
Risi
Jézikri té di disip ay : « Fò limyè a zòt kléré douvan lézòm, pou yo vwè bon biten zò ka fè é pou yo ba Papa-zòt ki an syèl-la glwa » (Matyé 5:16). Pou atenn objèktif-lasa, nou ka itilizé nouvo tèknoloji kon entèwnèt pa ègzanp. Sit ofisyèl a Témwen a Jéova sé jw.org. Grasa-y, on moun pé ranségné-y si kwayans an nou é si aktivité an nou. Ka nou ka touvé asi jw.org ?
Répons Labib ka bay asi dé kèsyon onlo moun ka pozé-yo. Adan lavi, ni dé kèsyon ki pli enpòwtan ki dòt. Anlè sit-la, ou pé touvé répons a sé kèsyon-lasa. Pa ègzanp, ou ni 2 trak ki disponib an pliski 600 lang. Ni yonn, non a-y sé Ès soufrans ké fin ou jou ? é ni on dòt, tit a-y sé Ès on jou moun-mò ké wouviv ? Anlè sit-la, ou pé touvé Traduction du monde nouveau la an pliski 130 lang, liv ki fèt pou étidyé Labib kon Ka Labib pé aprann-nou ?, é dènyé niméwo a La Tour de Garde é Réveillez-vous ! ki sòti. Ni mwayen ou li oben kouté onlo adan sé piblikasyon-lasa dirèktèman anlè sit-la. Ni mwayen osi ou téléchawjé-yo adan dé fòwma kon MP3, PDF oben EPUB. Ou pé jis enprimé déotwa paj adan on dòt lang pou on moun ki ka entérésé-y a Labib. Ni vidéo ki disponib adan on pakèt lang-dé-sign. Épi, pou fè-w plézi, ou pé téléchawjé pyès téat, anrèjistrèman a Labib yo ka li konsi sété téat, é onlo bèl mizik.
Enfòwmasyon ki fyab asi Témwen a Jéova. Anlè sit an nou, ou ka touvé onlo enfòwmasyon asi sa nou ka fè si toutlatè, asi sèwten évènman ki ka konsèwné Témwen a Jéova é asi sa nou ka fè pou édé frè é sè an nou ki an détrès. Ni onlo vidéo é onlo awtik ki ka palé dè sa. Ou pé touvé adrès é niméwo a tout sé Bétèl-la é ransègnman asi sé lasanblé-la ki ka vin la.
Èvè sa ki anlè sit-la, nou ka fè limyè a lavérité kléré dé koté ki lwen lwen lwen asi latè. É sé vré, moun toupatou si latè ka vizité sit an nou, menm moun ki ka rété an Antawtik. Nou ka priyé pou « pawòl a Jéova kontinyé kouri » asi toutlatè, pou ba Bondyé glwa (2 Tésalonisyen 3:1).
Kijan jw.org ka édé plis moun dékouvè vérité-la ki an Bib-la ?
Ka ou té ké vlé gadé anlè sit an nou ?