LÈSON 5
Ka Bondyé vlé pou latè ?
1. Poukwa Bondyé kréyé latè ?
Jéova ba lézòm latè. Sé « kaz » an nou. Lè i kréyé prèmyé misyé-la é prèmyé madanm-la, sètadi Adan é Èv, a pa té pou yo péplé syèl-la. Bondyé té ja kréyé lézanj pou viv an syèl-la (Jòb 38:4, 7). I mèt prèmyé nonm-la on koté ki té bèl toubònman, adan on paradi yo té ka kriyé Jadendédèn-la (Jénèz 2:15-17). É i ba Adan é tout pitit a-y posibilité viv asi latè san janmé mò (Li Sòm 37:29 ; 115:16).
Okoumansman, Jadendédèn-la sété sèl koté ki té on paradi. Fò Adan é Èv té fè timoun pou yo ranpli latè. Fò yo té pran swen a tout latè osi é fè-y vin on paradi (Jénèz 1:28). Latè pé ké jen détwi. I ké toujou rété « kaz » a lézòm (Li Éklézyas 1:4).
Gadé vidéo-la Poukwa Bondyé kréyé latè ?
2. Poukisa latè pa on paradi ?
Adan é Èv pa obéyi Jéova. Alò i fè-yo sòti an Jadendédèn-la. Paradi-la disparèt é pon nonm pa jen rivé woufè-y ankò. Labib ka di : « I lagé latè an men a sé méchan-la » (Jòb 9:24) (Li Jénèz 3:23, 24).
Ès sa vlé di Jéova abandoné sa i té vlé fè pou lézòm ? Non ! Jéova toupuisan é volonté a-y toujou ka fèt (Izayi 45:18). I ké òwganizé-y pou tousa i té prévwa pou limanité réyalizé (Li Sòm 37:11, 34).
3. Kijan latè ké wouvin on paradi ?
Latè ké wouvin on paradi pannan Jézi, Wa-la Bondyé chwazi la, ké ka gouvèné. Jézi é sé zanj-la ké détwi tout lènmi a Bondyé adan on lagè yo ka kriyé Awmagédon. Aprésa, i ké fèmé Satan on koté pannan 1 000 an. Moun ka sèvi Bondyé pé ké mò pannan Awmagédon, pas Jézi ké gidé-yo é i ké pwotéjé-yo. Yo ké pé bénéfisyé dè lavi pou touttan adan paradi-la si latè (Li Révélasyon 20:1-3 ; 21:3, 4).
4. Kitan soufrans ké disparèt ?
Kitan Bondyé ké fin èvè tousa ki mové ? Jézi bay on « sign » ki té’é fè moun sav lafen toupré rivé. Jòdijou, tout mové biten ki ka fèt toupatou si latè ka mèt limanité andanjé. Sa ka montré kè sé adan épòk-la nou ka viv la kè « mond-la kay bout » (Li Matyé 24:3, 7-14, 21, 22).
Étan an syèl-la, Jézi ké gouvèné latè pannan 1 000 an. Pannan i ké ka dominé, i ké fè tout soufrans disparèt (Izayi 9:6, 7 ; 11:9). I ké Wa, men i ké Gran Prèt osi : i ké éfasé péché a moun ki enmé Bondyé. Jéova ké itilizé Jézi pou woté lamaladi, lavyéyès é lanmò (Li Izayi 25:8 ; 33:24).
5. Kimoun ki ké viv adan paradi-la ?
Adan on Sal di Wayòm, ou ké jwenn moun ki enmé Bondyé é ki vlé aprann ka pou yo fè pou fè-y plézi.
Moun ki ka obéyi Bondyé ké viv adan paradi-la (1 Jan 2:17). Jézi mandé disip a-y chèché moun ki enb, kivédi moun ki ka montré-yo toupiti douvan Bondyé. I di disip a-y aprann sé moun-lasa ka yo dwèt fè pou yo fè Bondyé plézi. Jòdila, Jéova ka préparé plizyè milyon moun pou yo viv adan paradi-la asi latè (Sofoni 2:3). Pou yo adoré Bondyé, Témwen a Jéova ka réyini adan sa yo ka kriyé Sal di Wayòm. Lè ou kay la, ou ka aprann kijan ou pé vin plibon ankò adan wòl a-w si ou sé on mari, on papa, on madanm oben on manman. Papa, manman é timoun ka adoré Bondyé ansanm. Yo ka aprann kijan vi a yo pé pli bèl grasa sa yo ka aprann adan Labib (Li Miché 4:1-4).