LÈSON 8
Poukwa Bondyé ka pèwmèt lèmal é lasoufrans ?
1. Kijan lèmal vin parèt ?
Bondyé ja lésé lézòm gouvèné asé lontan pou montré kè yo pa kapab réglé pwoblèm ki ni an mond-lasa.
Lèmal koumansé fèt si latè lè Satan di prèmyé mansonj-la. Odépa, lè Bondyé kréyé-y, Satan pa té on zanj méchan. Sété on zanj ki té pawfè, men « i pa rété adan lavérité » (Jan 8:44). I té vlé yo adoré-y, alòskè nòwmalman sé Bondyé tousèl ou dwèt adoré. Satan manti ba Èv, prèmyé madanm-la, é i touvé mwayen fè Èv kouté-y, li, olyé Èv té kouté Bondyé. Adan fè menm biten ki Èv : i dézobéyi Bondyé. Désizyon-lasa menné soufrans é lanmò (Li Jénèz 3:1-6, 19).
Lè i fè Èv dézobéyi, Satan koumansé lévé moun kont dwa Bondyé ni dè gouvèné sa i kréyé. On majorité moun ka fè menm biten ki Satan : kon li, yo pa dakò pou sé Bondyé ki Chèf a yo. Sé konsa Satan vin « mèt a mond-la » (Li Jan 14:30 ; 1 Jan 5:19).
2. Ès té ni on défo adan kréyasyon a Bondyé ?
Tousa Jéova ka fè pawfè. Jan i té kréyé lézòm é lézanj, yo té kapab obéyi on mannyè ki pawfè (Détéwonòm 32:4, 5). Bondyé ban-nou dé posibilité : fè sa ki byen oben fè sa ki mové. Nou lib, sé nou ka chwazi. Libèté-lasa ka pèwmèt-nou montré Bondyé kè nou enmé-y (Li Jak 1:13-15 ; 1 Jan 5:3).
3. Poukwa Bondyé ka pèwmèt soufrans jousalè ?
Dépi épòk a Adan é Èv jiskaprézan, Bondyé ka pèwmèt moun rèbélé-yo kont dwa i ni dè gouvèné. Men poukisa ? Pou montré kè lè lézòm ka éséyé gouvèné san-y, sa pa ka pòté ayen dè bon (Éklézyas 7:29 ; 8:9). Ni pliski 6 000 an lézòm ka dirijé-yo yomenm é ni on biten ki sèten : sa ki ka gouvèné pa jen rivé woté ni lagè, ni krim, ni enjistis, ni maladi (Li Jérémi 10:23 ; Women 9:17).
Gouvènman a Bondyé pa kon ta lézòm. I ka pòté yenki bon biten ba moun ki ka soutyenn-li (Izayi 48:17, 18). Talè, Jéova ké woté tout gouvènman lézòm mèt anplas. Sé yenki moun ki chwazi Bondyé pou gouvèné-yo ki ké viv si latè (Izayi 11:9 ; Li Danyèl 2:44).
Gadé vidéo-la Poukwa Bondyé ka lésé moun soufè konsa ?
4. Ka pasyans a Bondyé ka pèwmèt-nou fè ?
Satan ka di kè lézòm pa ka sèvi Jéova paskè yo enmé-y, men pas yo vlé rèsèvwa on biten an rètou. Ès ou té’é anvi fè moun sav sé manti Satan ka manti ? Ou pé fè-y ! Pasyans a Bondyé ka pèwmèt-nouchak montré ki dominasyon nou préféré, ès sé ta Bondyé oben ès sé ta lézòm. Sé sèlon jan nou ka viv nou ka montré kilès nou chwazi (Li Jòb 1:8-12 ; Pwovèb 27:11).
5. Kijan nou pé montré sé Bondyé nou chwazi konm Chèf ?
Chwa an nou ka montré si nou vlé sé Bondyé ki Chèf an nou.
Kijan nou pé chwazi Bondyé konm Chèf ? Fò-nou aprann konnèt é fò-nou mèt an pratik vré adorasyon-la, ki bazé asi Pawòl a-y, Labib (Jan 4:23). Nou ka montré kè nou pa ka chwazi Satan konm chèf lè, menmjan ki Jézi, nou pa ka mélanjé-nou ni adan politik, ni adan lagè (Li Jan 17:14).
Satan ka itilizé pouvwa a-y pou pousé moun a fè péché sèksyèl é a fè dòt biten ki mové. Si nou arété fè sé biten-lasa, zanmi an nou oben fanmi an nou pé rivé a fè jé èvè nou oben yo pé éséyé anpéché-nou sèvi Jéova (1 Pyè 4:3, 4). Alò fò-nou chwazi : Ès nou ké chwazi zanmi an nou pawmi moun ki enmé Bondyé ? Ès nou ké obéyi a lwa a-y, ki plen sajès é ki plen lanmou ? Si nou fè sa, nou ké montré kè Satan manti lè i di kè lézòm pé ké obéyi Bondyé lè yo ké an difikilté (Li 1 Korentyen 6:9, 10 ; 15:33).
Bondyé enmé lézimen, é lanmou a-y sé on garanti kè lèmal é lasoufrans kay disparèt. Moun ki ni fwa an Bondyé é ki ka montré kè yo pou gouvènman a-y ké viv si latè pou touttan (Li Jan 3:16).