Kijan ou pé vin zanmi a Bondyé ?

1. Ès sé tout priyè Bondyé ka kouté ?

Bondyé ka ankourajé toutmoun rapwoché-yo dè-y grasa lapriyè (Sòm 65:2). Men i pa ka kouté, kivédi i pa ka aksèpté, tout priyè. Priyè a on misyé ki ka fè madanm a-y vwè mizè pa sèten rivé owa Bondyé (1 Pyè 3:7). Lè sé Izraélit-la té ka kontinyé fè sa ki mové, Bondyé pa té ka kouté priyè a yo. Men si on moun péché é i ka rèpanti-y (kivédi i ka règrété sa i fè), Bondyé ka aksèpté priyè a-y, menmsi sé on péché grav i té fè. Priyé Bondyé, sé vréman on gran lonnè (Li Izayi 1:15 ; 55:7).

Gadé vidéo-la Ès sé tout priyè Bondyé ka kouté ?

2. Kijan pou nou priyé ?

Lè nou ka priyé, sé on adorasyon nou ka bay. Donk sé yenki Jéova pou nou priyé, pas sé li ki Kréyatè an nou (Matyé 4:10 ; 6:9). Anplisdisa, konm nou enpawfè, fò-nou priyé an non a Jézi pas i mò pou péché an nou (Jan 14:6). Jéova pa vlé nou répété priyè ki maké adan on liv oben priyè nou aprann pa kè. I vlé priyè an nou sòti an fon a tchè an nou (Li Matyé 6:7 ; Filipyen 4:6, 7).

Menm lè nou ka priyé an tchè an nou, Kréyatè an nou ka tann (1 Samiyèl 1:12, 13). I ka di-nou nou pé priyé-y toutlè, pa ègzanp lèmaten lè nou sòti lévé, lèswa avan nou ay dòmi, lè nou kay manjé, oben lè nou ni pwoblèm (Li Sòm 55:22 ; Matyé 15:36).

3. Poukwa sé krétyen-la ka réini ?

Vin zanmi a Bondyé, a pa on biten ki fasil, pas nou lantouré èvè moun ki pa ni fwa adan-y é ki pa ka pran-y oséryé lè i ka di i kay mèt lapé si latè (2 Timoté 3:1, 4 ; 2 Pyè 3:3, 13). Donk, nou bizwen réini èvè dòt sèwvitè a Bondyé pou yo ankourajé-nou, é pou nou ankourajé-yo osi (Li Ébré 10:24, 25).

Lè nou ka réini èvè moun ki enmé Bondyé, sa ka édé-nou vin zanmi a-y. Lè ou ka vin an réinyon a Témwen a Jéova, sé on bèl lokazyon toubònman pou fwa a lézòt ankourajé-w (Li Women 1:11, 12).

4. Kijan ou pé vin zanmi a Bondyé ?

Ou pé vin zanmi a Jéova si ou ka pran tan réfléchi asi sa ou ka aprann adan Pawòl a-y. Réfléchi asi jan i ka aji, asi konsèy i ka bay é asi sa i ka pwomèt. Si ou priyé é si ou pran tan réfléchi asi sa, sa ké édé-w toujou ni plis rèkonésans pou lanmou é pou sajès a Bondyé (Li Joziyé 1:8 ; Sòm 1:1-3).

Pou vin zanmi a Bondyé, antoutjan fò ou fè-y konfyans, fò ou ni fwa adan-y. Men lafwa ka touvé-y kon on plant, fò ou fè-y grandi. Menmjan on plant bizwen dlo pou-y pousé, lafwa bizwen konésans pou i vin pli fò. Sé pousa fò ou toujou kontinyé nouri fwa a-w. Pousa, fò ou pran tan réfléchi asi sa ou ka kwè é asi sa ki ka fè-w kwè sa (Li Matyé 4:4 ; Ébré 11:1, 6).

5. Ki byenfé ou ké rékòlté si ou vin zanmi a Bondyé ?

Jéova ka sousyé-y dè moun ki enmé-y. I pé pwotéjé-w kont tousa ki pé fè fwa a-w pèd fòs é kont tousa ki pé fè-w pèd lèspwa dè viv pou touttan (Sòm 91:1, 2, 7-10). I ka avèti-w pou-w pa pran pon mové labitid ki pé aji si santé a-w é fè-w pèd jwa a-w. I ka montré-w kijan ou pé ni méyè vi ki tini (Li Sòm 73:27, 28 ; Jak 4:4, 8).