Ès soufrans ké fin on jou ?

MI SA LABIB KA DI

« Bondyé ké suiyé tout dlo an zyé a yo, lanmò pé ké la ankò ; pé ké tini ni dèy, ni kri, ni doulè ankò » (Révélation 21:3, 4, Traduction du monde nouveau).

KA SA VLÉ DI POU-W

Sa pwomès-lasa ka pòté ba-w :

ou sèten Bondyé pa rèsponsab a pwoblèm ou ka kontré (Jacques 1:13),

ou soulajé pas ou sav Bondyé ka sipòté lè ou ka soufè (Zekaria 2:8),

ou tin lèspwa, on lèspwa solid, tout kalité soufrans ké disparèt on jou (Psaume 37:9-11).

ÈS NOU PÉ KWÈ SA LABIB KA DI ?

Wi, pou omwen dé rézon :

• Bondyé hay soufrans é lenjistis. Enki konsidéré sa sa té ka fè Jéova Dyé lè, an tan lontan, yo té ka malmenné pèp a-y pa méchansté. Sèlon sa Labib ka di, lè Bondyé té ka tann yo hélé anba mové trètman yo té ka fè yo sibi, sa té ka boulvèsé-y (Juges 2:18).

  Bondyé pa dakò ditou èvè moun ka fè lézòt sibi méchansté. Pa ègzanp, Labib ka di, Bondyé hay « men ki ka fè san inosan koulé » (Proverbes 6:16, 17).

• Bondyé ka sousyé-y dè nou, dè nouchak. Chakmoun konnèt « ki bobo é ki doulè » i ni andidan kè a-y ; men a pa-y tousèl, Jéova osi konnèt ! (2 Chroniques 6:29, 30).

  Talè, Jéova ké sèvi èvè Wayòm a-y pou fè soufrans a chakmoun disparèt (Matthieu 6:9, 10). Pannansitan, èvè tandrès, I ka soulajé penn a moun ki ka chèché-y èvè tout kè a-yo (Actes 17:27 ; 2 Corinthiens 1:3, 4).