Kouté Bondyé pou mayé a-w vin bèl

Sé Jéovaa ki mayé prèmyé misyé-la é prèmyé madanm-la. Labib ka di kè Bondyé kréyé prèmyé madanm-la, é aprésa « i menné-y ba lòm ». Tèlman Adan té kontan, i di konsa : « Awè, mi zo a zo an mwen é mi chè a chè an mwen » (Jénèz 2:22, 23). Jis aprézan, Jéova vlé vwè moun-mayé kontan.

Byensouvan, lè dé moun ka mayé, yo ka kwè kè tout biten ké pawfè. Men an réyalité, menmsi on misyé é on madanm enmé-yo osèryé, yo pé pa pa jwenn pwoblèm (1 Korentyen 7:28). Adan bwochi-lasa, ou ké touvé prensip a Labib. Si ou ka suiv-yo, ou ké ni tchè-kontan adan mayé a-w é vi a fanmi a-w ké bèl (Sòm 19:8-11).

1 AKSÈPTÉ WÒL-LA JÉOVA BA-W LA

MI SA LABIB KA DI : Mari-la sé chèf a fanmi-la (Éfézyen 5:23).

Si ou sé on mari, Jéova vlé ou okipé dè madanm a-w byen é èvè dousè (1 Pyè 3:7). I fè-y pou i sé on konpangn ki k’ay èvè-w, é i vlé ou aji épi-y èvè rèspé é lanmou (Jénèz 2:18). Fò ou enmé madanm a-w fò menm. Lanmou-lasa ké fè-w fè entéré a-y pasé avan ta-w (Éfézyen 5:25-29).

Si ou sé on madanm, Jéova vlé ou ni on gran gran rèspé pou mari a-w é kè ou édé-y rivé about a rèsponsabilité-la Bondyé ba-y la (1 Korentyen 11:3 ; Éfézyen 5:33). Soutyenn-li lè i ka pran on désizyon é travay ansanm èvè-y dè-tou-kè (Kolosyen 3:18). Si ou ka aji konsa, mari a-w ké vwè ou sé on bon madanm é Jéova osi (1 Pyè 3:1-6).

SA OU PÉ FÈ :

• Mandé moun-la ou mayé èvè-y la ka ou pé fè pou vin on méyè mari, oben on méyè madanm. Kouté répons a-y byen é fè tousa ou pé pou fè douvan.

• Fò ou ni pasyans. Zò toulédé ké bizwen tan pou aprann kijan pou rann lòt-la éré.

2 CHÈCHÉ KONPRANN SA LÒT-LA KA RÈSANTI

MI SA LABIB KA DI : Chèché entéré a moun-la ou mayé èvè-y la (Filipyen 2:3, 4). Fò i ni onlo valè pou-w. Sonjé kè Jéova ka mandé sèwvitè a-y dè « ni dousè èvè toutmoun » (2 Timoté 2:24). « Pawòl moun ka di san réfléchi ka touvé-yo kon koudépé, men lang a moun ki saj ka géri moun. » Alò pran tan chwazi mo a-w byen (Pwovèb 12:18). Lèspri a Jéova ké édé-w palé èvè bonté é èvè lanmou (Galat 5:22, 23 ; Kolosyen 4:6).

SA OU PÉ FÈ :

• Avan ou palé èvè moun-la ou mayé èvè-y la dè on biten enpòwtan, priyé Bondyé pou i édé-w rété kalm é pou-w pa rété yenki asi sa ou ka pansé.

• Pran tan réfléchi asi sa ou kay di é jan-la ou kay di-y la.

3 TRAVAY ANSANM-ANSANM

MI SA LABIB KA DI : Lè ou ka mayé, vou é moun-la ou mayé èvè-y la, zò ka fòwmé « onsèl chè » (Matyé 19:5). Men zò ka rété dé moun diféran é sa pé rivé kè zò pa’a vwè léchòz menmjan-la. Sé pousa, fò zò aprann rété ini adan sa zò ka pansé é adan sa zò ka rèsanti (Filipyen 2:2). Sa enpòwtan toubònman kè zò rété ini lè zò ka pran désizyon. Labib ka di : « Lè on moun ka mandé konsèy, pwojé a-y ka réyisi » (Pwovèb 20:18). Apiyé-zòt asi prensip a Labib lè zò ka pran désizyon enpòwtan ansanm (Pwovèb 8:32, 33).

SA OU PÉ FÈ :

• Apatoudi ba madanm a-w ou mari a-w enfòwmasyon, oben lidé a-w asi on sijé, fò ou di-y sa ou ka rèsanti.

• Avan ou désidé fè on biten, mandé madanm a-w oben mari a-w sa i ka pansé.