LÈSON 14

Mèt sé lidé prensipal la an valè

Ébré 8:1

SA POU-W FÈ : Édé sé moun-la ki ka kouté-w la pa pèd fil a diskou a-w, é édé-yo konprann byen kijan chak lidé prensipal lyanné, ki èvè òbjèktif a-w, ki èvè tèm a-w.

KIJAN POU-W FÈ :

Fò ou ni on òbjèktif. Chèché ki òbjèktif a diskou a-w. Ès sé pou ba moun enfòwmasyon, pou ba-yo prèv, oben pou ba-yo anvi aji ? Aprésa, tchenn kont dè òbjèktif-lasa toupannan ou ka fè diskou-la. Fè ansòt pou tout sé lidé prensipal la édé-w rivé a òbjèktif-lasa.

Ou pé mandé-w : « Ki kèsyon oben kibiten té’é pé frenné sé moun-la ki ka kouté-w la asi sijé-lasa ? Adan tousa, ka ki té’é pé vin an lèspri a yo an prèmyé ? É an dézyèm ? É apré ? » Aprésa, òwganizé sé lidé-la adan lòd-lasa pou sé moun-la pé sa suiv, konprann é aksèpté sé lidé-la.
Mèt tèm a diskou-la an valè. Fè sé moun-la sonjé tèm-la pannan tout diskou-la. Pou fè sa, répété sé mo-la ki pli enpòwtan la adan tèm-la, oben sèvi èvè mo ki vlé di menm biten-la.
Èspliké sé lidé prensipal la on mannyè ki klè é ki senp. Chwazi enki lidé prensipal ki anrapò èvè tèm a-w, é kè ou ké pé èspliké byen adan tan-la yo ba-w la. Pa chwazi twòp lidé prensipal. Bay chak lidé prensipal on mannyè ki klè, fè on pòz antrè chak lidé, é pa pasé two vit antrè dé lidé.

Ou pé nonmé sé lidé prensipal la adan prèmyé pawòl a-w pou édé sé moun-la suiv diskou a-w. Oben, ou pé répété-yo adan dènyé pawòl a-w pou édé sé moun-la rètyenn-yo.