LÈSON 18

Édé sé moun-la aprann on nouvo biten

1 Korentyen 9:19-23

SA POU-W FÈ : Fè sé moun-la ki ka kouté-w la réfléchi asi on biten ki ka entérésé-yo, konsa yo ké santi yo aprann on biten ki itil.

Tchenn kont dè sa sé moun-la ja konnèt. Olyé ou kontanté-w répété on biten yo ja tann, lè ou ka palé ba yo, fè-yo vwè léchòz ondòt jan.

Pasé pli vit asi lidé sé moun-la ja konnèt, é pran plis tan pou èspliké sé nouvo lidé-la.
Fè rèchèch é pran tan réfléchi. Chèché enfòwmasyon ki fré oben biten moun pa byen konnèt pou èspliké sé lidé enpòwtan la. Gadé byen si sé enfòwmasyon-lasa k’ay èvè sijé-la.

Lè ou ka préparé-w, pou réfléchi voumenm a-w asi sijé-la, mandé-w : « Dè kimoun ? Dè kibiten yo ka palé ? Ola ? Kitan ? Kijan sa fèt ? É poukwa sa ? ». É aprésa lè ou ka anségné, sèvi èvè yonndé adan sé kèsyon-lasa é bay répons-la. Konsa, sa ké rann sa ou ka di pli vivan.
Montré sé moun-la kijan sa ou ka di itil. Èspliké kijan sé vèwsé-la ki adan Bib-la pé édé sé moun-la adan vi a yo. Palé dè biten ki ka konsèwné sé moun-la ki ka kouté-w la. Sé pé sa moun ka viv, sa moun ka pansé, oben sa moun ka fè.