LÈSON 14
Kijan nou dwèt adoré Bondyé pou sa fè-y plézi ?
Kon nou vwè adan lèson 13 la, a pa tout rèlijyon ki ka fè Bondyé plézi. Men kanmenmsa, ni mwayen adoré Kréyatè an nou pou sa mèt jwa an tchè a-y. Ki kalité « adorasyon [oben : rèlijyon] » ki ka fè-y plézi ? (Jak 1:27 ; nòt). An-nou vwè ka Labib ka di asi sa.
1. Si ou vlé adoré Bondyé kon i vlé, ola ou pé ay gadé ?
Bib-la ka di-nou byen konm i fo kijan pou nou adoré Bondyé. Jézi di Bondyé : « Pawòl a-w sé vérité » (Jan 17:17). Ni dé rèlijyon ki pa menm ka tchenn kont dè sé vérité-la ki maké an Bib-la, alòskè sé Pawòl a Bondyé. Yo ka mèt tradisyon é ansègnman a nonm kon yomenm, an plas a sé vérité-lasa. Jéova pa ka aprésyé moun ki ka ‘mèt komandman a-y akoté’ (li Mawk 7:9). Pawkont, lè nou ka suiv sé konsèy-la ki maké an Bib-la, nou ka mèt jwa an tchè a-y.
2. Kijan pou adoré Jéova ?
Jéova sé Kréyatè an nou, kifè, sé yenki li pou nou adoré (Révélasyon 4:11). Sa vlé di kè fò nou enmé-y é fò pa nou itilizé pon kalté imaj, ni pon kalté idòl pou nou adoré-y (li Izayi 42:8).
Fò nou adoré Jéova on mannyè ki ‘sen é kè i pé aksèpté’ (Women 12:1). Sa vlé di kè fò nou viv annakò èvè sé lwa-la i ban-nou la. Pa ègzanp, on moun ki enmé Jéova enmé sa i ka di anrapò èvè mayé é i ka suiv sé lidé-lasa an vi a-y. I pa’a fimé, i pa’a pran dwòg, i pa’a bwasonné pas sa ké détwi santé a-ya.
3. Poukwa fò nou sanblé èvè dòt moun pou nou adoré Jéova ?
Chak simenn, lè nou k’ay réinyon, sé lokazyon pou nou ‘louwé Jéova adan lasanblé-la’ (Sòm 111:1, 2). Pa ègzanp, nou ka fè sa lè nou ka chanté louwanj ba Bondyé (li Sòm 104:33). Jéova ka mandé-nou ay réinyon pas i enmé-nou é i sav kè sa ké édé-nou ni tchè-kontan pou touttan. Lè nou k’ay réinyon, yonn ka ankourajé lòt.
AN-NOU FOUYÉ PI FON
An-nou vwè pou ki biten Jéova pa dakò pou nou itilizé pon kalté idòl pou nou adoré-y. É an-nou vwè déotwa biten enpòwtan kè nou pé fè pou louwé Bondyé.
4. Fò pa nou sèvi èvè idòl pou nou adoré Bondyé
Kijan nou fè sav kè Bondyé pa dakò èvè sa ? Gadé VIDÉO-la é fè on ti kozé asi kèsyon-la ki ka vin la.
An tan a Labib, sèwten moun ki té an pèp a Bondyé éséyé sèvi èvè idòl pou adoré-y. Ka i pasé aprésa ?
Ni sèwten moun ki ka sèvi èvè imaj pou adoré Bondyé, pas yo ka konpranndèdi kè sa ké édé-yo vin pi bon zanmi èvè-y. Men an réyalité, sé lèkontrè ki ka fèt. Li Ègzòd 20:4-6 é Sòm 106:35, 36, é fè on ti kozé asi sé kèsyon-lasa :
Èvè ki kalté biten ou ja vwè moun sèvi pou adoré Bondyé ?
Lè sé moun-la ka sèvi èvè idòl pou adoré Jéova, ka i ka rèsanti ?
Lè on moun ka sèvi èvè idòl pou adoré Bondyé, ou ka di sé on bon biten ? Poukwa ou ka di sa ?
5. Si sé yenki Jéova nou ka adoré, nou pé’é èsklav a pon mansonj ankò
Si ou ka adoré Bondyé kon i ka mandé, ou pé’é èsklav a pon kwayans ki pa bon. Kijansa ? Gadé VIDÉO-la.
Li Sòm 91:14 é fè on ti kozé asi kèsyon-lasa :
Lè sé yenki Jéova nou ka adoré, ka i ka pwomèt-nou ?
6. Nou ka adoré Bondyé lè nou an réinyon
Lè nou an réinyon, nou pé bay komantè é nou ka chanté kantik. Konsa nou ka louwé Jéova é yonn ka ankourajé lòt. Li Sòm 22:22 é fè on ti kozé asi sé kèsyon-lasa :
Lè ou k’ay lasal, ès ou ka aprésyé sé komantè-la ou ka tann la ?
Ès sa ka di-w dè préparé-w pou fè on ti komantè ?
7. Jéova ka kontan lè nou ka pawtajé sa nou ka aprann
Ni plizyè fason diféran pou nou palé dè sé vérité-la ki an Bib-la. Li Sòm 9:1 é 34:1, é fè on ti kozé asi kèsyon-lasa :
Ka ou aprann an Bib-la é kè ou té’é byen anvi palé èvè ondòt moun ?
MI SA MOUN KA DI : « Dépi ou ni fwa an Bondyé, ou pé adoré-y jan ou vlé. »
Ka ou ka pansé dè sa ?
ON TI RÉZIMÉ
Nou ka fè Kréyatè an nou plézi lè sé-y tousèl nou ka adoré, lè nou ka louwé-y an lasanblé-la é lè nou ka fè dòt moun konnèt sa nou ka aprann.
Ka ou woutyenn
Ki koté Bondyé ka di-nou kijan pou nou adoré-y ?
Poukwa sé Jéova tousèl pou nou adoré ?
Poukwa fò nou adoré-y ansanm èvè dòt moun ki vlé fè-y plézi ?
AY GADÉ SA OSI
Adan awtik-la « Je ne suis plus esclave des idoles » gadé kijan on madanm sòti anba esklavaj a sé idol-la.
« La Bible transforme des vies » (Tou dè Gad a 1é juiyé 2011 an fransé)
Gadé pou vwè ka ki pé édé-w préparé komantè a-w pou sé réinyon-la.
« Ba Jéova louwanj adan lasanblé-la » (Tou dè Gad a janvyé 2019)
On jenn tiboug té ni dimal pou ay lasal, men gadé kijan sé réinyon-la fè-y dibyen toubònman.
Onlo moun ka kwè kè kwa-la sé senbòl a sé krétyen-la, men ès fò nou sèvi èvè-y pou nou adoré Bondyé ?
« Poukwa Témwen a Jéova pa ka sèvi èvè lakwa pou adoré Bondyé ? » (on awtik ki asi jw.org)
a Nou ké palé dè sé biten-lasa adan sé lèson-la ki ka vin la.