LÈSON 29

Lè on moun mò, ka i ka divini ?

Vèwsyon papyé

Ès ou ja pèd on moun kè ou enmé ? Sé on biten ki ka fè mal toubònman é lè sa ka rivé onlo moun ka pozé-yo sé kèsyon-lasa : « Lè on moun mò, ka i ka divini ? Ès on jou an ké wouvwè sé moun-la an té enmé la ? » Adan lèson-lasa é tala ki ka vin la, nou ké vwè kè lè Labib ka réponn a sé kèsyon-lasa, sa ka konsolé-nou toubònman.

1. Lè on moun mò, ka i ka divini ?

Jézi di kè lè on moun mò sé konsidiré i ka dòmi fò. Lè on moun ka dòmi bon dòmi la i pa konnèt ayen adan sa ki ka pasé alantou a-y. Poukwa nou pé di kè lè on moun mò sé konsi i ka dòmi ? Lè on moun mò i pa’a rèsanti pon doulè an tchè a-y. Menmsi i té byen enmé zanmi a-y é fanmi a-y, i pa’a vwè mank a yo. Mi sa Labib ka di : « Lémò pa konnèt ayen » (li Éklézyas 9:5).

2. Lè ou konnèt lavérité si lanmò ka sa ka pwokiré-w ?

Ni onlo moun ki pè lanmò é jous ni moun ki pè moun-mò ! Men si ou pè, dépè, pas sa Labib ka di asi lanmò pé ba-w fòs é kouraj. Mi sa Jézi di : « Lavérité ké libéré-zòt » (Jan 8:32). Ni déotwa rèlijyon ka di kè lè on moun ka mò ni on pati adan-y ka kontinyé viv, men a pa sa Labib ka di. Dapré Labib, sé moun-la pa sav ka i ka fèt alantou a yo. Kivédi, yo pa’a soufè é yo pé pa fè-nou dimal nonplis. Kifè nou pa oblijé priyé pou yo, ni ba-yo ayen pou anpéché-yo fè kòlè èvè nou.

Ni moun ka di kè yo ka rivé kominiké èvè moun-mò. Men pavré sa ! Kon nou sòti vwè, moun-mò « pa konnèt ayen ». Ni moun ki ka konpranndèdi kè sé èvè sé mò-la yo ka kominiké, men an réyalité sé èvè sé démon-la yo ka kominiké. Sé démon-la ka kouyonné-yo é ka fè-yo konprann kè sé pou on bon fanmi oben on bon zanmi yo ka palé. Lè ou konnèt lavérité asi lanmò sa ka pwotéjé-w kont sé démon-la. Jéova vé pa pon malè rivé-nou. Sé pou sa i ka di-nou pa kominiké èvè moun-mò, pas an réyalité sé èvè sé démon-la nou ka kominiké é sé on biten ki danjéré toubònman (li Détéwonòm 18:10-12).

AN-NOU FOUYÉ PI FON

Labib ka ban-nou dòt détay asi lanmò é i ka édé-nou fè Bondyé konfyans, pas sé on Papa plen lanmou ki pa’a fè moun-mò soufè. An-nou vwè sé biten-lasa ansanm.

Pannan lantèwman a on madanm, mari a-y é dé timoun a yo sizé si on ban. Zanmi a yo é fanmi a yo la èvè yo pou konsolé-yo, é pou soutyenn-yo.

3. Lè on moun mò, ka i ka divini ?

Si ou mandé plizyè moun ki sòti adan plizyè péyi diféran ka i ka pasé apré lanmò, ou ké rann-vou kont kè ni plizyè répons diféran. Ou ka tou konprann kè a pa yotout ki bon.

La ou ka rété la, si ou mandé sé moun-la ka nou ka divini lè nou mò, ka yo ké réponn-vou ?

Pou vwè ka Labib ka di asi sa, gadé VIDÉO-la.

VIDÉO : Ka i ni apré lanmò ? (on mòso adan vidéo-la) (1:19)

Imaj a vidéo-la « Ka i ni apré lanmò ? (on mòso adan vidéo-la) » On séri imaj : 1. On moun-mò asi on kouch lopital. 2. On misyé ka dòmi tou sizé adan on tren. I sizé antrè dé moun.

Li Éklézyas 3:20 é fè on ti kozé asi sé kèsyon-lasa :

Dapré sé vèwsé-lasa, lè on moun mò ka i ka divini ?
Apré on moun mò, ès ni on biten adan-y ki ka kontinyé viv ?

Labib ka rakonté-nou ka ki pasé apré Laza mò. Boug-lasa sé té bon zanmi a Jézi. Li Jan 11:11-14 é pran tan gadé kijan Jézi ka palé dè Laza. Aprésa fè on ti kozé asi sé kèsyon-lasa :

Èvè ki biten Jézi konparé lanmò ?
Ka lidé-lasa ka aprann-nou si moun ki mò ?
Lè ou ka gadé ka Labib ka di anrapò èvè lanmò, ès ou dakò èvè sa ?

4. Lè nou ka vin konnèt lavérité asi lanmò, sa ka libéré-nou

Lè nou ka vin konnèt lavérité asi lanmò, nou pa pè moun-mò ankò. Li Éklézyas 9:10 é fè on ti kozé asi kèsyon-lasa :

Ès on moun-mò pé fè-nou ditò ?

Sa nou ka aprann adan Bib-la ka wouvè zyé an nou pas nou sav kè nou pa bizwen ba sé mò-la ayen pou anpéché-yo fè kòlè èvè nou é nou pa bizwen adoré-yo nonplis. Li Izayi 8:19 é Révélasyon 4:11, é fè on ti kozé asi sé kèsyon-lasa :

Si on moun ka adoré moun-mò oben si i ka mandé-yo édé-y ka Jéova ka pansé dè-y ?

On séri imaj : Plizyè mès-é-labitid anrapò èvè jan yo ka onoré lézansèt. 1. On misyé ajounou douvan on tonb ka priyé. I mèt manjé pou ofè moun-mò la. 2. Twa misyé ka dansé èvè on lenj a sòsyé anlè yo. Yo ka kriyé sé mové-lèspri-la. 3. Jou a fèt a lémò, on group-moun ka défilé èvè mas a moun-mò an figi a yo. Yo chak ni on baton an men a yo é an bout a baton-lasa, ni on kràn. — Lè ou ka vin konnèt lavérité asi lanmò sa ka libéré-w pas ou ka lagé onlo mès é labitid ki pa’a fè Jéova plézi.

5. Lè nou ka vin konnèt lavérité asi lanmò, sa ka konsolé-nou

Ni onlo moun ki aprann kè apré ou mò yo ka pini-w pou tout sé mové biten-la ou fè la pannan ou té vivan. Men sa bèl dè sav kè lè on moun mò i pa’a soufè, menmsi lè i té vivan i fè onlo biten ki pa té bon. Li Women 6:7 é fè on ti kozé asi kèsyon-lasa :

Dapré Labib, lè on moun mò i péyé pou péché a-y. Alò ès ou ka di on moun mò ka soufè akòz dè sé péché-la i fè la pannan i té vivan ?

Pli nou ka aprann konnèt Jéova, é pli nou sèten kè i pa’a fè moun-mò soufè é kè i pé’é jen fè sa nonplis. Li Détéwonòm 32:4 é 1 Jan 4:8, é fè on ti kozé asi sé kèsyon-lasa :

Adan sé 2 pasaj-lasa yo ka palé dè kalité a Jéova. Ès ou ka di on Bondyé konsa pé fè moun-mò soufè ?
Ès ou ka touvé kè sa ou aprann si lanmò ka konsolé-w ? Poukwa ou ka di sa ?

MI SA MOUN KA DI : « An pè kè fanmi an mwen ki ja mò fè kòlè èvè mwen. »