LÈSON 56
Fè ansòt pou lasanblé-la rété soudé
Lèwvwè nou èvè frè é sè an nou, nou ka rèsanti menm biten ki David. Mi sa i di : « A pa ti bèl sa bèl é a pa ti agréyab sa agréyab pou dé frè dè viv soudé ansanm-ansanm ! » (Sòm 133:1). Men nou pa enki vin soudé konsa ! Si nou soudé, sé pas nouchak ka fè onlo éfò an sans-lasa.
1. Ki biten èstraòwdinè nou ka vwè adan pèp a Bondyé ?
Si ou ay réinyon adan ondòt péyi, pétèt ou pé ké konprann lang-la, men on biten ki sèten sé kè ou ké santi-w akaz a-w. Poukwa sa ? Paskè toupatou asi latè, nou ka étidyé Labib èvè sé menm piblikasyon-la é yonn ka montré lòt kè i enmé-y. Kèlkèswa la nou ka rété, ‘noutout ka louwé non a Jéova é noutout ka adoré-y ansanm-ansanm’ (Sofoni 3:9, nòt).
2. Ka ou pé fè pou noutout rété soudé ?
« Fò-zòt enmé-zòt fò toubònman, èvè tout tchè a zòt » (1 Pyè 1:22). Kijan ou pé mèt konsèy-lasa an pratik ? Vométan ou chèché kalité a lézòt olyé ou gadé défo a yo. Pa frékanté yenki moun ki kon vou é ki enmé menm biten ki-w. Éséyé fè konésans èvè frè é sè ki sòti dòt koté. Si ou ja mèt an tèt a-w kè fò ou véyé-w èvè sèwten frè é sè, alòskè ou pa menm byen konnèt-yo, fè bon éfò pou woté lidé-lasa an tèt a-wa (li 1 Pyè 2:17).
3. Siwvwè ou trapé on bab èvè ondòt krétyen, ka ou ké fè ?
Sé vré kè nou soudé, men fò pa nou oubliyé ké nou enpawfè. Dépawfwa, nou ka blésé lézòt oben nou ka fè-yo lapenn. Sa ka rivé noutout. Mi sa Pawòl a Bondyé ka di : « Fò yonn kontinyé padonné lòt volontyé », é mi sa i ka di ankò : « Menmjan Jéova padonné-zòt volontyé, sé konsa fò zò padonné-zòt osi » (li Kolosyen 3:13). Souvantfwa, nou ka fè Jéova lapenn é magrésa i ka padonné-nou. Alò sa toutafè nòwmal si i vlé nou padonné frè é sè an nou osi. É si ou ka rann-vou kont kè ou fè on moun lapenn, pran douvan pou ay fè lapé èvè-yb (li Matyé 5:23, 24).
AN-NOU FOUYÉ PI FON
An-nou vwè ka ou pé fè pou lasanblé-la rété soudé. É an-nou vwè osi ka ou pé fè pou i ni lapé adan lasanblé-la.
Ka ou ké fè pou woumèt lapé ?
4. Pa lésé sa moun ka pansé oben sa moun ka di détenn asi-w
Nou vlé enmé tout frè é sè an nou. Men lè on moun pa kon nou, nou pé ni dimal a rapwoché-nou dè-y. Ka ki pé édé-nou fè sa ? Li Akt 10:34, 35 é fè on ti kozé asi sé kèsyon-lasa :
Jéova dakò pou tout kalté moun adoré-y. Kijan ègzanp a-y pé édé-w pou ou pé sa aksèpté moun ki sòti tout kalté koté ?
La ou ka rété la, ki pawòl moun ka di asi sé étranjé-la ? Poukwa ou vé pa lésé sé lidé-lasa détenn asi-w ?
Li 2 Korentyen 6:11-13 é fè on ti kozé asi kèsyon-lasa :
Ni mwayen ou enmé tout frè é sè a-w pi fò. Dapré-w, kijan ou té’é pé fè sa ?
5. Padonné volontyé é fè lapé
Jéova ka padonné-nou volontyé alòskè i pé’é jen fè ayen ki mérité kè nou padonné-y. Li Sòm 86:5 é fè on ti kozé asi sé kèsyon-lasa :
Ka vèwsé-lasa ka aprann-nou asi Jéova ?
Jéova ka padonné-w volontyé. Poukwa ou ni rèkonésans pou sa ?
Adan ki sitiyasyon nou pé touvé sa rèd dè rété anpé èvè lézòt ?
Kijan nou pé imité Jéova pou nou rété soudé èvè frè é sè an nou ? Li Pwovèb 19:11 é fè on ti kozé asi kèsyon-lasa :
Si on moun ka fè oben ka di on biten ki ka égri-w oben ki ka fè-w mal, ka ou pé fè pou sa ay myé antrè zòt ?
Délè, sé noumenm ki ka fè lézòt lapenn. Adan ka-lasa, ka nou dwètèt fè ? Gadé VIDÉO-la é fè on ti kozé asi kèsyon-la ki ka vin la.
Adan vidéo-la, ka sè-la fè pou woumèt lapé ?
6. Chèché pou vwè ki bèl kalité frè é sè a-w ni
Lè nou ka aprann konnèt frè é sè an nou, nou ka vwè bèl kalité a yo, é nou ka vwè défo a yo osi. Ka nou pé fè pou nou konsantré-nou asi bèl kalité a yo ? Gadé VIDÉO-la é fè on ti kozé asi kèsyon-la ki ka vin la.
Ka ki pé édé-w vwè bèl kalité a frè é sè a-w ?
Jéova ka konsantré-y asi bèl kalité an nou. Li 2 Kronik 16:9a é fè on ti kozé asi kèsyon-lasa :
Ka ou ka rèsanti lè ou ka sonjé kè Jéova ka konsantré-y asi bèl kalité an nou ?
Menmsi on bag an lò ni déotwa griji anlè-y, a pa pousa i pa ni valè ankò. Menmjan-la, frè é sè an nou enpawfè men yotout ni onlo valè pou Jéova.
MI SA MOUN KA DI : « Padon pa’a géri bòs ! »
Poukwa fò-nou padonné lézòt volontyé ?
ON TI RÉZIMÉ
Ou pé édé lasanblé-la rété soudé. Pou fè sa, fò ou paré a padonné lézòt é fò ou montré tout frè é sè a-w kè ou enmé-yo.
Ka ou woutyenn
Ka ou pé fè pou ou pa lésé sa moun ka di é sa yo ka pansé détenn asi-w ?
Ka ou ké fè si ou trapé on bab èvè ondòt krétyen ?
Ès ou vlé padonné lézòt menmjan ki Jéova ? Pou ki rézon ?
AY GADÉ SA OSI
Pou édé-nou konprann kè fò pa nou jijé lézòt, Jézi sèvi èvè on bèl ègzanp.
Ès fò-nou mandé padon menmsi nou sèten nou ni rézon ?
« Les excuses contribuent à la paix » (Tou dè Gad a 1é novanm 2002 an fransé)
Gadé kijan déotwa moun aprann aji èvè lézòt san yo fè préférans.
Si on bab lévé, ka ou pé fè avan sa mèt dézòd adan lasanblé-la ?
« Règle les désaccords avec amour » (Tou dè Gad a mé 2016 an fransé)
a Nòt niméwo 6 la ki an bout a liv-la ka èspliké ka on krétyen pé fè pou i pa transmèt on maladi kè i ni, davwa i enmé frè é sè a-y.
b Nòt niméwo 7 la ki an bout a liv-la ka di-nou ka pou nou fè si nou trapé on bab èvè ondòt krétyen é kè pwoblèm-lasa anrapò èvè lajan oben lalwa.