Rété fidèl a san pou san !

1. Adan paragraf-la, nou palé dè twa Témwen a Jéova. Kijan yo montré fidélité a yo pou Jéova ?

IMAJINÉ kè sé twa Témwen a Jéova ki ka touvé-yo adan sé sitiyasyon-lasa. 1) On jennfi ki lékòl ka tann pwofésè-la ka mandé tout sé zélèv-la dè pawtisipé adan on fèt kè Bondyé pa enmé. Konm i sav sa Bondyé ka pansé dè fèt-lasa, èvè onlo rèspé, i ka rèfizé dè pawtisipé adan-y. 2) On jennboug ki timid ka préché dè kaz-an-kaz. I ka sonjé kè ni on kanmarad-lékòl a-y ki ka rété adan pwochen kaz-la yo kay fè la. É kanmarad-lasa ja ni lokazyon fè jé èvè Témwen a Jéova. Men jennboug-la kay owa kaz-la kanmenm é i ka konnyé asi pòt-la. 3) On nonm ka travay rèd pou ba fanmi a-y manjé. Lèwgadé, on jou, patron a-y ka mandé-y dè fè on biten malonnèt, kè lalwa ka pini. Menmsi i pé rivé a pèd travay a-y, i ka èspliké patron a-y kè fò i rété onèt é kè fò i suiv lalwa, padavwa sé sa Bondyé ka atann dè sèwvitè a-y (Wom. 13:1-4 ; Ébr. 13:18).

2. Ki kèsyon nou kay ègzaminé, é poukisa ?

² Sèlon vou, ki bèl kalité sé Témwen-la montré adan sé twa ka-lasa ? Pétèt ou ké di kè yo sé dé moun vayan é onèt. Men yo montré ondòt bèl kalité ki enpòwtan toubònman : yo rété fidèl a san pou san. Yochak montré-yo fidèl lè yo chwazi dè suiv prensip a Bondyé. Sèten Jéova fyèw dè yochak. Menmjan-la, nou vlé kè Pap’an nou ki an syèl-la fyèw dè nou, pa vré ? Alèla, an-nou ègzaminé sé kèsyon-lasa : Rété fidèl a san pou san, ka sa vlé di ? Poukwa sa nésésè kè nou rété fidèl a san pou san ? É ka nou pé fè pou, an tèt an nou, nou toujou désidé a rété fidèl magré épòk difisil la nou ka viv la ?

RÉTÉ FIDÈL A SAN POU SAN, KA SA VLÉ DI ?

3. a) Rété fidèl a san pou san, ka sa vlé di ? b) Ki ègzanp ki pé édé-nou konprann ka sa vlé di rété fidèl a san pou san ?

³ Ankijan sèwvitè a Bondyé ka montré kè yo fidèl a san pou san ? Yo ka fè sa lè yo ka kiltivé on lanmou ki total pou Jéova, on lanmou kè ayen ni ponmoun pé pa détui. Lanmou-lasa ka pousé-yo a toujou fè sa ki ka fè Jéova plézi. Ka èsprésyon-lasa vlé di lè nou ka jwenn-li an Bib-la ? Yo ka itilizé èsprésyon-lasa, dabò pou palé dè on biten ki antyè oben ki pa ni pon défo. Pa ègzanp, lè sé Izraélit-la té ka fè sakrifis ba Jéova, Lwa-la té ka mandé-yo menné dé bèt ki pa té ni pon défob (Lév. 22:21, 22). Lè sèwvitè a Bondyé té vlé fè on sakrifis, yo pa té ni dwa menné pon bèt té ka manké-y on pat, on zòrèy, on zyé, oben pon bèt ki té malad. Sa té enpòwtan kè yo menné on bèt antyè é san pon défo (Mal. 1:6-9). Nou pé konprann poukwa sa enpòwtan pou Jéova. Gadé ! Lè nou ka achté on biten, ki sé on fwi, on liv, on zouti, oben ondòt biten ankò, nou vé pa i ni pa menm on ti kòché, é fò pa ka manké ayen adan-y. Nou vlé i antyè é san pon défo. Menmjan-la osi, Jéova vlé kè lanmou-la nou ni pou-y la é fidélité an nou, antyè é san pon défo.

4. a) Èskè on moun ki pa pawfè pé rété fidèl a san pou san ? b) Dapré sa nou ka li adan Sòm 103:12-14, ka Jéova ka atann dè nou ?

⁴ Èskè sa vlé di kè, pou rété fidèl a san pou san, nou oblijé pawfè ? Pétèt kè konm nou ka fè onpakèt érè, nou pé pansé kè nou pé’é jen pé rété fidèl a san pou san. Men an-nou réfléchi asi dé rézon ki ka fè kè nou pa bizwen enkyété-nou. On prèmyé biten, sé kè Jéova pa jen ka arété-y asi défo an nou. Nou ka li adan Pawòl a-y : « Si ou té ka véyé fòt an nou, o Ja, kimoun, o Jéova, ki té’é pé tchenbé ? » (Sòm 130:3). Jéova sav kè nou pa pawfè, kè nou sé dé péchè, é i ka padonné péché an nou onlo toubònman (Sòm 86:5). Dézyèm biten-la, sé kè Jéova konnèt limit an nou, é i pa ka mandé-nou fè plis ki sa nou pé fè (li Sòm 103:12-14). Men alò, pou Bondyé, a ki moman on moun fidèl a san pou san ? A ki moman i pé di kè moun-lasa san défo ?

5. Pou sèwvitè a Jéova rété fidèl a san pou san, poukwa fò-yo enmé Jéova fò ?

⁵ Pou sèwvitè a Jéova rété fidèl a san pou san, fò-yo enmé Jéova fò. Si lèwvwè nou ka jwenn éprèv, lanmou an nou pou Pap’an nou ki an syèl-la é fidélité an nou ka rété antyè é san pon défo, a moman-lasa, nou fidèl a san pou san (1 Kron. 28:9 ; Mat. 22:37). An koumansman a awtik-la, nou palé dè twa Témwen. An-nou wouvin asi ègzanp a yo. Poukwa yo aji konsa ? Zò ka di tifi-la pa enmé anmizé-y lè i lékòl ? É jenngason-la, ès sé on bab i ka chèché pou kò a-y douvan pòt a moun-la ? Papa-la a kanta-y, èskè sé vlé i vlé pèd travay a-y ? Men non ! Si yo aji konsa, sé paskè yo sav kè Jéova ni dé prensip ki jis, é kè sa ki pli enpòwtan pou yo, sé dè fè Papa-yo ki an syèl-la plézi. Konm yo enmé Jéova, sé-y yo ka sonjé an prèmyé chak fwa yo ni on désizyon a pran. Sé konsa yo ka montré kè yo ka rété fidèl a san pou san.

POUKWA SA NÉSÉSÈ KÈ NOU RÉTÉ FIDÈL A SAN POU SAN ?

6. a) Poukwa sa nésésè kè nouchak rété fidèl a san pou san ? b) Ka ki montré kè Adan é Èv pa té fidèl a san pou san ?

⁶ Poukwa sa nésésè kè chak sèwvitè a Bondyé toujou rété fidèl ? Paskè Satan akizé Jéova, é i akizé-nou osi. Adan Jadendédèn-la, zanj-lasa ba Jéova do, é sé konsa limenm a-y vin Satan, kivédi i vin lènmi èvè Jéova. I éséyé sali non a Jéova lè i fè moun kwè kè Bondyé sé on mové dirijan, kè i égoyis é malonnèt. Malérèzman, Adan é Èv mété-yo èvè Satan. Yo osi yo ba Jéova do (Jén. 3:1-6). Lè yo té ka viv adan Jadendédèn-la, ni onpakèt biten ki té pé fè-yo enmé Jéova pli fò. Men lè Satan akizé Jéova, lanmou a Adan é Èv pa té asé fò é i pa té san défo. Mi sé sa ki menné kèsyon-lasa : Èskè, asi latè, té’é ni moun ki té’é rété fidèl a Bondyé paskè yo enmé-y ? Kivédi, èskè on nonm pé rété fidèl a san pou san ? An tan a Jòb, yo pozé kèsyon-lasa franchman.

7. Sèlon sa nou ka li adan Jòb 1:8-11, kijan Jéova é Satan té ka vwè fidélité a Jòb ?

⁷ An tan a Jòb, sé Izraélit-la té ka viv an Éjipt. Sé Jòb ki té pli fidèl asi latè. Sété on nonm enpawfè kon noumenm. I té ka fè érè. Men Jéova té enmé-y pas i té fidèl a san pou san. I ka sanm sa Satan té ja éséyé montré kè sèwvitè a Jéova pé pa rété fidèl a san pou san. I té vé fè Jéova wont. Sé pousa Jéova di-y pran tan a-y pou i gadé Jòb byen. Jan-la Jòb té ka viv la té ka montré on mannyè ki klè kè Satan sé on mantè ! Satan mandé pou tèsté fidélité a Jòb. Jòb sété zanmi a Jéova, alò Jéova té ka fè-y konfyans, kifè i lésé Satan tèsté-y (li Jòb 1:8-11).

8. Kijan Satan ataké Jòb ?

⁸ Satan méchan toubònman é sé on asasen. I pran tousa Jòb té ni, i fè-y pèd tout byen a-y, i tchouyé sèwvitè a-y, é i sali répitasyon a-y. I ataké fanmi a-y osi. Jòb té ni dis timoun kè i té enmé onlo é Satan tchouyé-yotout. Aprésa, i fè-y trapé on vyé maladi ki té ka ba-y onpakèt bobo asi tout kò a-y. Sa té ka fè-y soufè toubònman. Sa chouboulé lèspri a madanm a-y toubònman é tèlman sa fè madanm-la lapenn, i di Jòb lagé Bondyé, modi-y é mò. Jòb limenm a-y té byen anvi mò, men kanmenmsa i rété fidèl. Alò Satan ataké-y ondòt jan. I sèvi èvè twa zanmi a Jòb. Sé mésyé vin vwè Jòb é yo rété èvè-y plizyè jou, men yo pa ba-y pon fòs. Olyé yo pran penn a-y, yo tonbé an zo a-y. Yo di kè sé Bondyé ki té ka fè Jòb soufè é kè fidélité a Jòb pa té ni pon valè ba-y. Yo jous fè Jòb pasé pou on mové boug ki té mérité tout sé vyé biten-la ki té ka rivé-y la ! (Jòb 1:13-22 ; 2:7-11 ; 15:4, 5 ; 22:3-6 ; 25:4-6).

9. Magré tousa i sibi, ka Jòb rèfizé fè ?

⁹ Lè Jòb sibi éprèv-lasa, kijan i réyaji ? I pa té pawfè. Lè sé boug-la vin konsolé-y swadizan, i fè kòlè é i palé rèd ba yo. Limenm rèkonnèt kè i di dé pawòl kè i pa té dwèt di é plita, i rann-li kont kè i té palé san réfléchi. Olyé i té défann jistis a Bondyé, i défann pwòp jistis a-y (Jòb 6:3 ; 13:4, 5 ; 32:2 ; 34:5). Men, menm lè éprèv-la té pli rèd, Jòb rèfizé ba Jéova do. I rèfizé kwè manti a sé swadizan zanmi a-y la. I di : « An pa’a vwè ankijan an pé di kè zò jis ! Jiskatan an mò, an pé’é lagé fidélité an mwen ! » (Jòb 27:5). Sé pawòl-lasa ka montré kè Jòb té byen désidé a rété fidèl, kèlkèswa sa ki té’é rivé. Nou osi nou pé fè menm biten-la.

10. Satan akizé Jòb, men ka ou ni a vwè adan sa ?

¹⁰ Satan akizé Jòb, men i mété-w adan osi. Ankijan ? I ka di kè ou pa enmé Jéova poudèvré. I ka di osi kè, si sé pou sové vi a-w, ou ké lagé Jéova, é kè ou pa si fidèl ki sa ! (Jòb 2:4, 5; Rév. 12:10). Lè ou ka tann sa, ka sa ka fè-w ? Sa ka fè-w mal, pa vré ? Men, réfléchi asi sa : Tèlman Jéova ka fè-w konfyans, i ka pèwmèt Satan mèt fidélité a-w a léprèv. Jéova sèten kè ou pé rété fidèl a san pou san, sé pousa i ka ba-w on bèl lokazyon dè montré kè Satan sé on mantè. Anplisdisa, i ka pwomèt-vou kè i ké édé-w fè sa (Ébr. 13:6). Ou ka imajiné-w ? Gran Mèt a linivè ni konfyans adan-w. Mi on bèl privilèj mi ! Ès ou ka vwè poukwa sa enpòwtan toubònman dè rété fidèl ? Fidélité an nou ka pèwmèt-nou dè montré kè Satan sé on mantè, dè défann non a Pap’an nou é dè soutyenn dominasyon a-y. Ka nou pé fè pou nou vin pi fidèl ankò ?

KA POU NOU FÈ POU RÉTÉ FIDÈL JÒDIJOU

11. Ka ègzanp a Jòb ka aprann-nou ?

¹¹ Nou ka viv « dènyé jou » a sistèm-lasa, é pi nou kay, pi Satan ka ataké-nou, é pi i ka mèt sa rèd (2 Tim. 3:1). Alò, ka pou nou fè pou konsolidé fidélité an nou ? La ankò, ègzanp a Jòb itil toubònman. Jòb té ja ni lokazyon montré fidélité a-y onpakèt fwa, lontan avan i té jwenn sé éprèv-lasa. An-nou palé dè twa biten ègzanp a Jòb ka aprann-nou.

12. a) Sèlon sa nou ka li adan Jòb 26:7, 8, 14, ka Jòb fè pou i té rèspèkté Jéova plis ankò ? b) Kijan nou pé ni plis rèspé ba Jéova an fon a tchè an nou ?

¹² Jòb fè on travay asi-y pou i té ni plis rèspé pou Jéova é sa fè-y enmé Jéova pli fò. Kijan i fè sa ? Jòb pran tan aprésyé bèl biten Bondyé kréyé (li Jòb 26:7, 8, 14). Lè i té ka vwè jan latè yé, lè i té ka gadé syèl-la, sé niyaj-la é lè i té ka tann loraj, i té ka rété èstèbèkwè. I rèkonnèt kè i pa té konnèt gran zafè asi tousa Jéova kréyé. Jòb té ni onlo rèspé pou pawòl a Bondyé, kifè i di : « An ba pawòl a-y onlo valè » (Jòb 23:12). Konm Jòb té ni onlo rèspé ba Papa-y, i vin enmé-y plis é i té toujou anvi fè-y plézi. Kifè, i té désidé a rété fidèl plis ankò. Fò-nou fè menm biten ki Jòb. Nou konnèt lontan plis biten anlè sa Bondyé kréyé ki sa moun té konnèt an tan a Jòb. É nou ni tout Bib-la a dispozisyon an nou pou édé-nou konnèt Jéova plibyen. Tousa nou ka aprann pé édé-nou rèkonnèt kè Jéova fò toubònman ! Sa pé édé-nou ni plis rèspé é plis lanmou pou-y. Nou ké anvi fè sa i ka mandé é nou ké pi anvi rété fidèl (Jòb 28:28).

13-14. a) Sèlon sa ki maké adan Jòb 31:1, kijan Jòb montré kè i té obéyisan ? b) Kijan nou pé suiv ègzanp a Jòb ?

¹³ Pi Jòb té ka fè sa Jéova ka mandé, pi fidélité a-y té ka pran fòs. Jòb té sav kè pou on moun rété fidèl, fò i obéyi. An réyalité, pi nou obéyi, pi nou anvi rété fidèl. Touléjou, Jòb té ka fè éfò pou fè sa Bondyé ka mandé. Pa ègzanp, i té ka fè atansyon a jan i té ka konpòwté-y èvè sé madanm-la (li Jòb 31:1). Konm sété on nonm-mayé, i té sav kè fò pa i té fè bas èvè pondòt madanm. Jòdijou, nou ka viv adan on mond ki plen tantasyon sèksyèl. Menmjan ki Jòb, ès nou ké rèfizé fè bas èvè ondòt moun ki moun-la nou mayé èvè-y la ? Ès nou ké rèfizé osi gadé vyé imaj sal oben biten pòwno ? (Mat. 5:28). Si touléjou, nou ka fè éfò pou métrizé-nou, fidélité an nou ké pran fòs.

¹⁴ Jòb té ka ba byen matéryèl valè-la pou i té ba-yo la. An domenn-lasa osi i té ka kouté Jéova. Jòb konprann kè si i té ka fè fon asi sa i té ni, sé té ké on gwo fòt ki té’é mérité yo pini-y (Jòb 31:24, 25, 28). Jòdijou, adan mond-la, sé byen matéryèl ki ka konté. Si nou ka vwè lajan é byen matéryèl kon Labib ka mandé, kivédi on mannyè rézonab, nou ké pi anvi rété fidèl (Pwov. 30:8, 9 ; Mat. 6:19-21).

15. a) Dè ki biten Jòb té sèten ? b) Si nou pa jen oubliyé kè Jéova ké rékonpansé fidélité an nou, kijan sa pé édé-nou ?

¹⁵ Pou Jòb té rété fidèl, i toujou té ka sonjé kè Jéova té’é rékonpansé-y. I té sèten kè Bondyé té ka ba fidélité a-y onlo valè (Jòb 31:6). Magré pakèt éprèv-la i sibi la, Jòb té ni konfyans kè on jou, Jéova té ké rékonpansé-y. Asiré pa pétèt, sa édé-y rété fidèl. Tèlman Jéova té kontan fidélité a Jòb, i rékonpansé-y tout rèstan a vi a-y ! (Jòb 42:12-17 ; Jak 5:11). É lè i ké pawfè, i ké ni bénédisyon pou tann-é-konprann. É vou, èskè ou vréman sèten kè fidélité a-w ni valè pou Jéova é kè i ké rékonpansé-w ? Dyé an nou pa chanjé (Mal. 3:6). Si nou ka sonjé kè i ka ba fidélité an nou onlo valè, an tchè an nou, nou ké toujou ni lèspwa kè i ké rékonpansé-nou (1 Tés. 5:8, 9).

16. Ka pou nou byen désidé a fè ?

¹⁶ Alò, fò ou byen désidé a pa janmé lagé fidélité a-w ! Défwa, ou pé ni lenprésyon kè sé-w tousèl ki ka goumé pou rété fidèl a Jéova. Men pa enkyété-w, ou pé’é jen tousèl. Toupatou asi latè, ni plizyè milyon moun ki adan menm konba-la, yo ka lité pou yo rété fidèl. Si ou tchenbé, vou osi, non a-w ké maké asi on lis ki ni non a tout nonm é fanm ki té ni fwa é ki rété fidèl a Jéova menm lè vi a yo té an danjé (Ébr. 11:36-38 ; 12:1). Fò-noutout byen désidé a suiv ègzanp a Jòb ki di : « An pé’é lagé fidélité an mwen ! » An-nou rété fidèl a san pou san pou ba Jéova glwa pou létèwnité !