An-nou vin pli filé adan ministè-la : Préché ba moun ki avèg

POUKWA SA ENPÒWTAN : An jénéral, on moun ki avèg pa ka santi-y alèz pou palé èvè on moun i pa konnèt. Sé pousa fò-nou sé dé zouti byen filé pou préché ba yo. Jéova ka montré lanmou a-y pou moun ki avèg (Lév 19:14). An-nou imité ègzanp a-y. Pousa, nou pé pran dé dispozisyon pou édé-yo èspirityèlman.

KIJAN POU NOU FÈ SA :

• ‘Chèché moun’ ki avèg (Mat 10:11). Ès ou konnèt on moun ki ni on moun-avèg an fanmi a-y ? Adan téritwa a-w, ès ni lékòl, Épad oben dòt koté ankò ki té’é vlé ni piblikasyon ki fèt pou moun-avèg ?

• Montré-yo kè ou ka sousyé-w dè yo pèwsonèlman. Si ou ka sousyé-w dè yo pèwsonèlman é si ou ka montré-w janti èvè-yo, sa ké mèt-yo alèz. Éséyé koumansé on ti kozé èvè yo asi sa ki ka fèt an péyi-la.

• Édé-yo èspirityèlman. Pou édé moun ki ni pwoblèm pou vwè klè, òwganizasyon an nou ka pwodui diféran kalté piblikasyon. Mandé moun-la kilès-la i préféré la pou étidyé. Rèsponsab a prédikasyon-la dwètèt vérifyé si frè-la ki ka okipé-y dè sé piblikasyon-la byen maké ki kalté piblikasyon moun-la ki avèg la vlé ni la.