Si ou enmé Jéova é si ou ni rèkonésans pou-y sa pé ba-w anvi pran batèm

1-2. Dapré Akt 8:27-31, 35-38, ka ki pousé on fonksyonnè étyopyen a pran lèbatèm ?

ÈS OU anvi pran batèm é vin on disip a Jézi ? Sé sa onlo moun fè davwa yo té enmé Jéova é yo té ni onlo rèkonésans pou-y. An-nou palé dè ègzanp a on fonksyonnè étyopyen ki té ka travay pou rèn a Létyopi.

² Lè fonksyonnè-la konprann sa i té ka li adan Lézékriti, i pa pèd tan : i pran lèbatèm onfwa-onfwa (li Akt 8:27-31, 35-38). Ka ki pousé-y aji ? On biten ki sèten, sé kè i té enmé Pawòl a Bondyé. Dayè pou yonn, lè i té an cha a-y i té ka li on pawti a liv a Izayi. Anplisdisa, sa Filip èspliké-y pèwmèt-li ni plis rèkonésans pou sa Jézi té fè ba-y. Men poukwa i té ay Jérizalèm ? Sé pas i té ja enmé Jéova fò. Kijan nou fè sav sa ? Pas sé pou adoré Jéova kè i té ay a Jérizalèm. I ka sanm sa i té lésé rèlijyon-la i té lévé adan-y la pou i ay jwenn sèl nasyon-la ki té ka sèvi vré Dyé-la. Sé osi pas i té enmé Jéova kè i désidé fè ondòt biten enpòwtan : pran lèbatèm é vin on disip a Kris (Mat. 28:19).

3. Ka ki pé anpéché on moun pran lèbatèm ? (gadé ti karé-la « Ka i ni an tchè a-w ? »).

³ Si ou enmé Jéova, sa pé pousé-w pran lèbatèm. Men lanmou pé rivé a anpéché-w pran lèbatèm osi. Ankijan ? Nou pé pran déotwa ègzanp. Pétèt kè tèlman ou enmé zanmi a-w é fanmi a-w ki pa Témwen ou pè yo hay-vou si ou pran lèbatèm (Mat. 10:37). Oben ou enmé sèwten biten kè Bondyé hay é ou pa’a rivé arété èvè sa (Sòm 97:10). Oben ankò, dépi toupiti, ou ka pawtisipé adan fèt é tradisyon ki ka vin dè fo-rèlijyon-la. É pétèt kè lè ou ka sonjé bon moman ou pasé, ou ni dimal a mèt sé biten-lasa akoté (1 Kor. 10:20, 21). Si ou adan on ka kon séla, fò ou mandé-w : « Kimoun oben ki biten an pi enmé ? »

MOUN-LA POU NOU PI ENMÉ LA

4. Ki prèmyé biten ki dwètèt pousé-w a pran lèbatèm ?

⁴ Ni onpakèt biten on moun pé enmé é i pé rivé a ni on gran rèkonésans pou sé biten-lasa. Pa ègzanp, avan menm ou té étidyé èvè Témwen a Jéova, pétèt ou té ni onlo rèspé pou Labib é ou té enmé Jézi onlo. Aprézan, ou konnèt sé Témwen a Jéova la, é pétèt ou byen enmé pasé dé ti moman èvè yo. Men a pa parapòt a sé biten-lasa tousèl ou ké anvi ba Jéova vi a-w é pran lèbatèm. Prèmyé biten ki dwètèt ba-w anvi pran lèbatèm sé lanmou a-w pou Jéova. Si ou enmé Jéova plis ki toutbiten, ou pé’é lésé ayen ni ponmoun anpéché-w sèvi-y. Si ou enmé Jéova sa ké pousé-w a pran lèbatèm é sa ké édé-w rété fidèl a-y menm apré batèm a-w.

5. A ki kèsyon nou ké réponn ?

⁵ Jézi di-nou kè fò-nou enmé Jéova èvè tout tchè an nou, èvè tout nanm an nou, èvè tout entélijans an nou é èvè tout fòs an nou (Mawk 12:30). Ka pou ou fè pou enmé Jéova fò é pou ni onlo rèspé pou-y ? Lè nou ka vwè kijan Jéova enmé-nou, sa ka ban-nou anvi enmé-y plis ankò (1 Jan 4:19). Si ou enmé Jéova fò konsa, ki dòt biten ou ké rèsanti tou natirèlman ? É ka sa ké pousé-w a fèb ?

6. Dapré Women 1:20, kijan nou pé aprann konnèt Jéova ?

⁶ Aprann konnèt Jéova grasa sa i kréyé (li Women 1:20 ; Rév. 4:11). Fò ou médité asi sajès a Jéova, é pousa, réfléchi asi mannyè i fè sé plant-la é sé zannimo-la. Kò an nou fèt on mannyè ki èstraòwdinè. É si ou té ka pran on ti tan pou aprann tibwen plis asi-y (Sòm 139:14). Sonjé puisans-la Jéova itilizé la yenki pou i té kréyé solèy-la ! É solèy-la sé yenki on ti zétwal pawmi sé milya zétwal-la ki ka ègzisté lac ! (Iz. 40:26). Pli ou ké pran tan réfléchi si sa é pli ou ké ni rèspé pou Jéova. Men, a pa paskè ou sav kè i saj é toupuisan kè ou ké vin bon zanmi èvè-y. Pou ou enmé Jéova fò, fò ou aprann plis biten asi-y.

7. Pou lanmou a-w pou Jéova pé sa fò, dè ki biten fò ou sèten ?

⁷ Fò ou mèt fon an tèt a-w kè Jéova vréman enmé-w. Ès ou ni dimal a kwè kè sila ki kréyé syèl-la é tè-la sav kè ou ka ègzisté é kè i ka sousyé-y dè-w ? Si sé sa ou ka pansé, sonjé kè Jéova « pa lwen a ponyonn adan nou » (Akt 17:26-28). Kon David ni lokazyon di Salomon, Jéova ‘ka pran tan gadé sa ki andidan tchè a toutmoun’ é i ka pwomèt-vou kè ‘si ou ka chèché-y, i ké pèwmèt-vou touvé-y’ (1 Kron. 28:9). An réyalité, si ou ka étidyé Labib aprézan sé pas Jéova ‘fè-w vin owa a-y’ (Jér. 31:3). Pi ou ké pran tan aprésyé tousa Jéova ja fè ba-w é pi ou ké enmé-y fò.

8. Kijan ou pé montré Jéova kè ou ni rèkonésans pou lanmou-la i ka ba-w la ?

⁸ Pou montré Jéova rèkonésans a-w pou lanmou-la i ka ba-w la, on biten ou pé fè sé priyé-y. Si ou ka palé Jéova dè sa ki ka rann-vou enkyèt é si ou ka di-y mèsi pou sa i ka fè ba-w, ou ké enmé-y plis ankò. É lè ou ké vwè kijan i ka réponn a priyè a-w, ou ké vin pibon zanmi èvè-y ankò (Sòm 116:1). Ou ké sèten i ka konprann-vou. Men, pou pé sa vin pibon zanmi èvè-y, fò ou konnèt poukwa i enmé sèwten biten é poukwa i hay dòt, men osi sa i vlé ou fè. Ou pé ni konésans-lasa yenki si ou ka étidyé Pawòl a-y Labib.

9. Kijan ou pé montré kè Labib ni onlo valè pou-w ?

⁹ Fè sa ki fo pou ba Pawòl a Bondyé, Labib, onlo valè. Sé enki adan Labib ou ka touvé lavérité asi Jéova é sé enki adan liv-lasa osi yo ka èspliké-w sa i anvi fè ba-w. Lè ou ka li Labib touléjou, lè ou ka préparé-w pou étid a-w é lè ou ka apliké sa ou ka aprann, ou ka montré kè liv-lasa enpòwtan ba-w (Sòm 119:97, 99 ; Jan 17:17). Ès ou fè on pwogram pou li Bib a-w ? Ès ou ka fè sa ki fo pou suiv-li touléjou ?

10. Ki biten ki ka fè kè Labib sé on liv ki vréman èspésyal ?

¹⁰ Adan Labib, nou ka touvé istwa a vi a Jézi é sé moun ki frékanté-y dè pré ki maké-y. Sé on biten ki entérésan toubònman. Sé sèl liv ki ka èspliké ègzaktèman sa Jézi fè ba-w. Pi ou ké aprann sa Jézi di é sa i fè, é pi ou ké anvi vin bon zanmi èvè-y.

11. Ka ki ké édé-w enmé Jéova ?

¹¹ Aprann enmé Jézi é ou ké enmé Jéova pli fò ankò. Poukwa nou ka di sa ? Paskè Jézi imité kalité a Pap’a-y on mannyè ki pawfè (Jan 14:9). Kifè, pi nou ké konnèt Jézi, pi nou ké rivé konprann kijan dè moun Jéova yé é pi nou ké enmé-y. Sonjé kijan Jézi aji èvè konpasyon épi moun yo té ka méprizé kivédi moun ki pa té ni lajan, moun ki té malad é moun ki pa té kapab pwotéjé-yo yomenm a yo. Sonjé osi, kè i ka ba-w onpakèt konsèy ki vréman itil é kè lè ou ka suiv sé konsèy-lasa vi a-w ka vin pi bèl (Mat. 5:1-11 ; 7:24-27).

12. Lè ou ka aprann konnèt Jézi, ka sa pé pousé-w a fè ?

¹² Jézi sakrifyé vi a-y é grasa sakrifis-lasa Bondyé pé padonné péché an nou. Si ou pran tan réfléchi asi sa Jézi fè ba-w, asiré sèten, ou ké vin enmé-y pli fò (Mat. 20:28). Lè ou ké konprann kè Jézi té dakò pou bay vi a-y ba-w, pétèt sa ké pousé-w a rèpanti-w é a mandé Jéova padon (Akt 3:19, 20 ; 1 Jan 1:9). Anplisdisa, pi ou ké enmé Jéova é Jézi é pi ou ké anvi frékanté moun ki enmé-yo osi.

13. Ka Jéova pé ba-w ?

¹³ Aprann enmé moun ki enmé Jéova. Pétèt kè fanmi a-w ki pa Témwen é sé zanmi-la ou té ni la pa’a konprann poukwa ou anvi ba Jéova vi a-w. Pétèt yo pé jous vin lènmi èvè-w. Men Jéova ké édé-w é pousa i ké fè ansòt pou frè é sè a lasanblé a-w vin on vré fanmi ba-w. Si ou rété bon bon zanmi èvè yo, yo ké pé ba-w tout lanmou-la é tout èd-la ou bizwen la (Mawk 10:29, 30 ; Ébr. 10:24, 25). Pétèt on jou, fanmi a-w ké vé sèvi Jéova é yo ké fè sa i ka mandé (1 Pyè 2:12).

14. Ka ou konstaté voumenm a-w lèwvwè ou mèt prensip a Labib an pratik é ès sa annakò èvè sa 1 Jan 5:3 ka di ?

¹⁴ Aprann enmé prensip a Jéova é mété-yo an pratik. Avan ou té konnèt Jéova, pétèt kè ou pa té ka lésé ponmoun di-w ka pou ou fè é ka pou ou pa fè. Men alèla, ou ka rann-vou kont kè fò ou lésé prensip a Jéova gidé-w pas yo pibon ki ta-w (Sòm 1:1-3 ; li 1 Jan 5:3). Sonjé sé konsèy-la Bib-la ka ba sé mari-la, sé madanm-la, sé paran-la é sé timoun-la (Éféz. 5:22–6:4). Ès ou vwè kijan vi a fanmi a-w vin pi bèl dépi ou ka mèt sé konsèy-lasa an pratik ? Dépi ou koumansé chwazi zanmi a-w èvè sajès kon Jéova ka mandé, ès ou ni pibon labitid ? Ès tchè a-w pa pi kontan konnyéla ? (Pwov. 13:20 ; 1 Kor. 15:33). Sèten ou dwèt ké réponn wi a sé kèsyon-lasa.

15. Ka ou pé fè si ou bizwen èd pou mèt prensip a Labib an pratik ?

¹⁵ Déparfwa, ou ka touvé on prensip adan Labib, men ou ka ni dimal a vwè kijan pou ou mété-y an pratik adan vi a-w. Sé pousa, Jéova ka sèvi èvè òwganizasyon a-y pou ban-nou piblikasyon ki pé édé-nou a « fè ladiférans antrè sa ki byen é sa ki mal » (Ébr. 5:13, 14). Lè ou ké li-yo é lè ou ké étidyé-yo, ou ké vwè kè prensip a Labib vréman itil é kè ou ka pwokiré-w onlo byenfé lè ou ka mèt-yo an pratik. Sèten sa ké ba-w anvi fè pawti a òwganizasyon a Jéova.

16. Kijan Jéova òwganizé pèp a-y ?

¹⁶ Aprann enmé òwganizasyon a Jéova é fè tousa ou pé pou soutyenn-li. Pou Jéova té òwganizé pèp a-y, i séparé-y an plizyè ti lasanblé, é sé Jézi, gason a-y, ki sé chèf a sé lasanblé-lasa (Éféz. 1:22 ; 5:23). Jézi chwazi on ti gwoup nonm ki wen pou dirijé on travay kè i té anvi moun fè jòdijou. Jézi kriyé gwoup-lasa « èsklav fidèl é prévwayan la ». Fò gwoup-lasa fè ansòt pou ou vin é pou ou rété bon bon zanmi èvè Bondyé. É yo ka pran rèsponsabilité-lasa oséryé (Mat. 24:45-47). Sé pousa èsklav-lasa ka fè ansòt pou sé dé nonm kapab ki vin ansyen adan sé lasanblé-la. Sé ansyen-la la pou gidé-w é protéjé-w (Iz. 32:1, 2 ; Ébr. 13:17 ; 1 Pyè 5:2, 3). Yo paré a fè tousa yo pé ba-w. Yo paré osi a konsolé-w é a édé-w pou ou vin pibon zanmi èvè Jéova ankò. Men yo ka fè ondòt biten pou-w é ki pi enpòwtan ankò : yo ka montré-w kijan pou édé dòt moun konnèt lavérité asi Jéova (Éféz. 4:11-13).

17. Dapré Women 10:10, 13, 14, poukwa nou ka palé moun dè Jéova ?

¹⁷ Édé dòt moun pou yo osi enmé Jéova. Jézi mandé disip a-y aprann dòt moun lavérité asi Jéova (Mat. 28:19, 20). Pétèt nou ka obéyi a lòd-lasa pas nou ka santi kè nou oblijé fè-y. Men, piti-a-piti, lanmou an nou pou Jéova ké vin fò, é nou ké rèsanti menm biten ki lapòt Pyè é lapòt Jan. Mi sa yo di : « Nou pé pa arété palé dè sé biten-la nou vwè la é dè sé biten-la nou tann la » (Akt 4:20). Si ou édé on moun konnèt Jéova sa ké ba-w tchè-kontan. Ou ka tou konprann jan Filip té kontan lè i èspliké Étyopyen-la sé vérité-la ki adan Lézékriti é kè fonksyonnè-lasa désidé pran lèbatèm ! Lè ou ka fè kon Filip é kè ou k’ay préché kon Jézi mandé, ou ka montré kè ou vlé vin on Témwen a Jéova (li Women 10:10, 13, 14). Pétèt a moman-lasa, ou ké pozé-w menm kèsyon ki Étyopyen-la : « Ka i ka anpéché-mwen pran lèbatèm ? » (Akt 8:36).

18. Ka nou kay vwè adan pwochen awtik-la ?

¹⁸ Désizyon pi enpòwtan kè ou pé pran an vi a-w sé pran lèbatèm. Kifè, fò ou byen réfléchi a sa sa ka mandé. Ka fò ou konnèt asi lèbatèm ? Ka ou dwètèt fè avan é apré ou batizé ? Nou ké réponn a sé kèsyon-lasa adan pwochen awtik-la.