AWTIK POU ÉTIDYÉ 42
Kijan nou pé édé on étidyan pwogrésé é pran lèbatèm ? (2èm pawti-la)
« Toutlè, fò ou fè atansyon a voumenm é a sa ou ka anségné » (1 TIM. 4:16).
KANTIK 77 La lumière dans un monde enténébré
ON TI LIDÉ ASI SA NOU KAY VWÈa
1. Lè nou k’ay préché é lè nou k’ay anségné sé pou sové vi a moun. Poukwa nou ka di sa ?
LÈ NOU k’ay préché é lè nou k’ay anségné, sé pou sové vi a moun. Poukwa nou ka di sa ? Pas mi sa Jézi di an Matyé 28:19, 20 : « Alé é fè disip [...]. Batizé-yo. » É Bib-la ka di kè pou ou pé sa sové, fò ou pran lèbatèm. Si on moun vé pran lèbatèm, fò i sèten kè sé yenki grasa sakrifis a Jézi é grasa rézirèksyon a-y kè i ké pé ni lavi étèwnèl. Dayè, mi sa lapòt Pyè maké : « Batèm-la [...] ka sové-zòt [...] grasa rézirèksyon a Jézikri » (1 Pyè 3:21). Sé pousa, lèwvwè on nouvo disip ka pran lèbatèm i pé ni lèspwa dè viv pou touttan.
2. Sèlon 2 Timoté 4:1, 2, kijan pou nou anségné sé moun-la ?
2 Pou nou fè disip, fò-nou ‘anségné sé moun-la byen’ (li 2 Timoté 4:1, 2). Poukwa nou ka di sa ? Pas sé Jézi limenm ki mandé-nou fè disip é anségné-yo. Menmjan-la, lapòt Pòl ankourajé-nou a kenbé adan aktivité-lasa ‘pas lè nou ké fè sa, nou ké sové ki noumenm ki séla ki ka kouté-nou la’. Kifè, nou ka konprann pou ki rézon i ban-nou konsèy-lasa : « Toutlè, fò ou fè atansyon a [...] sa ou ka anségné » (1 Tim. 4:16). Si nou vé fè disip, fò-nou anségné. Sé pousa, fò-nou fè tousa nou pé pou kò an nou vin pibon an domenn-lasa.
3. Ka nou ké vwè adan awtik-lasa ?
3 Toupatou si latè nou ka fè étid a plizyè milyon moun. Men kon nou vwè adan awtik a simenn pasé, nou vé fè tousa nou pé pou édé plis étidyan pran lèbatèm. Adan awtik-lasa, nou ké vwè 5 biten on anségnan pé fè pou i édé étidyan a-y pwogrésé é pran lèbatèm.
LÉSÉ BIB-LA PALÉ
Mandé on pwoklamatè ki ni onlo èkspéryans kijan pou ou fè pou ou sèvi èvè Bib-la pibyenf (gadé sé paragraf 4 a 6 la).
4. Poukwa lè on anségnan ka fè on étid, fò pa i palé twòp ? (gadé nòt-la).
4 Adan Labib, ni onlo vérité kè nou ka anségné sé moun-la. A pa ti enmé nou enmé sé vérité-lasa ! Kifè, nou pé ka touvé-nou ka bay twòp détay asi sé vérité-lasa. Men lèwvwè on moun ka dirijé étid a Tou dè Gad la, lèwvwè i ka dirijé étid biblik a lasanblé-la oben lè i ka fè on étid biblik, fò pa i ka palé twòp. Pou on anségnan lésé Bib-la palé, fò i fè atansyon pou i pa di tousa i konnèt asi on vèwsé oben asi on sijéb (Jan 10:16). Pran on ti tan pou réfléchi asi sa : « Ès ou ka di kè sa ou konnèt anlè Labib konnyéla la, sé menm biten ki sa ou té konnèt lèwvwè ou té toufré pran batèm ? Pi souvan ki rarman, lèwvwè on moun sòti pran batèm, sé yenki déotwa ansègnman enpòwtan kè i konnèt (Ébr. 6:1). Pou ou té konnèt tousa ou konnèt konnyéla la, sa pran-w plizyè lanné ; alò pa néyé étidyan a-w èvè twòp enfòwmasyon onsèl kou.
5. a) Dapré 1 Tésalonisyen 2:13, ka nou vé édé étidyan an nou konprann ? b) Ka nou pé fè pou pousé étidyan an nou di sa i ka pansé dè sa i ka aprann ?
5 Sa nou vé sé kè étidyan an nou konprann kè sa i ka aprann sòti adan Pawòl a Bondyé (li 1 Tésalonisyen 2:13). Kijan nou pé rivé fè sa ? Fò ou ankourajé étidyan a-w di sa i ka pansé dè sa i ka aprann. Olyé sé-w ki èspliké-y sé vèwsé-la, mandé-y èspliké-w kijan i ka konprann-yo. Édé-y vwè kijan i pé apliké sé konsèy-la ki an Bib-la adan vi a-y (Lik 10:25-28). Pa ègzanp, ou pé mandé-y : « Ka vèwsé-lasa ka aprann-vou asi Jéova ? », « Kijan sa ou aprann la pé édé-w adan vi a-w ? » oben « Ka ou ka pansé dè sa ou aprann ? » (Pwov. 20:5). Fò nou sonjé kè nou pa la pou plen tèt a étidyan-la èvè onpakèt konésans, men sa nou vé sé kè i vin enmé sa i ka aprann é kè i mété-y an pratik.
6. Lè ou k’ay fè on étid biblik, dè tanzantan, fò ou menné on pwoklamatè ki ni onlo èkspéryans èvè-w. Pou ki biten ?
6 Lèwvwè ou k’ay fè on étid biblik, ès sa ka rivé-w dè menné moun ki ni èkspéryans èvè-w ? Si sé sa ou ka fè, mandé-y sa i ka pansé dè jan ou ka kondui étid-la. Mandé-y osi si ou ka lésé Bib-la palé asé. Si ou vé vin on mèt-a-mannyòk an domenn-lasa fò ou ni imilité (konparé èvè Akt 18:24-26). Anplisdisa, mandé-y si i ni lenprésyon kè étidyan-la ka konprann sa i ka aprann. Si ou sav kè ou pé’é la pannan déotwa jou, ou pé mandé-y si i pé fè étid-la a plas a-w. Konsa, moun-la ké kontinyé fè étid a-y chak simenn é i ké vwè kè étid-la sé on biten ki vréman enpòwtan. Pa jen mété an tèt a-w kè étid-la sé ta-w é kè ponmoun pé’é pé fè-y a plas a-w. É lè ou byen gadé, sa ou vé, a pa kè étidyan-la aprann konnèt Jéova pibyen é kè i pwogrésé alò !
MONTRÉ KÈ OU ENMÉ SA OU KA ANSÉGNÉ É KÈ OU KA KWÈ ADAN SA
Sèvi èvè ègzanp a frè é sè pou édé étidyan a-w suiv sé prensip-la ki an Bib-lag (gadé sé paragraf 7 a 9 la).
7. Kijan ou pé fè pou étidyan-la touvé sa ou ka montré-y entérésan é pou i anvi aprann plis biten ankò ?
7 Fò étidyan a-w santi kè ou enmé sé vérité-la ki an Bib-la é kè ou ka kwè adan sa (1 Tés. 1:5). Konsa, i ké touvé sa ou ka aprann-li entérésan toubònman é sa ké ba-y anvi aprann plis biten ankò. Pétèt ou pé rakonté-y kijan sé prensip-la ki an Bib-la édé-w. Konsa, i ké rann-li kont kè sé konsèy-la ki an Bib-la pé édé-y osi.
8. Ki dòt biten ou pé fè pou édé étidyan a-w, é poukwa sa itil ?
8 Ondòt biten ou pé fè ankò, sé palé étidyan-la dè sèwten frè é sè ki jwenn menm jan dè pwoblèm ki-y é ki rivé about a yo. Pétèt kè an lasanblé a-w, ni on pwoklamatè ki jwenn menm difikilté ki étidyan a-w. Pétèt kè si ou té ka menné-y èvè-w, sa té’é byen. Asi jw.org osi, ou pé touvé déotwa ègzanp ki vréman ankourajan adan « La Bible transforme des viesc ». Sé awtik-la i ké li la é sé vidéo-la i ké vwè la ké édé étidyan a-w konprann kè sé prensip-la ki an Bib-la pé édé-y ni on vi ki pi bèl.
9. Kijan nou pé ankourajé étidyan an nou palé dè sa i ka aprann èvè fanmi a-y é zanmi a-y ?
9 Si étidyan a-w mayé oben i ka viv èvè on moun, ès moun-lasa ka étidyé Labib osi ? Si i po’o ka fè sa, mandé-y si i vé pa vin fè étid-la ansanm èvè zòt. Anplisdisa, fò ou ankourajé étidyan a-w palé dè sa i ka aprann èvè fanmi a-y é zanmi a-y (Jan 1:40-45). Pa ègzanp, ou té’é pé mandé-y : « Kijan ou té’é èspliké on fanmi a-w vérité-lasa ? » oben « Ki vèwsé ou té’é pé pran pou montré on zanmi a-w sa Labib ka di asi sa ? » Konsa, ou ké montré étidyan a-w kijan pou i fè pou i anségné. Aprésa, lè i ké fè tousa ki nésésè pou i vin on pwoklamatè, i ké pé préché èvè lasanblé-la. Ou pé mandé étidyan a-w si i pa konnèt ondòt moun ki té’é byen anvi étidyé Labib osi. Si i di-w wi, éséyé vwè kijan zò ka òwganizé-zòt pou ou pé sa pwopozé moun-la on étid biblik. Ou té’é pé montré moun-la vidéo-lasa : On lèson biblik : kijan sa ka pasé ?d.
ANKOURAJÉ-Y A VIN ZANMI ÈVÈ SÉ PWOKLAMATÈ-LA
Édé étidyan a-w touvé déotwa zanmi an lasanblé-lah (gadé sé paragraf 10 é 11 la).
10. Sèlon 1 Tésalonisyen 2:7, 8, kijan dè anségnan Pòl té yé é ka nou pé fè pou imité-y ?
10 Fò-nou montré étidyan an nou kè nou enmé-yo. Pétèt kè talè sé ké frè é sè an nou (li 1 Tésalonisyen 2:7, 8). Sa pa fasil pou yo dè ba sèwten zanmi a yo do é dè fè tousa ki fo pou fè volonté a Jéova. Sé pousa, fò-nou édé-yo touvé dé zanmi-frè an lasanblé-la. Anplisdisa, fò ou sé bon zig a étidyan a-w. A pa enki pou étid-la pou zò vwè-zòt ! Ou pé pasé-y on ti koudfil. Ou pé voyé on ti mésaj ba-y oben ou pé rann-li on ti vizit akaz a-y. Konsa, ou ké montré-y kè i pa on zéwo douvan on chif é kè i ni onlo valè pou-w.
11. Ka nou té’é byen vlé kè étidyan an nou touvé an lasanblé-la ?
11 Mi sa on ti pwovèb afriken ka di : « Ou bizwen tout on vilaj pou lévé on timoun. » Kifè, nou té’é pé di : « Nou bizwen tout on lasanblé pou fè on moun vin on disip. » Sé pousa, on bon anségnan ké fè étidyan a-y fè konésans èvè déotwa moun an lasanblé a-y ki ké édé-y pwogrésé. Konsa, étidyan-la ké pé frékanté sèwvitè a Bondyé. Yo ké édé-y vin pibon zanmi èvè Jéova é lè i ké ka jwenn difikilté, yo ké la pou ankourajé-y. Sa nou vé sé kè étidyan-la santi-y alèz a-y an lasanblé-la é kè i santi kè i ka fè pawti a on fanmi èspirityèl. Lè i ka vwè jan nou enmé-nou adan lasanblé-la, fò sa ba-y anvi fè pawti a fanmi-lasa. Konsa, sa ké pi fasil pou i lagé sé mové frékantasyon-la i té ni la, pas a pa édé yo ka édé-y enmé Jéova (Pwov. 13:20). Si sé zanmi-la i té ni la pa’a lévé-y digad ankò, i ké sav kè adan òwganizasyon a Jéova i ké touvé bon zanmi (Mawk 10:29, 30 ; 1 Pyè 4:4).
FÈ-Y VWÈ KÈ ‘BA JÉOVA VI A-W’ É ‘PRAN LÈBATÈM’ SA ENPÒWTAN TOUBÒNMAN
On étidyan ki anvi pwogrésé ké fè sa ki fo pou i pran lèbatèm (gadé sé paragraf 12 é 13 la).
12. Poukwa fò pa ou pè di étidyan a-w kè ‘ba Jéova vi a-w’ é ‘pran lèbatèm’ sa enpòwtan toubònman ?
12 Fò ou èspliké étidyan-la kè ‘ba Jéova vi a-w’ é ‘pran lèbatèm’ sé 2 biten ki enpòwtan toubònman. Fò pa ou pè di-y sa ! Lè nou ka fè on étid, sa nou vé sé kè étidyan-la fè volonté a Jéova é pran lèbatèm. Si ja ka fè kèlkè mwa kè i ka étidyé é si i ka vin lasal, fò i konprann kè nou ka étidyé èvè-y pou nou édé-y vin on Témwen a Jéova.
13. Ka pou on étidyan fè avan i pran lèbatèm ?
13 Si on étidyan a Labib vréman sensè, piti-a-piti, i ké fè sa ki fo pou i pran lèbatèm. Prèmyèwman, fò i aprann konnèt Jéova, fò i enmé-y é fò i ni fwa adan-y (Jan 3:16 ; 17:3). Sé konsa i ka koumansé vin bon bon zanmi èvè Jéova é i ka vin ni zanmi an lasanblé-la osi (Ébr. 10:24, 25 ; Jak 4:8). Aprésa, i ka lagé tout mové labitid i té ni é i ka mandé Bondyé padon (Akt 3:19). An menm balan-la, i ka anvi palé dè sa i aprann (2 Kor. 4:13). É anfinaldikont, i ka ba Jéova vi a-y é i ka pran lèbatèm (1 Pyè 3:21 ; 4:2). A pa ti kontan lasanblé-la ka kontan ! Lè étidyan a-w ka fè sa ki nésésè pou i pran lèbatèm, félisité-y souvan é ankourajé-y pou i kontinyé konsa.
TOUJOU PRAN ON TI TAN POU VWÈ SI I KA PWOGRÉSÉ
14. Ka pou on anségnan fè pou i sav si étidyan a-y ka pwogrésé ?
14 Fò nou ni pasyans lè nou ka édé on étidyan pwogrésé. Men on lè, fò ou gadé pou ou vwè si i vréman anvi sèvi Jéova. Ès ni dé biten ki ka montré-w kè i ka fè éfò pou suiv komandman a Jézi ? Oben èskè sèl biten ki ka entérésé-y sé konnèt sa ki an Bib-la é sé tout ?
15. Ka pou on anségnan mandé-y pou vwè si étidyan a-y ka pwogrésé vréman ?
15 Fò ou toujou pran on ti tan pou vwè si étidyan a-w ka pwogrésé. Ès i ka di Jéova sa i ka rèsanti ? Ès i ka priyé Bondyé ? (Sòm 116:1, 2). Ès i ka li Bib a-y ? (Sòm 119:97). Ès i toujou ka vin réinyon ? (Sòm 22:22). Ès i ka suiv prensip a Labib an vi a-y ? (Sòm 119:112). Ès i koumansé préché ba fanmi a-y é ba zanmi a-y ? (Sòm 9:1). É kèsyon-la ki pi enpòwtan la : ès i vé vin on Témwen a Jéova ? (Sòm 40:8). Si ou ka konstaté kè étidyan-la pa’a fè pon pwogré, san chouboulé-y, chèché a sav poukwa i pa’a pwogrésé. Aprésa, palé sa èvè-y jantiman men franchmane.
16. Ka ki pé édé-w vwè kè fò ou arété on étid ?
16 Lè ou ka kondui on étid, dè tanzantan, fò ou mandé-w si sa vo lapenn dè kontinyé oben si fò ou arété. Mandé-w : « Ès i ka préparé étid a-y ? Ès i enmé vin réinyon ? Ès i lagé tout mové labitid i té ni ? Ès i koupé lépon èvè rèlijyon-la i té adan-y la ? » Si ou ka réponn non a sé kèsyon-lasa é kè ou ka kontinyé fè étid-la, sé konsi ou bizwen aprann on moun najé alòskè pa menm bout a zòtèy a-y i vé pa mèt an dlo-la. Si on étidyan pa vréman enmé sa i ka aprann é kè i pa’a fè pon chanjman an vi a-y, ou ka di sa ké sèvi-y on biten si ou ka kontinyé étidyé èvè-y ?
17. 1 Timoté 4:16 ka di kè fò nou fè atansyon a sa nou ka anségné. Kijan pou nou apliké sa lè nou kondui on étid biblik ?
17 Fè disip sé on biten ki ni onlo enpòwtans pou nou. Sé pousa nou ka édé étidyan an nou pwogrésé jiskatan yo pran lèbatèm. Pou sa, nou ka lésé Bib-la palé é nou ka montré-y kè nou enmé sa nou ka anségné é kè nou ka kwè adan sa. Nou ka ankourajé-y a vin zanmi èvè sé pwoklamatè-la. Nou ka montré-y kè ‘ba Jéova vi a-w’ é ‘pran lèbatèm’ sé 2 biten ki enpòwtan toubònman é anmenmditan, nou toujou ka pran on ti tan pou vwè si i ka pwogrésé. (Gadé ti karé-la « Sa on anségnan dwètèt fè pou édé on étidyan pran lèbatèm ».) Nou ka préché bon nouvèl-la é nou ka anségné moun. A pa ti kontan nou kontan fè sa ! Pas sa pé sové vi a moun. Alò, an-nou fè tousa nou pé pou édé étidyan an nou fè sa ki fo pou yo pran lèbatèm.
KANTIK 79 Qu’ils tiennent ferme dans la foi !
a Lè nou ka kondui on étid biblik, sé on bèl kado Jéova ka fè-nou piskè nou ka ni lokazyon édé étidyan-la chanjé mantalité a-y é jan i ka aji pou i pé sa fè Bondyé plézi. Awtik-lasa ké ban-nou déotwa konsèy pou nou pé sa anségné pibyen ankò.
b Gadé awtik-la « Pièges à éviter lors d’un cours biblique », adan Kayé Vi é Ministè a sèptanm 2016.
c Ay asi QUI SOMMES-NOUS ? > TÉMOIGNAGES ET ANECDOTES.
d Adan JW Library®, ay asi MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
e Gadé sé awtik-la « Si ou enmé Jéova é si ou ni rèkonésans pou-y, sa pé ba-w anvi pran batèm » é « Ès ou paré pou pran lèbatèm ? » adan Tou dè Gad a maws 2020.
f SA NOU KA VWÈ ASI SÉ IMAJ-LA : On jenn sè envité on sè ki ni plis èkspéryans fè on étid èvè-y. Tibwen plita, sè-la ki ni plis èkspéryans la ka èspliké jenn sè-la ka i pé fè pou i pa palé twòp pannan étid-la.
g SA NOU KA VWÈ ASI SÉ IMAJ-LA : Pannan étid a-y, on madanm ka aprann kijan on madanm mayé dwètèt aji é ka i pé fè pou i jouwé wòl a-y pibyen. Aprésa, i ka palé mari a-y dè sa i aprann.
h SA NOU KA VWÈ ASI SÉ IMAJ-LA : Menm madanm-la é mari a-y ka pasé on bon ti moman èvè frè é sè kè madanm-la jwenn an Sal di Wayòm la.