Jéova ka voyé zyé asi sèwvitè a-y

1. Poukwa Jézi mandé Jéova jété on zyé asi disip a-y ?

AVAN jou-la i mò la, lavèy oswa, Jézi priyé Pap’a-y é i mandé-y on biten an pawtikilyé. I di-y jété on zyé asi disip a-y (Jan 17:15, 20). Sé vré kè Jéova toujou jété on zyé asi sèwvitè a-y ; i toujou pran swen a yo é i toujou pwotéjé-yo. Men, poukwa Jézi mandé-y sa ? Sé pas i té sav kè pli tan té’é ka pasé, pli Satan té’é limé difé asi disip a-y é kè i té’é pèwsékité-yo. Sé pousa, yo té bizwen kè Jéova édé-yo.

2. Dapré Sòm 33:18-20, poukwa fò pa nou pè sé difikilté-la nou pé rivé a jwenn la ?

² Sé Satan ki ka dirijé mond-la nou ka viv adan-y la é i ka mèt bon présyon asi sé vré krétyen-la. Nou ka jwenn onlo difikilté ki pé dékourajé-nou é dépawfwa, sa pé mèt fidélité an nou a léprèv. Men kon nou ké vwè-y adan awtik-lasa, nou pa bizwen pè. Jéova ka voyé zyé a-y asi nou. Sa vlé di kè i konnèt byen sé éprèv-la nou ka jwenn la é kè i toujou paré pou édé-nou. An-nou vwè 2 ègzanp adan Bib-la ki ké montré-nou kè Jéova ka « voyé zyé asi moun ki ka krenn-li » (li Sòm 33:18-20).

LÈWVWÈ NOU KA SANTI-NOU TOUSÈL

3. A ki moman nou pé rivé a santi-nou tousèl ?

³ Menmsi ni onpakèt frè é sè adan lasanblé an nou, sa pé rivé kè nou santi-nou tousèl. Pa ègzanp, sé jenn-la pé santi-yo tousèl lèwvwè fò-yo palé èvè kanmarad a yo dè sa yo ka kwè asi Bondyé é lèwvwè yo ka chanjé lasanblé. Ni dòt moun osi ki pé santi-yo tris oben ki dékourajé é yo pé ni lenprésyon kè fò-yo jéré sitiyasyon a yo tousèl a yo. Lèwvwè nou ka jwenn sé sitiyasyon-lasa, pétèt kè nou on tijan pè palé dè sa èvè dòt moun paskè an tèt an nou, nou ka di-nou kè yo pé’é konprann-nou. É dépawfwa nou pé jous di-nou kè pa ni ponmoun ki ka enkyété-y dè nou vréman. Kèlkèswa rézon-la ki ka fè kè nou ka santi-nou tousèl, sa pé kasé 2 bra an nou. Men Jéova vé pa kè nou santi-nou konsa. Ka ki ka pèwmèt-nou di sa ?

4. Poukwa pwofèt Éli di konsa : « I ka rété enki mwen » ?

⁴ An-nou vwè sa ki rivé Éli, on pwofèt ki té fidèl. Rèn Jézabèl té vlé tchouyé-y é sa té ka fè 40 jou kè i té ka kouri pou sové vi a-y (1 Wa 19:1-9). I fin pa touvé-y tousèl a-y adan on gwòt. É tèlman i té dézèspéré, mi sa i di Jéova : « Yo tchouyé pwofèt a-w a koudépé. Sé enki mwen ka rété. É konnyéla la yo bizwen tchouyé-mwen ! » (1 Wa 19:10). Men Abdyas té rivé kaché 100 pwofèt pou Rèn Jézabèl pa té tchouyé-yo (1 Wa 18:7, 13). Alò, poukwa Éli té ka santi-y tousèl konsa ? Ès i té mèt an tèt a-y kè tout sé pwofèt-la Abdyas té sové la té mò alèla ? Éli té montré toutmoun kè sé Jéova ki sé vré Dyé-la lèwvwè yo té asi Mòn Karmèl la é poutan ponmoun pa té vin èvè-y pou adoré Jéova. Ès a pa pousa osi i té ka santi-y tousèl ? Ès i té ni lenprésyon kè moun pa té okouran kè té ni lènmi ki té ka chèché a tchouyé-y ? Oben ès i té ni lenprésyon kè ponmoun pa té ka lévé-y digad ? Istwa-la pa’a di nou. Men on biten nou pé sèten, sé kè Jéova té ka konprann byen poukwa Éli té ka santi-y tousèl é i té sav ègzaktèman sa Éli té bizwen.

5. Kijan Jéova édé Éli konprann kè i pa té tousèl ?

⁵ Jéova soutyenn Éli plizyè fason diféran. Dabò pou yonn, i mèt Éli alèz a-y, konsa, i té pé wouvè tchè a-y ba-y. A 2 rèpriz i mandé Éli « Ka ou ka fè la, Éli ? » (1 Wa 19:9, 13). É a chakfwa i pran tan kouté lèwvwè Éli té ka di-y sa i té ka rèsanti. Jéova vwè kè i té enkyèt é i réponn-li. I fè-y sonjé kè i la èvè-y é i fè-y vwè puisans-la i ni la. I di-y osi kè ni onlo Izraélit ki kontinyé adoré-y (1 Wa 19:11, 12, 18). Sèten Éli santi-y soulajé lèwvwè i èspliké Jéova sa i té ka rèsanti é kè Jéova réponn-li. Anplisdisa, Jéova ba Éli 3 biten enpòwtan a fè : i voyé-y chwazi Azaèl pou i vin wa a Siri, i voyé-y chwazi Jéyi pou i vin wa a Izrayèl é i voyé-y chwazi Élizé pou i vin pwofèt (1 Wa 19:15, 16). Konsa, Jéova édé Éli konsantré-y asi dé biten ki pozitif. Anplisdisa, Jéova pèwmèt Éli touvé on bon zanmi pou sèvi-y konpangn. Zanmi-lasa sé té Élizé. É vou, lèwvwè ou ka santi-w tousèl, ka ou pé fè pou Jéova pé sa soutyenn-vou ?

6. Lèwvwè ou ka santi-w tousèl, ka ou pé di Jéova adan priyè a-w ? (Sòm 62:8).

⁶ Jéova ka fè-w on bèl envitasyon. I ka ankourajé-w priyé-y. I sav byen ki pwoblèm ou ka jwenn. É i ka pwomèt-vou kè i ké kouté priyè a-w a nenpòt ki moman (1 Tés. 5:17). I enmé kouté priyè a sèwvitè a-y (Pwov. 15:8). Alò, lèwvwè ou ka santi-w tousèl, ka ou pé di-y ? Menmjan ki Éli, di-y tousa ki asi tchè a-w (li Sòm 62:8). Palé-y dè tousa ki ka trakasé-w é di-y tousa ki ka fè-w lapenn. Mandé-y édé-w lèwvwè ou ka santi-w tousèl oben kè ou tris. Pa ègzanp, lè ou ka santi-w konsa pas fò ou èspliké kanmarad-lékòl a-w adan ki biten ou ka kwè, mandé Jéova ba-w kouraj pou-w pé sa palé ba-yo. Ou pé mandé-y osi ba-w sajès pou-w palé èvè onlo jantiyès (Lik 21:14, 15). É si ou ka santi-w tris oben kè ou dékourajé, mandé Jéova ba-w fòs pou ou palé dè sa èvè on krétyen ki byen doubout adan lavérité. Ou pé mandé Jéova osi édé moun-lasa pou i pé sa kouté-w é pou i pé sa konprann sa ou ka rèsanti. Wi, di Jéova tousa ou ka rèsanti. Pran tan gadé kijan i ka réponn a priyè a-w é aksèpté kè frè é sè a-w édé-w. Ou ké vwè, ou pé’é santi-w tousèl kon avan.

7. Ka ègzanp a Mauricio ka aprann-nou ?

⁷ Jéova ka ban noutout fè dé biten ki enpòwtan. Ou pé sèten kè i ka vwè tousa ou ka fè pou soutyenn lasanblé-la é pou-w pé sa préché. É lè i ka vwè sa, i ka kontan (Sòm 110:3). Poukwa sa enpòwtan kè ou rété konsantré asi sé biten-lasa si ou ka santi-w tousèl ? An-nou vwè ka on jenn frè non a-y sé Mauricio vivb. Kèlkè tan apré batèm a-y, i rann-li kont kè yonn adan méyè zanmi a-y té koumansé ba Jéova do piti-a-piti. Mi sa i ka di : « Lè an vwè i té k’ay lagé lavérité, an koumansé mandé-mwen si an té’é pé fè volonté a Jéova. An mandé-mwen si an té’é rivé tchenn a mo an mwen lèwvwè an ba Jéova vi an mwen é si an té’é pé rété adan fanmi a Jéova. An té ka santi-mwen tousèl é an té ni lenprésyon kè ponmoun pa té’é jen rivé konprann-mwen. » Ka ki édé Mauricio pou i pa té lagé ? Mi sa i ka èspliké : « An mèt-mwen ka préché plis ki avan, konsa an pa té ka sonjé enki mwen é an pa té ka rété konsantré yenki asi sa an té ka rèsanti. É konm an té ka pasé plis tan èvè lézòt ka préché, sa té ka mèt onlo jwa an tchè an mwen. Kifè, an pa té ka santi-mwen tousèl kon avan. » Sé menm biten pou nou osi. Menmsi nou ka préché enki grasa vidéokonférans oben pa téléfòn èvè frè é sè an nou, yonn pé ankourajé lòt lèwvwè nou ka palé èvè moun dè lavérité pa téléfòn oben lè nou ka fè on ti lèt ba yo. Ki dòt biten ki fè Mauricio dibyen ? Mi sa i ka di ankò : « An koumansé travay plis adan lasanblé-la. An té ka pran tan an mwen mwen té préparé sé sijé-la yo té ka ban’an fè la byen konm i fo é an té ka fè tousa an pé pou an té pé sa prézanté-yo byen konm i fo osi. Tousa édé-mwen vwè kè an té ni valè pou Bondyé é pou frè é sè an mwen. »

LÈ NOU KA SANTI KÈ NOU KA NÉYÉ ANBA ÉPRÈV

8. Lèwvwè nou ka jwenn sèwten éprèv ki rèd, ka nou pé rèsanti ?

⁸ Konm nou ka viv adan sé dènyé jou-la, nou ja mèt an tèt an nou kè éprèv ké vin jwenn-nou (2 Tim. 3:1). Men dépawfwa sé éprèv-la nou ka sibi la ka siwprann-nou pas nou pa jan konprann kè nou té’é jwenn difikilté konsa oben pas nou pa té paré pou sa. Pa ègzanp, lajan-la pé rivé a vin two kout oben yo pé di-nou kè nou ni on maladi ki grav oben nou pé pèd on moun nou enmé. Lèwvwè sa ka tonbé asi nou, nou pé santi kè nou ka néyé anba a sa, siwtou si nou ni lenprésyon kè sé éprèv-lasa ka tonbé yonn apré lòt oben kè yotout ka vin anmenmtan. Men on biten pou nou pa jen oubliyé, sé kè Jéova ka soutyenn-nou é kè grasa-y nou ké rivé sipòté nenpòt ki éprèv nou ké jwenn é nou pé’é pè.

9. Rakonté ki éprèv Jòb jwenn.

⁹ An-nou vwè kijan Jéova édé Jòb. Onlo malè rivé Jòb yonn dèyè lòt é sa té rèd toubònman. Yo di-y kè i pa ni pon bèt ankò pas swa yo volé-yo oswa yo tchouyé-yo. Aprésa, yo di-y ké yo tchouyé tout sèwvitè a-y é kè tout timoun a-y mò. É tout sé biten-lasa rivé-y menm jou-la (Jòb 1:13-19). Kèlkè tan apré, alòskè tchè a-y té ka sengné, i vin ni on maladi ki té ka fè-y soufè bon soufè la. I té ni bobo asi tout kò a-y (Jòb 2:7). Tèlman sitiyasyon a-y té mové, mi sa i di : « An hay vi an mwen ; an pa anvi viv ankò » (Jòb 7:16).

10. Kijan Jéova soutyenn Jòb ? (gadé imaj-la ki anlè po a jounal-la).

¹⁰ Jéova té ka voyé on zyé asi Jòb. Konm i té enmé-y, i soutyenn-li lèwvwè i té bizwen èd pou i té pé sa andiré sé éprèv-la i té ka sibi la é pou i té pé sa rété fidèl a-y. Pa ni 2 moun ki ni sajès kon Jéova é Jéova fè Jòb sonjé sa. I di-y osi kè i ka okipé-y dè tout kréyati a-y byen konm i fo. Anplisdisa, Jéova palé-y dè onlo zannimo ki té èstraòwdinè toubònman (Jòb 38:1, 2 ; 39:9, 13, 19, 27 ; 40:15 ; 41:1, 2). I sèvi osi èvè Éliyou, on jennboug ki té ni onlo fwa, pou i té pé sa ba Jòb fòs é pou i té pé sa konsolé-y. Grasa Éliyou, Jòb té sèten kè Jéova toujou ka rékonpansé sèwvitè a-y ki ka andiré. Men Jéova sèvi èvè Éliyou osi pou i té ba Jòb dé bon ti konsèy ki té plen lanmou. Éliyou édé Jòb pou i té arété konsantré-y enki asi sitiyasyon a-y é i fè-y sonjé kè lézimen pa ayen koté Jéova, Bondyé-la ki kréyé linivè-la (Jòb 37:14). Anplisdisa, Jéova mandé Jòb fè on biten. I di-y priyé pou sé 3 zanmi a-y la ki té péché kont Jéova la (Jòb 42:8-10). É nou ? Kijan Jéova ka soutyenn-nou jòdijou lèwvwè nou ka travèsé éprèv ?

11. Lèwvwè nou ka jwenn bout-rèd, kijan Labib pé ban-nou fòs ?

¹¹ Jòdijou, Jéova pa’a palé ban nou kon i té ka palé ba Jòb men i ka sèvi èvè Pawòl a-y Labib pou palé ban nou (Wom. 15:4). Pou konsolé-nou, i ka ban-nou on bèl èspwa pou dèmen. Ni déotwa vèwsé ki pé fè-nou dibyen lèwvwè nou ka jwenn éprèv. Pa ègzanp, Jéova ka ban-nou on garanti é i ka di-nou kè pa ni ayen ki ké « pé séparé-nou dè lanmou-la [i] ni pou nou la » (Wom. 8:38, 39). I ka fè-nou sonjé osi kè i « toupré a tout moun ki ka kriyé-y » adan priyè a yo (Sòm 145:18). I ka pwomèt-nou osi kè siwvwè nou ka fè fon asi-y, nou ké rivé andiré kèlkèswa éprèv-la nou ké jwenn la é nou ké ni tchè-kontan (1 Kor. 10:13 ; Jak 1:2, 12). Pawòl a Bondyé ka fè-nou sonjé osi kè sé éprèv-la nou ka viv la sé pou on ti moman alòskè bèl vi-la Jéova ka pwomèt-nou la sé ké pou touttan (2 Kor. 4:16-18). Jéova ka di-nou kè sé moun-la ki ka fè-nou soufè la, kivédi Satan Dyab-la é tout bannélo a-y ké disparèt. Sé vréman on bèl èspwa (Sòm 37:10). Ès ou aprann déotwa vèwsé pa tchè ki ké pé ba-w fòs lèwvwè ou ké ka jwenn éprèv ?

12. Pawòl a Jéova pé pòté onlo bon biten ban nou. Ka Jéova ka mandé-nou fè pou nou pé sa bénéfisyé dè tout sé biten-lasa ?

¹² Jéova ka mandé-nou pran tan étidyé Labib é pran tan réfléchi asi sa nou ka li adan-y. I vlé kè nou pran labitid fè sa. Pli nou ka mèt sa nou ka aprann an pratik, pli fwa an nou ka vin solid é pli nou ka vin bon bon zanmi èvè Pap’an nou ki an syèl-la. Tout sé biten-lasa ka ban-nou fòs pou andiré sé éprèv-la nou ka jwenn la. Anplisdisa, lèwvwè on moun ka lésé Pawòl a Jéova gidé-y, Jéova ka ba moun-lasa lèspri sen a-y. É kèlkèswa éprèv-la nou ka jwenn la, lèspri sen a-y ka ban-nou « puisans-la ki ka dépasé sa ki nòwmal » (2 Kor. 4:7-10).

13. Tout sé biten-la « èsklav fidèl é prévwayan la » ka ban-nou la ka édé-nou andiré. Kijansa ?

¹³ Grasa Jéova, « èsklav fidèl é prévwayan la » ka ban-nou awtik, vidéo é chanson agogo. Tout sé biten-lasa ka fè fwa an nou pli fò é sa ka édé-nou rété bon bon zanmi èvè Jéova (Mat. 24:45). Fò-nou sèvi èvè tousa Jéova ka ban-nou byen konm i fo. Pa ni lontan dè sa, on sè ki ka viv o Zétazini di jan i ni rèkonésans pou tousa Jéova ka ba-y. Mi sa i di : « Sa ka fè 40 lanné kè an ka sèvi Jéova é an ja jwenn onlo difikilté ki mèt fidélité an mwen a léprèv. » Sè-lasa soufè onlo. On boug-sou tchouyé granpè a-y adan on aksidan a vwati. Manman-y é pap’a-y tonbé malad é yo toulédé mò. Anplisdisa, i trapé on kansè a 2 rèpriz é fò i té goumé èvè maladi-la. Ka ki édé-y andiré ? Mi sa i èspliké : « Jéova toujou pran swen an mwen. Tout sé biten-la Jéova ka ban-nou la grasa èsklav fidèl é prévwayan la édé-mwen andiré. An pé di menm biten ki Jòb lèwvwè i di konsa : “Jiskatan an mò, an pé’é lagé fidélité an mwen !” » (Jòb 27:5).

14. Lèwvwè nou ka jwenn bout-rèd, kijan Jéova ka sèvi èvè frè é sè an nou pou soutyenn-nou ? (1 Tésalonisyen 4:9).

¹⁴ Jéova montré sèwvitè a-y kijan pou yonn aji èvè lanmou èvè lòt é kijan pou yonn konsolé lòt lèwvwè yo ka pasé penn é péripési (2 Kor. 1:3, 4 ; li 1 Tésalonisyen 4:9). Kon Éliyou, frè é sè an nou pé soutyenn-nou pou nou pé sa rété fidèl lèwvwè nou ka jwenn éprèv (Akt 14:22). An-nou palé dè Diane. Mari a-y té malad bon malad la é i touvé frè é sè a lasanblé-la pou ankourajé-y. I ka rakonté kijan yo édé-y pou fwa a-y rété solid. Mi sa i ka di : « Péryòd-la nou pasé la pa té mòl. Men pannan sé moman-lasa nou santi jan Jéova té ka pran-nou an 2 bra a-y. Sé frè é sè la pòté bon mannèv pou yo pé soutyenn-nou. Yo té ka vin vwè-nou, yo té ka kriyé-nou é yo té ka pran-nou an 2 bra a yo. Sé té ègzaktèman sa nou té bizwen pou nou té pé sa kontinyé andiré. Konm an pa ni pèwmi, sé frè é sè la òwganizé-yo pou toujou ni on moun pou vin chèché-mwen pou an pé sa ay an réinyon é pou an pé sa préché dépi an pé. » Nou pé ni tchè-kontan toubònman pas frè é sè an nou enmé-nou onlo adan lasanblé-la !

JÉOVA KA PRAN SWEN AN NOU, AN-NOU NI RÈKONÉSANS POU SA

15. Poukwa nou sèten kè nou ké pé andiré sé éprèv-la nou ké jwenn la ?

¹⁵ Noutout nou ké sibi éprèv. Men nou pé’é jen tousèl lè nou ké ka jwenn sé éprèv-lasa. Jéova sé on Papa ki plen lanmou é i toujou ka voyé zyé asi nou. I toujou la pou nou é lèwvwè nou bizwen èd i toujou paré pou kouté-nou é pou soutyenn-nou (Iz. 43:2). Poukwa nou sèten kè nou ké pé andiré éprèv an nou ? Pas Jéova donan é i ka ban-nou tousa nou bizwen pou fè sa : lapriyè, Pawòl a-y Labib, onlo vidéo é piblikasyon é frè é sè ki enmé-nou onlo é ki ka soutyenn-nou lè nou ka pasé penn é péripési.

16. Ka pou nou fè pou Jéova kontinyé voyé zyé asi nou ?

¹⁶ A pa ti kontan nou kontan nou ni on Papa an syèl-la ki ka voyé on zyé asi nou ! « Sé grasa li si nou ni tchè-kontan » (Sòm 33:21). An-nou montré Jéova jan nou ni rèkonésans pou-y. Pousa, an-nou pwofité dè tout sé dispozisyon-la i ka pran la pou i pé sa soutyenn-nou. Men, nou osi nou ni dé biten a fè pou Jéova kontinyé voyé on zyé asi nou. An-nou fè tousa nou pé pou obéyi-y é pou nou maché dwèt douvan-y. Si nou fè sa, i ké voyé zyé asi nou é i ké kontinyé fè sa pou touttan ! (1 Pyè 3:12).