AWTIK POU ÉTIDYÉ 19
Jéova pwomèt-nou kè i ké mèt on nouvo mond anplas. Ka nou pé fè pou nou pi sèten dè sa ankò ?
« Lè [Jéova] ka di on biten, ès i pa ka fè-y ? » (NONB 23:19).
KANTIK 142 Nou ka tchenbé fò adan èspwa an nou
ON TI LIDÉ ASI SA NOU KAY VWÈa
1-2. Toupannan nou ka atann Bondyé mèt nouvo mond-la anplas, ka pou nou fè ?
JÉOVA pwomèt-nou kè i ké mèt on nouvo mond an plas a sila nou ka viv adan-y la. É adan nouvo mond-lasa, toujou ké ni lajistis (2 Pyè 3:13). Nou ka di Jéova mèsi pou bèl pwomès-lasa ! Nou pa sav ègzaktèman kitan nouvo mond-la ké la men lè nou ka gadé sa ki ka pasé alantou an nou, nou sav kè bòdlanmè pa lwen (Mat. 24:32-34, 36 ; Akt 1:7).
2 Annatandan, kèlkèswa kantité lanné nou ka sèvi Jéova, noutout bizwen konsolidé fwa an nou adan pwomès-lasa. Poukwa sa ? Paskè menmsi fwa an nou fò konnyéla, i pé rivé a fébli. Lapòt Pòl di kè lè on moun pa ni asé fwa sé konsi sé on péché i ka fè ; on ‘péché ki ka mélé-y fasilman’ (Ébr. 12:1). Kifè, pou fwa an nou pa fébli, fò-nou pran labitid réfléchi asi sa ki ka montré-nou kè nouvo mond-la toupré (Ébr. 11:1).
3. Ka nou ké vwè adan awtik-lasa ?
3 Adan awtik-lasa, nou ké palé dè 3 biten nou pé fè pou nou sèten a san pou san kè Jéova ké mèt nouvo mond-la anplas : 1) fò-nou pran tan réfléchi asi ranson-la, 2) fò-nou pran tan réfléchi asi puisans a Jéova, é 3) fò-nou fè sèwten biten ki ka édé-nou vin pibon zanmi èvè Bondyé. Aprésa, nou ké vwè kijan mésaj-la Jéova ba Abakik la pé konsolidé fwa an nou. Men adan on prèmyé tan, an-nou palé dè sèwten sitiyasyon nou pé ka jwenn konnyéla la é kè nou ké rivé a sipòté si nou sèten a san pou san kè Bondyé ké mèt nouvo mond-la anplas.
DÉOTWA SITIYASYON KÈ NOU KÉ PÉ SIPÒTÉ YENKI SI NOU NI ON FWA KI SOLID
4. Ki désizyon nou ni a pran é poukwa fò-nou ni on fwa ki fò lè nou ka pran-yo ?
4 Chakjou nou ni désizyon a pran. Sé pé pou chwazi kimoun nou ké frékanté, kijan nou ké anmizé-nou oben ki étid nou ké fè. Sé pé osi anrapò èvè mayé an nou, timoun an nou é travay an nou. Pou nou pran bon désizyon, fò-nou ni on fwa ki solid. Sé pousa fò-nou pozé-nou sé kèsyon-lasa : « Èskè sé chwa-la an ka fè la ka montré kè an sèten kè mond-lasa ké disparèt é kè toutalè Bondyé ké mèt on nouvo mond an plas a-y ? Oben ès an ka chwazi fè menm biten ki moun ki ka pansé kè apré lanmò sé tibèt ? » (Mat. 6:19, 20 ; Lik 12:16-21). Nou ké pran méyè désizyon ki tini si nou ka kontinyé fè éfò pou nou sèten a san pou san kè nouvo mond-la toupré.
5-6. Poukwa fò-nou ni on fwa ki solid lè nou ka jwenn éprèv ? Bay on ègzanp.
5 Fò-nou ni on fwa ki solid osi lèwvwè nou ka jwenn éprèv. Pèwsékisyon, on maladi ki pa’a géri oben dòt sitiyasyon ki rèd a sipòté pé rivé a dékourajé-nou. Lè nou ka jwenn on éprèv konsa, pétèt kè odépa nou ka santi kè nou ké pé kenbé. Men konm an jénéral, sé éprèv-lasa ka diré lontan, nou bizwen ni on fwa ki solid pou nou pé sa andiré é pou nou pé sa kontinyé sèvi Jéova èvè on tchè ki kontan (Wom. 12:12 ; 1 Pyè 1:6, 7).
6 Lèwvwè nou ka jwenn on éprèv é kè nou ka pran bon gaz, nou pé ni lenprésyon kè Jéova ka tadé pou i mèt nouvo mond-la anplas. Ès sa vlé di kè nou pa ni asé fwa ? Pa oblijé. An-nou pran on ègzanp. Siwvwè ni on gwo séchrès koté-la nou ka rété la, nou pé ni lenprésyon kè fò-nou ké atann lontan ankò avan sézon a lapli-la rivé. É poutan, sézon a lapli-la ka fin pa rivé. Menmjan-la osi, lèwvwè nou dékourajé bon dékourajé la, nou pé ni lenprésyon kè nouvo mond-la pé’é vin ankò. Men lè nou ni on fwa ki fò, nou sèten a san pou san kè Bondyé ké réyalizé pwomès a-y (Sòm 94:3, 14, 15 ; Ébr. 6:17-19). Konm nou ka fè Jéova konfyans, nou ka kontinyé adoré-y é nou ka mèt adorasyon-lasa prèmyé douvan adan vi an nou.
7. Ka sèwten moun ka pansé é ki prékosyon fò-nou pran ?
7 Fò-nou ni on fwa ki fò osi pou nou pé sa préché. Pou onlo moun, ‘bon nouvèl-la’ nou ka anonsé la anrapò èvè nouvo mond-la sé on rèv ki pé’é jen réyalizé (Mat. 24:14 ; Ézék. 33:32). Si nou pa fè atansyon, yo pé détenn asi nou, sa pé mèt dout an tèt an nou é nou pé rivé a rézonné kon yo. Men pou sa pa rivé, fò pa nou jen arété fè sa ki fo pou rann fwa an nou pli solid. An-nou vwè 3 biten nou pé fè pou sa.
PRAN TAN RÉFLÉCHI ASI RANSON-LA
8-9. Poukwa lè nou ka pran tan réfléchi asi ranson-la sa ka rann fwa an nou pli solid ?
8 On prèmyé biten nou pé fè pou rann fwa an nou pi solid, sé pran tan réfléchi asi ranson-la. Grasa ranson-la nou sèten kè pwomès a Bondyé ké réyalizé. I pwomèt-nou kè i ké ban-nou lavi étèwnèl adan on mond méyè. Alò lè nou ka pran tan réfléchi pou vwè poukwa i ban-nou ranson-la é pou vwè grandè a sakrifis-la i fè la, sa ka édé-nou ni on fwa pi solid adan pwomès-lasa. Poukwa nou ka di sa ?
9 An-nou pran tan gadé ki sakrifis Jéova fè pou nou té pé sa bénéfisyé dè ranson-la. Jéova fè ansòt pou prèmyé Gason a-y ki té an syèl-la fèt asi latè antankè nonm pawfè. I té enmé Gason-lasa toubònman, é sé té méyè zanmi a-y. Lè Jézi té asi latè, i jwenn tout kalté éprèv é i soufè bon soufè la avan i té mò. Jéova péyé ranson-la chè toubònman ! Ès ou ka di kè Jéova Pap’an nou ki plen lanmou, té’é lésé Gason a-y soufè konsa é pran mò a-y pou nou pé viv adoumanman yenki pou on ti moman ? Anponjan ! (Jan 3:16 ; 1 Pyè 1:18, 19). Si Jéova péyé ranson-la chè konsa, nou pé sèten kè i ké fè ansòt kè nou viv pou touttan adan nouvo mond-la.
PRAN TAN RÉFLÉCHI ASI PUISANS A JÉOVA
10. Sèlon sa Éfézyen 3:20 ka di, ka Jéova kapab fè ?
10 On dézyèm biten nou pé fè pou rann fwa an nou pli solid, sé pran tan réfléchi asi puisans a Jéova. Grasa a puisans-la i ni la, i kapab fè tousa i pwomèt. Jòdijou, ni onlo moun ki ka pansé kè zafè a lavi étèwnèl adan on nouvo mond sé biten ankouyonnad. Men pi souvan ki rarman, Jéova ka pwomèt lézimen sa yomenm a yo pa kapab fè. Sé-y ki Toupuisan-la, é fò pa nou jen oubliyé sa (Jòb 42:2 ; Mawk 10:27). Alò nou pa ka touvé sa fò si sé biten-la i ka pwomèt-nou la èstraòwdinè toubònman (li Éfézyen 3:20).
11. Palé dè on pwomès èstraòwdinè kè Jéova fè (gadé ti karé-la « Déotwa pwomès èstraòwdinè ki réyalizé »).
11 An-nou pran tan réfléchi asi déotwa pwomès kè Jéova ni lokazyon fè sèwvitè a-y an tan lontan. I di Abraam é Sara kè yo té’é ni on gason alòskè yo té ja ni on bèl laj. On moun té’é pé di : « Men sa pé pa fèt anponjan ! » (Jén. 17:15-17). Anplisdisa, i di Abraam kè i té’é ba pitit a pitit a-y tout péyi a Kanaan. Pannan bon tibwen lanné, désandan a Abraam, sé Izraélit-la, té èsklav an Éjipt. Yo té’é pé pansé kè pwomès-la Jéova té fè la pa té’é jen réyalizé. É poutan i akonpli. Plita, Jéova di Élizabèt kè i té’é fè on timoun alòskè i té ja ni on bèl laj. Anplisdisa, i fè Mari sav kè sé li ki té’é mèt Gason a-y si tè alòskè Mari té vyèwj. Lèwvwè Jézi fèt, sa réyalizé ondòt pwomès kè Jéova té fè ! Ni plizyè lanné dè sa, adan Jadendédèn-la i té pwomèt kè Gason a-y té’é vin si latè (Jén. 3:15).
12. Ka Joziyé 23:14 é Izayi 55:10, 11 ka aprann-nou asi puisans a Jéova ?
12 Lè nou ka pran tan réfléchi asi sé pwomès-la Jéova fè nou la é asi jan i réyalizé-yo, nou ka rann-nou kont kè i ni on puisans ki èstraòwdinè toubònman. Kifè, lè i ka di-nou kè i ké mèt on nouvo mond anplas, nou sèten a san pou san kè pwomès-lasa ké réyalizé (li Joziyé 23:14 ; Izayi 55:10, 11). É grasa fwa-la nou ni la, nou pé édé dòt moun konprann kè lè on moun ka kwè kè Bondyé ké mèt on nouvo mond anplas, a pa révé i ka révé ! Jéova pwomèt-nou kè i ké ni on nouvo syèl é on nouvo tè. É mi sa i di anrapò èvè pwomès-lasa : « Zò pé ni konfyans adan sé pawòl-lasa é yo vré » (Rév. 21:1, 5).
FÈ SÈWTEN BITEN KI KÉ ÉDÉ-W VIN PIBON ZANMI ÈVÈ JÉOVA
SÉ RÉINYON-LA
Kijan sa pé konsolidé fwa a-w ? (gadé paragraf 13 la).
13. Kijan sé réinyon-la pé konsolidé fwa an nou ? Bay on ti èsplikasyon.
13 On twazyèm biten nou pé fè pou rann fwa an nou pi fò, sé òwganizé-nou pou fè sèwten biten ki ké édé-nou vin pibon zanmi èvè Jéova. Pa ègzanp, sonjé tout bon biten sé réinyon-la ka pòté ban nou. Pannan onpakèt lanné, Annab ni lokazyon fè plizyè biten diféran antankè sèwvitè aplentan. Mi sa i ka di : « Grasa sé réinyon-la fwa an mwen ka rété fò. Menmsi frè-la ki ka fè diskou-la pa gè fò adan zafè a anségné la, oben menmsi an ja konnèt tousa i ka èspliké la, byensouvan i ka di on biten ki ké édé-mwen konprann on vérité ki an Bib-la pibyen é sa ka konsolidé fwa an mwen. » Anplisdisa, fwa an nou pé vin pli fò lè nou ka pran tan kouté komantè a frè é sè an nou pannan sé réinyon-la (Wom. 1:11, 12 ; 10:17).
PRÉDIKASYON-LA
Kijan sa pé konsolidé fwa a-w ? (gadé paragraf 14 la).
14. Kijan prédikasyon-la ka konsolidé fwa an nou ?
14 Nou ka konsolidé fwa an nou osi lè nou ka préché (Ébr. 10:23). Barbara ka sèvi Jéova dépi pliski 70 lanné, é mi sa i ka èspliké : « On biten an toujou konstaté, sé kè prédikasyon-la ka konsolidé fwa an mwen. Pi an ka palé dè sé bèl pwomès-la Jéova ka fè-nou la, pi fwa an mwen ka vin solid. »
ÉTID PÈWSONÈL A-W
Kijan sa pé konsolidé fwa a-w ? (gadé paragraf 15 la).
15. Lè nou ka étidyé tousèl an nou, kijan sa pé konsolidé fwa an nou ? (gadé imaj-la osi).
15 Ondòt biten ankò nou pé fè pou konsolidé fwa an nou, sé étidyé Labib tousèl an nou. Susan ka di kè sa ki ka édé-y, sé kè i ka fè on pwogram pou étidyé. Mi sa i ka èspliké : « Lè dimanch, an ka étidyé awtik a Tou dè Gad la nou ké vwè simenn pwochenn. Lè lendi é lè mawdi, an ka préparé réinyon-la ki ka fèt an simenn-la. É rèstan a simenn-la, an ka étidyé on sijé kè mwenmenm an mwen chwazi. » Konm Susan ka suiv pwogram-la i fè la, i toujou ka kontinyé konsolidé fwa a-y. Irene kanta-y, ka sèvi Jéova an Biwo mondyal la dépi onpakèt lanné. I konstaté kè sa ki ka konsolidé fwa a-y sé lè i ka étidyé sé pwofési-la ki an Bib-lac. Mi sa i ka èspliké : « Sa an ka touvé fò menm, sé kè lè sé pwofési-la ka réyalizé, pa ni pon ti détay ki ka rété atè. »
« ASIRÉ PA PÉTÈT, I KÉ RÉYALIZÉ »
16. Poukwa nou pé di kè sa Jéova di Abakik sa valab pou nou osi ? (Ébré 10:36, 37).
16 Pawmi sèwvitè a Jéova, ni sa ki ka atann kè mond-lasa bout dépi on bon moman. Ni dé moun ki ka pansé kè ni lontan mond-lasa té dwèt ja disparèt. Men konm Jéova ka konprann sa sèwvitè a-y ka rèsanti, mi sa i di pwofèt Abakik : « Pas vizyon-la ké réyalizé a lè a-y, i ké rivé vit, é a pa on manti. Menmsi i ka tadé, kontinyé atann-li. Asiré pa pétèt, i ké réyalizé. I pé ké anrèta ! » (Abak. 2:3). Ès sa Jéova di la, sé té pou Abakik tousèl ? Oben ès sa valab pou nou osi ? Grasa lèsprisen a Bondyé, lapòt Pòl sèvi èvè sé menm pawòl-lasa pou i té ankourajé sé krétyen-la ki té présé vwè nouvo mond-la rivé (li Ébré 10:36, 37). Menmsi nou ni lenprésyon kè pwomès a Jéova ka pran tan pou i réyalizé, « asiré pa pétèt, i ké réyalizé » ; « i pé ké anrèta ! ».
17. Kijan on sè suiv konsèy-la Jéova té ba Abakik la ?
17 Ni onpakèt sèwvitè a Jéova ki ka « kontinyé atann » kon Jéova ka mandé-yo fè. É ni sa adan yo ki ka fè sa dépi plizyè lanné. An-nou palé dè Louise. I koumansé sèvi Jéova an 1939. Mi sa i ka rakonté : « A lépòk, an té ka pansé kè Awmagédon té’é rivé avan an fin lanné-lisé an mwen. Men a pa sa ki pasé. Lanné apré lanné, an té ka li istwa a onlo sèwvitè a Jéova ki rété ka atann lontan avan yo té risivwè rékonpans-la Jéova té pwomèt-yo la. Pa ègzanp, an té ka li istwa a Noé, Abraam é Jozèf, é sé sa ki édé-mwen pran pasyans. Menmjan ki onlo dòt frè é sè, an té ka kontinyé atann. Kifè, an toujou mèt an tèt an mwen kè nouvo mond-la toupré rivé. » Ni onlo sèwvitè a Jéova ki batizé dépi onpakèt lanné é ki dakò èvè sa Louise ka di !
18. Bondyé pwomèt-nou kè i ké mèt on nouvo mond anplas. Lè nou ka òbsèwvé sa i kréyé, kijan sa ka konsolidé fwa an nou adan pwomès-lasa ?
18 Sé vré, nouvo mond-la poko la. Men sonjé tousa ki ja la : sé zétwal-la, sé pyébwa-la, sé bèt-la, sé moun-la ki alantou a-w la é onlo dòt biten ankò. Sé biten-lasa ka ègzisté poubon menmsi onlè yo poto’o la. Si yo la jòdla, sé pas Jéova kréyé-yo (Jén. 1:1, 26, 27). Bondyé an nou ni lentansyon mèt on nouvo mond anplas osi, é adan-y toutmoun ké ni on santé ki pawfè, é yo ké viv pou touttan. I ké réyalizé pwomès a-y ! Nou pé sèten kè nouvo mond-la ké rivé a moman-la Bondyé désidé la (Iz. 65:17 ; Rév. 21:3, 4).
19. Kijan ou pé konsolidé fwa a-w ?
19 Toupannan ou ka atann nouvo mond-la, fè tousa ou pé pou ou pé sa konsolidé fwa a-w. Toujou montré rèkonésans a-w pou ranson-la. Pran tan réfléchi asi puisans a Jéova. É fè dé biten pou ou pé sa rapwoché-w dè-y. Si ou fè tousa, ou ké adan « séla ki ka érité dè sé pwomès-la grasa lafwa é grasa lapasyans » (Ébr. 6:11, 12 ; Wom. 5:5).
KANTIK 139 Imajiné-w adan mond nouvo la
a Adan Labib, Bondyé ka pwomèt kè i ké mèt on nouvo mond anplas. Men ni onlo moun ki pa’a kwè kè sa ké fèt. Pou yo, sé on rèv ki pé’é jen réyalizé. Nou, nou sèten kè tout pwomès a Jéova ké réyalizé. Sèlman, fò-nou kontinyé fè éfò pou fwa an nou rété fò. Alò ka pou nou fè ? Sé sa nou ké vwè adan awtik-lasa.
b Yo chanjé sèwten non.
c Si ou k’ay adan Index des publications des Témoins de Jéhovah, é kè aprésa ou k’ay adan « Prophéties », ou ké touvé onlo awtik ki ka palé dè sé pwofési-la ki an Bib-la. Pa ègzanp, ou pé gadé awtik-la « Les prédictions de Jéhovah s’accomplissent » adan niméwo a 1é janvyé 2008 a Tou dè Gad la.