AWTIK POU ÉTIDYÉ 30
Toujou fè ansòt pou lanmou a-w vin pli fò
« An-nou grandi adan toutkalté domenn grasa lanmou » (ÉFÉZ. 4:15).
KANTIK 2 Non a-w sé Jéova
ON TI LIDÉ ASI SA NOU KAY VWÈa
1. Lè ou koumansé étidyé Labib, ki biten ou aprann ?
ÈS OU ka sonjé tout sé biten-la ou aprann la lèwvwè ou koumansé étidyé Labib ? Pétèt lèwvwè ou vin konnèt non a Bondyé, ou rété èstèbèkwè. Sèten lè ou vin aprann kè Jéova pa’a brilé moun an difé pou fè-yo soufè, sa trankilizé lèspri a-w. É sèten ou té kontan lè ou vin aprann kè ou ké pé wouvwè moun ou té enmé é ki mò é kè ou ké pé viv èvè yo adan paradi-la.
2. Toupannan ou té ka aprann sé vérité-la ki an Bib-la, ki pwogré ou fè ? (Éfézyen 5:1, 2).
2 Pli ou étidyé Labib, pli ou vin enmé Jéova fò. Lanmou-lasa pousé-w mèt sa ou té ka aprann an pratik. Grasa sé prensip-la ki an Bib-la, ou rivé pran plibon désizyon adan vi a-w. Pou fè Jéova plézi, ou chanjé mantalité a-w é konpòwtasyon a-w. Ou té ka imité Pap’a-w ki an syèl-la kon on timoun ka imité fanmi a-y ki enmé-y (li Éfézyen 5:1, 2).
3. Ki kèsyon nou té’é pé pozé-nou ?
3 Mi sa nou té’é pé mandé-nou : « Ès jòdijou an enmé Jéova pli fò ki lè an pran lèbatèm ? Ès pli tan ka pasé é pli mannyè an ka aji é mannyè an ka pansé ka sanm ta Jéova ? Pa ègzanp, ès an ka montré frè é sè an mwen kè an enmé-yo plis ki avan ? » Si ou pa ni menm lanmou-la ki tala ou té ni la odépa, pa lésé sa dékourajé-w. Sa rivé sé prèmyé krétyen-la. Men Jézi pa lagé-yo é i pé’é lagé-nou nonplis (Rév. 2:4, 7). I sav kè nou pé rivé a ni lanmou-la nou té ni la odépa lèwvwè nou vin konnèt sé vérité-la ki an Bib-la.
4. Ka nou ké vwè adan awtik-lasa ?
4 Adan awtik-lasa, nou ké vwè ka nou pé fè pou nou kontinyé enmé Jéova é pwochen an nou pli fò. Aprésa, nou ké palé dè déotwa byenfé sa pé pwokiré ki nou, ki frè é sè an nou.
FÈ ANSÒT POU-W ENMÉ JÉOVA PLI FÒ
5-6. a) Ki difikilté Pòl jwenn lè i té ka sèvi Jéova ? b) Ka ki édé-y pou i pa lagé ?
5 Lapòt Pòl té kontan sèvi Jéova, men délè i jwenn onlo difikilté. I fè plizyè vwayaj é souvantfwa sé vwayaj-lasa té long. A épòk-lasa, lè on moun té ka vwayajé, sa pa té fasil pou-y. Pa ègzanp, a plizyè rèpriz, Pòl « té an danjé akòz dè sé flèv-la » é « akòz dè sé vòlè-la ». Anplisdisa, dépawfwa moun ki té kont-li fè-y bon méchansté (2 Kor. 11:23-27). É a pa toutlè sé frè é sè la té ni rèkonésans pou tousa i té ka fè pou yo (2 Kor. 10:10 ; Filip. 4:15).
6 Ka ki édé Pòl pou i kontinyé sèvi Jéova ? Grasa sa i aprann adan Lézékriti é grasa sa i viv osi, i vin konnèt onlo biten asi jan dè moun Jéova yé. Sé konsa i vin sèten kè Bondyé a-y té enmé-y (Wom. 8:38, 39 ; Éféz. 2:4, 5). É i vin enmé Jéova fò toubònman. Pòl montré Jéova sa lè i « té ka sèvi lésen » é lè i té « ka kontinyé sèvi-yo » (Ébr. 6:10).
7. Bay on biten nou pé fè pou nou enmé Jéova pli fò.
7 Nou pé fè ansòt pou nou vin enmé Jéova pli fò lè nou ka étidyé Pawòl a-y oséryé. Lè ou ka li on pasaj a Labib, éséyé vwè ka sa ka aprann-vou asi-y. Mandé-w : « Kijan istwa-lasa ka montré kè Jéova enmé-mwen ? Ki biten adan istwa-lasa ka ban-mwen anvi enmé Jéova ? »
8. Kijan lapriyè pé édé-nou enmé Jéova pli fò ?
8 Ondòt biten nou pé fè pou nou vin enmé Jéova pli fò, sé lè nou ka priyé-y touléjou é lè nou ka di-y tousa nou ka rèsanti (Sòm 25:4, 5). Jéova dè koté a-y ké réponn a priyè an nou (1 Jan 3:21, 22). An-nou palé dè on sè ki ka viv an Azi, non a-y sé Katiab. Mi sa i ka di : « Avan, lanmou-la an té ni la pou Jéova té bazé asi sa an té konnèt adan Labib. Men lè an vwè jan i réponn a priyè an mwen, an vin enmé-y pli fò é sa ban-mwen anvi fè sa ki ka fè-y plézi. »
FÈ ANSÒT POU-W VIN ENMÉ PWOCHEN A-W PLI FÒ
9. Timoté té ka fè ansòt pou i té pé sa enmé frè é sè a-y pli fò. Ka ki ka montré sa ?
9 Déotwa lanné apré i vin krétyen, Pòl kontré Timoté, on jennboug ki té ni onlo bèl kalité. Timoté té enmé Jéova é pwochen a-y onlo toubònman. Plita, mi sa Pòl di sé krétyen Filip la asi Timoté : « An pa’a touvé dé moun ki ni menm konpòwtasyon ki-y, é ki ka sousyé-y vréman dè entéré a zòt » (Filip. 2:20). Pétèt Timoté té sav òwganizé dé biten byen konm i fo oben pétèt i té sav fè bèl diskou osi. Men lè Pòl di sé pawòl-lasa, a pa dè sa i té ka palé. An réyalité, i té ka palé dè jan Timoté té enmé frè é sè a-y. Sèten kè sé frè é sè la ki té adan sé lasanblé-la Timoté té ka vizité la dwèt té présé vwè-y wouvin vizité lasanblé a yo (1 Kor. 4:17).
10. Kijan Anna é mari a-y montré frè é sè a yo kè yo té enmé-yo ?
10 Nou osi, nou ka chèché a vwè ka nou pé fè pou nou édé frè é sè an nou (Ébr. 13:16). Adan awtik a simenn pasé, nou palé dè Anna é mari a-y. An-nou vwè ka yo fè. Apré on gwo manman tanpèt, yo ay aka on fanmi ki Témwen a Jéova. Lè yo rivé, yo vwè kè tanpèt-la té krazé twa a kaz-la é kè fanmi-la pa té ni pon lenj pwòp. Mi sa Anna ka rakonté : « Nou pati èvè lenj a yo akaz an nou é nou lavé-yo ba yo. Nou rèpasé-yo, nou pliyé-yo é nou menné sé lenj-la ba yo. Pou nou, a pa té granzafè, men grasa sa, nou vin zanmi èvè fanmi-lasa é jous alajouné jòdi nou bon bon zanmi. » Konm Anna é mari a-y té enmé frè é sè a yo, sa pousé-yo fè on biten pou édé-yo (1 Jan 3:17, 18).
11. a) Lè nou ka fè éfò pou montré frè é sè an nou kè nou enmé-yo, ki éfé sa pé ni asi yo ? b) Dapré Pwovèb 19:17, kijan Jéova ka réyaji lè nou ka fè on biten pou montré on moun kè nou enmé-y ?
11 Lè nou janti èvè frè é sè an nou é kè nou ka montré-yo kè nou enmé-yo, frè é sè an nou ka vwè kijan nou ka fè éfò pou imité Jéova. É pétèt yo ké ni onlo rèkonésans pou nou men nou pa jen oblijé okouran a sa. Talè la nou palé dè Katia. Mi sa i ka èspliké : « A pa ti rèkonésans an ni pou tout sé sè-la ki menné-mwen préché èvè yo la. Yo té ka vin chèché-mwen, yo té ka menné-mwen manjé on ti biten èvè yo. Aprésa, yo té ka viré menné-mwen akaz an mwen pou yo té sèten kè ayen pa té’é rivé-mwen. Jòdila, an ka rann-mwen kont kè tousa yo fè pou édé-mwen mandé-yo onlo éfò é kè sé lanmou ki pousé-yo fè sa. » Nou ka tou konprann kè a pa toutmoun ki ké di-nou mèsi pou sa nou ka fè ba yo. Mi sa Katia ka di anrapò èvè sé sè-la ki édé-y la : « An té’é enmé fè-yo dibyen kon yo fè-mwen dibyen. Men an pa sav ola yochak ka viv jòdijou. Men érèzman, li Jéova, i sav ola yo yé é an ka priyé-y pou i pé sa rékonpansé-yo. » Katia ni rézon, Jéova ka vwè mwenn ti biten nou ka fè pou fè lézòt dibyen. Pou-y, sé on sakrifis ki ni onlo valè é sé doué i ka doué-nou. Asirésèten, i ké ranbousé-nou (li Pwovèb 19:17).
On moun ki ka pwogrésé pou vin pli bon zanmi èvè Jéova ka gadé pou vwè ka i pé fè pou i édé lézòt (gadé paragraf 12 la).
12. Ka on frè pé fè pou montré frè é sè a lasanblé a-y kè i enmé-yo ? (gadé sé imaj-la osi).
12 Si ou sé on frè, kijan ou pé aji épi lanmou èvè frè é sè a-w é kijan ou pé édé-yo ? On jenn frè, non a-y sé Jordan, ay mandé on ansyen ka i té pé fè pou vin pli itil adan lasanblé-la. Ansyen-la félisité-y pou tout sé pwogré-la i té ja fè la é i ba-y déotwa konsèy. Pa ègzanp, i mandé-y si i té’é pé rivé pli bonnè adan sé réinyon-la pou di tout sé frè é sè la bonjou. I mandé-y osi si i té’é pé bay déotwa ti komantè pannan sé réinyon-la é pran labitid préché èvè sé frè é sè la ki adan gwoup a prédikasyon a-y. I di-y osi kè i té’é pé gadé pou vwè ki biten itil i té’é pé fè pou édé lézòt. Lèwvwè Jordan suiv sé konsèy-lasa, non sèlman i aprann fè dé nouvo biten men anplisdisa, i vin enmé frè é sè a-y pli fò. I rann-li kont kè lèwvwè on frè ka vin asistan, a pa a moman-lasa i ka koumansé édé lézòt, men sé kontinyé i ka kontinyé fè sa (1 Tim. 3:8-10, 13).
13. Ka ki ba Christian anvi wouvin ansyen ?
13 É si ou té asistan oben ansyen avan ? Jéova pa oubliyé tousa ou fè ba-y é lanmou-la ki pousé-w fè sa (1 Kor. 15:58). I ka vwè osi ka lanmou-la ou ni pou-y la ka pousé-w fè touléjou. An-nou palé dè on frè, non ay sé Christian. I té ansyen é lè yo woté rèsponsabilité-lasa an men a-y, sa désèvwa-y. Mi sa i di : « An désidé kè an ké fè tousa an pé pou sèvi Jéova èvè onlo lanmou, ki an ansyen, ki an pa ansyen. » Déotwa tan apré i wouvin ansyen, mi sa i rèkonnèt : « Wouvin ansyen, sé on biten ki té ka fè-mwen on ti jan pè. Men konm Jéova ni onlo mizérikòd é kè i té anvi kè an wouvin ansyen, an aksèpté pas an enmé-y é pas an enmé frè é sè an mwen. »
14. Ka ègzanp a Elena ka aprann-vou ?
14 Sèwvitè a Jéova ka montré kè yo ni lanmou pou pwochen a yo osi (Mat. 22:37-39). Pa ègzanp, mi sa Elena, on sè ki ka viv an Jéòwji ka di : « Odépa, onsèl biten ki té ka ban-mwen anvi préché sé lanmou-la an té ni la pou Jéova. Men pli lanmou-lasa té ka vin fò, pli an té ka vin enmé sé moun-la osi. Alò an réfléchi pou vwè ki pwoblèm sé moun-la ka jwenn é dè ki biten yo té’é byen anvi palé. É pli an té ka sonjé-yo, pli an té anvi édé-yo » (Wom. 10:13-15).
JÉOVA KA BÉNI-W LÈ OU KA MONTRÉ LÉZÒT KÈ OU ENMÉ-YO
Onsèl ti jès nou ka fè pou montré on moun kè nou enmé-y pé fè onlo moun dibyen (gadé sé paragraf 15 é 16 la).
15-16. Kon nou ka vwè-y asi sé imaj-la, ki bénédisyon nou ka trapé lèwvwè nou ka montré lézòt kè nou enmé-yo ?
15 Lèwvwè nou ka montré frè é sè an nou kè nou enmé-yo, sa ka fè-yo dibyen, men a pa yo tousèl. An-nou vwè on ègzanp. Lèwvwè pandémi a Covid-19 la koumansé, on frè non a-y sé Paolo é madanm a-y édé onlo sè ki té ja ni on bèl laj sèvi èvè aparèy élèktronik a yo pou yo préché. Ni yonn adan yo ki pa té ka rivé menm, men i pa lagé é i rivé sèvi èvè aparèy élèktronik a-y pou voyé envitasyon a Mémoryal-la ba fanmi a-y. Anfinaldikont, ni 60 adan yo ki vin an Mémoryal-la pa vidéokonférans ! Tout sé éfò-la Paolo é madanm a-y fè la té itil pou sè-lasa é pou fanmi a-y. Kèlkètan apré, sè-la maké on ti mo ba Paolo. Mi sa i té ka di : « Mèsi pou bèl fòwmasyon-la zò ban-nou la. Menmsi nou ja ni on ti laj, zò pa rété gadé sa. An pé’é jen oubliyé jan Jéova pran swen an nou é an pé’é oubliyé tout sé éfò-la zò fè la pou édé-nou. »
16 Istwa-lasa aprann Paolo on biten enpòwtan : lanmou, sa pli enpòwtan ki konnèt onlo biten oben ni onlo kapasité. Mi sa Paolo konstaté : « An té rèsponsab a siwkonskripsyon men jòdijou an ka rann-mwen kont kè menmsi sé pwoklamatè-la pa’a sonjé sé diskou-la an fè la, yo ka sonjé jan an édé-yo toujou. »
17. Lè nou ka montré lézòt kè nou enmé-yo, pou kimoun ankò sa ké pòté bon biten ?
17 Lèwvwè nou ka montré lézòt kè nou enmé-yo, sa ka pòté onlo bon biten ban nou. É souvantfwa, sé dé biten nou pa té ka imajiné. Sé sa Jonathan, on frè ki ka viv an Nouvèlzéland konstaté. On sanmdi aprémidi, i vwè on frè ki té ka préché tousèl a-y. Frè-lasa té pyonyé. Jou-lasa té ni bon chalè. Alò Jonathan désidé kè i pé’é lésé frè-la préché tousèl a-y lè sanmdi aprémidi ankò. I désidé ay èvè-y. Sa i té ka fè la té janti, men a moman-lasa, i poto’o ka vwè ki bon biten sa té’é menné ba-y. Mi sa i ka di : « A épòk-lasa, an pa té enmé préché, men lè an vwè jan frè-la ka anségné sé moun-la, é jan prédikasyon a-y ka maché, an koumansé enmé laprédikasyon. Anplisdisa, frè-lasa vin bon zig an mwen. I édé-mwen pwogrésé adan lavérité. Si an enmé préché é anségné sé grasa-y é i édé-mwen vin pli bon zanmi èvè Jéova. »
18. Ka Jéova vlé kè nou fè ?
18 Ni on biten kè Jéova anvi noutout fè : i vlé kè nou enmé-y pli fò é i vlé kè nou enmé frè é sè an nou pli fò osi. Kon nou vwè-y adan awtik-lasa, nou ké rivé enmé Jéova pli fò siwvwè nou ka li Pawòl a-y é nou ka médité anlè-y é siwvwè nou ka pran labitid priyé-y. Nou ké rivé enmé frè é sè an nou pli fò siwvwè nou ka kontinyé édé-yo. Pli nou ké enmé Jéova é frè é sè an nou fò, pli lanmityé an nou èvè yo ké vin solid. É sé lanmityé-lasa ké diré pou touttan !
KANTIK 109 « Aimons intensément avec le coeur »
a Ki nou toufré pran lèbatèm, ki nou ka sèvi Jéova dépi onpakèt lanné, noutout nou pé kontinyé fè pwogré pou vin pli bon zanmi èvè Jéova. Pou sa, on biten pou nou fè, sé fè ansòt pou nou enmé Jéova é pwochen an nou pli fò. Toupannan nou ka ègzaminé sé lidé-la nou ka touvé adan awtik-lasa, pran tan réfléchi asi sé pwogré-la ou ja fè la é asi sa ou té’é pé fè ankò pou kontinyé pwogrésé.
b Yo chanjé sèwten non.