BIBLIYOTÈK ANLÈ ENTÈWNÈT a Lawatchtower
Lawatchtower
BIBLIYOTÈK ANLÈ ENTÈWNÈT
Kréyòl Gwadloup
ò
  • ò
  • Ò
  • È
  • É
  • LABIB
  • PIBLIKASYON
  • RÉINYON
  • w23 sèptanm p. 8-13
  • Léjenn, kijan zò ké menné vi a zòt ?

Pa ni pon vidéo disponib pou sa ou chwazi la.

Èskizé, ni on pwoblèm, pa ni mwayen gadé vidéo-la.

  • Léjenn, kijan zò ké menné vi a zòt ?
  • Tou dè Gad la ka bay lavwa asi Wayòm a Jéova (pou étidyé) 2023
  • Soutit
  • Asi menm sijé-la
  • CHWAZI DÉ BON ZANMI
  • KONTINYÉ NI IMILITÉ
  • KONTINYÉ VIN PIBON ZANMI ÈVÈ JÉOVA
  • LÉJENN, ZÒ PÉ NI ON VI KI BÈL
  • Poukwa fò-nou krenn Jéova ?
    Tou dè Gad la ka bay lavwa asi Wayòm a Jéova (pou étidyé) 2023
  • Jozyas enmé Lwa a Bondyé
    Sa an ka aprann grasa Labib
Tou dè Gad la ka bay lavwa asi Wayòm a Jéova (pou étidyé) 2023
w23 sèptanm p. 8-13

AWTIK POU ÉTIDYÉ 38

Léjenn, kijan zò ké menné vi a zòt ?

« Ou ké ni bon jijman é sa ké sové-w » (PWOV. 2:11).

KANTIK 135 Envitasyon plen lanmou a Jéova : « Gason an mwen, aji èvè sajès »

ON TI LIDÉ ASI SA NOU KAY VWÈa

1. Adan ki sitiyasyon difisil Joas, Ozyas é Jozyas touvé-yo ?

IMAJINÉ kè ou sé on jenn timoun é yo ka di-w kè sé vou ki ké wa a pèp a Bondyé, ka ou té’é rèsanti ? Kijan ou té’é sèvi èvè otorité-la ou ni la ? Labib ka palé dè plizyè jenn ki vin wa a Jida. Pa ègzanp, ni Joas ki té ni 7 an lè i vin wa, ni Ozyas ki vin wa a 16 an é Jozyas ki vin wa a 8 an. Mésyé, sé té on gwo rèsponsabilité ki té asi zépòl a yo ! Men menmsi sa pa té fasil, Jéova é dòt moun édé-yo toulétwa é yo rivé fè onlo bon biten.

2. Poukwa fò-nou entérésé-nou a ègzanp a Joas, Ozyas, é Jozyas ?

2 Menmsi nou pa wa oben rèn, ègzanp a sé 3 moun-lasa nou ka touvé adan Labib pé aprann-nou onlo biten. Yo pran dé bon désizyon men yo pran dé mové désizyon osi. Toupannan nou ké ègzaminé ègzanp a yo, nou ké vwè poukwa sa enpòwtan kè nou chwazi dé bon zanmi, kè nou kontinyé ni imilité é kè nou kontinyé vin pibon zanmi èvè Jéova.

CHWAZI DÉ BON ZANMI

On sè ki byen doubout adan lavérité ka ba on sè ki pi jenn ki-y on konsèy. Yo douvan on magazen é adan vit a magazen-la nou ka vwè on jip ki kout é on jip ki pi long.

Ou pé suiv ègzanp a Joas lèwvwè ou ni zanmi ki byen doubout adan lavérité é kè ou ka suiv konsèy a yo (gadé sé paragraf 3 é 7 la).c

3. Kijan Joad édé wa Joas pran désizyon ki plen sajès ?

3 Joas pran désizyon ki plen sajès : imité-y. Lèwvwè i té jenn, wa Joas pran on désizyon ki té plen sajès. I pa té ni papa, kifè i lésé Joad, on gran prèt ki té fidèl a Bondyé, gidé-y. Prèt-lasa lévé-y konsi sé té gason a-y. Grasa bèl ègzanp-la Joad ba-y la, Joas désidé sèvi Jéova é édé pèp-la sèvi Jéova osi. I jous fè ansòt pou yo réparé Tanp-la (2 Kron. 24:1, 2, 4, 13, 14).

4. Lèwvwè nou enmé komandman a Jéova é lè nou ka suiv-yo, ki byenfé sa ka pwokiré-nou ? (Pwovèb 2:1, 10-12).

4 Si sé fanmi a-w oben ondòt moun ki ka aprann-vou enmé Jéova é ki ka aprann-vou rèspèkté prensip a-y, ou sav, sé on bèl kado yo ka fè-w la (li Pwovèb 2:1, 10-12). Yo pé fòwmé-w diféran mannyè. Pou nou konprann sa, an-nou vwè ègzanp a Katya. Papa a sè-lasa té ka édé-y pran désizyon ki plen sajès. Touléjou, lèwvwè i té ka menné Katya lékòl, i té ka fè on ti kozé èvè-y asi tèks-di-jou-la. Mi sa Katya ka èspliké : « Grasa sé ti kozé-lasa, chakfwa an té ka jwenn on sitiyasyon ki té difisil an jouné-la, sa té ka édé-mwen pran bon désizyon. » Pétèt kè fanmi a-w ka sèvi èvè sé prensip-la ki an Bib-la pou ba-w on dirèksyon men kè ou ni lenprésyon kè sa ka anpéché-w fè sa ou vé. Ka ki pé édé-w obéyi ? On sè non a-y sé Anastasia té ka sonjé kè manman-y é pap’a-y té ka pran tan a yo pou èspliké-y poukwa yo té ka mèt sèwten règ anplas. Mi sa i konstaté : « Sa édé-mwen konprann kè lè yo té ka fè sa, sé té paskè yo té enmé-mwen é kè yo té vé pwotéjé-mwen men a pa té pou anpéché-mwen fè sa an vé. »

5. Kijan sa ou ké chwazi fè ké aji asi fanmi a-w é asi Jéova ? (Pwovèb 22:6 ; 23:15, 24, 25).

5 Manman-w é pap’a-w ka ba-w dé konsèy ki sòti an Bib-la é si ou ka suiv sé konsèy-lasa, ou ké fè tchè a yo kontan. Men pi enpòwtan ankò, Jéova ké kontan é ou ké vin pibon zanmi èvè-y (li Pwovèb 22:6 ; 23:15, 24, 25). Lè ou ka réfléchi asi sa, ès sa pa’a ba-w anvi fè menm biten ki sa Joas fè lèwvwè i té jenn ?

6. Ki konsèy Joas désidé kouté lèwvwè Joad mò, é ki rézilta sa bay ? (2 Kronik 24:17, 18).

6 Joas pran mové désizyon. Ka sa ka aprann-vou ? Lèwvwè Joad mò, sé zanmi-la Joas chwazi la fè-y fè dé mové biten (li 2 Kronik 24:17, 18). I désidé kouté sé prens a Jida la ki pa té enmé Jéova. Sèten ou ké dakò pou di kè konm sé moun-lasa té ka fè dé mové biten i pa té dwèt mélanjé-y èvè yo (Pwov. 1:10). Men olyé dè sa, i lésé sé zanmi-lasa détenn asi-y. É lèwvwè Zakari, kouzen a-y, éséyé fè-y rézonné, i fè-yo tchouyé-y (2 Kron. 24:20, 21 ; Mat. 23:35). Mésyé ! Mi on mové désizyon mi ! Vi a Joas té byen koumansé, men malérèzman i vin apòsta é i tchouyé moun. Anfinaldikont, sé moun ki té ka travay pou-y ki tchouyé-y (2 Kron. 24:22-25). Siwvwè Joas té kouté Jéova é si i té kouté moun ki té ka sèvi Jéova, tousa pa té’é rivé-y ! Ka ègzanp-lasa ka aprann-nou ?

7. Ki kalté zanmi pou ou chwazi ? (gadé imaj-la osi).

7 Sé mové désizyon-la Joas pran la ka montré-nou kè sa enpòwtan kè nou chwazi zanmi ki enmé Jéova é ki vé fè-y plézi. Zanmi konsa ké édé-nou fè bon biten. Men nou pa oblijé ni zanmi ki ni menm laj ki nou. Joas té lontan pli piti ki Joad, men sa pa anpéché-yo vin bon bon zanmi. Alò, lè ou ka sonjé zanmi a-w, mi sa pou-w mandé-w : « Èskè zanmi an mwen ka édé-mwen konsolidé fwa an mwen ? Ès yo ka ankourajé-mwen pou mwen pé sa rèspèkté prensip a Jéova ? Ès yo enmé palé dè Jéova é dè sé bèl vérité-la ki an Bib-la ? Ès yo ka rèspèkté prensip a Jéova ? Ès yo toujou ka di-mwen sa an anvi tann oben ès yo ka pran kouraj a yo a 2 men pou ban-mwen on bon konsèy lè sa nésésè ? » (Pwov. 27:5, 6, 17). Konfèdmanti, si zanmi a-w pa enmé Jéova, ou pa bizwen-yo. Pawkont, si zanmi a-w enmé Jéova, pa lagé-yo ; sé dé bon zanmi pou-w (Pwov. 13:20).

8. Si nou ka sèvi èvè sé rézo sosyo la, ki kèsyon fò-nou pozé-nou ?

8 Grasa sé rézo sosyo la, nou pé kontinyé palé èvè fanmi an nou é zanmi an nou menmsi yo pa toupré an nou. Men ni onlo moun ki ka sèvi èvè sa pou fè moun vwè-yo. Yo ka mèt foto oben vidéo a biten yo achté oben a biten yo ka fè. Si ou ka sèvi èvè sé rézo sosyo la, mi sa pou mandé-w : « Ès an ka chèché a fè moun vwè-mwen ? Èskè sa an vlé sé ankourajé lézòt oben ès an ka chèché a fè-yo pòté-mwen anlè ? Ès an ka lésé dòt moun ki ka mal sèvi èvè sé zouti-lasa détenn asi mwen, kivédi asi sa an ka pansé, asi sa an ka di é asi sa an ka fè ? » Mi konsèy-lasa frè Nathan Knorr, ki té ka fè pawti a Komité santral la, bay : « Pa éséyé fè moun plézi. Pas rivé onlè, zò pé’é fè ponmoun plézi. Fè Jéova plézi, é zò ké fè toutmoun ki enmé-y plézi. »

KONTINYÉ NI IMILITÉ

9. Ka Jéova édé Ozyas fè ? (2 Kronik 26:1-5).

9 Ozyas pran désizyon ki plen sajès : imité-y. Lèwvwè i té jenn, wa Ozyas té ni imilité. I té aprann « krenn vré Dyé-la ». I viv 68 lanné é prèstout vi a-y Jéova béni-y (li 2 Kronik 26:1-5). Ozyas goumé èvè onlo nasyon ki té lènmi èvè-y, i gangné-yo é i fè ansòt pou Jérizalèm té byen pwotéjé (2 Kron. 26:6-15). Lè i té ka vwè tousa Jéova té ka édé-y fè, sèten i dwèt té ni tchè-kontan (Ékl. 3:12, 13).

10. Ka ki rivé Ozyas ?

10 Ozyas pran mové désizyon. Ka sa ka aprann-vou ? Konm Ozyas sé té on wa, i té abityé vwè moun obéyi-y. Alò pétèt sa fè-y mèt an tèt a-y kè i pé fè tousa i vé. Antouka on jou, Ozyas aji èvè òwgèy lèwvwè i désidé ay an tanp a Jéova pou brilé lansan asi lotèl-la alòskè i pa té andwa fè sa. Dayè pon wa pa té ni dwa fè sa (2 Kron. 26:16-18). Alò gran prèt-la Azaryas éséyé arété-y men Ozyas pa pran sa é i fè gwo kòlè. Ou ka imajiné-w, Ozyas rété onpakèt lanné ka sèvi Jéova, men aprésa, i mal aji é Jéova pini-y. I vin ni lalèp (2 Kron. 26:19-21). Tousa pa té’é jen rivé Ozyas siwvwè i té kontinyé aji èvè imilité !

On séri imaj : 1) Pannan on lasanblé a siwkonskripsyon, on sè ka priyé avan i monté asi èstrad-la. 2) I èvè ondòt sè é on frè ka pozé-yo déotwa ti kèsyon. 3) An fen a lasanblé-la yo ka vin félisité-y é i ka ba Jéova tout glwa-la.

Olyé nou bat lèstonmak an nou parapòt a sa nou ka rivé fè, an-nou ba Jéova tout glwa-la (gadé paragraf 11 la).d

11. Ka ki ké édé-nou pou nou kontinyé aji èvè imilité ? (gadé imaj-la osi).

11 Lèwvwè Ozyas vin puisan, i oubliyé kè sé Jéova ki té ba-y tout fòs-la i té ni la é tout sé richès-la i té ni la. Ka sa ka aprann-nou ? Fò pa nou jen oubliyé kè tout sé bénédisyon-la é tout sé rèsponsabilité-la nou ni la, sé Jéova ki ban-nou sa. Alò, lè nou rivé fè on biten, olyé nou bat lèstonmak an nou, an-nou ba Jéova tout glwa-lab (1 Kor. 4:7). An-nou aji èvè imilité é an-nou rèkonnèt kè nou sé dé moun ki enpawfè é kè nou bizwen yo korijé-nou. Mi sa on frè ki ni plis ki 60 an maké : « Lèwvwè an ka fè on érè è kè lézòt ka di’an sa, alèla an pa’a fè kòlè pou sa ankò é an pa’a lésé sa dékourajé-mwen. É lè on moun ka korijé-mwen, an ka woupran doubout an mwen é an ka kontinyé fè douvan. » An réyalité, siwvwè nou ka krenn Jéova é kè nou ka kontinyé aji èvè imilité, tout biten ké pasé byen ban nou (Pwov. 22:4).

KONTINYÉ VIN PIBON ZANMI ÈVÈ JÉOVA

12. Lèwvwè Jozyas té jenn, kijan i montré kè i té ka chèché Jéova ? (2 Kronik 34:1-3).

12 Jozyas pran désizyon ki plen sajès : imité-y. Jozyas té ni 16 an lèwvwè i koumansé chèché Jéova. I té anvi aprann konnèt-li pibyen é fè volonté a-y. Men lèwvwè i té jenn, a pa toutlè sa té fasil pou wa-lasa. Lamajorité a sé Izraélit-la té ka adoré fo-dyé, alò fò Jozyas té ni kouraj pou i té fè-yo lagé sa. Ès Jozyas té ni asé kouraj ? Wi ! Jozyas po’o menm té ni 20 an lèwvwè i koumansé travay pou fè fo adorasyon-la disparèt adan nasyon-la (li 2 Kronik 34:1-3).

13. Siwvwè ou ka ba Jéova vi a-w, kijan sa ké aji asi tout rèstan a vi a-w ?

13 Menmsi ou jenn, vou osi ou pé imité Jozyas siwvwè ou ka aprann plis biten asi Jéova é asi bèl kalité a-y. Si ou ka fè sa, sa ké ba-w anvi ba Jéova vi a-w. É lè ou ké ba Jéova vi a-w, ka sa ké chanjé ba-w ? An-nou vwè ègzanp a Luke. Sé on jenn ki pran lèbatèm lèwvwè i té ni 14 an. Mi sa i ka di : « Dépi jou-la an ba Jéova vi an mwen la, an désidé mèt Jéova prèmyé douvan an vi an mwen é an désidé kè an té’é fè tousa an pé pou mwen pé sa fè-y plézi » (Mawk 12:30). Si vou osi sé sa ou anvi fè, ou pé sèten kè ou ké ni tchè-kontan tout vi a-w !

14. Kijan Johan é Rachel ka imité wa Jozyas ?

14 Ki kalté difikilté sèwten jenn ki ka sèvi Jéova ka jwenn ? Johan pran lèbatèm lèwvwè i té ni 12 an. I ka èspliké kè kanmarad-lékòl a-y ka mèt présyon asi-y pou i sèvi èvè sigarèt élèktronik pou i fimé. Lèwvwè sa ka rivé, i ka sonjé kè lè on moun ka fè sa, sa pa bon pou santé a-y é kè moun-lasa pé pa rété bon zanmi èvè Jéova. Konsa, sa ka ba-y fòs pou tantasyon-la pa pran lanmen asi-y. Rachel pran lèbatèm lèwvwè i té ni 14 an. I ka èspliké ka ki ka édé-y lèwvwè i ka jwenn difikilté adan lékòl a-y. Mi sa i ka di : « An toujou ka lyanné sa an ka aprann lékòl èvè sa an ka vwè adan Labib. Pa ègzanp, lè nou an istwa, délè sa nou ka vwè ka fan’an sonjé on istwa oben on pwofési ki an Bib-la. Oben délè pannan an ka palé èvè on moun an lékòl an mwen, on vèwsé ka vin an lèspri an mwen é an ka di-mwen kè an té’é pé montré-y vèwsé-lasa. » Pétèt ou pa ni menm difikilté ki wa Jozyas men menmjan ki-y, ou pé aji èvè sajès é ou pé montré-w fidèl. Éfò ou ka fè pou ou rivé about a sé éprèv-la ou ka jwenn la jòdila pé préparé-w pou séla ou ké jwenn la plita.

15. Ka ki ankourajé Jozyas fè sa ki byen ? (2 Kronik 34:14, 18-21).

15 Lè wa Jozyas vin ni 26 an, i koumansé ranjé Tanp-la pou fè-y vin nèf. Pannan sé travo-la, yo touvé ‘liv a Lwa a Jéova kè Jéova té ba Moyiz pou pèp-la’. Lèwvwè wa-la tann sa liv-lasa té ka di, i fè chanjman tousuit pou i té pé sa apliké sa ki té maké adan Lwa-la (li 2 Kronik 34:14, 18-21). Ès ou té’é byen enmé li Labib chakjou ? Si sé sa ou ja ka fè, ès ou enmé fè sa ? Lè ou ka touvé déotwa vèwsé ki itil ba-w, ka ou ka fè pou-w sonjé-yo ? Talè la nou palé dè Luke, é mi sa i ka fè lè i ka li Labib. I ka maké sé lidé-la i ka touvé entérésan la adan on ti kawné. Ès ou té’é pé fè on biten konsa pou ou pé sa sonjé sé vèwsé-la oben sé lidé-la ki touché-w la ? Pi ou ké aprann konnèt Labib é kè ou ké enmé-y, pi ou ké anvi sèvi Jéova. É menmjan Pawòl a Bondyé édé Jozyas fè sa ki byen, sé menmjan-la osi i ké édé-w fè sa ki byen.

16. Poukwa Jozyas fè on gwo érè, é ka sa ka aprann-nou ?

16 Jozyas pran mové désizyon. Ka sa ka aprann-vou ? Lè Jozyas té ni 39 an apépré, i fè on gwo érè é i pèd vi a-y akòz dè sa. Olyé i té mandé Jéova ka pou i té fè, i suiv pwòp lidé a-y (2 Kron. 35:20-25). Ka sa ka aprann-nou ? Ki nou jenn, ki nou ja ni on bèl laj é kèlkèswa kantité tan nou ka étidyé Labib, fò-nou toujou chèché a sav ka Jéova ka pansé adan tèl oben tèl sitiyasyon. Pou nou rivé fè sa, fò-nou mandé-y gidonné-nou, fò-nou étidyé Pawòl a-y é fò-nou ay chèché konsèy owa frè é sè ki byen doubout adan lavérité. Konsa nou ké pi fasil a maché dwèt ki a fè chimen kochi é nou ké rivé a ni tchè-kontan pli fasilman (Jak 1:25).

LÉJENN, ZÒ PÉ NI ON VI KI BÈL

17. Ka istwa a vi a wa Joas, Ozyas é Jozyas pé aprann-nou ?

17 Ni onlo biten entérésan ou pé fè pannan ou jenn. Istwa a vi a Joas, a Ozyas é a Jozyas ka montré kè sé jenn-la pé pran bon désizyon é kè yo pé viv on mannyè ki ka fè Jéova plézi. Sé vré, sé jenn-lasa fè sèwten érè é sa menné mové biten ba yo. Men si nou ka imité sé bon biten-la yo fè la è kè nou pa’a fè sé érè-la yo fè la, nou ké pé ni on vi ki bèl.

David on koté yo ka fè lagè é i ka sèvi èvè on sòt dè jèspòm pou voyé on wòch asi Golyat.

Lèwvwè i té jenn, David té bon bon zanmi èvè Jéova. I té ka fè Jéova plézi é vi a-y té bèl toubònman (gadé paragraf 18 la).

18. Ki ègzanp adan Labib ka montré kè ou pé ni tchè-kontan tout vi a-w ? (gadé imaj-la osi).

18 Adan Labib, nou ka touvé ègzanp a dòt jenn ki té bon bon zanmi èvè Jéova. Yo fè-y plézi é vi a yo té bèl toubònman. Pawmi yo té ni David. Lèwvwè i té jenn, i désidé kè i ké adoré Jéova é plita lèwvwè i vin wa, i rété fidèl a-y. Sé vré kè David fè érè, men magrésa pou Jéova sé té on moun ki té fidèl (1 Wa 3:6 ; 9:4, 5 ; 14:8). Si ou ka pran tan étidyé istwa a vi a David, sa ké ankourajé-w pou-w rété fidèl a Jéova. Ou pé étidyé ègzanp a Mawk oben ègzanp a Timoté osi. Ou ké rann-vou kont kè lèwvwè yo koumansé sèvi Jéova, yo té tou jenn é yo kontinyé rété fidèl a-y. Konm sé sa yo désidé fè, Jéova té kontan yo é yo osi yo té ni tchè-kontan.

19. Ki jan dè vi ou pé ni ?

19 Jan ou ka viv vi a-w jòdila ké aji asi jan vi a-w ké yé dèmen. Si ou ka fèfon asi Jéova olyé ou fè sa lidé a-w ka di-w, i ké édé-w pran désizyon ki plen sajès (Pwov. 20:24). Ou pé ni on vi ki bèl é ou pé fè onlo bèl biten. Toujou sonjé kè Jéova ka ba sa ou ka fè ba-y onlo valè. Pli bèl biten ou pé fè adan vi a-w sé sèvi Jéova, Pap’an nou ki plen lanmou.

KA ISTWA A SÉ WA-LASA PÉ APRANN-VOU :

  • wa Joas ?

  • wa Ozyas ?

  • wa Jozyas ?

KANTIK 144 Rété konsantré si pri-la !

a Léjenn, Jéova sav kè zò ka jwenn difikilté é i sav osi kè zò pé ni dimal a fè sa ki byen é a rété zanmi èvè-y. Men ka zò pé fè pou pran désizyon ki ké fè Pap’a zòt ki an syèl-la plézi ? Nou ké ègzaminé ègzanp a 3 tigason ki vin wa a Jida. Zò ké vwè ki désizyon sé jenn-lasa pran é ka sé désizyon-la yo pran la pé aprann-zòt.

b Gadé ti karé-la « Attention à la fausse modestie » adan awtik-la « Être vu sur les réseaux sociaux : est-ce important ? » ki asi jw.org.

c SA NOU KA VWÈ ASI IMAJ-LA : On sè ki byen doubout adan lavérité ka ba on sè ki pi jenn ki-y on konsèy.

d SA NOU KA VWÈ ASI IMAJ-LA : On sè ki kay pawtisipé adan on lasanblé ka fèfon asi Jéova é i ka ba Jéova glwa.

    Piblikasyon an kréyòl Gwadloup (2015-2025)
    Dékonèkté-w
    Konèkté-w
    • Kréyòl Gwadloup
    • Pawtajé
    • Sa ou préféré
    • Copyright © 2025 Watch Tower Bible and Tract Society of Pennsylvania
    • Règ pou itilizé sit-la
    • Règ asi sa ki konfidansyèl
    • Réglaj pou sa ki konfidansyèl
    • JW.ORG
    • Konèkté-w
    Pawtajé