Ou pé sèten Jéova ké édé-w lèwvwè biten-la ké vin rèd

1-2. a) Poukwa nou pé di kè nou ka jwenn difikilté ki ka sanm séla sé Juif-la ki viré Jérizalèm la jwenn ? b) Ki difikilté sé Juif-la jwenn ? (gadé chéma-la ki ka montré adan ki lòd sé évènman-la fèt, tèm a-y sé « Évènman ki fèt an tan a Ajé, Zakari é Èsdras »).

ÈS DÉLÈ ou ka mandé-w ka dèmen ké pòté é ou ka santi-w istrésé parapòt a sa ? Pétèt ou pèd travay a-w é ou ka mandé-w kijan ou ké pé ba fanmi a-w on dèkwa. Oben pétèt kè ou pè kè on biten rivé fanmi a-w pas adan péyi-la ou ka viv la ni boulvès, pas yo ka pèwsékité-nou oben pas yo ka mèt baton an wou an nou pou anpéché-nou préché. Si sé sa ou ka rèsanti, awtik-lasa ké édé-w onlo toubònman pas i ka montré kijan Jéova édé sé Juif-la an tan lontan lèwvwè yo jwenn sé kalté sitiyasyon-lasa.

² Sé Juif-la ki viv tout vi a yo Babilòn té ka viv alèz a yo koté-lasa. Alò pou yo té sòti koté-lasa pou ay adan on péyi yo pa gè té konnèt, fò-yo té ni onlo fwa. Lèwvwè yo rivé, adan on ti moman yo koumansé jwenn bon difikilté. Pou yo té ba fanmi a yo on dèkwa, sa pa té senp. Sé nasyon-la ki té ka viv alantou a yo la té ka mèt baton an wou a yo. Anplisdisa, té ni enpé pwoblèm adan tout sé téritwa-la ki té anba dominasyon a sé Pèws-la é péyi a sé Juif-la té adan sé téritwa-lasa. Pannan té ni tout sé pwoblèm-lasa, fò sé Juif-la té woukonstwi tanp a Jéova, kifè ni sèwten adan yo ki té ni dimal a mèt travay-lasa prèmyé douvan adan vi a yo. Sé pousa owa lanné 520 avan épòk an nou, Jéova voyé 2 pwofèt, Ajé é Zakari, pou édé sé Juif-la woupran fòs (Ajé 1:1 ; Zak. 1:1). Kon nou ké vwè-y, sé pwofèt-lasa ba-yo balan toubònman. Men malérèzman apépré 50 lanné apré, yo pa té ni fòs pou yo té kontinyé travay-la ankò. Alò Èsdras, on nonm travay a-y sé té kopyé Lwa-la é ki té ka fè travay-lasa byen sòti Babilòn pou vin Jérizalèm. I té vin pou ankourajé sé Juif-la pou yo té mèt vré adorasyon-la prèmyé douvan adan vi a yo (Èsdr. 7:1, 6).

3. A ki kèsyon nou ké réponn ? (Pwovèb 22:19).

³ Pwofési a Ajé é Zakari édé sèwvitè a Jéova ki viv an tan lontan kontinyé fè Jéova konfyans lèwvwè yo té ka pèwsékité-yo, é sé pwofési-lasa pé édé-nou kontinyé fè Jéova konfyans osi kèlkèswa difikilté nou té’é pé jwenn adan vi an nou (li Pwovèb 22:19). Adan awtik-lasa nou ké vwè ki mésaj Jéova ba Ajé é Zakari pou sé Juif-la é nou ké vwè ègzanp a Èsdras. An menm balan-la nou ké réponn a sé kèsyon-lasa : Kijan sé pwoblèm-lasa aji asi sé Juif-la ? Menmsi nou ka jwenn difikilté, poukwa fò-nou kontinyé mèt Jéova prèmyé douvan adan vi an nou ? É lèwvwè nou anba difikilté, kijan nou pé fè ansòt pou nou fè Jéova konfyans plis ankò ?

YO PÈD BALAN A YO AKÒZ DÈ PWOBLÈM YO JWENN

4-5. Pétèt poukwa sé Juif-la pa té ni balan pou woukonstwi Tanp-la kon avan ?

⁴ Lèwvwè sé Juif-la ki té ka viré an péyi a yo rivé Jérizalèm, yo té ni onlo travay a fè. San pèd tan, yo woukonstwi lotèl a Jéova é yo fè fondasyon a Tanp-la (Èsdr. 3:1-3, 10). Men on ti moman apré, yo pèd tout balan-la yo té ni la. Poukwa ? Pas non sèlman fò-yo té woukonstwi Tanp-la men fò-yo té konstwi kaz a yo osi, fò-yo té travay tè a yo é simé grenn adan é fò-yo té ba fanmi a yo manjé (Èsdr. 2:68, 70). Anplisdisa, lènmi a yo té ka mèt baton an wou a yo. Yo té ka monté konplo pou fè-yo arété konstwi Tanp-la (Èsdr. 4:1-5).

⁵ Ondòt biten ankò, sé kè pou sé Juif-la ki té viré Jérizalèm la té pé sa ni sa yo té bizwen pou viv, a pa té on ti afè. Yo té anba dominasyon a sé Pèws-la, é an tan-lasa, adan sé téritwa-lasa té ni onlo boulvès. Apré kè wa Siris mò, an 530 avan épòk an nou, Kanbiz, moun-la ki pran plas a-y la, rantré an lagè èvè Léjipt. Konm sòlda a Kanbiz pasé pa téritwa a sé Juif-la, pétèt yo mandé sé Juif-la pou yo té ba-yo bwè é manjé é on koté pou yo té pozé kò a yo. Nou ka tou konprann kè sitiyasyon-la vin pi rèd pou sé Juif-la ankò. Aprésa, Dariyis 1^é pran plas a Kanbiz, é li osi anba dominasyon a-y, sé moun-la té ka voyé labou é té ni boulvès. Sé pousa, onlo adan sé Juif-la té enkyèt é yo té ka mandé-yo kijan yo té’é pé ba fanmi a yo sa yo bizwen pou viv. Konm yo pa té sav ka ki té’é pasé dèmen, ni onlo adan yo ki té ka pansé kè a pa té bon moman-la pou yo té woukonstwi Tanp a Jéova (Ajé 1:2).

6. Dapré Zakari 4:6, 7, ki dòt difikilté sé Juif-la jwenn é ki garanti Zakari ba-yo ?

⁶ (Li Zakari 4:6, 7.) Biten-la té rèd toubònman pou sé Juif-la : yo té ni dimal a ni on dèkwa, anplisdisa té ni onlo boulvès adan téritwa a yo é yo té ka pèwsékité-yo bon pèwsékité la. An 522 avan épòk an nou, lènmi a yo rivé fè gouvènman a Lapèws entèwdi sé Juif-la woukonstwi Tanp-la. Men Zakari ba-yo on garanti, i di-yo kè Jéova té’é sèvi èvè lèspri sen a-y pou woté tousa ki té’é pé frenné-yo. An 520 avan épòk an nou wa Dariyis ba-yo dwa kontinyé travay-la yo té ka fè la pou konstwi Tanp-la é i ba-yo lajan pou yo té kontinyé fè sa. I jous mandé sèwten moun ki té ni on otorité adan wayòm a-y ba-yo on pal adan travay-lasa (Èsdr. 6:1, 6-10).

7. Sé Juif-la ki viré adan péyi a yo mèt travay-la Jéova té ba-yo fè la prèmyé douvan adan vi a yo. Ki bénédisyon yo risivwè ?

⁷ Jéova sèvi èvè Ajé é Zakari pou pwomèt pèp a-y kè siwvwè yo té ka woukonstwi Tanp a-y é si yo té ka mèt travay-lasa prèmyé douvan adan vi a yo, i té’é soutyenn-yo. Yo fè Jéova pasé an prèmyé adan vi a yo (Ajé 1:8, 13, 14 ; Zak. 1:3, 16). Sé pwofèt-la ankourajé pèp-la, kifè, yo woukoumansé travay an 520 avan épòk an nou é yo fin konstwi Tanp-la an mwens ki 5 lanné. Magré tout sé difikilté-la yo té ka jwenn la, yo mèt travay-la Jéova té ba-yo fè la prèmyé douvan adan vi a yo. Kifè, Jéova soutyenn-yo, i ba-yo tousa yo té bizwen pou viv é i édé-yo rété bon bon zanmi èvè-y. Ki rézilta sa bay ? Alèla, yo té pé adoré Bondyé èvè tchè-kontan (Èsdr. 6:14-16, 22).

RÉTÉ KONSANTRÉ ASI SA JÉOVA KA MANDÉ-W FÈ

8. Kijan sa Ajé 2:4 ka di pé édé-nou rété konsantré asi sa Jéova ka mandé-nou fè ? (gadé nòt-la osi).

⁸ Gwo tribilasyon-la toupré rivé. Alò sa enpòwtan kè nou préché kon Jéova mandé-nou fè-y (Mawk 13:10). Men pétèt nou ni dimal a mèt prédikasyon-la prèmyé douvan adan vi an nou, pas nou ni pwoblèm a lajan oben pas yo ka mèt baton an wou an nou pou anpéché-nou préché. Ka ki pé édé-nou mèt Wayòm-la prèmyé douvan adan vi an nou ? Fò-nou sèten kè « Jéova, Chèf a sé lawmé-lab » èvè nou. I ké soutyenn-nou si nou ka kontinyé fè entéré a Wayòm-la pasé avan tan nou. Nou pa bizwen pè (li Ajé 2:4).

9-10. Kijan on frè é madanm a-y vwè kè sé pawòl-la Jézi di la an Matyé 6:33 sé lavérité ?

⁹ An-nou pran ègzanp a on frè é madanm a-y non a yo sé Oleg é Irinac. Yo toulédé pyonyé. Yo ay viv adan ondòt réjyon pou soutyenn on lasanblé men lèwgadé, konm té ni pwoblèm a lajan adan péyi-la, yo pèd travay a yo. Pannan on lanné yo té ka touvé dé ti travay men sé té pou on ti moman. Sèlman yo toujou vwè men a Jéova adan vi a yo é chakfwa Jéova té ka soutyenn-yo èvè onlo lanmou. Anplisdisa, dè tanzantan frè é sè a yo té ka édé-yo. Odépa Oleg té ni lenprésyon kè i té anba dlo men i èspliké kè menmsi li é madanm a-y pa té sav ka dèmen té’é pòté, yo pa arété fè Jéova konfyans. Mi sa i ka di : « Lèfètkè nou té ka pasé onlo onlo tan adan travay a prédikasyon-la, sa édé-nou rété konsantré asi sa ki pi enpòwtan adan lavi. » Toupannan yo té ka kontinyé chèché on travay, Oleg é Irina rété byen konsantré asi travay a prédikasyon-la.

¹⁰ On jou Oleg é madanm a-y té fin préché é lèwvwè yo rantré akaz a yo, yo vin sav kè on bon zanmi a yo té fè 160 km pou pòté 2 sak ki té plen konmisyon ba yo. Mi sa Oleg ka di : « Jou-lasa, nou vwè ondòt fwa ankò jan Jéova é lasanblé-la ka pran swen an nou. Jéova pa ka oubliyé sèwvitè a-y menmsi yo pé ni lenprésyon kè pwoblèm a yo pa ni pon solisyon. Nou pa ni pon dout asi sa ! » (Mat. 6:33).

11. Si nou ka rété konsantré asi travay-la Jéova ban-nou fè la, dè ki biten nou pé sèten ?

¹¹ Jéova vé kè nou édé moun vin disip a Kris é i vé kè nou mèt travay-lasa prèmyé douvan adan vi an nou pas sé sa ki pé sové vi a moun. Kon nou vwè-y adan paragraf 7 la, Ajé ankourajé pèp a Bondyé pou yo té pé sa koumansé travay-la yo té ni a fè la asi Tanp a Jéova. É Jéova té pwomèt-yo kè siwvwè yo té ka fè sa, i té’é béni-yo (Ajé 2:18, 19). Nou osi, nou pé sèten kè Jéova ké béni tout éfò nou ka fè si nou ka rété konsantré asi travay-la i ban-nou fè la.

KA OU PÉ FÈ POU-W FÈ JÉOVA KONFYANS PLIS ANKÒ ?

12. Poukwa Èsdras é sé Juif-la ki té èvè-y la té bizwen ni onlo fwa ?

¹² An 468 avan épòk an nou, Èsdras vwayajé èvè dòt Juif ki té sòti Babilòn pou ay Jérizalèm. Pou yo té fè vwayaj-lasa, fò-yo té ni fwa toubònman. Fò-yo té pasé asi dé chimen ki té danjéré toubònman alòskè yo té ka chayé sé ofrann-la yo té ba-yo pou Tanp-la. Té ni onlo onlo lò é onlo onlo awjan osi. Sé vòlè-la té pé ataké-yo a nenpòt ki moman (Èsdr. 7:12-16 ; 8:31). Anplisdisa, lèwvwè yo rivé Jérizalèm, yo rann-yo kont kè yo pa té ansékirité nonplis. Pa té ni onlo moun adan vil-la, é sé miray-la é sé pòt-la té mérité yo réparé-yo. Kijan ègzanp a Èsdras pé édé-nou fè Jéova konfyans plis ankò ?

13. Ka ki édé Èsdras fè Jéova konfyans plis ankò ? (gadé nòt-la osi).

¹³ Èsdras té ja vwè jan Jéova soutyenn sèwvitè a-y lèwvwè yo té anba éprèv. Kèlkè lanné avan, an 484 avan épòk an nou, wa Asiyéris fè on lwa pou yo té tchouyé tout sé Juif-la ki té ka viv anba dominasyon a Lapèws. Lè i fè sa, Èsdras dwèt té ka viv Babilòn (Èstè 3:7, 13-15). A moman-lasa vi a Èsdras é ta tout sé Juif-la té andanjé. Lèwvwè yo tann palé dè lwa-lasa, tèlman sa chouboulé-yo, yo arété manjé é sèten yo mèt-yo ka priyé Jéova pou mandé-y édé-yo. Toupannan yo té ka priyé Jéova, dlo té ka sòti an zyé a yo (Èstè 4:3). Ou ka imajiné sa Èsdras é sélézòt Juif-la dwèt rèsanti lèwvwè yo rann-yo kont kè olyé sé yo yo tchouyé, sé sé moun-la ki té monté konplo kont yo la yo tchouyé ! (Èstè 9:1, 2). Sèten sa Èsdras viv a épòk-lasa dwèt préparé-y pou sé éprèv-la ki té ka vin la é i té pi sèten ankò kè Jéova té’é pé pwotéjé sèwvitè a-yd.

14. Lè on sè touvé-y an difikilté, Jéova fè on biten pou édé-y. Ka sa aprann-li ?

¹⁴ Lèwvwè nou an détrès é kè nou ka vwè kijan Jéova ka mèt men a-y pou édé-nou, nou ka fè-y konfyans plis ankò. An-nou pran ègzanp a on sè non a-y sé Anastassia. I ka viv an Éwòp dè Lès. I lagé travay a-y pou i pa té pran pawti adan zafè a politik. Mi sa i ka di : « An té razè razè razè. Sé prèmyé fwa sa té ka rivé-mwen. » Mi sa i ka di ankò : « An palé Jéova dè sitiyasyon an mwen é an vwè kijan i pran swen an mwen èvè onlo tandrès. Siwvwè on jou an pa ni travay ankò, an pé’é pè. Si jòdijou Pap’an mwen ki an syèl-la ka pran swen an mwen, a pa dèmen i pé’é fè-y. »

15. Ka ki édé Èsdras pou i kontinyé fè Jéova konfyans ? (Èsdr. 7:27, 28).

¹⁵ Èsdras té ka vwè sa Jéova té ka fè pou édé-y. Lè Èsdras té ka sonjé tout sé fwa-la Jéova vin a sèkou a-y, sèten sa édé-y kontinyé fè Jéova konfyans. Dayè, mi sa i konstaté : « Jéova Bondyé an mwen té èvè mwen » (li Èsdras 7:27, 28). Nou ka touvé 5 èksprésyon ki ka sanm tala adan liv-la i maké la (Èsdr. 7:6, 9 ; 8:18, 22, 31).

16. Adan ki sitiyasyon nou pé vwè men a Jéova on mannyè ki klè ? (gadé imaj-la osi).

¹⁶ Lè nou ka jwenn difikilté, Jéova pé édé-nou. Pa ègzanp, lèwvwè nou ka mandé patron an nou ban-nou jou konjé pou nou ay adan on lasanblé oben chanjé lè a travay an nou pou nou ay adan tout réinyon an nou, nou pé vwè kijan Jéova ka édé-nou on mannyè ki klè. Pétèt kè nou ké konstaté kè Jéova fè plis ki sa nou té ka atann. Alò nou ké fè Jéova konfyans plis ankò.

17. Lèwvwè Èsdras jwenn difikilté, kijan i montré kè i té ni imilité ? (gadé imaj-la ki anlè po a jounal-la).

¹⁷ Èvè onlo imilité, Èsdras té ka mandé Jéova édé-y. Lèwvwè Èsdras té ka santi kè i té ka néyé anba tout sé rèsponsabilité-la i té ni la, i té ka wouvè tchè a-y ba Jéova èvè onlo imilité (Èsdr. 8:21-23 ; 9:3-5). Konm i té ka aji konsa, sa té ka ba lézòt gou pou yo té soutyenn-li é pou yo té imité fwa a-y (Èsdr. 10:1-4). Délè nou pé angwasé bon angwasé la pas nou ka mandé-nou si nou ké pé ba fanmi an nou on dèkwa oben si ayen pé ké rivé-yo. Lè sa ka rivé-nou, an-nou priyé Jéova èvè tout tchè an nou é an-nou fèfon asi-y.

18. Ka ki ké édé-nou fè Jéova konfyans plis ankò ?

¹⁸ Nou ké fè Jéova konfyans plis ankò si nou ka mandé-y édé-nou èvè onlo imilité é si nou ka lésé frè é sè an nou édé-nou osi. Erika sé on manman ki ka lévé 3 timoun. I sav tout soufè on moun ka soufè lèwvwè i pèd on moun i enmé. Adan on ti moman, i pèd timoun-la ki té an vant a-y la é mari a-y mò. Men magrésa, i pa jen arété fè Jéova konfyans. Lè i ka sonjé sa ki pasé, mi sa i ka di : « Ou pa jen sav kijan Jéova ké édé-w. Délè i ka fè dé biten ou pa té’é jen imajiné. An rann-mwen kont kè souvantfwa Jéova té ka sèvi èvè zanmi an mwen pou i té réponn a priyè an mwen. Lè yo té ka di oben fè sèwten biten, an té sèten kè sé Jéova ki té réponn a priyè an mwen. Si ou ka wouvè tchè a-w ba zanmi a-w, yo ké pé édé-w pi fasilman. »

FÈ JÉOVA KONFYANS JOUSTAN LAFEN RIVÉ

19-20. Ka ègzanp a sé Juif-la ki pa té pé viré Jérizalèm la ka aprann-nou ?

¹⁹ Ni onlo Juif ki pa viré Jérizalèm men ègzanp a yo pé aprann-nou onlo biten. Ni sèwten adan yo ki pa té pé viré Jérizalèm davwa yo té ja ni on bèl laj oben davwa yo té malad bon malad la oben konm fò-yo té okipé-yo dè fanmi a yo, yo pa té pé wouviré an péyi a yo. Men yo té kontan ba sé moun-la ki té viré Jérizalèm la sa yo té’é bizwen pou tanp-la. Konsa, menmsi yo pa té pé ay Jérizalèm, yo té ka soutyenn-yo (Èsdr. 1:5, 6). É i ka sanm sa kè 19 an apré sé prèmyé Juif-la té viré Jérizalèm, sé moun-la ki té rété Babilòn la té ka kontinyé voyé biten Jérizalèm toujou (Zak. 6:10).

²⁰ Menmsi nou pé pa fè tousa nou té’é anvi fè pou Jéova, nou pé sèten kè Jéova ka ba tout ti éfò nou ka fè pou fè-y plézi onlo valè. Kijan nou pé sèten dè sa ? Jéova mandé Zakari fè on kouwòn èvè lò-la é awjan-la sé Juif-la ki té rété Babilòn la té ba-yo la (Zak. 6:11). Fò bèl ti kouwòn-lasa té rété adan Tanp a Jéova pou moun pa jen oubliyé jan sé Juif-lasa té donan lè yo fè sé bèl ti ofrann-lasa (Zak. 6:14, nòt). Nou pé sèten dè on biten : Jéova pé’é jen oubliyé éfò nou ka fè èvè tout tchè an nou pou sèvi-y magré nou pa sav ka ki ké fèt dèmen é ki difikilté nou pé rivé a jwenn (Ébr. 6:10).

21. Nou pa sav ka dèmen ké pòté men nou pé fè Jéova konfyans kèlkèswa sa ki té’é pé rivé-nou. Poukwa nou ka di sa ?

²¹ Konm nou ka viv pannan sé dènyé jou-la, nou ka jwenn bon difikilté é nou ké jwenn difikilté ki ké pi rèd ki sa ankò. Fò-nou atann-nou a sa pas sitiyasyon-la dwèt ké vin pi mové. Men menmsi sa ka enkyété-nou, fò pa nou lésé sa pran lanmen asi nou. An-nou toujou sonjé sa Jéova té di sèwvitè a-y an tan a Ajé : « An la èvè zòt […]. Pa pè ! » (Ajé 2:4, 5). Nou osi nou pé sèten kè Jéova ké èvè nou dépi nou ka fè tousa nou pé pou fè volonté a-y. Siwvwè nou ka apliké sa nou aprann adan pwofési a Ajé é adan ta Zakari é siwvwè nou ka suiv ègzanp a Èsdras, nou ké kontinyé fè Jéova konfyans menmsi nou pa sav ka dèmen ké pòté.