Ka ki pé édé-w lèwvwè ou ni sèwten dout an tèt a-w ?

1-2. a) Ki dout sèwvitè a Jéova pé ni an tèt a yo ? b) Ka nou ké vwè adan awtik-lasa ?

KI NOU jenn ki nou ja ni on bèl laj, nou pé rivé a ni douta an tèt an nou. An-nou pran diféran ègzanp pou nou konprann sa : on jenn pé mandé-y si Jéova ka pran tan gadé-y é parapòt a sa, i pé pè pran lèbatèm. On frè désidé dépi lèwvwè i té jenn kè i ké mèt Jéova prèmyé douvan adan vi a-y olyé i fè ansòt pou i gangné onpakèt lajan. Men konnyéla, lè i ka vwè kijan biten-la rèd é kè i ni on fanmi pou i okipé, i pé mandé-y si sé té on bon biten sa i chwazi fè la. On sè ki ja ni on bèl laj é ki pa ni tèlman fòs pé dékourajé pas i pé pa fè tousa i té ka fè avan. Sa ja rivé kè ou mandé-w : « Ès an ni valè pou Jéova ? Ès sé sakrifis-la an té fè la ka sèvi-mwen on biten alèla ? Ès an pé fè on biten pou Bondyé toujou ?

² Si nou pa’a chèché a ni répons a kèsyon nou ka pozé-nou, fwa an nou pé rivé a pran plon adan sa é nou pé jous arété sèvi Jéova. Adan awtik-lasa, nou ké vwè kijan Labib pé édé-nou si nou ka pansé kè Jéova pa ka mélé-y adan nou, kè sèwten adan sé désizyon-la nou ni lokazyon pran la pa té bon, oben kè nou pa itil an men a Jéova ankò.

KIJAN NOU PÉ FÈ SÉ DOUT-LA DISPARÈT

3. Ka pou nou fè lèwvwè sèwten kèsyon ka vin an lèspri an nou é kè sa ka dékourajé-nou ?

³ Lè nou ka pozé-nou sèwten kèsyon, sa enpòwtan kè nou ay chèché sé répons-la adan Bib-la. Si nou ka fè sa, sa ké konsolidé fwa an nou, nou ké vin pi bon zanmi èvè Jéova é nou ké pé « tchenbé rèd adan lafwa » pi fasilman (1 Kor. 16:13).

4. Kijan pou nou « vérifyé tout biten » ? (1 Tésalonisyen 5:21).

⁴ (Li 1 Tésalonisyen 5:21.) Labib ka di kè fò nou « vérifyé tout biten ». Kijan pou nou fè sa ? Nou pé « vérifyé tout biten » lè nou ka konparé sa nou ka pansé èvè sa Labib ka di. An-nou wouvin asi ègzanp a jenn-la ki ka mandé-y si Bondyé ka pran tan gadé-y. Si i ka pansé kè i pa ni valè pou Bondyé, ès fò i mèt an tèt a-y kè sa i ka pansé la sé lavérité ? Awa. Fò i ‘vérifyé tout biten’, kivédi fò i étidyé Labib pou i sav ka Jéova ka pansé dè-y vréman.

5. Lè nou ka pozé-nou sèwten kèsyon, kijan nou pé touvé sé répons-la Jéova ka ban-nou la ?

⁵ Lèwvwè nou ka li Bib-la, sé konsi nou ka tann Jéova ka palé ban nou. Lè nou ni sèwten kèsyon adan lèspri an nou, a pa li pou nou li Labib tousèl pou nou touvé sé répons-la. Fò-nou ay fouyé an Bib-la pou touvé vèwsé ki ka réponn a kèsyon an nou. Pousa nou pé sèvi èvè zouti lòwganizasyon ka mèt a dispozisyon an nou pou nou fè rèchèch (Pwov. 2:3-6). Fò-nou mandé Jéova osi gidonné-nou lè nou ka fè rèchèch pou i édé-nou vwè sa li i ka pansé asi sa. An-nou chèché prensip a Labib é dé ti konsèy ki pé édé-nou adan sitiyasyon an nou. Sé on bon biten osi lèwvwè nou ka li istwa a moun ki adan Labib ki té ka pansé é ki té ka rèsanti menm biten ki nou.

6. Kijan sé réinyon-la pé édé-nou woté dout ki an tèt an nou ?

⁶ Nou ka tann Jéova ka palé ban nou osi lèwvwè nou réinyon. Si nou ni labitid ay réinyon, nou ké pé tann on biten adan on diskou oben adan on komantè é sé pé ègzaktèman sa nou bizwen pou woté dout nou ni an tèt an nou (Pwov. 27:17). Alè, an-nou vwè ka ki pé édé-nou woté déotwa adan sé dout-lasa.

SI OU PA SÈTEN OU NI VALÈ POU JÉOVA

7. Ka sèwten moun pé rivé a mandé-yo ?

⁷ Ès ou ja mandé-w si ou ni valè pou Bondyé vréman ? Si pou vou ou sé on ti kakazwa, alò pétèt kè ou pa’a vwè ankijan ou pé vin zanmi èvè Kréyatè a linivè la. Ében ou sav, sé sa wa David té ka pansé osi. Lè i té ka sonjé kè Jéova té ka pran tan gadé moun ki asi latè, i té ka touvé sa fò. Dayè, mi sa i di : « O Jéova, ka on nonm yé konsa pou ou pé sa vwè-y ? Ka on nonm yé konsa pou ou pran tan gadé-y ? » (Sòm 144:3). Ola ou pé touvé répons a sé kèsyon-lasa ?

8. Sèlon sa 1 Samiyèl 16:6, 7, 10-12 ka di, ka Jéova ka vwè lè i ka gadé-nou ?

⁸ Labib ka montré on mannyè ki klè kè Jéova ka pran tan gadé sé moun-la ki ka pansé kè yo pa ni valè. On jou Jéova voyé Samiyèl aka Jésé pou i pé sa vidé luil asi tèt a yonn adan sé gason a-y la. Sé té pou montré kè Jéova té chwazi-y pou i té wa an Izrayèl. Jésé kriyé 7 adan sé 8 gason-la i té ni la, men i pa jen kriyé David, pli jenn-lab. Poutan, sé li Jéova té chwazi (li 1 Samiyèl 16:6, 7, 10-12). Jéova té sav byen kimoun David té yé. I té sav kè sé té on jennboug ki té enmé-y onlo toubònman.

9. Poukwa ou pé sèten kè Jéova ka sousyé-y dè-w ? (gadé imaj-la osi).

⁹ Jéova ja montré-w kè ou ni valè pou-y. Kijan i fè sa ? Réfléchi asi sa : I ka ba-w onlo konsèy ki ka korèsponn èvè sa ou ka viv é èvè sa ou bizwen (Sòm 32:8). Sa ka montré kè i konnèt-vou byen. Pa vré ? (Sòm 139:1). É si ou ka mèt sé konsèy-lasa an pratik, ou ké pé vwè jan sa ké menné bon biten ba-w é kè i ka sousyé-y dè-w (1 Kron. 28:9 ; Akt 17:26, 27). Mwenn ti éfò ou ka fè, Jéova ka vwè sa. I ka vwè kimoun ou yé vréman é i ka vwè bèl kalité a-w. I vlé vin Zanmi a-w (Jér. 17:10). É i té’é tèlman kontan si vou osi ou té ka dakò pou vin zanmi a-y (1 Jan 4:19).

SI OU PA SÈTEN KÈ OU PRAN SÉ BON DÉSIZYON-LA

10. Lè nou ka sonjé désizyon kè nou pran, pétèt ki kèsyon ki pé vin an lèspri an nou ?

¹⁰ Délè, lè sèwten moun ka sonjé désizyon kè yo pran, yo ka mandé-yo si sé désizyon-lasa té bon. Pétèt kè yo désidé lagé on travay ki té’é pèwmèt-yo touché onlo lajan oben yo désidé kè yo pé ké wouvè on antrèpriz ki té’é pèwmèt-yo viv alèz a yo. Yo fè sa pou yo fè plis pou Jéova. Alè, ja ni bon détwa lanné ki ja pasé é yo ka vwè sèwten moun kè yo konnèt ki mèt travay a yo prèmyé douvan adan vi a yo é i ka sanmsa yo ni onpakèt lajan é yo alèz a yo. Konnyéla, sé frè é sè la ki fè sakrifis té’é pé di an tchè a yo : « An fè sakrifis pou Jéova, men ès sa té vo lapenn ? Ès fò pa an té travay plis pou an té gangné plis lajan ? »

11. Poukwa boug-la ki maké Sòm 73 la té dékourajé konsa ?

¹¹ Si sé kèsyon-lasa ja vin an lèspri a-w é kè sa ka chouboulé-w, sonjé sa moun-la ki maké Sòm 73 la té ka rèsanti. I té ka gadé sèwten moun é i té ni lenprésyon kè yo té ka bwè dlo a yo trankilman é kè zafè a yo té ka maché (Sòm 73:3-5, 12). Afòs i gadé-yo, i té ni lenprésyon kè tout sé éfò-la i té ja fè la pou sèvi Jéova pa té ka sèvi ayen. Sa té ka dékourajé-y é ‘i té enkyèt tout lajouné’ (Sòm 73:13, 14). Ka i fè pou i pa ni sé lidé-lasa an tèt a-y ankò ?

12. Sèlon sa Sòm 73:16-18 ka di, ka ki édé boug-la ki maké sòm-lasa woté dout i té ni an tèt a-y ?

¹² (Li Sòm 73:16-18.) Moun-la ki maké sòm-lasa ay adan tanp a Jéova. Koté-lasa, i touvé-y pawmi dòt sèwvitè a Jéova é sa édé-y woupran sans a-y. I rivé konprann kè menmsi i té ka sanmsa sèwten moun té ka bwè dlo a yo trankilman, dèmen a yo pa té sèten. Kifè, i pa té dékourajé ankò é i té sèten kè lèwvwè ou ka mèt Jéova prèmyé douvan adan vi a-w, sé méyè désizyon ou pé pran. Sa trankilizé-y é i té byen désidé a kontinyé sèvi Jéova (Sòm 73:23-28).

13. Si nou pran sèwten désizyon é kè alè nou ka règrété sa, ka nou pé fè ? (gadé imaj-la osi).

¹³ Vou osi ou pé goumé èvè lidé ki négatif é ou pé rivé about a yo kon nonm-la ki maké Sòm 73 la. Ka ou pé fè ? Pran tan sonjé tout sé bon biten-la ou ni la é sé bénédisyon-la Jéova ka ba-w la. Pran tan gadé osi kijan moun ki pa ka sèvi Jéova yé davwa yo pa ni Jéova pou édé-yo. Lamajorité a moun ki pa ka sèvi Jéova ka mèt travay a yo prèmyé douvan adan vi a yo pas yo pa ni pon èspwa pou dèmen. Men vou, non sèlman ou ni bénédisyon a Jéova dépi alè men anplisdisa i ka pwomèt-vou onlo bèl biten ankò pou dèmen (Sòm 145:16). Pran on tan pou réfléchi asi sa : Ès nou konnèt kijan biten-la té’é yé ban nou vréman si nou pa té fè sé chwa-la nou fè la ? Pa oblijé ! Pawkont ni on biten nou pé sèten : désizyon nou ka pran pas nou enmé Jéova é pas nou enmé lézòt, pé ké jen anpéché-nou ni bon biten.

SI OU PA SÈTEN KÈ OU ITIL AN MEN A JÉOVA

14. Ki sitiyasyon sèwten frè é sè ka jwenn, é ki kèsyon yo pé ka pozé-yo ?

¹⁴ Sèwten frè é sè ja ni on bèl laj, santé a yo pa two flanbo oben yo andikapé é yo pa ka rivé fè tousa yo té’é anvi fè. Kifè, yo pé ni lenprésyon kè yo pa ni valè pou Jéova. Yo pé ka mandé-yo : « Ès an itil an men a Jéova toujou ? »

15. Dè ki biten nonm-la ki maké Sòm 71 la té sèten ?

¹⁵ Sé sa osi moun-la ki maké Sòm 71 la té ka rèsanti pas i pa té ni onlo fòs ankò. Mi sa i di Jéova : « Pa lagé-mwen lè an ka pèd fòs » (Sòm 71:9, 18). Menmsi i té ka santi-y fèb, nonm-lasa té sèten kè si i té ka kontinyé rété fidèl a Jéova, Jéova té’é soutyenn-li. I rivé konprann kè moun ki ka fè Jéova plézi, sé moun ki ka fè tousa yo pé pou sèvi-y menmsi yo pa ka rivé fè tousa yo té’é vé fè (Sòm 37:23-25).

16. Kijan sé frè é sè la ki ja ni on bèl laj itil an men a Jéova ? (Sòm 92:12-15).

¹⁶ Frè é sè an nou ki ja ni on bèl laj, éséyé vwè-zòt kon Jéova ka vwè-zòt. I pé édé-zòt kontinyé sèvi-y magré zò pé pa fè kon avan (li Sòm 92:12-15). Olyé zò konsantré-zòt asi sa zò pé pa fè ankò, konsantré-zòt asi sa zò pé fè. Pa ègzanp, zò pé ba lézòt bon fòs grasa a bèl ègzanp-la zò ka ba-yo la davwa zò fidèl. Zò pé ba lézòt bon fòs osi lèwvwè zò ka entérésé-zòt a yo. Zò pé rakonté-yo kijan zò vwè men a Jéova adan vi a zòt é zò pé di-yo kijan zò sèten kè sé pwomès-la Jéova fè la ké réyalizé. Anplisdisa, fò pa zò jen konpranndèdi kè lè zò ka priyé pou frè é sè a zòt èvè onlo lanmou, sa pa ka sèvi ayen. Zò ka fè lézòt dibyen toubònman (1 Pyè 3:12). Kèlkèswa sitiyasyon an nou, noutout ni on biten nou pé ba Jéova é frè é sè an nou.

17. Poukwa fò pa nou konparé-nou èvè lézòt ?

¹⁷ Pétèt kè lè ou ka vwè kè ou pé pa fè sa ou té’é anvi fè pou Jéova, sa ka désèvwa-w. Men ou pé sèten kè li Jéova, sa pa ka désèvwa-y é kè kèlkèswa sa ou ka fè pou fè-y plézi, sa ni onlo valè pou-y. Men pétèt kè ou ka gadé sa lézòt ka rivé fè. Men fò ou goumé pou-w pa konparé-w èvè moun. Poukwa fò pa ou fè sa ? Pas Jéova pa jen ka konparé on moun èvè ondòt moun (Gal. 6:4). Pa ègzanp, Mari fè Jézi kado on luil ki té ka kouté chè (Jan 12:3-5). Ti vèv-la aprézan ki té maléré ay adan Tanp-la é i bay 2 ti pyès ki pa té ni pon valè menm (Lik 21:1-4). Men Jézi pa jen konparé sé 2 madanm-lasa. Pou-y, yo toulédé montré yo té ni fwa adan Jéova. Sé konsa Papa a Jézi ka rézonné osi. Pou-y, dépi ou ka fè on biten ba-y pas ou enmé-y é kè ou ni fwa adan-y, i ka vwè sa é sa ni onlo valè pou-y menmsi pou vou a pa granzafè ou fè.

18. Ka ki ké édé-nou woté dout ki an tèt an nou ? (gadé ti karé-la « Pawòl a Jéova pé édé-w pou-w rivé about a sé dout-la ou ni la »).

¹⁸ Noutout pé rivé a ni dout an tèt an nou. Men Labib sé Pawòl a Bondyé é nou pé fè-y konfyans. I pé édé-nou woté dout ki an tèt an nou. Alò, an-nou fè tousa nou pé pou nou chèché an Bib-la répons a kèsyon nou ka pozé-nou. Konsa tout sé kèsyon-la ki an tèt an nou la pé’é tèwbolizé lèspri an nou ankò. Okontrè, nou ké sèten kè Jéova ka sousyé-y dè nou, kè i ka ba tout sé sakrifis-la nou ka fè la onlo valè é kè i ké rékonpansé-nou. Jéova enmé tout sèwvitè a-y ki fidèl é i ka pran swen a yo èvè onlo tandrès.