Kon Jézi, an-nou préché èvè balan

1. Ki diférans ki ni ant sèwvitè a Jéova é sélézòt moun-la ?

SÈWVITÈ a Jéova ka pòté bon mannèv pou yo préché bon nouvèl-la. É sé yo tousèl ki ka rivé fè sa (Tit 2:14). Men délè ou pé ni dimal a ni balan lèwvwè fò ou ay préché. Mi sa on ansyen ki ka travay rèd adan lasanblé-la ka di : « Dépawfwa, an pa anvi ay préché menm ! » Délè, ès vou osi sé sa ou ka rèsanti ?

2. Délè, pou ki biten nou pa ni balan ankò pou nou préché ?

² Délè nou pi enmé fè dòt biten pou Jéova ki préché bon nouvèl-la. Poukisa ? Pas lè nou ka konstwi sal di Wayòm, kè nou ka pran swen a yo, kè nou ka ba frè é sè an nou on pal lèwvwè ni katastwòf, oben kè nou ka ankourajé-yo, nou ka vwè ka sa ka menné é nou ka kontan vwè sa. Lè nou ka travay èvè frè é sè an nou, yonn anpé èvè lòt é yonn enmé lòt. Nou sav osi kè yo ka aprésyé sa nou ka fè ba yo. Alòskè pou prédikasyon-la, nou pé ka touvé-nou ka préché menm koté-la dépi onpakèt lanné, é pétèt kè sé enki on ti krazi moun ki ka kouté. Sèwten moun jous ka voyé-nou alé lè nou ka préché ba yo. Anplisdisa, nou sav kè pi lafen ké toupré rivé pi moun pé’é vé tann mésaj a Wayòm-la menm (Mat. 10:22). Adan on ka konsa, ka ki pé édé-nou pou nou kontinyé préché èvè balan oben pou nou ni plis balan ankò ?

3. Ka Lik 13:6-9 ka aprann-nou asi Jézi ?

³ Ègzanp a Jézi pé montré-nou kijan pou nou ni balan adan travay a prédikasyon la. Pannan i té asi latè, i toujou préché èvè onlo balan. Anfèt, pi tan-la té ka pasé é pi i té ka travay rèd (li Lik 13:6-9). Jézi pran on ègzanp pou montré kè travay a-y ka sanm ta on agrikiltè. Boug-lasa travay rèd pannan 3 lanné pou pran swen a on pyé-figa, men pyé-fig-la pa jen fè pon fwi. Menmjan agrikiltè-lasa pa jen arété èspéré kè pyébwa-la ké fè fwi on jou, sé menmjan-la osi Jézi pa pèd èspwa é i pa jen moli adan prédikasyon-la. Okontrè, i travay pi rèd ankò pou préché ba sé Juif-la é pou édé-yo aksèpté bon nouvèl-la.

4. Ka ègzanp a Jézi ké aprann-nou ?

⁴ Adan awtik-lasa nou ké vwè jan Jézi pòté mannèv adan prédikasyon-la siwtou pannan sé 6 dènyé mwa-la i pasé asi latè. Nou osi nou ké ni bon balan siwvwè nou ka gadé byen kijan i té ka palé é kijan i té ka aji é kè nou ka imité-y. Nou ké vwè 4 biten ègzanp a Jézi ka montré-nou : 1) i toujou konsantré-y asi sa Jéova té vlé, 2) désizyon a-y té annakò èvè sé pwofési-la, 3) i té ka fèfon asi Jéova, é 4) i toujou té pozitif é i té sèten kè té’é ni moun ki té’é kouté-y.

I KONSANTRÉ-Y ASI SA JÉOVA VLÉ

5. Kijan Jézi montré kè sa ki té pli enpòwtan ba-y sé té fè sa Jéova té vlé ?

⁵ Jézi préché ‘bon nouvèl a Wayòm la’ èvè onlo balan pas i té sav kè sé travay-lasa Jéova té vlé i fè (Lik 4:43). Pou Jézi, prédikasyon-la sé té sa ki té pli enpòwtan adan vi a-y. Menm lèwvwè travay a prédikasyon a-y té kay bout, i « té ka pasé adan chak vil é adan chak vilaj » pou anségné sé moun-la (Lik 13:22). Ondòt biten i fè, sé kè i fòwmé plis disip ankò pou yo préché bon nouvèl-la osi (Lik 10:1).

6. Kijan prédikasyon-la lyanné èvè dòt biten nou ka fè pou Jéova ? (gadé imaj-la osi).

⁶ Jòdijou osi, Jéova é Jézi vlé nou mèt prédikasyon-la prèmyé douvan adan vi an nou kon o 1^é syèk (Mat. 24:14 ; 28:19, 20). Kèlkèswa sa nou ka fè pou Jéova, sa lyanné èvè prédikasyon-la. Pa ègzanp, nou ka konswti sal di Wayòm, pou moun nou ka préché ba yo pé sa ni on koté pou yo vin adoré Jéova. Travay-la ki ka fèt adan sé Bétèl-la ka pèwmèt prédikasyon-la fè douvan. Lè ni on katastwòf, nou ka fè tousa nou pé pou frè é sè an nou pé sa ni sa yo bizwen. Sa ka édé-yo wouvin réinyon é woukoumansé préché. Lè nou ka rèkonnèt kè prédikasyon-la sé travay-la ki pli enpòwtan la kè Jéova ban-nou fè la, sa ka ban-nou balan pou nou préché chak simenn. Mi sa János, on ansyen ki ka rété an Ongri ka di : « An toujou ka di-mwen kè pa ni pondòt biten an ka fè pou Jéova ki pé ranplasé travay a prédikasyon-la. Sé travay-la ki pli enpòwtan la Jéova ban-nou fè la. »

7. Poukwa Jéova vlé kè nou kontinyé préché ? (1 Timoté 2:3, 4)

⁷ Lè nou ka vwè sé moun-la kon Jéova ka vwè-yo, sa ka ban-nou plis balan pou nou préché (li 1 Timoté 2:3, 4). I vlé kè on maksimòm dè moun tann bon nouvèl-la é kè yo aksèpté lavérité. Davwa bon nouvèl-lasa pé sové vi a moun, Jéova ka fè-nou vin pli filé pou nou palé dè mésaj-lasa. Pa ègzanp, adan bwochi-la Aji èvè lanmou : Alé é fè disip, ou ka touvé onlo ti konsèy ki pé édé-w koumansé on ti kozé èvè on moun é koumansé on étid a Labib èvè-y. Menmsi sé moun-la pa ka koumansé sèvi Jéova konnyéla, pétèt yo ké fè-y avan gwo tribilasyon-la bout. Pétèt dèmen yo ké sonjé sa nou té di-yo, é yo ké désidé sèvi Jéova. Men sé on biten ki pé fèt enki si nou ka kontinyé préché.

I LÉSÉ SÉ PWOFÉSI-LA AJI ASI VI A-Y

8. Lèfètkè Jézi té konnèt sé pwofési-la byen, kijan sa édé-y byen sèvi èvè tan a-y ?

⁸ Jézi té ja konprann kijan sé pwofési-la té’é réyalizé. I té sav i té’é préché enki pannan 3 an-é-dèmi é i té sav kitan i té’é mò é kijan sa té’é pasé (Dan. 9:26, 27 ; Lik 18:31-34). Konm i té ja konnèt ka sé pwofési-la té anonsé, i fè tousa i té pé pou byen sèvi èvè tan a-y. Sé pousa i pòté bon mannèv adan prédikasyon-la pou i té pé sa fin tout travay-la i té ni a fè la.

9. Poukwa nou ka di kè sé pwofési-la ki an Bib-la ka édé-nou préché èvè onlo balan ?

⁹ Si nou ka pran tan réfléchi asi sé pwofési-la, nou ké pé kontinyé préché èvè onlo balan. Nou sav kè mond-lasa kay bout talè. Labib té ja anonsé kijan sé moun-la té’é yé é sa ki té’é fèt pannan sé dènyé jou-la. Sé pwofési-lasa ka réyalizé an 2 zyé an nou. Ni on pwofési ki an Bib-la ki ka di osi kè wa di Nò la té’é anripaj èvè wa di Sid la « an tan a lafen », é sé sa nou ka vwè jòdila. Nou ka vwè Langlètè é Lamérik ki toujou anripaj èvè Larisi é sé péyi-la ki ka soutyenn-li la (Dan. 11:40). É nou konprann osi kè pyé a èstati-la ki adan Danyèl 2:43-45 ka rèprézanté puisans-la Langlètè é Lamérik ka fòwmé la. Alò konm nou ka vwè tout sé pwofési-lasa réyalizé douvan nou, nou sèten kè talè wayòm a Bondyé ké détwi tout sé gouvènman-la ki asi latè. Tout sé pwofési-lasa ka montré kè lafen toupré é kè non sèlman fò nou préché, men sé alè pou nou bay adan.

10. Kijan sé pwofési-la pé ban-nou fòs pou nou kontinyé préché ?

¹⁰ Adan sé pwofési-la, nou ka touvé dé biten kè nou présé pawtajé èvè moun. Mi sa Carrie, on sè ki ka rété an Répiblik-Dominikèn ka di : « Lè an ka sonjé tout sé bèl biten-la Jéova pwomèt kè i ké fè talè, an ka di-mwen kè fò mwen montré sé moun-la sa. » Sé pwofési-la ka montré kè Jéova ka édé-nou fè travay a prédikasyon-la é sa ka ban-nou kouraj pou nou kontinyé préché. Mi sa Leila on sè ki ka rété an Ongri ka di : « Izayi 11:6-9 ka montré kè Jéova pé édé nenpòt kimoun chanjé. Lèfètkè an sav sa, sa ka édé-mwen palé toutmoun dè bon nouvèl-la, menmsi i ka sanmsa bon nouvèl-la pa ka entérésé-yo. » É mi sa Christopher, on frè ki ka rété an Zanbi ka di : « Kon Mawk 13:10 té anonsé, nou ka préché bon nouvèl-la toupatou asi latè. É lèfètkè an pé pawtisipé adan sa, sé on bèl lonnè pou mwen. » É vou, ki pwofési ka ba-w gou pou kontinyé préché ?

I TÉ KA FÈFON ASI JÉOVA

11. Poukwa Jézi té bizwen fèfon asi Jéova pou i té kontinyé préché èvè balan ? (Lik 12:49, 53).

¹¹ Jézi té ka fèfon asi Jéova pou i té pé sa kontinyé préché èvè balan. Lè Jézi té ka préché, i té ka palé ba sé moun-la èvè onlo rèspé, men i té sav kè magrésa, prédikasyon a Wayòm la té’é fè sèwten moun fè kòlè é kè moun té’é lévé kont li (li Lik 12:49, 53). Dayè sé chèf a rèlijyon la éséyé tchouyé-y plizyè fwa (Jan 8:59 ; 10:31, 39). Men i té ka kontinyé préché pas i té sav Jéova té èvè-y. Mi sa i di : « An pa tousèl, men Papa-la ki voyé-mwen la èvè mwen. […] I pa lésé-mwen tousèl an mwen, pas an toujou ka fè sa ki ka fè-y plézi » (Jan 8:16, 29).

12. Kijan Jézi préparé disip a-y pou yo kontinyé préché magré sé pèwsékisyon-la yo té’é jwenn la ?

¹² Jézi fè disip a-y sonjé kè yo té pé fèfon asi Jéova pou édé-yo. Toutlè i té ka di-yo kè Jéova té’é édé-yo lè yo té’é touvé-yo anba pèwsékisyon (Mat. 10:18-20 ; Lik 12:11, 12). Konm Jézi té ja sav kè onlo moun té’é kont bon nouvèl-la, i di disip a-y kè fò yo té’é pran prékosyon (Mat. 10:16 ; Lik 10:3). I di-yo kè lè on moun pa té vé kouté mésaj a Wayòm-la, fò pa yo té fòsé-y kouté (Lik 10:10, 11). I di sé disip-la osi kè siwvwè yo té ka pèwsékité-yo, fò yo té pran pyé a kouri a yo (Mat. 10:23). Menmsi Jézi té ka pòté mannèv adan prédikasyon-la é kè i té ka fèfon asi Jéova, i pa té ka mèt vi a-y andanjé initilman (Jan 11:53, 54).

13. Poukwa nou pé sèten kè Jéova ké édé-nou ?

¹³ Jòdijou, nou osi nou bizwen Jéova édé-nou pou nou kontinyé préché èvè bon balan menmsi moun ka lévé kont nou (Rév. 12:17). Poukwa ou pé sèten kè Jéova ké soutyenn-vou ? Sonjé priyè a Jézi nou ka touvé an Jan chapit 17. Jézi mandé Jéova jété on zyé asi apòt a-y. É sé sa Jéova fè. Sé sa liv a Akt ka montré-nou. Nou ka vwè kijan Jéova édé sé apòt-la kontinyé préché èvè balan magré té ni pèwsékisyon. Jézi mandé ondòt biten ankò adan priyè a-y. I mandé Pap’a-y jété on zyé asi moun ki té’é ni fwa adan sa sé disip-la té ka préché la. Vou osi ou ka fè pawti a sé moun-lasa. Kifè Jéova ké édé-w menmjan i édé sé apòt-la (Jan 17:11, 15, 20).

14. Poukwa nou pé sèten kè menmsi nou ka jwenn difikilté, nou pé ni balan pou préché ? (gadé imaj-la osi).

¹⁴ Pli lafen ka vin pli nou pé rivé a ni dimal a préché bon nouvèl-la. Men Jézi ka di-nou kè nou ké ni èd-la nou bizwen la pou nou kontinyé ni balan adan prédikasyon-la (Lik 21:12-15). Menmjan ki Jézi é disip a-y, nou ka lésé sé moun-la chwazi si yo ka kouté-nou oben si yo pa’a kouté-nou é nou pa’a rantré adan pon déba initil èvè yo. Lèwvwè sé frè é sè la ka rété dé koté gouvènman-la pa’a pèwmèt-nou préché, yo ka touvé on mwayen pou yo préché kanmenm, pas yo ka apiyé-yo asi Jéova olyé yo apiyé-yo asi pwòp fòs a yo. O 1^é syèk, Jéova ba sèwvitè a-y fòs. Jéova ka fè menm biten pou nou jòdijou pou nou ‘fè tout travay a prédikasyon-la i ban-nou fè la’ (2 Tim. 4:17). Vou osi ou pé sèten kè si ou ka fè Jéova konfyans, ou ké ni bon balan pou préché.

I RÉTÉ POZITIF

15. Ka ki ka montré kè Jézi té sèten kè prédikasyon-la té’é maché ?

¹⁵ Jézi té sèten kè té’é ni moun ki té’é kouté bon nouvèl-la. Sa édé-y ni onlo jwa é sa édé-y kontinyé travay rèd adan prédikasyon-la. Pa ègzanp, apépré 1 an apré Jézi té koumansé préché, i vwè kè onlo moun té paré pou kouté bon nouvèl-la é i konparé sé moun-lasa èvè on jaden ki ja bon pou rékòlt-la (Jan 4:35). On lanné pasé, é aprésa mi sa i di disip a-y : « Ni onlo biten a rékòlté » (Mat. 9:37, 38). Tibwen, plita i di-yo ankò : « Ni onlo biten a rékòlté […]. Priyé Mèt a rékòlt-la pou i voyé travayè rékòlté sa i ni a rékòlté » (Lik 10:2). Jézi té sèten kè ni moun ki té’é kouté bon nouvèl-la, é lèwvwè i té ka vwè-yo ka fè sa, i té ka kontan toubònman (Lik 10:21).

16. Kijan sé ègzanp-la Jézi pran la ka édé-nou vwè prédikasyon-la on mannyè ki pozitif ? (Lik 13:18-21 ; gadé imaj-la osi).

¹⁶ Pou édé disip a-y kontinyé pòté mannèv adan prédikasyon-la, Jézi té ka fè-yo sonjé jan prédikasyon-la té ka maché. An-nou vwè 2 ègzanp i pran (li Lik 13:18-21). Jézi konparé mésaj a Wayòm la èvè on toupiti ti grenn moutad ki ka bay on kalté gran pyébwa. Jézi sèvi èvè ègzanp-lasa pou montré jan prédikasyon-la té’é fè douvan é kè ayen pa té’é arété-y. Adan 2^èm ègzanp-la, i konparé mésaj a Wayòm la èvè tibwen lèven. I pran ègzanp-lasa pou montré kè yo té’é préché bon nouvèl-la toupatou asi latè é kè onlo moun té’é fè chanjman an vi a yo menmsi moun ki alantou a yo pa té’é vwè sa tousuit. Jézi té vé montré disip a-y kè mésaj-la yo té ka préché la té’é édé onlo moun.

17. Pou ki rézon nou pé rété pozitif adan prédikasyon-la ?

¹⁷ Lèwvwè nou ka gadé sa ki ka fèt toupatou asi latè jòdijou, sa ka ban-nou anvi kontinyé préché èvè onlo balan. Chak lanné, milyon é milyon moun lavérité ka entérésé ka vin Mémoryal é ka étidyé Labib èvè nou. Plizyè milyé moun ka pran lèbatèm é yo ka vin jwenn-nou adan travay a prédikasyon-la. Nou pa sav konmen moun ki ké aksèpté tann bon nouvèl-la men sa nou sav sé kè Jéova ka sanblé on gran-foulmoun é yo ké pasé gwo tribilasyon-la vivan (Rév. 7:9, 14). Jéova sé Mèt a rékòlt-la é i sèten kè onlo moun ké aksèpté bon nouvèl-la, kifè sa ka ban-nou on bon rézon pou nou kontinyé préché.

18. Ki biten nou anvi lézòt vwè ?

¹⁸ Vré disip a Jézi toujou pòté bon mannèv adan travay a prédikasyon-la. Lè moun té ka vwè an 2 zyé a yo jan sé apòt-la « pa té ka mèt dlo an bouch a yo » pou yo préché, sé moun-la ‘té ka réyalizé kè sé apòt-la té ka maché èvè Jézi’ (Akt 4:13). Menmjan-la, nou osi nou vlé préché èvè onlo balan, konsa sé moun-la ké vwè kè nou ka imité Jézikri.